لعبرات تقليدية ديال لعبار فالمغرب ما كانتش غير أرقام باش يتعاملو بها ناس، ولكن كانت حتى جزء مهم من الثقافة الشعبية و طرق لعيش ديال لمغاربة عبر قرون. ف كل سوق ولا مدينة كان عندها خصوصياتها: ف فاس مثلا "الرطل" ماشي بحال "الرطل" ديال مراكش، و الوزن ديال "المدّ" ولا "القصعة" كيختالف من عبدة للريف ولا لجبالة. هاد الإختلافات ما كانوش كيديرو مشاكل كبيرة، حيث كل منطقة كانت متعودة على نظامها، و التجار والحرفيين كانو كيعرفو هاد الفوارق و كيكيّفو تجارتهم على حسابها. بزاف ديال الأمثال الشعبية و الأغاني و حتى الحكايات كتعاود على "الوزان" و "المكيال"، و هادشي كيبين بلي المقاييس كانت داخلة ف الثقافة اليومية د الناس. مع دخول لحماية لفرانساوية على لمغريب ف بداية لقرن لعشرين، بدا النظام المتري كيتفرض ب قرارات رسمية، خصوصا ف الإدارة، الجيش، و التعليم. ولكن الشعب بقا محافظ على العبرات القديمة، حيث مرتبطة ب الذاكرة الجماعية و ب المعاملات التقليدية ف الأسواق الأسبوعية. و حتى من بعد الإستقلال، بقات هاد العبرات كتستعمل ف الأسواق الشعبية و لعروبيات، بحال ملي كيتباع القمح بالمدّ، ولا الزيت ب القدّوح، ولا المواشي ب القنطار. اليوم، وخا القانون كيعتمد على الميترو و الكيلوڭرام و ليطرو، باقي شي عبرات تقليدية حاضرة ف المعاملات اليومية، و هادشي كيخلّيها ب مثابة تراث لا مادي كيعكس تاريخ المغرب و تنوع جهاتو.[4]
لعبرات تقليدية ما كانتش غير وسيلة للبيع و الشرا، ولكن دخلات حتى للأمثال الشعبية و للغة اليومية ديال المغاربة. بزاف ديال الناس كيستعملو تعابير بحال: "كل واحد و ميزانو"، بمعنى كل واحد و كيفاش كايعبر الأمور، وهي عبارة مجازية خرجات من عالم الموازين و لعبار. كاين حتى المثل: "الحق ما يتباع ب المدّ ولا يتكال ب القنطار" اللي كيدلّ بلي القيم ما يمكنش يتحددو ب عبرات لعبار المادية. و ف الأسواق، كانو التجار كيستعملو جملة بحال "زيد رطل على خاطرك" كناية على الكرم مع لكليان.
حتى ف الزجل و الأغاني الشعبية، كيبانو هاد العبرات رموز للحياة اليومية، بحال ذكر "المدّ" و "الرطل" بحال عبارات ديال للخير و البركة. و ف الثقافة الشعبية كاين تعبيرات بحال "ما كيعمرها لا مدّ لا صاع"، ب معنى الطمع ما عندوش حدود. هاد الأمثال و التعبيرات الشعبية كتخلّي هاد العبرات ما تبقاش مجرد وسيلة حساب، ولكن حتى رموز ثقافية كتحمل معاني عميقة على الكرم، العدل، الطمع، و الميزان ف الحياة.[5]
