نيكولا طيسلا

نيكولا طيسلا (ب نّݣليزية: Nikola Tesla، تزاد نهار 10 يوليوز 1856 و توفّى نهار 7 يناير 1943) هو مخترع و عالِيم ديال الفيزيك، و مهندس ديال الضو، و عالم مستقبليات. طيسلا كان من أصل صربي، و خدى الجنسية د لميريكان.

طيسلا تشهر ب المساهمات ديالو الكبيرة فـ تصميم النظام ديال التيار المتناوب، اللي هو واحد من الأنظمة الرئيسية فـ توزيع التريسينتي. قبل ما يهاجر للميريكان فـ عام 1884، كان خدم فـ ميدان التيليفون و الهندسة ديال الضو، و من بعد مشا يخدم مع طوماس إديسون فـ نيويورك. ولكن العلاقة بينهم ما دامتش، و تفارقو بزّربة. بدا طيسلا يخدم بوحدو، و دار مختبرات و شركات باش يطوّر لإختراعات ديالو.

جورج ويستينڭهاوس شرا منو حقوق إستغلال براءة إختراع ديال لموطور الحثّي و المحوّل الكهربائي، و حتى خدمو معاه شوية كمستشار.

الخدمة ديال تسلا فـ التريسينتي كانت جزء من الصراع اللي تسمّى حرب التيارات، بين اللي كيدافعو على السارح لمتناوب و اللي مع السارح المستامر، و كانت حتى حرب ديال البراءات. فـ عام 1891، خدا طيسلا الجنسية لميريكانية.

ستامر طيسلا فـ تجاربو على التريسينتي اللاسلكي wireless electricity و نقل التريسينتي بالتوتر العالي، و خدم على طاقة التعاويدة لعالية. فـ عام 1893، قال بلي يقدر يدير إتصال لاسلكي ب ستعمال الأجهزة ديالو. و حاول يطبّق هاد الفكرة فـ مشروع كبير هو برج واردنكليف Wardenclyffe Tower، اللي كان الهدف منو يدير بث لاسلكي بين القارات، ولكن المشروع ماكملش.

فـ المختبر ديالو، دار بزاف ديال التجارب، بحال تجارب على المتذبذبات، و الجينيراطورات الميكانيكية، و أنابيب التفريغ د التريسينتي، و حتى محاولات لولة فـ التصوير ب الشعا د إكس. و بنى حتى باطو كيتصاڭ على لبعد، و هاد الشي كان سابق ل عصرو.

طيسلا كان معروف ب الإختراعات ديالو و ب الحضور القوي ديالو، و هاد الشي خلاه فـ آخر حياتو يوصل لسمعة ديال العالِم المجنون فـ الثقافة الشعبية. ربح بزاف د الفلوس من براءات الإختراع، ولكن صرف بزاف منها على مشاريع خاصة، اللي كانت بعضها ناجحة و بعضها ما نجحش.

عاش طيسلا أغلب حياتو فـ ؤطيلات نيويورك، حتى تقاعد، و توفّى فـ 7 يناير 1943. بعد الموت ديالو، الخدمة ديالو تنسات شوية، ولكن فـ عام 1960، المؤتمر العام د لأوزان و لمقاييس سمّى عبرة شدة المجال المغناطيسي ب سميتو "طيسلا"، تكريمًا ليه. و من التسعينات، تجدد الإهتمام فـ طيسلا و خدمتو.

الموت ديالو

ف نهار سبعة يناير عام 1943، ملي كان قريب يكمل 86 عام، توفّى نيكولا طيسلا فـ الشومبرة نمرة 3327 فـ أوطيل نيويورك. اللي لقات الڭسدة ديالو كانت خدّامة د التنظيف أليس موناڭان، اللي دخلات للبيت وخا طيسلا كان معلّق ورقة «ممنوع الإزعاج» على الباب يومين قبل ما يتوفّى.

اللي فحص الڭسدة هو مساعد الطبيب ويمبلي، و قال بلي سباب الوفاة كان سدّان د شرايين القلب.

بعد يومين من الوفاة، مكتب التحقيقات الفيدرالي (FBI) طلب من الجهة اللي كانت مسؤولة على لممتلكات ديال طيسلا باش تسلّمهم كلشي، وخا طيسلا كان مواطن ميريكاني.

ستدعاو المهندس د التريسينتي جون ج. طرامپ، اللي كان أستاذ فـ جامعة ميشيڭان التكنولوجية، و كان كيخدم كمساعد تقني فـ هيئة بحث الدفاع الوطني، باش يحقق فـ المحتويات اللي كانت عند طيسلا.

من بعد ثلث يام ديال الفحص و التحقيق، قال طرامپ فـ التقرير ديالو بلي ما كاين حتى خطر فـ لحوايج اللي خلاها طيسلا، و وضح بلي الصندوق اللي طيسلا كان كيدّاعي فيه وجود جزء من الشعا د الموت، ما كان فيه غير جهاز مقاومة عقدي multidecade resistance box قديم عمرو 45 عام.

نهار 10 يناير، عمدة نيويورك فيوريلو لا ڭوارديا قرا كلمة تأبينية فـ ڭنازة طيسلا فـ كاتدرائية القديس جون. و من بعد الڭنازة، تدفن فـ مقبرة فيرنكليف فـ منطقة آردسلي، ف مدينة نيويورك.

مصادر

ويكيميديا كومنز عندا تصاور و معلومات على نيكولا طيسلا.

هادي زريعة ديال مقالة خاصها تّوسع. تقدر تشارك ف لكتبة ديالها.