ڭزاير فارو
Føroyar (fo)
| ||||
| ||||
 | ||||
| التقسيم لإداري | ||||
| لبلاد | مملكة دانمارك | |||
| لعاصيمة | توشهافن | |||
| التأسيس | 1 أبريل 1948 | |||
| لجغرافيا والسكان | ||||
| لميساحة | 1,399 كم² | |||
| بلاصة لعالية | Slættaratindur (880 م) | |||
| محادية معا | إسلاندا | |||
| شحال دالسكان | 54,149 (2023) | |||
| لإدارة | ||||
| فريدريك العاشر | ||||
| رئيس وزراء فارو | أكسل يوهانسن | |||
| معلومات خرى | ||||
| التوقيت | ڭريتينش | |||
| اللوغات | ||||
| خريطة لجيهة | ||||
 | ||||
ڭزاير فارو (ب لفاروية Føroyar) هوّ أرخبيل جا ف شمال لمحيط لأطلسي، و تيريطوار مستاقل تابع للدانمارك. لڭزاير جاو بين إسلاندا، النورڤيج، و ڭزاير هيبريديز و شيطلاند لي تابعين ل سكوطلاندا، و ساكنين فيهم 54885 واحد (شتنبر 2025) ف مساحة ديال 1393 كلم².[1] اللوغة الرسمية ديالك ڭزاير فارو هيّ لفاروية لي كاتفاهم شوية معا لإسلاندية. لأرض ديالها صعيبة و مكوّنة سيرتو من فيوردات و منحدرات ب غطا نباتي و شجر قليل. بسباب لقرب ديالها للدايرة لقطبية، لڭزاير د فارو كايعيشو شفق ماكيحبسش ف الليالي د الصيف، و نهار قصير بزاف ف الشتوة. ولايني بسباب سارح لخليج ، كايعرفو مناخ محيطي تحت قطبي ب درجات متوسطة د السخونية.[2] لعاصمة ديالها طورشاڤن كاتلقّى أقل عدد ديال الساعات د الشمش من بين جميع لمدون ف لعالم، ب 840 ساعة ف لعام.[3]
ملحمة فاريينڭا و كتابات الجغرافي ديكويل كايبلاصيو لإستيطان النوردي اللول ف ڭزاير فارو ف لقرن 9، ف مستوطنة ڭريمور كامبان.[4][5] بحال ف إسلاندا، أغلبية د لمستوطنين كانو من النورڤيج و من النورديين لڭاليين، لي جابو معاهم حتى عبيد من أصل ڭالي. لأبحات اللخرة بيّنات بلي لڤايكينڭ لي حتلو ڭزاير فارو و إسلاندا لي حداها ماعندهمش نفس لأصل.[6]
ف اللول، كانو ڭزاير فارو مستاقلين تحت حكم مجلس لوڭتينڭ، و ف لقرن 11 سيطرات عليهم مملكة النورڤيج بعدما دخلات لمسيحية من عند لقايد لفاروي سيڭموندور بريصتيصون ف عام 999. ف 1397، بعد تأسيس إتحاد كالمار، ولّاو النورڤيج و لمناطق ديالها تابعين للدانمارك تال 1523 فاش تحلّ لإتحاد. بعدما لعقيدة اللوثرية دخلات ف 1538، اللوغة لفاروية تمنعات ف لمؤسسات لعامة و لكتابة ل تلاتة د لقرون. ف 1814، تدارت معاهدة كيل لي عطات ڭزاير فارو، ڭرينلاند و إسلاندا ل مملكة الدانمارك، و تعوّض مجلس لوڭتينڭ ب مؤسسات قضائية تابعة للدانمارك.
بعدما ترجّع اللوڭتينڭ و تدارت كتابة معيارية ديال لفاروية، الصراع اللوغاوي أدى ل تعويض الدانماركية ب لفاروية ف لكنيسة، التعليم لعمومي و لقانون ف لقرن 20. ف لحرب لعالمية الجاوجة تحتلو لڭزاير من عند بريطانيا، لي ماكاناتش كاتدخل ف الشؤون الدخلانية ديالها. بسباب هاد لفترة ديال لحكم الداتي، و حيت إسلاندا علنات لإستقلال ديالها كـ جمهورية ف 1944، ڭزاير فارو دارت إستفتاء ف 1946 لي عطى نتيجة ديال أغلبية صغيرة لي بغات لإستقلال. لماليك الدانماركي كريستيان لعاشر لغى النتيجة د لإستفتاء، و لمفاوضات لي تدارو من بعد خلاو لڭزاير ياخدو ستيقلالية تحت لحكم الدانماركي ف 1948.[7]
و دابا، وخا باقية تابعة ل مملكة الدانمارك، راه عندها حكم داتي لي كايسمح ليها تتحكم ف الدفاع لعسكري ديالها، لبوليس، لقضاء، الصولدي، و حتى شوية ف لعلاقات لبرانية.[8] ڭزاير فارو يقدرو يديرو حتى معاهدات تجارية مستاقلة معا بلدان خرين، بحال إتفاقية التبادل لحر لي دايرين معا إسلاندا. ف عدد ديال الرياضات، بحال ف كورة، ڭزاير فارو عندهم لمنتخب ديالهم. ف لمجلس النوردي و لمجلس ديال ؤروپا، راهم ممتلين كـ طرف من الدانمارك.
الصيد لبحري كايمتّل 90% د الصادرات ديال ڭزاير فارو، و السياحة غادية و كاتطلع ف لأهمية من عوام 2010. لبلاد ماشي عضو ف لإتحاد لؤروپي. مجلس لوڭتينڭ، وخا كان حبس مابين 1816 و 1852، كايعتابر راسو أقدم برلمان باقي خدّام ف لعالم.
- ↑ "Population | Statistics Faroe Islands". hagstova.fo. Retrieved 12 December 2023.
- ↑ "The unpredictable Faroe Islands weather". Guide to Faroe Islands. 19 December 2018.
- ↑ TORSHAVN Climate Normals 1961–1990.
- ↑ "Viking history: 825 – Grímur Kamban arrived at Faroe islands". Viking history. Retrieved 12 December 2023.
- ↑ Dahl, Sverri (1970). "The Norse Settlement Of The Faroe Islands". Medieval Archaeology. 14: 60–62. doi:10.5284/1071511 – via Archaeology Data Service.
- ↑ Mann, Allison E.; Magnussen, Eyðfinn; Tillquist, Christopher R. (2024). "Genetic evidence points to distinct paternal settlers of the Faroe Islands and Iceland". Frontiers in Genetics. 15 1462736. doi:10.3389/fgene.2024.1462736. ISSN 1664-8021. PMC 11625576. PMID 39655223.
- ↑ "The Faroe Islands". Ministry of Foreign Affairs of Denmark. Retrieved 28 December 2020.
Home Rule was established in 1948 [...]
- ↑ "Lov om de færøske myndigheders overtagelse af sager og sagsområder (Also called: Overtagelsesloven)". Retsinformation.dk (ب الدانمركية).
