هيپ هوپ

تصويرة ديال جوج كيغنيو لهيپ هوپ

  لهيپ هوپ (بنّݣليزية: Hip hop) أولا موسيقى الراپ، هو واحد النوع ديال الموسيقى و الثقافة فـ لميريكان. هاد الموسيقى شعبيّة، و طوروها لمراكنا لكوحل (لمراكنا لأفارقة) و الميريكانيين اللاتينيين. كيتعتابر حركة ثقافية ديال لمراكنا لأفارقة.

تزاد الهيپ هوپ فـ عام 1970 فـ نيويورك، بالضبط فـ حي البرونكس، و ما تعرّفش حتى لـ عام 1979، بسباب عراقيل ديال الفقر اللي ما خلاش هاد الثقافة تنتاشر بزّربة. و كان كـ رد فعل على العنصرية اللي تعرّضو ليها لمراكنا لأفارقة، و كـ طريقة باش يعبّرو على راسهم ضد المشاكل الإجتماعية بحال الفقر، الشوماج، العنصرية، و الظلم، حتى ولى من بعد ثقافة و فن مستاقل.

قال باترسون، اللي هو أستاذ كيدرس فن الهيپ هوپ:

'"ثقافة الهيپ هوپ جات كـ رد فعل على الظلم و العنصرية اللي كانو كيتعرضو ليها السود من عند البيض، وكتعتبر حتى وسيلة تواصل بين السود فـ جميع أنحاء ميريكان."

واحد من الأهداف اللي كان كيتمنى يحققها اللي طوّر ثقافة الهيپ هوپ، هو بلي يشغل الشّباب السود فميريكان باش يدخلو لفرق ديال الهيپ هوپ ويتباراو فـ الرّقص والغنا، عوض ما يمشيو ينضمو للعصابات ولا يدخلو فـ العنف والمخدرات.

ولكن المشكل اللي طرا من بعد، هو بلي حفلات الهيپ هوپ ولات بلايص كيتستعرضو فيهم الأسلحة وكيتباعو فيهم المخدرات، وولات العصابات حاضرة وكاتسيطر على هاد الحفلات.

الهيپ هوپ عندو سمعة خايبة عند بزاف ديال الناس البيض فميريكان، بحيث كيشوفو فيه غير الكلام الخايب، العنف، كراهية البيض، وكراهية النسا.

وفـ الواقع، إلا شفنا مشاركة العيالات السود فهاد الفن، فهي قليلة، وحيت أغلب الرواپا رجال، كيدخلو العنصر النسائي غير باش يعبّرو على الجنس.

اللغة اللي كيتستعمل فـ الهيپ هوپ هي النݣليزية ديال الناس اللي عندهم أصول إفريقية، وكاين بزاف ديال الكلمات المختصرة.

مثلاً: كلمة "ديس" (diss) كتعني disrespect، يعني قلة الإحترام، و دابا ولات كتستعمل باش يعبّر بيها لواحد على التحدي و المنافسة بين الرواپا.

كاينين كلمات خرين بزاف اللي دخلات مع ثقافة الهيپ هوپ.

و كاين "إمينيم"، اللي كيعتبروه من أعظم السميات فـ تاريخ الراپ، و تخصص فـ هاد النوع ديال الراپ، و ورّاه للعالم فـ لفيلم لمشهور ديالو "8 أميال".

و فـ السنوات اللخرة، ولات ثقافة الهيپ هوپ مشهورة فـ العالم كامل، خصوصاً عند الشباب، و ب لخصوص اللي عندهم أصول إفريقية، بحيث ولات معروفة فـ أوروپا، إفريقيا، و آسيا.

و واحد من الأسباب اللي خلاتها تنتاشر هو النفوذ ديال الثقافة لميريكانية فالعالم، سوا على طريق السينيما ولا وسائل الإعلام.

و حتى حيث الهيپ هوپ كيعطي حرية فـ التعبير للشباب، حرية اللي ما كايناش فـ شي فن آخر، و زيد عليها السهولة، حيت أي واحد يقدر يكتب كلمات ديالو، و يضيف ليها موسيقى على طريق برامج ديال لورديناتور، وبسهولة يولي راپور.

وبالنسبة للراب، راه هو واحد من خمسة عناصر ديال ثقافة الهيپ هوپ.

الأحداث و الفنانين ديال قصة هيپ هوپ

كاي آر إس ون ف سنة 2007

الهيپ هوپ كنوع ديال الموسيقى و كثقافة تزادت فتسعينات القرن اللي فات، فاش ولات الكايات و الحفلات كتدار بزاف فمدينة نيويورك، خصوصاً وسط الشباب اللي من أصول إفريقية و ساكنين فحي البرونكس. ولكن، موسيقى الهيپ هوپ ما تسجلاتش رسميّاً وما تباناش فالراديو ولا فالتلفزة ولا فالإعلام حتى لعام 1979، وهادشي كان راجع بالأساس للفقر اللي كان كاين فداك الوقت، وݣاع ماكانش مقبول خارج الأحياء الشعبية.

من الفنانين اللي كانو معروفين فداك الوقت كاين: DJ Kool Herc، Grandmaster Flash and The Furious Five، Fab Five Freddy، Marley Marl، Afrika Bambaataa، Kool Moe Dee، كورتيس بلو، Doug E. Fresh، Whodini، Warp، Spoonie Gee.

أغنية Rapper’s Delight ديال The Sugarhill Gang كتعتبر أول تراك ديال الهيپ هوپ تسجّل فعام 1979 ودار ضجة كبيرة، وكان عندو دور كبير فإنتشار ثقافة الهيپ هوپ.

فالثمانينات، ولات موسيقى الهيپ هوپ متنوعة كثر، و بداو كيتخدمو ستايلات معقدة كثر. قبل 1980، كانت الموسيقى ديال الهيپ هوپ محدودة غير فأمريكا. ولكن فالثمانينات، ولات كتنتاشر فبزاف ديال الدول، و بزاف منهم خلطوها مع الموسيقى المحلية ديالهم و دارو منها ستايلات جديدة.

أصل ديال السمية

كيثر ما كيتقال بلي اللي دار أول مرة مصطلح "الهيپ هوپ" هو كيث كاوبوي، اللي كان مغني راب مع فرقة Grandmaster Flash and The Furious Five. ولكن فالحقيقة، حتى Lovebug Starski وDJ Hollywood ستعملو نفس المصطلح فواحد الوقت اللي كانت الموسيقى مازال كيتسمّى ليها "راب الديسكو".

كيتقال بلي كاوبوي لقا المصطلح وهو كيسخر من واحد الصاحب ديالو اللي دخل للجيش الميريكاني، وكان كيغني عليه بطريقة مضحكة "hip / hop / hip / hop" بحال الجونود اللي كيمشيو فالمارش، يعني كيسخر من طريقة المشي ديالهم.

من بعد، كاوبوي دخل هاد الإيقاع ديال "الهيپ هوپ" فواحد من العروض ديالو على المسرح، وهادشي خذاه بزاف ديال الفنانين من بعد، بحال فرقة The Sugarhill Gang فالأغنية ديالهم المشهورة "Rapper’s Delight".

اللي دار المصطلح "الهيپ هوپ" كاسم للثقافة كاملة اللي تابعة لها هاد الموسيقى هو Afrika Bambaataa، اللي أسّس Universal Zulu Nation. وخا داكشي، كيتقال حتى هو فواحد الوقت قال بلي الكلمة كانت كتعني شي حاجة سلبية، وكيضحكو بيها على نوع ديال الموسيقى.

أول مرة تكتب فيها مصطلح "الهيپ هوپ" فشي جورنال كانت فـ The Village Voice، وكتبها الصحافي ستيڤن هايݣر، اللي من بعد كتب كتاب فـ1984 على تاريخ موسيقى الهيپ هوپ.

الحاجات الخمسة المهمة ف الهيپ هوپ

1. دي جي DJing

أفريقيا بامباتا مع دي جي يوتاكا Zulu Nation الجاپون، 2004.

"DJ هو فن ديال تشغيل الميوزيك والتّحكُّم فيها على إيقاعات مختالفة، وكيقدر يخلط بين جوج ديال المقطوعات باش يصاوب مزيج موسيقي زوين ومميّز."

2. الكتابة على الحيوطا. (غرافيتي - Graffiti):

الايروسول د الوان الأدوات ديال الكتابة و الرسم على الحيوطا

الكتابة على الحيطان بدات كاتنتاشر ف ميريكان من نهاية الستينات، و كانت كتستعمل كـ طريقة ديال التعبير من عند النشطاء السياسيين، و حتّى من عند العصابات، ولا باش شي واحد يعبّر على الغضب ديالو من شي واحد آخر ويشتمو ويحاول يقهرو. العلاقة بين هاد الظاهرة وثقافة الهيپ هوپ بدات منين كانو أول الناس اللي كيرسمو على الحيطان هما نفسهم أعضاء ففرق ديال الهيپ هوپ، حيث كانو كايتلاقاو فݣاع مناطق اللي فيها عناصر خرة من الهيپ هوپ، وبداو كل فرقة كاتطوّر الستايل الفني ديالها.

3. شطحة ديال البريك دانس Break Dance

شطحة ديال البريك دانس في شوارع سان فرانسيسكو.

شطحة ديال البريك دانس كيتدار على موسيقى الهيپ هوپ، وتطور مع الوقت ولى جزء كبير من ثقافة اهيپ هوپ. وكاين اللي كايعتابرو هو التعبير الجسدي على موسيقى الراب. دابا، البريك دانس ما بقى غير فالشوارع، ولى كاين فمنافسات ومسابقات كبار فميريكان وحتى خارجها

4. مزيكا ديال الراب Rap

راپور. بستا ريمس ف حفلة ديال الراب في لاس فيغاس

مزيكا ديال الراب هي العنصر الرئيسي فثقافة الهيپ هوپ. والراب كيجلس فواحد المنطقة وسط ما بين الهضرة والنثر والشعر والغناء. ممكن يكون بإيقاع وممكن بلا إيقاع.

بالمختصر، الراب هو موسيقى غنائية سريعة، كيردد فيها الراپور كلمات بسرعة وبإيقاع، ماشي كيغنيهم، وهاد الكلمات كتكون معمرة بالقوافي وكتهضر فمواضيع مختالفة: شخصية، إجتماعية، عاطفية أولا سياسية، وغالباً كتكون مثيرة للجدل وما فيهاش بزاف ديال القيود، كاين الحرية فالكلام وحتى الجرأة.

الراپور ماشي ضروري يكون عندو صوت زوين، لأن الجمالية ديال الراب ماشي فالصوت ولكن فطريقة التقديم والكلمات. وممكن أي واحد يولي راپور، حيث ماشي ضروري يكون مغني، وداكشي علاش كنقولو عليه مؤدي راب أولا 'راپور'، ماشي 'مغني'.

5- بيت بوكس beatbox

من بين عناصر ثقافة الهيپ هوپ كاين واحد الفن سميتو "البيت بوكس"، وهاد الفن هو واحد النوع ديال الإيقاع كيصاوبوه غير بالفم، بلا آلات. كيعتمد على الفم، الشفايف، اللسان، والصوت، وشي مرات كيكون فيه حتى الغناء والتقليد، بحال تقليد الآلات الموسيقية بحال البوق أولا الطومطوم، وأي صوت ممكن يجي فالبال.

البيت بوكس مرتابط بزاف بثقافة الهيپ هوپ، ولكن ماشي ضروري يبقى غير فيها، يعني تقدر تلقاه حتى فأنواع موسيقية اخرا.