ويكيپيديا:ناس حيين
لكتاتبيا خاصهم يحضيو راسهم مزيان ملي يكتبو ولّا يبدّلو ولّا يزيدو معلومات ف المقالات لي فيها البيوڭرافيا ديال الناس الحيين، و حتى ف الصفاحي ديال المداكرة، ديال الپروجيات و ديال الواساخ. حيت هاد الماطيرييل كيكون حسّاس بزاف و يقدرو يكونو عندو أبعاد أخلاقية ولّا قانونية، سيرتو حيت جميع المحتويات ديال ويكيپيديا كاتكون متاحة للعموم، و أي واحد يقدر يقرا أي صفحة و التويرخ ديال الڤيرسيونات ديالها، من غير يلا خبّاها أمغار بشكل مقصود.
بسباب هادشي، و كتر من أي مقالات ولّا صفاحي د المحتوى خرين، أي معلومات متعلّقة ب شخص حي، لي ماشي موتّقة ب مصادر موتوقة و عمومية، ولّا مشكوك ولّا كاين تضارب فيها، ولّا كاتمتّل غير فرضية ولّا إتهام ماشي من جهة رسمية ولّا قانونية معروفة، ماخاصهاش تّزاد ڭاع ف مقال، و خاصها تتحيّد ف أقرب وقت يلا كانت تزادت. يلا كان المحتوى خطير، خاصو يتخبّى ف أقرب وقت حتى من التويرخ ديال الصفحة ب طلب ل أمغار ديال ويكيپيديا.
عافاك حضي مزيان و لتازم ب لحكام التلاتة الأساسية ديال ويكيپيديا:
- الحيادية: عافاك ماتكتبش مقال على شي واحد ولّا تزيد عليه معلومة من منضور عاطفي، متلا حيت ماكاتحملوش، ولّا كاتبغيه، ولّا عندك أي مصلحة معاه ولّا ضدو. المقالات د ويكيپيديا خاصهم يكونو مكتوبين ب أسلوب بارد و موسوعي، و هادشي كينطابق عاد كتر على المقالات د الناس الحيين.
- المراجعية: المصادر لي مخدّمة ف مقالات ديال ناس حيين، ولّا على ود توتيق معلومات عليهم، خاصها تكون ب جودة عالية، كتر من أي نوع خور ديال المعلومات.
- ممنوع البحت ب ميكتو: عافاك ماتزيد حتى شي ستينتاج من راسك وخا يبان ليك منطقي، سيرتو ف ما كيتعلّق ب ناس حيين، و وخا تكون عارف 100% بلي لإستنتاج ولّا المعلومة صحيحة (متلا حيت كاتعرف داك الشخص ولّا كاتعرف ناس كيعرفوه). ديما خدّم مصادر موتوقة و عمومية، و دير غير المعلومات لي فيها.