ويكيپيديا:مسابقة ويكيپيديا المغرب 2025
من 20 شتنبر تال 20 أكتوبر 2025
تّعرّف على لمسابقة
جائزة ويكيپيديا المغريب هي جائزة كاتنظمها مجموعة لخدايميا د ويكيميديا فلمغريب، لهدف ديالها هو نغنيو و نطورو و نزيدو من لمعرفة على لمغريب فويكيپيديا بداريجة لمغربية. تاتبدا لمشاركة فلمسابقة من 20 شتنبر 2025 تال 20 أكتوبر 2025، فوجه ڭاع الناس لي تايهضرو بالدارجة.
شروط د لمشاركة
- يكون عند لمشارك كونط فويكيپيديا، ماكاتقبلش لمشاركة بعناوين لأيپي لمجهولة.
- يمكن لخدايمي يشارك غير كونط واحد، أيّ عملية د لغميق ولا تدليس كايتطرد مولاها ديريكت من لمسابقة.
- اللجنة ديال لمسابقة ماتاضمنش يبقاو الصفحات لي داروهم لمشاركين، بسباب الطبيعة ديال ويكيپيديا لي كاتركز على تطوير لمحتوى و التدقيق ف لجودة و لملحوضية.
- تايتحسبو غير لمُشاركات لي تقدمو من تاريخ لبدية تال تاريخ لمسالية د لمُسابقة و هو نهار 20 أكتوبر 2025 معا 11:59 د لعشية كآخر أجال على حساب التوقيت لعالمي لمنسق.
- غادي يتحيد من لمسابقة أي واحد ماحتارمش هاد الشروط.
شروط المقالات
- لهدف ديال المُسابقة هو إغناء لمحتوى لمغريبي على موسوعة ويكيپيديا ب الداريجة، سوا من ناحية لكتابة د لمقالات، ولا تطوير لمقالات لي ديجا موجودة. و هدشي غيكون بالكتابة ديال المقالة بليعتيماد على مصادر برانيين ؤلا بالترجمة ديال مقالات ويكيپيديا من اللغات لخرين، و خاص المقالة تكون فيها ڭاع الشروط ديال لمقالة لموسوعية.
- يمكنلك تختار لمقالة اللي بغيتي ؤ كتب سميت لخدايمي ديالك بلاصت متال لي حدا لمقالة، بشرط متختارش كتر من مقالة وحدا حتا تزيد 4000 بايت ولا كتر فلمقالة لولة.
- لحد الأدنى ديال حجم لمساهمة اللي غتقبل هو 4000 بايت، و ماغاتّقبلش يلى كانت ناقصة على هاد الحد.
- خاص لمقالة تكون فيها جميع لعناصر ديال لمقالة بحال التصانيف اللي خصها تكون مناسبة للمقالة، و لمصادر و الليانات الدخلانية و صندوق لمعلومات و التصاور (يلا كانت ضرورية) و ڭاع داكشي لي تيدخل فتنسيق لويكي.
- خاصك تراعي لداكشي للي غدي تزيد فالمقالة باش مايكونش غير حشو و صافي، بحال تزيد موضيلات خاويين ولا تعاود تكتب الجُمل بطريقتك ولا تزيد شي حوايج غير باش يتزاد حجم لمقالة.
- ماغادي تقبل حتى شي مساهمة دارها شي خدايمي قبل لموعد ديال لمسابقة 20 شتنبر 2025 معا 00:00 د لعشية أولا منبعد ما تسالي 20 أكتوبر 2025 معا 11:59 د لعشية
معايير التحكيم
غادي نعتامدو على نظام ديال التنقيط باش نّقطو المشاركات، و تا تقييم لمقالات اللي تتحقق الشروط لأولية من طرف لجنة تحكيم لمسابقة. غادي يتوزعو النقاطي بهاد الشكل:
- 10 د النقاط على الزيادة د 4000 بايت اللولة ف المقال من عند كل مشارك (سوا كان المقال جديد، ولّا ديجا موجود). يقدرو مبدئيا جوج مشاركين يخدمو على نفس المقال، و مزيان يلا دارو تنسيق بيناتهم، يلا دعات الضرورة.
- 5 د النقاط على كلا 1000 بايت إضافية ف نفس المقال، ف لحد ديال 20000 بايت، ل كل مشارك.
- 1 نقطة على كلا مصدر كيحقق شروط المصادر الموتوقة، تال حدود 21 مصدر.
- 3 د النقاط على الزيادة د صندوق المعلومات.
- 2 د النقاط على كلا تصويرة، ف حدود 3 د التصاور عندهم علاقة معا الموضوع ديال المقال، و ف حدود الحجم ديال المقال. أي تصويرة إضافية مامحسوباش ف التنقيط (من غير حجم البايتات ديالها).
- نظام التنقيط كيفتارض حسن النية ديال المشارك، و الرغبة ديالو ف تطوير المحتوى الموسوعي ديال ويكيپيديا. أي محاولة ديال التلاعب ب النظام ديال التنقيط على ود تحقيق أكبر عدد د النقاط بلا مراعاة ديال الجودة د المحتوى، يقدر يفقد بسبابها المشارك نقاط سوا بشكل جزئي ولا كلّي. لجنة التحكيم كاتحتافظ بالحق الكامل ديال مراجعة المحتوى و الجودة ديالو، و كاتعطي ولّا كاتحيّد النقاط للمشارك على حساب المنظور ديالها.
الجوائز
- غادي تتعطى الجوايز للفايزين بالمراكز الثلاثة اللولة على هاد الشكل:
- الرتبة اللولة: قسيمة د الشرا بقيمة 300 دولار ميريكاني.
- الرتبة الثانية: قسيمة د الشرا بقيمة 150 دولار ميريكاني.
- الرتبة الثالثة: قسيمة د الشرا بقيمة 100 دولار ميريكاني.
تّعرّف على لمونضيم
مجموعة لخدايميا د ويكيميديا فلمغريب عتارفات بيها لجنة الجهات الشقيقة ديال مؤسسة ويكيميديا ف 6 أكتوبر 2015، بعد ما تأسسات المجموعة باش تمثل ويكيميديا فلمغريب. مجموعة لخدايميا د ويكيميديا فلمغريب كاتعاون بلأنشطة ديالها فنشر و تحسين لمعرفة و الثقافة الحرة، خاصة لمعرفة باللغات لي تايهضرو بيها لمغاربة على لمحتوى لمغربي. لهدف ديال لمجموعة هو توفير لمعاونة للمشاريع ديال ويكيميديا لي متعلقة بشكل مباشر ولا ماشي مباشر بلمغريب. و لويكيميديين لمغاربة لي تايساهمو فيها، و تاطمح باش تولي فلمستقبال لقريب فصل معتارف بيه من عند مؤسسة ويكيميديا فلمغريب.
