نوارة

نوارة
كلاص فرعية ديال	عضو نباتي، بنية نباتية، نورة زهرية
طرف من	بتيلة، نورة زهرية، كاسيات البذور
الاستعمال	تكاثر النبات
السمية ب لكانا	はな
تنمو من	flower bud، mixed bud
هاشطاڭ	flowers
عندو خصلة	مرحلة الإزهار
كاراكطير د يونيكود	⚘، 🥀

ميّز على نوار (مرض).

النوّار، معروفين عاوتاني ب سمية الزهور، هوما لقلدات لمكاتريين ديال النبتات لمنوّرين. ف لعادة، هوما كايكونو كايكونو مهيكلين ل ربعة ديال النيڤوات الدايرين جوايه لختمة ديال شي ساق د النوّارة. كايشملو: كويّسات النوّارة، لي هوما وراق معدّلين لي كايكاليو النوّارة؛ لبتيلات، لي دايماً كايكونو مديزاينين باش يجدبو اللقّاحا؛ لغزلات د الدكر، في كايتمدو حبوب اللقاح؛ و لمنسل د النتوا، فين كايتخادو حبوب اللقاح و كايتسهّل التحراك ديالهم ل لبيضة. منين النوّار كايتستفو ف واحد لݣروپ، لي معروفين ب شكل جماعي كا تنويرة.

الديڤلوپمو د النوّار معقّد و كايشكل طرف مهم ف دورات لعيشة ديال النبات لمنوّر. عند لغالبية ديال النبتات، النوّار قادر باش ينتج خلايا الجنس ديال الجناس ب جوج. حبوب اللقاح، لي يمكن ليهم ينتجو خلايا الجنس د الدكر، كايتطرونسبورطاو بينات طراف النوّارات ديال الدكر و النتوا وقيت التلقاح. التلقاح يقدر يوقع بينات نبتات مبدلين، كيف ما ف التلقاح لمكروْز، ولا بينات نوّارات من نفس النبتة ولا حتى نفس النوّارة، بحال لي ف التلقاح الداتي. حركة حبوب اللقاح يقدر يكون سبابها لحيوانات، كيف ما الطيور و لبخوش، ولا لحوايج لماعايشينش بحال الريح و لما. اللون و لقلدة ديال النوّار كايعاونو ف عملية التلقاح.

من بعد التلقاح، لخلايا الجنسيين كايدّمجو معا بعضياتهم ف عملية التخصاب (fertilisation)، لي هي خطوة ساروتية ف لمكاترة الجنسية (sexual reproduction). على طريق التقسامات لخلويين و النوويين، لخليّة لحاصول كاتكبر ل واحد الزرّيعة (seed)، لي فيها قلدات كايعاونو ف النجو و النمو لمستقبليين ديال النبتة. ف نفس لوقيتة، لپارتية النتوا من النوّارة كاتّشكّل ل فروتة، و لقلدات النوّاريين لخرين كايموتو. شغل لفروتة هو حماية الزريعة و لمعاونة ف التشتات ديالها من النبتة لم. الزيعات يقدرو يتشتتو ب لحوايج لحيّين، بحال الطيور لي كاياكلو لفروتات و كايفرّقو الزريعة منين كايخراو. لحوايج اللاحيين بحال الريح و لما يمكن ليهم حتى هوما يعاونو ف تشتات الزريعة.

النوّارات تطورو ل لخطرة اللولى بينات 150 و 190 مليون عام هادي، ف لفترة الجوراسية. النبتات ب النوّار جاو بلاصة النبتات اللامنورين ف شلا سيستيمات إيكولوجيين، ب صيفتهم حاصول على لمفعولية لمكاترية لمفوّقة ديال النوّار. ف الدراسة ديال كلاصاج النبات، النوّار كايكونو خصلة ساروتية مخدّمة ف تفراق النبات. ل أولوفات د لعوام بنادم خدّمو النوّار ل غراضات معددين، كيف ما: التزواق، الطب، لماكلة، و الروايح (پارفانات). ف التقافات لبنادميين، النوّار تخدّمو ب شكل رمزي و بانو ف لفن، لأدب، و لمّارسات الدينيين، الطقوس، و لمواسم (لفيستيڤالات). ݣاع لعناصر ديال النوّار، بحال لقد، الشكل، اللون، و الريحة، كايورّيو تنواع هايل بينات النبات لمنوّر. هوما كايتفاوتو ف لقد من 0.1 مم ل 1 ميطرو، و ب هاد الشكل كايتفاوتو من نوّارة ستيوتة ب زايد و مامقشوعاش، ل نوّارة طاغية على قلدة النبتة. النبتات ب النوّار كايطغاو على لغالبية ديال السيستيمات لإيكولوجيين د الدنيا، و هوما ب ريوسهم كايتفاوتو من السحلبيات لݣليولين و النبتات الرايسيين د لمحاصل ل الشجرات لكبار.

لوضيفة

لغرض الساسي ديال شي نوّارة هو لمكاترة ديال لفرد، هادشي لي كايعاون ف النجو ديال النوع. النوّار ماكاينتجش غير لبواغ (spores) و صافي، لي كايولّيو ݣاميطوفيتات (gametophytes؛ ولا النبّاتات لعروسيين) لي كاينتجو خلايا الجنس، هادشي لي كايودّي ل خلايا مخصبين، بلحق كايدڤلوپي و يعاون ف تفراق الزريعة. لمكاترة الجنسية بينات النبات كاتودّي ل أضاپطاسيو تطورية، لي كاتحسّن ف النجو ديال النوع. النبات كايخّير التلقاح لمكروْز حيت كايروّج لملاقية د خلايا الجنس من نبتات مفرّزين جينياً من نفس النوع، هادشي لي كايزيد ف التنواع الجيني. تسهال هاد لعملية هو شغل ساروتي ديال النوار و دايماً كايتعكس ف لفورمة و لقلدة نتاوعهم. لخصايل لمديزاينين باش يجدبو اللقاحا من بينات لاضاپطاسيوات الشايعين ݣاع.

لقلدة

لقلدة ديال شي نوّارة، ب شكل صطيلاحي مورفولوجيتها، تقدر تعتابر ف جوج پارتيات: لپارتية لخضرية (vegetative)، لمشكّلة من قلدات لا-مكاتريين كيف ما بتيلات النوّارة (petals)؛ و لپارتيات لمكاتريين ولا الجنسيين. شي نوّارة سطيريو نوعية، ولا كاملة كاتكون مصايبة من ربعة الشكال ديال قلادي مستفين ف مجموعات كايعيّطو ليهم اللفّات (whorls؛ ولا محيطات النوّارة). هاد لقلدات كايكبرو جوايه لقمقومة د شي سويّق (stalk) قصير ولا آكس (محوْر)، كايسميوه سرير النوّارة (receptacle؛ ولا التخت). لملفّات الربعة الساسيين (كايبداو من الساس د النوّارة و كايكمّلو ل لفوق) هوما غريرفات (calyx)، بتيلات النوّارة، لمنسل د الدكر (androecium) و لمنسل د النتوا (gynoecium).

لپارتيات لخضريين

لپارتية لخضرية ولا اللامكاترية ديال النوّارة، معروفة ب شكل مجمّع ب لغلاف النوّاري (perianth)، كايتصايب من لغريريف (calyx؛ وراق برانيين معدّلين)، و لبتيلات. سرير النوّارة هو لپارتية لمغلّضة من لعنيّق (pedicel)، لي هو السويّق د النوّارة، لي كايسند ݣاع لقلدات لخرين د النوّارة.

لغريريف

كويّسات النوارة (sepals)، معروفين ب شكل مجمّع ب لغريريف، هوما وراق معدّلين لي كايكونو ف اللفّات لبرانيين ݣاع من النوّارة. هوما كايشبهو ل لوراق، حيتاش عندهم واحد الساس عريض، مسامات (فتحات)، الصبغة لخضرا، و يقدر يكونو فيهم تنبيتات (Stipules) ممّاتلين من الساق (stem). كويّسات النوارة دايماً كايكونو شمعيين، صلابين، و كايكبرو دغيا باش يحاميو على النوارة و هي كادّيڤلوپا. وخا شي خطرات كايطيحو ف وقيت النضوجية، لكويّسات ب شكل شايع كايدومو باش يحميو لفروتة و يعاونو ف التفراق ديالها. عند شي نوّارات، لكويسات يقدرو يدّمجو ب شكل ݣزوي ولا ب مرّة معا بعضياتهم.

لبتيلات

لبتيلات، معروفين ب شكل مجمّع ب التويّج (corolla)، كايكونو على بونت ولا كاملين قلدات قلالين اللياف كايشبهو ل لورقة لي كايصايبو اللفّة لقدّامية ݣاع ديال غلاف النوارة. هوما غالباً كايكونو رقاق و رهاف و كايكونو ف لعادة ملوّنين، عندهم شكل، ولا مريّحين، باش يحفّزو و يسهّلو التلقاح. لبتيلات يقدرو يدّمجو معا بعضياتهم. لبتيلات دايماً كايورّيو نماط ديال الشعا لفوق بنفساجي (UV patterns) ماكايبانوش ل بنادم بلحق باينين ل اللقّاحا. عند شي نوّارات، لبتيلات و لكويسات ماكايمكنش يتفرّزو على بعضياتهم.

لپارتيات لمكاتريين

ݣاع النوّارات لمنوّرين كايكونو مبدلين التبواغ (heterosporous)، معنيتها، كل فرد ف النبات كاينتج جوج شكال من لبواغ (spores). لبواغ كايتفورماو من النبتات الناضجين، لي فيهم جوج صفوفا من لكروموزومات، و كايتقسّمو ل ميكروبواغ (microspores؛ ولا بواغ صغار) و ميݣابواغ (megaspores؛ ولا بواغ كبار)–لي هوما السلف ديال حبوب اللقاح (pollen) و كياس الجنين ب شكل مرادف. حبوب اللقاح و كياس الجنين هوما النابْتات لعروسيين (gametophytes؛ ولا لݣاميطوفيتات) ديال الدكر و النتوا، لقلدات د إنتاج خلايا الجنس، و فيهم غير صف واحد من لكروموزومات. لميكروبواغ كايتنتجو ب التنصاص (meiosis) لداخل د لميْبّرات (anthers)، لݣزو الدكري ديال النوارة، و لميݣابواغ كايتنتجو لداخل د بويضات (ovules) كاينين وسط لمبيض (ovary). كيف ما هو لحال معا ݣاع النبتات مبدلين التبواغ، لݣاميطوفيتات حتى هوما كايدّيڤلوپاو وسط لبواغ.

الدكر

منسل الدكر (androecium) هو اللفّة ديال لݣزوّات الدكريين لي سميتهم لغزلات (stamens) لي كايطلقو حبوب اللقاح. لغزلات كايتشكلو ف لعادة من واحد لميْبّرة، مصايب من ربعة ديال كياس حبوب اللقاح مستفين ف جوج جوايات (thecae)، مربوطين ب واحد لخويّطات (filament)، ولا سويّقات. لميْبّرة فيها ميكروبواغ لي كايولّيو حبوب اللقاح، لي هوما النابتة لعروسية د الدكر، من بعد ماكايدوزو من التنصاص. وخا كايورّي لمفاوتة لعرض ݣاع بينات لأعضاء النوّاريين، منسل الدكر كايكون ف لعادة محصور غير ف لفّة وحدة ولا جوج لفّات ف حالات نادرين.

النتوا

منسل النتوا (gynoecium)، مشكّل من فويكية (carpels) وحدة ولا كتر، هو لپارتية النتوية من النوّارة و كايتصاب ف اللفّة الدخلانية ݣاع. كلّ فويكية كاتّشكل من: علْمة (stigma)، لي كاتاخد حبوب اللقاح؛ قلام (style)، لي هو السويّق؛ و واحد لمبيض، لي فيه لبويضات، و ب التالي النابتات لعروسيين د النتوا. لفويكيات يقدرو يدّمجو معا بعضياتهم و دايماً كايتوصفو ب شكل مجمّع ب سمية لمهيريز (pistil). ف لداخل د لمبيض، لبويضات كايكونو ملاصقين معا لمشيمة ب قلدات سميتهم لكويردات (funiculi).

التنواع

وخا لغالبية ديال النبات عندهم نوّار ب ربعة د اللفّات—وراق منّاعين، بتيلات، پارتيات د الدكر، و پارتيات د النتوا—و لقلدات لفرعيين النوعيين دياولهم، هوما كايتنوّعو ب زايد ب النسبة ل النبتات لمنوّرين. هاد التنواع كايشمل ݣاع الجوايه ديال النوّار، بحال لقد، الشكل، و اللون. النوّار كايتفاوت ف لقد من 0.1 من (ربيع لبط، duckweed) ل 1 ميطرو ف لݣطر (نوّارة الجتمان). زيد على هادشي، لپارتيات الربعة الساسيين د شي نوّارة كايتعرّفو ب شكل عام ب مواضعهم ماشي ب وضايفهم. بزاف ديال النوّارات كاينقصوهم شي پارتيات، و عندهم پارتيات لي تعدّلو على ود وضايف خرين، ولا فيهم پارتيات لي كايبانو بحال شي پارتية نوعية خرى. عند شي نوارات، لأعضاء بحال لغزلات، لعلمات، و لكويسات كايتعدّلو باش يولّيو يشبهو ل لبتيلات. هادشي شايع كتر ف لفلاحة (بحال لورد)، فين النوّارات ب "بتيلات" زايدين كتر كايتصابو جدابين كتر.

لغالبية ديال النوّارات عندهم السيميطريّة (التناضر). منين النوّارة كاتشرّح على جوج من لاكس السونطرال (لمحور لمركزي) من أي نقطة و كايتنتجو النصاص السيميطريين، النوّارة كاتّعتابر منتاضمة (بحال ف نبتة التارة). هادشي متال على السيميطرية الشعاوية (radial symmetry). يلا كان غير نيڤو واحد ديال السيميطرية (كيف ما السحلبيات)، النوّارة كاتّعتابر مامنتاضماش. ف شي حالات نادرين ب زايد، يلا ماكانتش عندهم حتى سيميطرية كايتسماو لاسيميطريين (asymmetric). لاحقاش هي وحدة من لخصايل الساسيين لمعرّشين على طريق التطوّر لمرافق (coevolution) ديال النبات لمزوهر (لمنوّر)، السيميطريّة النوّارية هي واحد الدافع ساروتي ديال التنواع ف لمورفولوجيا د النوّار. النوّار لمامنتاضمش دايماً كايطّور ب شكل مرافق معا لقّاحا فلانيين، ف لوقيتة لي النوّار شعاوي السيميطريّة كايميلو باش يجدبو واحد لمادى عرض ديال اللقّاحا.

عند لغالبية ديال النواع، لفراد د النوّار عندهم پارتيات د الدكر و د النتوا — بحال هاد النوّارات كايتوصفو بلي هوما مكمولين، جاوجيين الجنس، ولا خنتات (hermaphrodite). عند شي نواع ديال النبات، النوّارات كايكونو مامكمولينش ولا وحدانيين الجنس: عندهم غير پارتيات الدكر ولا غير د النتوا. يلا النوّارات وحدانيين الجنس د الدكر و النتوا بانو ف نفس النبتة، النوع د النبتة كايتعتابر وحداني السكنة (monoecious). غير هو، يلا شي نبتة فرد كانت يا إما دكر ولا نتوا، النوع كايتعتابر جاوجي السكنة (dioecious). شلا نوّارات عندهم غدد نيكطاريين (nectaries)، لي كايطلقو النيكطار (nectar): واحد لمايع (fluid) مسكَّر شغلو يجدب اللقّاحا. شكالهم كايتبدلو على حساب النبتة، حيتاش ماكايتعتابروش ب صيفتهم عضو ب حد داتهم.

شي نوّارات كايكونو ناقصينهم السويّقات ولا عندهم غير سويّق منقوص ب زايد، و عليها كايكونو لاصقين نيشان معا النبتة. كاينين بزاف د لقلادي، تلقاو ف شي نبتات، لي كايشبهو ل النوّار ولا لأعضاء النوّاريين. هادشي كايجمع: التاجات (coronas)، زوايد برانيين لي كايدّيو ل التاج، و غدد نيكطاريين مزوّرين (pseudonectaries)، لي كايبانو بحال لغدد النيكطاريين و لايني مافيهمش النيكطار. عند النبتات لي حكمهم لمرض، يقدر يطرا التوراق (phyllody)—ف الطراف د النوّارة.

التنويرة

عند النبتات لي عندهم كتر من نوّارة ولا شي محوْر، لمزاحمة لمجمّعة ديال النوّار كايعيّطو عليها تنويرة (inflorescence). شي تنويرات كايتشكّلو من شلا نوّارات صغار مستفين ف واحد التشكيلة لي كاتشبه ل نوّارة وحدة. هاد التنويرات معروفين عاوتاني ب سمية النوّار لمزوّر (pseudanthia). متلاً، شي ݣحوانة (daisy) ولا شي نوّارة الشمش (sunflower) ماشي نوّارات بلحق واحد التنويرة مشكّلة من نويويرات (florets)، ولا نوّارات ستيوتين. شي تنويرة تقدر تشمل سيقان مختصين و وراق معدّلين معروفين ب سمية لقنّابات (bracts)، و حتى لقنّيبات الصغر حتى هوما.

الدياݣرامات الصيغات النواريين

شي صيغة نوّارية (floral formula؛ ولا فورمول نوّارية) هي واحد الشكل ف تمتيل لقلدة د شي نوّارة ب تخدام لحروف، النوامر، و الرموز ب واحد الشكل مدموج. يمكن ليها تمتّل شي ݣروپ د النواع ولا شي نوع فلاني، و كاتعطي ف لعادة مفاوتات على قبل نوامر لأعضاء لمبدلين. لفورمة ديال لفورمولات النوّاريين كايتبدّلو ف طراف مبدلين ديال الدنيا، بلحق ݣاع لفورمولات كايوصّلو نفس لمعلومة.

الدياݣرامات النوّاريين (Floral diagrams) هوما دياݣرامات شيماويين لي يقدرو يتخدّمو باش يورّيو خصايل مهمين د النوّار، بحال لمواضع النسبيين ديال أعضاء معددين، حضور، د الدميج لعضوي و السيميطريّة، و التفاصل لقلداويين.

اللون

عكس جل لپارتيات لخضريين (Vegetative) لخوضر ديال النبات، النوّار دايماً كايكونو ملوّنين. هادشي كايشمل لبتيلات، و عند شي نبتات، لغزلات، لميْبّرات، لعلمات، لمبايض، حبوب اللقاح، لقلوما، و حتى النيكطار. هاد اللوان كايتنتجو ف الساس من واحد الصبغة بيولوجية (biological pigments)، لي هوما موليكيلات (جزيئات) لي يمكن ليهم يمصّو و يكسبو الطّاقة من الضو. الصبغات لخاصين، و ب التالي اللوان، كايعطيو منافع منوّعين ل النبتة. هاد لمنافع كايشملو حماية النبتة من التدهوير و ليرشاد ديال اللقّاحا–ب جوج بيهم عامين و خاصين–ل النبتة.

اللون، ولا مفعولات اللون، يقدر يتنتجو عاوتاني ب التلوينة لقلداوية (structural coloration)، فين اللون كايتنتج ب قلدات ݣليويلين ف السورفاص كايعكّلو موجات الضو. هادشي كايشمل التقزاح (iridescence؛ كيف ما عند شي توليپات) و لبلّارات الضوّيين (photonic crystals، ولا لكريسطالات لفوطونيين؛ بحال ف نوّارة لبيضة النبيلة)، لي كايحِيدو (diffract؛ كايهرّسو موجات الضو ب شكل مفرّق) الضو ب تخدام خدودات صغيورين. اللون ديال النوّار يقدر عاوتاني يتبدل؛ شي خطرات هادشي كايخدْم بحال شي سينيال ل اللقّاحا (بحال ف لبنفسج موّ ݣرون). التبدال يقدر عاوتاني يوقع كا حاصول على درجة لحرارة؛ لPH (لقدرة لهيدروجينية ولا قياس لحمضية)، كيف ما ف لأنثوزانثينات (anthoxanthins) لي كايتلقاو ف ݣنس لغرّافية (Hydrangea)؛ لفلزّات؛ السكريات؛ و شكل لخلية.

الديڤلوپمو

الديڤلوپمو النوّاري كايبدا ب الطرونسفورماسيو د النمو لخضري ل النمو النوٌاري. هادشي كايتريݣل ب عوامل جينيين و بيئيين. التشكال لختامي د شي نوّارة كايبدا ب واحد النسيج تقسامي دروي فسيلي (SAM): واحد لݣروپ ديال لخلايا التقساميين مكلفين ب لوراق و لبراعم. لأعضاء لي كايصايبو النوّارة—ف لغالبية ديال لحالات كويّسات، بتيلات، و پارتيات د الدكر و ديال النتوا–كايكبرو برّا شي نسيج تقسامي (meristem؛ ولا بارضة)، لي كايشكّلها النسيج التقسامي الدروي لفسيلي. لموضيل ABC د ديڤلوپمو النوّار يقدر يتخدّم، على قبل شلّا نبتات، باش يوصف كيفاش ݣروپات ديال الجينات كايخدمو معا بعضياتهم باش يحفّزو تشكال كل عضو كايتنتج. ب شكل عام، ݣاع الجوايه ديال ديڤلوپمو النوّار كايتكونطرولاو ب واحد الشبكة تنضامية جينية (gene regulatory network) ديال جينات صندوق-MADS (MADS-box) مختصين–لي كايشملو جينات ABC–و لپروتينات لمقرونين. ب النسبة ل النبات، التحوال ل التنوار هو تبدال رايسي و كايخصو يطرا ف وقيتة لايقة باش يتضمن النجاح لمكاتري. النبتات كايحدّدو هاد لوقت ب تاويل ليمارات الدخلانيين و لبيئيين ب جوج، بحال طولة النهار.

موضيل الABC كان لموضيل اللولاني لي وحّد لمبادئ ف ديڤلوپمو النوّار، و ركايزو الساسيين تصايبو بلي كايطّبقو ف جل النبتات لمنوّرين. كايوصف كيفاش تلاتة لݣروپات د الجينات–A، B، C–كايكونو مكلفين ب الديڤلوپمو ديال النوّارة. النشاطات د هاد لݣروپات التلاتة ديال الجينات كايتفاعلو معا بعضياتهم باش يحدّدو لهويات الديڤلوپماويين ديال عضو لمنشم (primordia) وسط النسيج التقسامي الدروي (apical meristem) النوّاري. بوحدو، شي جين كاينتج لكويسات ف اللفّة اللولى. معا بعضياتهم، A و B كاينتجو لبتيلات ف اللفّة الجاوجة، الجينات C بوحديتهم كاينتجو لفويكيات ف السونطر د النوّارة. C و B ب جوج بيهم كاينتجو لغزلات ف اللفّة التالتة. هادشي عاوتاني يمكن ليه يتجبّد ل موضيل ABCDE لمعقد كتر، لي كايزيد جوج ݣروپات مزيودين د الجينات باش يفسّر الديڤلوپمو د قلدات بحال لبويضات.

التحوال ل التزوهير (flowering؛ التنوار) هو واحد من التبدال لمرحاليين الرايسيين لي كادّيرهم شي نبتة وقيت دورة حياتها. التحوال كايخصو يوقع ف شي وقيتة مخيّرة ل التخصاب و ل تشكال الزريعة، باش ف التالي يضمنو نجاح مكاتري ماكسيموم. باش تلبّي هاد لحاجات، النبتة يمكن ليها تتوّل (تأوّل) ليمارات الدخلانيين و لبيئيين لمهمين بحال: التبدالات ف نيڤوات هورمون النبات (كيف ما الجيبريلين)، درجة لحرارة لموسمية، و التبدالات ف طولة النهار (Photoperiodism؛ ولا لفترة الضوّية). بزاف ديال النبتات، بحال شلا نبتات لي عندهم كتر من عاماين ف تيساع لعمر و لي عندهم عاماين ف تيساع لعمر، كايخضهم يتعرّضو ل لبرد باش ينوّرو. هاد ليمارات كايتتوّلو ب شكل موليكي من واحد السينيال معقد كايعيطو ليه لفلوريجين (النوّارجين)، لي كايشمل واحد التنويعة د الجينات. لفلوريجين كاينتج ف لوراق ف ضروف مخيّرة ب شكل مكاتري و كايطلق مفعولو ف قماقم الساق باش يبزز لقليب من الديڤلوپمو د لوراق ل الديڤلوپمو د النوّار. غير كايدّڤلوپاو، النوار يقدر يحلّو و يسدّو ب شكل عزايلي بتيلاتهم ف وقات مبدلين من ليوم؛ ف لعادة جوايه لغسق و لفجر. يقدرو هوما عاوتاني يتبعو طريق الشمش باش يبقاو دافيين–ب شكل محتامل باش يستافدو ل راسهم و باش يجدبو اللقّاحا. هاد لميكانيزمات ب جوج كايتكونطرولاو ب واحد الريتم يوماوي (circadian rhythm؛ ولا الريتم الليلونهاري) و كا ستيجابة ل التبدالات لبيئيين.

التلقاح

ماحد النوّارات كايكونو لأعضاء لمكاتريين ديال النبتة، هوما كايتوسّطو لملامّة د لماني، لي كاينين وسط حبوب اللقاح، معا لبيضات (لخلية د لبيض) ف لبويضات–لي كاينين وسط لمبيض. التلقاح ف هاد لحركة د حبوب اللقاح من لپارتيات د الدكر ل پارتيات د النتوا. هادشي كايطرا ياما بينات النوّارات (ولا من شي پارتية د شي نوّارة ل پارتية خرى) من نفس النبتة، كيف ما ف التلقاح الداتي، ولا بينات النوّار من نبتات مبدلين، بحال ف التلقاح لمكروز. التلقاح لمكروز كايكون شايع كتر عند النبتات لمزوهرين لاحقاش كايزيد ف التبدال الجيني. التلقاح ف لعادة كايطرا منين النوّارة كاتكون موسعة كاملة و وضيفية.

النبتات لمنوّرين ف لعادة كايواجهو ضغط تطوري (evolutionary pressure) باش يحسّنو التحوال ديال حبوب اللقاح دياولهم و هادشي كاينعاكس ف لمورفولوجيا ديال نوّاراتهم و السطراتيجيات لمكاتريين دياولهم. لأجوّات لي كاينقلو حبوب اللقاح بينات النبات كايسمّيوهم نقّالات (vectors). جوايه 80٪ من النبتات لمنوّرين كايخدّمو النقّالات لبيوتيكيين ولا لحيّين. نبات خر كايخدّمو النقّالات اللابيوتيكيين ولا اللاحيّين، ولا شي تخليطة بينات الجوج.

التلقاح لبيوتيكي

النوّاور لي كايخدّمو النقّالات لبيوتيكيين كايجدبو و كايخدّمو لحيوانات ف نقيل حبوب اللقاح من نوّارة ل وحدة خرى. هاد النوّارات دايماً كايكونو مشكلين و مديزاينين باش يجدبو اللقّاحا و باش يضمنو بلي حبوب اللقاح تحوّلو ب شكل فعّال. النوّار ب شكل شايع كتر كايخدّمو لبخوش، و لايني حتى: الطيور، سحات الليل، لوزاغي، لبزوليات لخرين، لغلال و لبعبول، و ف شي حالات نادرين، لقشريات و الدود. الجايزة لمعطية ل اللقّاحا من النوّار باش يشجعو التلقاح: لماكلة (بحال حبوب اللقاح، النشا، ولا النيكطار)، لملاقيين، التدريقة، موضع فين يكبّرو صغارهم، و لمسافدة لمزوّرة (pseudocopulation؛ ولا التقوليب الجنسي). ف اللخرة، النوّارة كاتكون ريحتها ولا شكلها كايشجّع لهيجان الجنسي (sexual arousal) و التلقاح من لمجامعة (intercourse) اللاحقة. هوما عاوتاني يقدرو يتجدبو ب شلا حفّازات بحال لقد و الريحة (بحال ف نوّارات الجيفة). اللون حتى هو كايكون واحد لعامل، و كايشمل لݣيدات د النيكطار (nectar guides؛ مرشدات النيكطار)، لي كايورّيو ل اللقّاحا فين يقلّبو على النيكطار، هوما يقدرو يكونو مقشوعين غير تحت الشعا التحت بنفسجي.

شلا نوّارات عندهم علاقات قرابين معا غير لقاّح واحد ولا شوية ديال اللقّاحا لمحددين. هوما يقدرو يكونو مهيكلين باش يخلّيو ولا يشجّعو التلقاح من هاد لكائنات لحيين. هادشي كايزيد لمفعولية، حيتاش كاينة واحد الشونص كبر ديال التلقاح جاية من حبوب اللقاح د نفس النوع من النبتة. هاد لعلاقة لقريبة هي واحد لمتال على التطور لمشروك (coevolution)، ماحد النبتة و اللقّاح ب جوج بيهم دّيڤلوپاو ف وقيتة طويلة باش يلپيو لحاجات د كل واحد.

التلقاح اللابيوتيكي

النوّارات لي كايخدّمو النقّالات اللابيوتيكيين، ولا اللاحيين، كايخدّمو الريح، ولا لما ب شكل قل ف الشيوع، باش يحرّكو حبوب اللقاح من نوّارة ل نوّارة. النواع لي كايفرّقو حبوب اللقاح ب الريح ماكايحتاجوش يجدبو اللقّاحا و عليها كايميلو باش ماينوّضوش نوّارات كبار، فتّانين، ولا ملوّنين، و ماكايكونش عندهم لا غدد النيكطار، لا شي ريحة ملحوضة. ف لوقيتة لي حبوب اللقاح ديال النوّارات لملقحين ب لبخوش كايكونو ف لعادة كبار، معلّكين، ةدو معبيين ب لپروتين باش يخدْم كا "جايزة"، حبوب اللقاح د النوّارات لملقحين ب الريح كايكونو عادةً صغار، خفاف ب زايد، رطبين، و عندهم قيمة تقواتية قليلة.

التخصاب و الديڤلوپمو د الزريعة

التخصاب هو الدّميج ديال لخلايا الجنسيين نتاع الدكر و النتوا باش ينتجو واحد لبويضة مخصّبة (zygote؛ ولا زيݣوط)، لي منها كايدّيڤلوپا شي كائن حي. عند بنادم، لمجامعة الجنسية كاتودّي ل طريح د لخلايا لمنويين (لخلايا الزريعة) ف لمهبل. وخا ماشي كاملين بيهم كاينجاو، هوما كايبقاو مسافرين حتى كاتوصل شي حيوان منوي ل لبيضة ف عنبوب فالوپ (fallopian tube)، فين لخلايا الجنسيين ديال الدكر و النتوا كايدّمجو ف عملية التخصاب.

عند النبات لمنوّر، التخصاب كايسبقو التلقاح، لي هو التحراك ديال حبوب اللقاح من لغزلة ل لفويكية. كايشمل لمواحدة لمشكّلة (plasmogamy)، لي هي الدّميج ديال پروطوپلاسطات (protoplasts، ولا لمشکلات اللوالى؛ خلايا بلا حيط لخلية)، و لمواحدة النووية (karyogamy)، لي هي الدّميج ديال النواوات. منين حبة اللقاح كاتّحط عل لعلمة د النوّارة، كاتبدا تصايب واحد لعنبوب د حبوب اللقاح، لي دايز لتحت من لقلام ل الداخل ديال لمبيض. من مور ختيراق لپارتية لوسطانية ݣاع ديال لمبيض، حبة اللقاح كادخل ل لاپاراي د لبيضة و كاتّرشد ب واحد لخلية متخصّة.

من بعد، لختمة ديال عنبوب حبوب اللقاح كايطّرطق و كايطلق جوج خلايا نطفيين (sperm cells)، وحدة فيهم كاتشق طريقها ل شي بيضة، و ف نفس لوقت عاوتاني كاتخسر لغشا السيطوپلازمي ديالها و بزاف من لمادّة لي بحال الجيل لي معمّرة لخلايا دياولها. النوا ديال النطفة (Sperm) موراها كايدّمج معا النوا د لبيضة، هادشي لي كايودّي ل تشكال د شي زيݣوط (بويضة مخصبة)؛ لي هي خلية ديپلويدية (diploid)، فيها جوج كوپيات من كل كروموزوم. النبتات لمنوّرين كايدوزو من التخصاب لمدوبل (double fertilisation)، لي كايشمل لمواحدة لمشكّلة و لمواحدة النووية ب جوج بيهم. ف التخصاب لمدوبل، لخلية النطفية الجاوجة ف اللخر حتى كاتدّمج معا النوا جاوجية لقطاب ديال لخلية لمركزية. ماحد ݣاع النواوات ب تلاتة كايكونو هاپلويديين (haploid؛ خلايا ب صف واحد ديال لكروموزومات)، هوما كايودّيو ل واحد النوا كبير د النسيج التقواتي لي كايكون طريپلويدي (خلايا ب تلاتة الصفوفا د لكروموزومات).

الديڤلوپمو د الزريعة و لفروتة

من بعد التشكال ديالو، الزيݣوط كايبدا يكبر على طريق تقسامات خلويين و نوويين، كايعيّطو عليهم التقسام لمساوي (mitosis؛ التقسام لفتيلي، التاميطوسيت)، ف اللخر كايولّي واحد لݣروپ صغير ديال لخلايا. طرف واحد من الزيݣوط كايولّي هو لمضيغة (embryo، ولا الجنين لبكراني)، أما الطرف لاخر كايولّي عليليقة (suspensor)؛ واحد لقلدة لي كاتخلّي لمضيغة تدخل بزز ل لبديرة الدخلانية (endosperm) و لي ݣاعما كادّيطيكطا ف اللاحق. جوج ݣروپات صغار من لخلايا حتى هوما كايتشكلو ف هاد لوقيتة، لي في اللاحق كايولّيو الزليّفة (cotyledon، ولا لفلقة)، ولا لورقة لبديانية، لي كاتخدْم خزنة ديال لينيرجي. لمرحالة الجاية كاتشمل لكبورية ديال شلا قلادي ساروتيين، كيف بحال: الجدر لمضيغي (Radicle)، الساق لمضيغي (Epicotyl)، و لملاقية بينات الجدر و التنبيتات لخضريين(Hypocotyl). ف اللخر، النسيج لوعاوي كايدّيڤلوپا جوايه الزريعة.

وسط لمبيض، كاتّشكل الزريعة من لبويضة، و كاتكبر ل فروتة. ݣاع لپارتيات النوّاريين الساسيين لخرين كايدبلو و يموتو وقيت هاد الديڤلوپمو بحال: لقلام، لعلمة، لغزلات، لبتيلات، و لكويسات. هاد لعملية كاتسمّى الشرف النوّاري (loral senescence)؛ دايماً كايتزرّب ولا يبدا معا التكمال ديال التلقاح. لموت كاتّفضّل حيتاش النوّار كايكلّف النبتة؛ وخا هاكداك، النوّار يقدر يبقى عايش ما بين سوايع قلال ل شلّا شهورا. لفروتة فيها تلاتة ديال قلدات ساسيين: الطبقة لبرانية ديال لقشرة (Epicarp، غلاف التمرة السطحي)؛ لپارتية لملحّمة (Mesoxarp، طبقة التمرة لوسطانية)؛ و لعضم، ولا الطبقة الدخلانية ݣاع (Endocarp، غلاف التمرة الدخلاني). طوّاقة التمرة (pericarp)، لي تقدر تشمل وحدة قلدة وحدة ولا كتر من هادو، كاتمتّل ب شكل مجمّع حيط لفروتة–ݣاع لپارتيات من غير الزريعة. لقد، الشكل، لقصوحية، لغلوضية ديال طوّاقة التمرة كايتفاوتو على حساب لفروتات لملحمين و ليابسين لمبدلين. هاد لمزيّات كايتربطو نيشان معا لمطيود د النبتة ف تشتات الزريعة (seed dispersal)، ماحد لغرض من لفروتة هو تشجاع تمكين تشتات الزريعة و حماية الزريعة و هوما كايديرو هادشي.

تشتات الزريعة

من بعد التلقاح د شي نوّارة، التخصاب، و ف اللخر الديڤلوپمو ديال الزريعة و لفروتة، واحد لميكانيزم، ولا نقّال، كايتخدّم ف لعادة باش يشتت (Disperse؛ يفرّق) لفروتة بعيد عل النبتة. عند النبتات لمنوّرين، الزريعات كايتشتتو بعيد من النبتة على قبل باش ماتبززش لمنافسة بينات النبتة لم و النبتة لبنيّة، و حتى باش يمكّنو الستيعمار د بلايص جداد. النقّالات يقدرو ب شكل عام يتقسّمو ل جوج كاطيݣوريات: النقالات لبرانيين و النقالات الدخلانيين. النقالات لبرانيين كايجمعو لحوايج لحيّين بحال الطيور ولا سحات الليل، ولا لحوايج لي ماحيينش بحال لما و الريح. النقالات الدخلانيين، لي تعرّشو من النبتة ب راسها كايشملو، متلاً، لفروتة كاتّفرݣع باش تسرّح الزريعة، كيف ما عند نبتة الدبق لقزم (dwarf mistletoes).

التطور

النوّار تأصّل بينات 150 و 190 مليون عام هادي، وقيت لفترة الجوراسية. وخا التحاليل لموليكيين كاينعّتو ب الضهور لبكراني ديال خابياويات الزرّيعة (angiosperms)–النبتات لمزوهرين، الدليل التحديدي لبكراني ݣاع من التسجال لفوصيلي جا من بينات 125 و 130 مليون عام هادي، وقيت لفترة الطاباشيرية. لوقيتة لمضبوطة فين خابياويات الزرّيعة تعرّشو من النبتات الزريعاتيين لخرين هي واحد التسويلة كلاسيكية محلولة ف لبيولوجيا التطورية. قبل لمجية ديال النوّار، النبات تكاترو ب تخدام لمخارط (بحال عند عريانات الزريعة، gymnosperms)، و لبواغ (كيف ما عند النبات السراخسي، pteridophytes). التحوال ديال لوراق لي كاينتجو لبواغ ل قلدات بحال لغزلات و لفويكيات، هي أكتر لحضة مفصلية واضحة ف التطور لمعقّد ديال النوّار. كاينة واحد لمناقشة على واش هاد التبدال ولا التبدالات لخرين طراو ب شكل مدرّج ولا ب صيفتهم قلبات غفّالين بحال الطفرات لمّاتلين (homeotic mutations)، و إينا طرف من لمورفولوجيا د النوّارة بان اللول.

النوّارة كان هو أكتر بتيكار تطوري مهم عند خابياويات الزرّيعة، لاحقاش مدّات ليهم لقدرة باش يستاغلّو ب شكل فعّال اللقّاحا لحيوانيين. لمزيّات التطوريين لخرين كايشملو: لقدرة على يكون عندهم پارتيات د النتوا و د الدكور ف نفس لاكس (لمحور)؛ و على هاد لاكس عندهم فويكيات، باش يحاميو على لبويضات؛ لغزلات، باش يمدّو حبوب اللقاح؛ و غلاف النوّارة، باش يعطي لحماية. زيد على هادشي، هوما كانو سباقين ف التخصاب لمدوبل، ل سمح ب ستيتمار لينيرجي (ل بديرة دخلانية) باش يقدر يطوّل حتى ل بعد التلقاح. النابتات لعروسيين، لي كاينتجو لخلايا الجنسيين، تنقّصو ب زايد، هادشي لي سمح ب حماية كبر ل هاد لعملية لحاسمة. التأتير الشبكة ديال هاد لخصايل كانت واحد لأمن مكاتري و فعالية كبر. هادشي رد خابياويات الزرّيعة قادرين باش يجيو بلاصة شلا نبتات زريعاتيين خرين–بحال الصنوبراويات (Pinales)، السيكادات (cycads)، النباتات لݣنيطويين (Gnetophyta) و لݣينكواويات (Ginkgoales)–ف لغالبية ديال السيستيمات لإيكولوجيين.

واحد لقوة ساروتية دافعة ديال النوّارات هي التطور لمشروك (coevolution)، فين اللقّاح و النوارة كايطّورو معا بعضياتهم، دايماً على قبل مصلاحتهم ب جوج. هادشي كايكون بارز ب الضبط عند النواع د لبخوش بحال النحل، بلحق كايتلقى حتى ف لعلاقات نوّارة-لقّاح معا الطيور و سحات الليل. بزاف ديال النوّارات تطوّرو ب هاد الشكل باش يخلّيو التلقاح من نواع فلانيين سهل، و عليها مدّان فعالية كبر و ضمانة معدّلات زيْد د التلقاح. هادشي حيتاش هوما كايستقبلو حبوب لقاح قل من النواع لخرين د النبات. غير هو، هاد التعوال بين النواع لقريب كايزيد ف الريسك د النقيراض، مادام النقيراض د شي عضو كايعني علاين ب شكل ميقّن النقيراض ديال لعضو لاخر حتى هو. النوّار ديال دابا كايورّي تنويعة ديال لخصايل لمعرّشين من التطور لمشروك بحال: الشكل، لقد، السيميطرية، التوقيت د تفتاح النوّارة، اللون، الريحة، و الجوايز ديال اللقّاحا (كيف بحال حبوب اللقاح، النيكطار، و الزيوت). متلاً، نوّارات نبتة اللوٌاية الجاپونية (Japanese honeysuckle) كايتحلّو ب شكل سطراتيجي وقيت الليل باش يجدبو لفرطاطوات الليليين، لي كايكونو لقّاحا فعّالين كتر على النحل النهاري. معا لبتيكار ديال النوّارة—و لأضاپطاسيوات لخرين—خابياويات الزرّيعة تنوّعو ب الزربة. تقريباً 90٪ من ݣاع نواع النبات ديال ليابسة خابياويات الزرّيعة. هادشي راجع ل التطوّر لمشروك ب شكل ݣزوي، لي ودّى ل تخصص و ف التالي التانوايعيت (speciation؛ النتيواع)؛ فين نسمات كايتعرّشو ل نواع مبدلين. لقوة د لعلاقات نوّارة-لقّاح لقراب و النجو ديال شي نوع ب جوج بيهم كايتأترو ب التبدال د لمناخ. النقصان ف نوامر د اللقّاحا ودّى ل نقيراض شلا نبتات منورين.

الطاكسونوميا

ف الطاكسونوميا ديال النبات، لي هي الدراسة د كلاصاج و تحديد د النبات، لمورفولوجيا د نوّارات النبتة كاتّخدّم ب شكل موسّع–و كانت من زمانات اليونان لكلاسيكية علاقل. وخا كانو أعمال بكرانيين، لكتاب د 1753 ديال كارل لينيوس نواع النبات (Species Plantarum)، فين حط لكلاصاج ديال السيستيم نتاعو، كايتشاف بلي هو لعمل الطاكسونومي اللول ݣاع لي كايعتارف ب لاهمية ديال النوّار. هو ضبط 24 كلاص ديال النبات لمزوهر، ب شكل ساسي على حساب النمرة، الطولة، و التّيحاد ديال لغزلات. السيستيمات اللاحقين ف لقرن 18 و 19 ركّزو كتر على لخصايل الطبيعيين. هادشي شمل لخودان ف لبال لي بقى من النبتة، عليها النباتات لمنوّعين ماتحطوش ف نفس لݣروپات، كيف ما كان كايطرا دايماً ف السيستيم د لينيوس.

ف 1963، لبيولوجيستات غوبيغت زوكال و پيطر سنيث صاوبو لميطود ديال الطاكسونوميا لمنومرة (numerical taxonomy)، لي فرّقات بين الطاكسونات على حساب لخصايل لمورفولوجيين لمجدوْلين؛ بحال النوارات دياولهم. هادشي كان واحد لمجهود باش يخلّيو طاكسونوميا النبات كتر ف لموضوعية، و لايني هي بقات بعيدة على لكونصيپط د التطور، و عليها ماكانتش نافعة ف هاد السياق. وخا هاد لميطود و لميطودات لفايتين بحال ديال لينيوس خدّمو خصايل مورفولوجيين، شلّا بوطانيسنات (عولاما د النبات) ليوم كايوضّفو التسنسيل الجيني، دراسة لخلايا، و الدراسة ديال حبوب اللقاح. هادشي جا ب صيفتو حاصول على التحسانات ف لعلوم لمرتابطين ب لاديئين. وخا هادشي، لخصايل لمورفولوجيين بحال الطبيعة ديال النوّارة و التنويرة (inflorescence) باقيين كايصايبو لحجر الساس ديال طاكسونوميا النبات.

التخدام

على طول ألفيات، بنادم خدّمو النوّار على قبل تنويعة ديال لغراض ف جوايه مبدلين ف الدنيا، بحال التزيان، الطب، الضروݣات، لماكلة، لعطرية، الروايح (perfumes)، و الزيوت لمعطرين. بزاف ديال النوّارات كايكونو صالحين ل لماكلة و دايماً كايتخدّمو ف لمشروبات و لپلاوات، بحال الشلايض، على قبل الدوق، الريحة (Scent)، و الديكور. التنويرات (Inflorescences)، لقنابات ولا السيقان د شي نوّارات كايتوصفو ب شكل شايع بلي هوما خضرة. هادو كايشملو: لبروكولي، الشيفلور، و لقوق. النوار يقدر يتكالو خوضر من مورا لݣطيف، ولا يتنشفو و يتكالو من بعد. التافلوريست (Floristry) هو لينتاج و لبيع ديال النوّار، و كايشمل توجاد نوّارات مقطوعين جداد و تستافهم–ف مشموم، متلاً، على حساب شنو بغى لكليان.

لغالبية ديال نبات لغلّة عندهم النوّار، و كاينتجو بزاف من أكتر لمنتوجات الشايعين د لغلة–بحال الزريعة و لفروتات؛ جوايه النص من ݣاع التيرات د لغلّة كايتخدّمو باش يكبّرو تلاتة ديال النبتات لمنوّرين: الروز، لݣمح، و الدرة. النوّارات كايترقّدو باش يصايبو منهم أتايات، يا بوحدهم، كيف ما ف لاتايات لعشوبيين، ولا تخليطة معا نبتةأتاي. الزيوت لمعطرين و لمستخلصات لخرين د النوّارة كايتخدّمو ب شكل واسع ف التاعشابت و الستيخلاص ب لغليان (decoctions) حيت فيهم كيمياويات نباتيين (فيطوكيماويات) و يقدر يكون فيهم مفعولات أونتي ميكروبيين. النوّارات د شلا نبتات حتى هوما كايتخدّمو ف لينتاج ديال الضروݣ، بحال لقنّب، السوسن د الشجيرات، و عناݣية مدغشقر. شي نوّارات كايتخدّمو ف الطياب ب صيفتهم عطرية، بحال الزعفران و لقرنفل؛ لي تعرّشو من ݣنس الزعفران (Crocus) و النوع د النبتة Syzygium aromaticum ب شكل مرادف.