ويكيپيديا:لحكام/مداكرة على حكام التصويت

طاڭ ل إمغارن لحاليين و لقدام @Abdes101, Mehdi Immähder, Mico2023, Mounir Neddi, Reda benkhadra, SADIQUI, و Tifratin:@Anass Sedrati و سمير تامر:. عافاكم راجعو هاد لإقتراح د لحكام د لمداكرة و التصويت و عطيو الرأي ديالكم فيه. تقدرو تقتارحو أي تعديلات بغيتو. ب النسبة للڭروپات 3 و 4، يقدرو يكونو هوما الساس باش من بعد نديرو الصلاحيات ديال "كتاتبي ناضي" (ب النڭليزية extended-confirmed، ب لعربية "محرر") و "مراجع نيشان" (ب النڭليزية auto-reviewed، ب لعربية "مراجع تلقائيا"). السميات ديالهم نقدرو نتّافقو عليهم من بعد. --Ideophagous (مداكرة) 08:38، 16 نونبر 2025 (+01)

إقتراح ديال حكام التصويت

• لميكانيزمات لأساسيين باش كايتخادو لقرارات ف ويكيپيديا ب الدارجة هوما لكتابة و التبديل ف لويكي (إتفاق ضمني طالمّا تا واحد ما عتارض)، لمداكرات بين لكتاتبيا باش يوصلو ل إتفاق على شي قضية فيها خلاف ولّا عدم وضوح، و التصويت ف حالة يلا ماتّافقوش 100% ولّا يلا لإداري لي كايسيّر لمداكرة بغى باش تكون النتيجة د لمداكرة واضحة ل كولشي.
• كانقسّمو لخدايميا ل 8 د لڭروپات على حساب الصلاحيات ديالهم و لقدرة ديالهم باش يصوّتو:
  1. إمغارن (ليستة): هوما لإداريين ديال لويكي و عندهم صلاحيات كبيرة بحال تحياد الصفاحي، لبلوك، و غيرهم.
  2. إمغارن لقدام (ليستة): خدايميا كانو إداريين قبل و مابقاوش.
  3. خدايميا ب خبرة عالية (ليستة): عندهم كونط قديم ب 6 شهور ولّا كتر، صاوبو 50 مقال جديد و دارو 500 تبديل ولّا كتر ف لمقالات و 200 تبديل ولّا كتر ف لمجالات السمياتية التقنية و لإدارية (تصنيف، موضيل، مودول، معاونة، ...). التبديلات خاصهم يكونو مامرجّعينش، و الصفاحي لي تصاوبو تراجعو و ماتحيّدوش. خاص يكون عندهم 100 تبديل ف 6 شهور اللخرة.
  4. خدايميا ب خبرة مزيانة (ليستة): عندهم كونط قديم ب 3 شهور ولّا كتر، صاوبو 20 مقال جديد و دارو 200 تبديل ولّا كتر ف لمقالات و 50 تبديل ولّا كتر ف لمجالات السمياتية التقنية و لإدارية (تصنيف، موضيل، مودول، معاونة، ...). التبديلات خاصهم يكونو مامرجّعينش، و الصفاحي لي صاوبو تراجعو و ماتحيّدوش. خاص يكون عندهم 50 تبديل ف 3 شهور اللخرة.
  5. مبتدئين (ليستة): أي خدايميا عندهم كونط قديم ب سيمانة ولّا كتر و دارو مقال تراجع و ماتحيّدش، و 10 د التبديلات ف لمقالات ولّا كتر.
  6. جميع لكتاتبيا لخرين (ب كونط)
  7. خدايميا بلا كونط (كونط مؤقت)
  8. خدايميا مبلوكين
• أي كتاتبي ولّا خدايمي ب كونط مؤقت يقدر يشارك الرأي ديالو ف أي مداكرة، من غير يلا كان من لڭروپ 8 (مبلوكي). لخدايميا لمبلوكين ماخاصهمش يتحايلو على لبلوك ب لمصاوبة ديال كونط جديد ولّا لمشاركة بلا كونط شخصي (أيپي ولّا كونط مؤقت، شوف لحكام د لمقاشرة)، و ماعندهم حق لا ف لمداكرة لا ف التصويت ف أي نوع د لمداكرات.
• نواع لمداكرات و شكون يقدر يصوّت فيهم يلا وصلو للتصويت:
  1. مداكرات د لمحتوى: بحال لإختيار د عنوان ديال مقال، لمعلومات ف لمقال واش صحاح ولا لا، لمصادر لي مخدّمين ف لمقالات، لمحتويات ديال لموضيلات د التسركيل لي كايبانو ف لمقالات، لمداكرات ديال اللوغة و لإملاء و غيرهم: لكتاتبي لي صاوب لمحتوى ولّا دار التبديل لي عليه مداكرة + لڭروپات من 1 ل 5.
  2. مداكرات تقنية: مداكرات متعلقين ب مسايل تقنية بحال لموضيلات و لمودولات بشكل عام، لبوتات، الصفاحي د ميدياويكي و الطرجامة التقنية و غيرهم: لڭروپات من 1 ل 4.
  3. مداكرات إدارية و تنظيمية: مداكرات متعلّقين ب لحكام د لويكي و التنظيم ديالها و التطوير ديال لحكام و الصلاحيات، و غيرهم: لڭروپات من 1 ل 3.
• لحكام لي لفوق كاينطابقو بشكل عام، ولايني لحكام لخاصين ب شي نوع د لأنشطة ولّا لمداكرات يقدرو يكونو فيهم تفاصيل ولّا تغييرات على الصلاحيات لمطلوبين على ود لمشاركة ولّا التصويت ف داك النوع ديال لمداكرات.

هاد لمداكرة تسدات. عافاك ماتبدّل فيها والو. أي تعليقات إضافية خاصها تزاد ف فقرة جديدة.

مداكرة

• معا -- السلام منير وشكرا على لمجهود اللي درتي على هاد الصفحة. قريت هاد لفقرة هادي ومتافق على ڭاع التفاصيل اللي فيها. مهم بزاف تكون عندنا هاد لقواعد باش نعرفو كل نقاش وشكون يقدر يشارك فيه. -- Anass Sedrati (مداكرة) 21:18، 15 نونبر 2025 (+01)
• متافق -- Reda benkhadra (مداكرة) 20:17، 29 نونبر 2025 (+01)
• معا --Ideophagous (مداكرة) 20:24، 2 دجنبر 2025 (+01)

التعييطة اللخرة @Abdes101, Mehdi Immähder, Mico2023, Mounir Neddi, Reda benkhadra, SADIQUI, و Tifratin:@سمير تامر: لمداكرة غادي تسد غدّا و لقرار غادي يتطبق يلا ماكان حتى شي عتيراض.--Ideophagous (مداكرة) 16:13، 29 نونبر 2025 (+01)

تعليق أمغاري: التصويت دابا داز ب لإجماع على السياسة الجديدة. --Ideophagous (مداكرة) 20:24، 2 دجنبر 2025 (+01)

لمداكرة لفوقانية تسدات. عافاك ماتبدّل فيها والو. أي تعليقات إضافية خاصهوم يتزادو ف لفقرة ؤلا الصفحة د لمداكرة لمناسبة. عافاك ماتدير تا شي تبديل أخور ف هاد لمداكرة.