ݣولميمة

ݣولميمة
‫ݣلميمة‬ (ar) ⵉⴳⵯⵍⵎⵉⵎⵏ (tzm)
لبلاصة
لبلاد	لمغريب
لإقليم	إقليم الراشيدية
السكان
شحال دالسكان	14,624 (2024)
شحال دلفاميلات	3,425 (2014)
لجغرافيا
لعلو	1,018 م
معلومات خرين
الرمز لجغرافي	6546836

ݣولميمة مدينة مغريبية و جماعة ترابية حضرية كاينة ف إقليم رّاشيدية، جهة درعا تافيلالت، ساكنين فيها 16335 واحد، على حسب لإحصاء لعام 2014.

تعليم

• نسبة لأمية (نّاس لّي ما كايعرفوش يقراو ولا يكتبو) : 22,7%
• نسبة سّكان لّي قاريين فوق الليسي (ليسي و جامعة): 25,6%

قتيصاد

• نسبة نّاس نّشيطين (لّي يقدرو يخدمو): 36%
• نسبة لبطالة (نّاس لّي ما خدامينش و تايقلبو على خدمة): 27,3%
• نسبة نّاس اللي خدامين ف دّولة : 34,9%
• نسبة نّاس اللي خدامين ف لپريڤي:26,7%

مدينة كلميمة

مدينة كلميمة تابعة إداريا لقيادة كلميمة وكاتنقسم لجوج جماعات قروية: جماعة غريس لعلوي وجماعة غريس سفلي، وجماعة حضرية فوسط لمدينة. وكتعتبر حوض كبير كايحدها جبال الأطلس الكبير الشرقي من شمال ولغرب، والأطلس الصغير من لجنوب، وكايحدها من شمال شرقي سهل غريس، اللي كاين على ارتفاع 1000 متر فوق سطح البحر.

وهي دايرين بيها لقصور لي مبنين بتراب لمدكوك، ومشيدة وسط غابات من نخيل وزيتون أو حتى بعض لأشجار لمثمرة ففدادين محاطة بالأسوار، وكانو شحال هاذي كايسميوهم اورتان جمع اورتي، وهي فملكية ساكنة أو لجماعات سلالية.

فيها نظام ري دقيق بصبيب مائي كبير كاينحدر من وادي غريس لي خارج من سلسلة جبال لأطلس لكبير، وهو واد دائم الجريان طول لعام، وفيه خطارات جوفية فمنبع كايتسمى تيفوناسين، وهاد الشي كايخلي واحة كولميمة ما كتتأثرش بزاف بفترات الجفاف وندرة تساقطات لمطرية.

وكتعرف قصور كلميمة أو غريس قديما بأسامي لأهالي وسلالات ديالها، ومنهم اللي مازال فيه سكان، خصوصا لقصور لكبار، واللي خضعات لإعادة ترميم بحال قصر إكلميمن، ومنهم اللي تهجر نهائيا، إما هجرة للمدن أو للمركز الحضري ديال لمدينة نفسها، أو هجرة لأبنية عصرية كاتتبنى فلمناطق لجاورة للقصور.

تضم كلميمة منطقة مركزية وحدة هي بلدية كلميمة، وعدد مهم كايوصل لحوالي 38 قصر. ومن أهم القصور: قصر كلميمة، قصر أيت كطو، قصر إغرغر، تغزة، واقة، اكوز، سيدي محمد اولحسن، حرت، آيت يحيى اوعتمان، مكمان، تيلوين، خليل، توغزة

قصر أيت كطو

قصر أيت كطو هو واحد من لقصور أو لقصبات بمدينة كولميمة، إقليم الراشدية. وتبنى على جوج ديال لمراحل، حيث توسع فلمرحلة ثانية وزادولو باب رئيسي آخر كيدعم لباب لأول فنفس لمدخل لوحيد ديال لقصر، وكان تحت حراسة بواب خدام ديما.

هاد لباب كايوصل لتانصرت، وهي مكان مخصص لعابري سبيل، وكانو فلغالب تجار مقايضين كايجيبو للقصر الحطب ولملح وللفت وخيزو مقابل تمر ولقمح وشعير والذرة.

فوسط لقصر كاينة ساحة ديال لحفلات (أرحبي نيسلان بشلحة)، وهي ساحة خاصة بلأعراس ولحفلات وسهرات لفرجة.

سكان كايجيبو لماء من جوج ديال لآبار، واحد داخلي ولى دابا ملك للحبوس تابع لمسجد لقصر، وواحد خارجي. وعند مدخل القصر، فليسر، كاينة حضيرة كاتأوي عجل صغير تابع للجماعة، كايتهلاو فيه حتى يكبر، وكايعيش على نصيبو من البرسيم (الفصة) اللي كاتجيبو نساء القصر من الحقول القريبة.

هاد لعجل عندو دور ديال إخصاب أبقار تلجماعة، وكايتذبح إما فمناسبة عيد لمولد نبوي أو فلعيد صغير اوكيتوزع على أسر لقصر.

ومن داخل كايتكون لقصر من لعلاوي (جمع لعلو)، وهي مجموع دروبة، وكل درب عندو اسم عائلي كيجمع لعائلات لقريبة من بعضها. وكل دار فيها طابق سفلي مخصص للبهائم وتخزين نفايات، وطابق لفوقاني للسكن، وكايسالي بالسطح اللي كايتستعمل لتجفيف تمور فوقت جني، وحتى للنوم فليل فأيامات سخونة.

هاد لعمارة كاملة مبنية بالتراب المدكوك ومسقوفة بلخشب بلا مسامير بلا حديد.

حالياً للأسف هاد لقصور كاتتعرض للإهمال من بعد ما خرجو منها لسكان وبناو منازل بالإسمنت ولحديد فلحقول المجاورة، وولات عندهم رمز ديال التقدم، وولاو بزاف من لقصور غير أطلال، تحيدات منها الأبواب الخشبية، وبقاو بعضهم كايستعملوهم حضائر للبهائم.

قصر إغرغر

قصر إغرغر هو قصرٌ (قريةٌ محصنة) فلمغرب، كاين فجهة درعة تافيلالت. تبنى هاد القصر بتقنية التربة المدكوكة، واستعملو فيه الطين. المساحة ديالو كتوصل لـ2.73 هكتار.

مصادر

ويكيميديا كومنز عندا تصاور و معلومات على ݣولميمة.

هادي زريعة ديال مقالة خاصها تّوسع. تقدر تشارك ف لكتبة ديالها.