والاس و ڭروميت
| لمقال مقطوع من شجرة، ما كايدي ليه تا شي مقال أخر، زيد ليان ديالو ف مقالات خرين. |
والاس و ڭروميت
| ||
 | ||
| معلومات إضافية | ||
| شكون خلقو | نيك بارك | |
والاس و ڭروميت (ب النڭليزية: Wallace & Gromit) هوما الشخصيات الرئيسية ف سلسلة ديال الأفلام القصيرة د الأنيميشن، وسلسلة د المقاطع القصار، وفيلم طويل، كاع هاد الشي إخراج ديال نيك پارك ولصالح أستوديوهات آردمان أنيميشنز.[1] الشخصيات كاملين مصاوبين ب الصلصال الملون فوق هيكل د الحديد، ومصورين ب طريقة ستوپ موشن.
القصة د الأفلام كتيدور على واحد المخترع مبهطل سميتو والاس، والكلب ديالو الذكي واللي عزيز عليه سميتو ڭروميت، ساكنين ف مدينة ويڭان ف منطقة لانكشاير ف النڭليز.[2]
بسباب النجاح الكبير اللي حققوه هاد الأفلام، رجعو هاد الشخصيات رمز من رموز الثقافة البريطانية العصرية.[3] الأفلام القصيرة "السروال ماشي ديالك" و"تحفيفة خطيرة" والفيلم الطويل "والاس و ڭروميت و لقنية القتالة" ربحو أستوديوهات آردمان بزاف د جوائز لأوسكار ف فئة أحسن فيلم منمي.[4]
الخدمة على الفيلم الأول ف السلسلة، "خرجة ماشي ف هاد لعالم"، بداها نيك پارك بوحدو ملي كان مزال طالب، ك مشروع د التخرج ديالو. ف عام 1986، أستوديوهات آردمان خدمو پارك وعطاو له الفرصة باش يكمل الفيلم اللي فيه نص ساعة، والبطولة كانت ل والاس، المخترع البريطاني المرفوع اللي كيموت على الفرماج والكراكير، والكلب ديالو ڭروميت المطور. الفيلم كيعاود على المغامرة ديالهم ملي طارو ل القمر حيت سالا ليهم الفرماج ف الويكاند والمحلات كانوا سادين. الفيلم خرج ف 1989 وحقق نجاح كبير وتترشح ل الأوسكار.
النجاح د الفيلم الأول شجعهم باش يصاوبو الجزء الثاني، "السروال ماشي ديالك" ف 1993، اللي كيهضر على واحد البطريق قبيح وشفار سرق الاختراع الجديد د والاس، ومن بعد "تحفيفة خطيرة" ف 1995، فين الجوج حلوا مشروع ديال غسيل الزجاج. هاد الجوج أفلام بجوجهم ربحو جوائز الأوسكار ودارو حالة ف الشهرة. ال بي بي سي شرات حقوق العرض ديال هاد الأفلام ب ثلاثة ورجعو كلاسيكيات كيتعاودو ديما ف العطلة د العيد الكبير/الميلاد ف النڭليز. ف عام 2005 خرج الفيلم الطويل "والاس و ڭروميت و لقنية القتالة" ب التعاون مع أستوديوهات دريم ووركس، وحقق نجاح عالمي وربح الأوسكار. وف عام 2008 خرج فيلم قصير رابع "قضية د لموت و لحياة"، فين والاس و ڭروميت حلوا مخبزة، ووالاس تتخطب ولكن لقا راسو ف وسط قضية جريمة قتل غامضة.[5] وف عام 2024 خرج الفيلم الطويل الثاني "على جناوح الانتقام" اللي حتى هو نجح بزاف وتترشح ل الأوسكار.[6]
السلسلة معروفة ب الضحك د الجسد (Slapstick) الخفيف مع ضحك مطور وذكي كيناسب الصغار والكبار ف دقة واحدة.
والاس هو واحد المخترع مبهطل كيعيش ف شمال النڭليز مع الكلب ديالو، ڭروميت. الدار ديال والاس عامرة ب الاختراعات ديالو - ماكينات معقدة كيشبهو ل ماكينات روب ڭولدبيرڭ، اللي المفروض يسهلو الخدمة د الدار، ولكن ديما كيتخسرو ويديرو الصداع والروينة.[7] الشخصية د والاس جاية مؤخرة ف الزمان (anachronique) ولابس ب طريقة قديمة: سروال د الصوف قهوي، قميجة بيضاء فوقها طريكو خضر وكرافات حمراء. والاس معروف ب أنه كيموت على فرماج (خاصة فرماج وينسليديل)،[8] والكراكير، وأتاي، وما كيحيملش الخضرة كاع. هو بنادم نية ودرويش حتى ل النية العميقة، وهاد النية ديالو مع الاختراعات العجيبة كيجيبو ليهم ديما المشاكل من حيث لا يحتسبون. الشخصية ديالو مستوحاة شوية من الأب د نيك پارك، اللي حتى هو كان عزيز عليه يصاوب ماكينات باش يسهل الخدمة د اليوم.
ف الأصل، دار الصوت ديال والاس الممثل البريطاني پيتر ساليس، ومن بعد كمل معاه الممثل بن وايتهايد.[9]
ڭروميت هو الكلب الوافي والذكي بزاف د والاس. تبناه والاس من بعد ما تخرج من جامعة دوڭوورتس - اللي هي پارودي على المدرسة د هوڭوورتس فين قرا هاري پوتير. ڭروميت ما كيهضرش، ولكن المشاعر والشخصية ديالو كيبانو غير ف وجهو وتعبيرات عينيه.[10] ڭروميت مطور بزاف، ف بزاف د الأوقات أذكى من والاس براسو، وديما كيكب الماء على الكرش وكيتحسر على الهبال ديال مولاه. عندو بزاف د المهارت: كيطريكي، كيقرا الجرايد والمقالات، كيحال ألغاز، كيتصنت ل الموسيقى الكلاسيكية، وكيصلح الغلاط د الاختراعات د والاس. ڭروميت هو اللي كيعتق والاس ديما من الحصلات اللي كيطيح فيها. ورغم هاد الشي كامل، ڭروميت كيبغي مولاه ب الصح ووافي ليه بلا حدود.
الكتوبا اللي كيقرا ڭروميت هُوما پارودي د كتوبا كاينين ب الصح، بحال: "الجمهورية" د پلوتو (لعب ب السميات بين پلاتو وپلوتو الكلب د ديزني)، "الجريمة والعقاب" د فيدو دوڭستويفسكي، و"الرجال من المريخ والكلاب من الزهرة". واحد الموديل من المركبات د ناسا اللي صيفطو ل المريخ سماوه على سمية ڭروميت.[11]
- ↑ Youngs, Ian (10 October 2005). "Wallace and Gromit's cracking careers". BBC News.
- ↑ "A cracking town, Gromit". Wigan Today. 16 November 2005.
- ↑ "Nominations: Wallace and Gromit". Icons of England. Culture24.
- ↑ "Peabody Awards: Wallace & Gromit".
- ↑ Robinson, James (26 December 2008). "Wallace and Gromit lead BBC to Christmas ratings victory". The Guardian.
- ↑ "From Feathers McGraw to Mr Burns: kids' TV's all-time evillest villains". The Guardian. 12 June 2024.
- ↑ "Wallace and Gromit world recreated in £2m exhibition at Science Museum". The Guardian. 26 March 2009.
- ↑ "Not even Wensleydale?". wallaceandgromit.net.
- ↑ Rawlinson, Kevin (5 June 2017). "Actor Peter Sallis dies aged 96". The Guardian.
- ↑ Farndale, Nigel (18 December 2008). "Wallace and Gromit: one man and his dog". The Daily Telegraph.
- ↑ Perlman, David (4 October 2005). "NASA's new robots show their stuff: Gromit, K-9 have the smarts to travel on the moon, Mars". San Francisco Chronicle.