پول پاصكون
| لمقال مقطوع من شجرة، ما كايدي ليه تا شي مقال أخر، زيد ليان ديالو ف مقالات خرين. |
پول پاصكون
| ||
 | ||
| معلومات عامة | ||
| زيادة | 13 أبريل 1932 فاس | |
| لموت | 21 أبريل 1985 (53 عام) موريطانيا | |
| لجنسية | لمغريب فرانصا | |
| لحرفة | صوسيولوڭ | |
| لّوغات لي كيعرف | لوغات أمازيغية و عربية | |
پول پاصكون (مزيود ف 13 أبريل 1932 ف فاس، توفى ف 21 أبريل 1985 ف موريطانيا) صوصيولوݣ مغريبي من أصل فرانساوي. لخدمة لأكاديمية ديالو ركّزات على لإحتلال لفرانساوي ف لمغريب، و النضام الراسمالي لي جا معاه، و التطور د لمغريب مورا لإستقلال. پاصكون كان أهم باحت مختص ف لإقتصاد و لفلاحة د لمغريب، و التحول ديال لبلاد ف لوقت د لإحتلال و مورا لإستقلال.[1][2] پاصكون يقدر يكون أول باحت درس الجبل لمدوّر حدا سيجيلماسة.[3]
پاصكون كان من فاميلة ديال "الرجلين لكوحل" Pied Noir، لي كانو عساكريا و مستوطنين ؤروپيين ف شمال إفريقيا.[4] تزاد ف فاس، و كان ولد أنجينيور د السيڤيل، لي منو ورت لحب ديال لخروج و التسافير.[5] من بعد، هضر ل صاحبو إرنيست ݣيلنير على التاريخ ف الفاميلة ديالو: جدّو كان من الرجلين لكوحل لي خداو أراضي ف لمغريب من مور لحرب لعالمية اللولة، ولايني ماصدقتاش ليه ف لفلاحة. واحد من جدودو كان ف حرب الريف. بسباب التوترات لي طبعات لعلاقات لمغريبية لفرانساوية ف لخمسينات و التاريخ د لفاميلة ديالو، پاصكون ولّى "حياتو كلها متفاني ف فهم و تطوير لفلّاح لمغريبي". فاش كان ف عمرو 7 سنين دخل پاصكون معا لكشّافا. ف 1942، واليديه تشدّو ف لحبس، بّاه ف بودنيب و مّو ف ميدلت، حيت عارضو لحكومة ديال ڤيشي لي تشكّلات بعدما خسرات فرانسا ضد ألمانيا النازية ف لحرب لعالمية الجاوجة. پول لي كان دري عمرو 10 سنين تحطّ ف مدرسة داخلية حتى جاو لميريكانيين ل شمال إفريقيا.[5]
ف 1964، خدا پاصكون الجنسية لمغريبية.[5]
پاصكون كان تابع للفلسفة لمادية و ف نفس لوقت كان كيركّز على لأهمية ديال لأفكار، و بعتيبارو صوسيولوݣ، حتى ديال الجغرافيا، الطيكنولوجيا و سيرتو ديال التاريخ. پاصكون كان كيشوف بلي منطقة لحوز هيّ واحد لمجال ديال لبحت و موضوع لي الناس (مغاربا ولّا ماشي مغاربا) يقدرو يستافدو منّو من ناحية كيفاش التغيير كيطرا و كيفاش يقدر يتدار.[3]
فاش كانت عندو 17 عام، ربح جايزة على تقرير على واد زيز و واد رغيس، و عاماين موراها خدا لباك صيونص إكس ف ليسي ݣورو ف الرباط. مشي ف شعبة لعولوم الطبيعية و خدا سرتيفة د لقراية لعالية التحضيرية Certificat d'études supérieures préparatoires ف 1952.[1] ف داك لعام نيت مشي زار الجبل لمدوّر، و ف 1956 كتب عليه مقال ف مجلة هيسپيريس و مونوݣراف ف نفس لعام.[6]
ف داك لعام نيت، خدا ليصونس ف لعولوم الطبيعية، و ف 1958، خدا ليصونس ف الصوسيولوجيا. بعدما خدم ف لإدارة واحد لمدة، توضّف ف معهد لحسن التاني د لأݣرونوميا و لبيطرة ف 1970، و تماك فين خدم ف عدد ديال لمناصب حتال لموت ديالو. و كان أسس عدد ديال لوحدات، منها الضيپارطومو ديال التنمية لقروية.[1] ف 1975، دار التيز ديالو على بحت متعدد التخصصات (فيه التاريخ، الصوسيولوجيا، و الجغرافيا، معا أبحات ديالو ف لأرشيڤات ديال العائلات و الحكّام)، على إقليم لحوز حدا مراكش.[7] ف 1977، تّنشر هاد لبحت و كاين لي عتابرو "أكبر خطوة ف الدراسات د شمال إفريقيا. حيت كيعطي ميتال واعر ديال لعمق د التحليل ملي تقنيات متعددة التخصصات و مصادر محلية و عقل إبداعي كيتركزو ف فهم منطقة وحدة".[5]
پاصكون كان شيوعي ماركسي، ولايني تخلى على هاد لأفكار من بعد.[4]
پاصكون كان باحت مرافق ف لمركز لوطني د لبحت لعلمي ف فرانسا، و أستاد مرافق ف الجامعة لكاطوليكية د لوڤان، ف بلجيكا.[1]
پول پاصكون كان ملحد.[8] كانو عندو جوج ولاد لي ماتو ف حرب الصحرا.[4]
توفى پاصكون ف كسيدا ب الطونوبيل ف موريطانيا، و خلّى مراتو من موراه هجّالة.[1][9] ف لبريّة د النعي ديالو، كتب صاحبو إرنيست ݣيلنير:
مات ف أوج لقوة ديالو، ف واحد لوقت لي كانت عندو إنتاجية خارقة. لوفاة ديالو راها طراجيديا إنسانية، و خسارة فايتة لعبار للأكاديميا. راه كان بلا نيقاش واحد من أكتر الدارسين ديال لمجتمع د لمغريب و د شمال إفريقيا ف لعمق و لمعرفة ديالو.[4]
- لحوز ديال مراكش Le Haouz de Marrakech (الرباط: Editions Marocaines et Internationales، 1977): التيز ديال الدوكتورا د پوصكون ف جوج ݣزوّات؛ دراسة متعددة التخصصات.[5] واحد من النقاد شبّه هاد التيز ب دراما فيها 4 د الشخصيات: لقبيلة، لي كاتّعتابر عنصر بشري أساسي ب تشكيلات متنوعة؛ الزوايا لي هوما مجموعات دينية عندها بزاف ديال لقوة السياسية؛ لقيّاد لي هوما زوعاما محليين عندهم قوة لي لقلدة ديالها كاتشبة للفيودالية، و لي سمّاها پاصكون "قايدالية" caïdalism؛ و لمدينة ديال مراكش.[10][10]
- فاميلة إليغ و التاريخ لإجتماعي ديال تازروالت La Maison d'lligh et l'histoire sociale du Tazerwalt (الرباط: Editions Marocaines et Internationales، 1984): دراسة على فاميلة إليغ، لي حكمات منطقة تازروالت ف لقرن 17. پاصكون كان باقي خدام عليها ملي توفّى. تطلبات لقضية 17 عام باش الرب د لفاميلة يدير التيقة و يعطيه أكصي للأرشيڤات ديالهم. لكتاب لي تّنشر مور لموت ديالو، فيه 5 د الدراسات مستاقلين من عدد د الجوانب على لفاميلة؛ من فاش خداو لأراضي و لخدمة د السيستيم ديال السقي لي داروها ف 1640، تال وتايق تجارية ف لقرن 19، زيادة على قضية د لقتيلة ف 1825.[9][11][12]
- الراسمالية و الزراعة ف لحوز د مراكش Capitalism and Agriculture in the Haouz of Marrakesh (لندن: Routledge and Kegan Paul، 1986): طرجامة ديال النص التاني د التيز ديالو، راجعها دجون ر. والط. كاتدرس التاريخ ديال منطقة الحوز قبل و ف وقت و من مور لحماية، ب ليعتيماد على النظرية ديال التبعية dependecy theory، ماشي لماركسية. التخدام ديال لأرض هوّ لأداة باش كايتّعبر لمقدار ديال الدخول د الراسمالية ف مجتمع زراعي هامشي.[3][7][13][14]
- 1 2 3 4 5 "Paul Pascon, Biographie" (ب الفرنسية). Institut Agronomique et Veterinaire Hassan II. Retrieved 30 June 2019.
- ↑ Seddon, David (1988). "The Past in the Present". The Journal of African History. 29 (1): 129–30. doi:10.1017/S002185370003615X. JSTOR 182255.
- 1 2 3 Capel, Chloé (2013). "Jebel Mudawwar: une montagne fortifiée au Sahara. Site étatique ou site communautaire ?". In Bourrouilh, Antoine; Pierre-Emmanuel, Paris; Haidar Vela, Nairusz (eds.). Appréhension et qualification des espaces au sein du site archéologique. Paris: Sorbonne. pp. 101–122.
- 1 2 3 4 Gellner, Ernest (1985). "Obituary: Paul Pascon". Anthropology Today. 1 (6): 21–22. JSTOR 3033252.
- 1 2 3 4 5 Hoover, Ellen Titus (1979). "Le Haouz de Marrakech by Paul Pascon". Middle East Studies Association Bulletin. 13 (2): 46–47. doi:10.1017/S0026318400007616. JSTOR 23061160.
- ↑ Pascon, Paul (1956). "La Gara Medouar". Hespéris (ب الفرنسية). 43: 226–28.
- 1 2 Sutton, Keith (1988). "Capitalism and Agriculture in the Haouz of Marrakesh by Paul Pascon". The Journal of Developing Areas. 22 (2): 275–77. JSTOR 4191662.
- ↑ "Jalons biographiques". Bulletin économique et social du Maroc. No. 155–156. 1986. p. 255.
- 1 2 Tréanton, Jean-René (1986). "La Maison d'Iligh et l'histoire sociale du Tazerwalt by Paul Pascon". Revue française de sociologie. 27 (2): 348–49. doi:10.2307/3321544. JSTOR 3321544.
- 1 2 Marthelot, Pierre (1980). "Le Haouz de Marrakech by Paul Pascon". Annales. Histoire, Sciences Sociales. 35 (3/4): 823–25. doi:10.1017/S0395264900145445. JSTOR 27581085.
- ↑ Cannon, Byron D. (1986). "La Maison d'Iligh et l'histoire sociale du Tazerwalt by Paul Pascon, A. Arrif, D. Schroeter, M. Tozy and H. Van der Wusten". Middle East Studies Association Bulletin. 20 (1): 71–73. doi:10.1017/S0026318400059046. JSTOR 23058699.
- ↑ Hamès, Constant (1988). "La Maison d'Iligh et l'histoire sociale du Tazerwalt by Paul Pascon". Archives de sciences sociales des religions. 65 (2): 300. JSTOR 30122390.
- ↑ Gellner, Ernest (1988). "Capitalism and Agriculture in the Haouz of Marrakesh by Paul Pascon". Economic Development and Cultural Change. 37 (1): 209–12. doi:10.1086/451717. JSTOR 1154189.
- ↑ Perkins, Kenneth J. (1988). "Capitalism and Agriculture in the Haouz of Marrakesh by Paul Pascon, C. Edwin Vaughan, Veronique Ingman and John R. Hall". Middle East Journal. 42 (1): 116–17. JSTOR 4327695.
