نمل
| لمقال مقطوع من شجرة، ما كايدي ليه تا شي مقال أخر، زيد ليان ديالو ف مقالات خرين. |
نمل
| ||
 | ||
| معلومات عامة | ||
| سمية لعيلمية | Formicidae (بييار أندريه لاتريل، 1809) | |
| لخاصية د ترتاب | فاميلة | |
| تابع ل | النَّمْلاَوات | |
| لعيشة | ||
| عايش فلفترة | 140 مليون عام قبل لميلاد | |
النمل هوما بخوش فوق جتيماعي من فاميلة النمليات (سمية علمية: Formicidae)، و هوما و الرزوزيات لقرابين ليهم و النحل، كاينتاميو ل التنضيمة غشاويات الجناوح. النمل تطورو من الجدود ديال الرزوزيات لحقيقيين ف لفترة الطاباشيرية. كتر من 13,800 نوع من واحد الطوطال د 22,000 تكلاصاو. هومايا ساهلين باش يتعرفو ب سباب لانطيرات دياولهم لمطويين ب شكل ماضي (مكوّدين) و لقلدة لمفرّزة ديالتهم لي كاتشبه ل لحزمة لي كاتصايب لخاصرات لمسلوتين دياولهم.
النمل كايصايبو مستعمارات لي كايتفاوتو ف لقد من شي عشرات د لأفراد لي ديما كايعيشو ف التجوافات الطبيعيين الصغار ل مستعمارات منضمين ب زايد لي يقدرو يعمرو نطاقات كبار ب شي عش كبير ف لقد (ولا عشاش) لي كايتشكلو من لملاين د لأفراد، ف شي حالات كايوصلو ل مياوات لملاين د لأفراد ف السوپر مستعمارات. لمستعمارات النوعيين كايتشكلو من مقامات معددين (طبقات جتيماعيين) من النتوات لعاݣرات، و بلا جناوح، و لي لغالبية فيهم خدّامات (ergates) و عسكريات (dinergates) و ݣروپات مختصين خرين. على بونت ݣاع مستعمارات النمل فيهم عاوتاني شي دكور خصبين كايسميوهم "الضرونات" و نتوا خصبة وحدة ولا كتر كايعيّطو ليها "لملكة". لمستعمارات كايتوصفو كا سوپر كائنات حيتاش النمل كايبانو بلي كايخدٔمو كيان موحّد، كايخدمو ب الجماعة معا بعضياتهم باش يفورنيو على لمستعمارة.
النمل علاين ستعمرو كل كتلة أرضية ف الدنيا. لبلايص لوحيدين لي ما فيهمش النمل لمستوطن ب شكل أصلي هوما أنطاركتيكا و شي ݣزاير معزولين ولا ماصالحينش ل لعيشة. النمل كايتزوهرو ف لإيكوسيستيمات لمداريين لفازݣين و يقدرو يفوتو لبيوماص (لكتلة لبيولوجية) لمشروكة ديال الطيور و لبزوليات لبريين مجموعين. النجاح ديالهم ف شلا بيئات راجع ل التنضام ديالهم الجتيماعي و لقدرة نتاعتهم باش يعدّلو لموايل، يستاغلو لموارد، و باش يدافعو على ريوسهم. التطور لمشروك ديالهم الطويل معا نواع خرين ودّى ل علاقات فيهم لميميك، لمعايشة، التبرزيط، و لمقايضة.
مجتمعات د النمل فيهم تقسام الشغل، التواصل بينات لفراد، و واحد لقدرة على حلان لمشاكيل لمعقدين. هاد التشابيهات معا لمجتمعات لبنادميين من شحال و هوما واحد لانسپيراسيو و موضوع ديال الدراسات. شلا تقافات بنادميين خدّمو النمل ف لكوزينة، لمداوية، و الطقوس الدينيين. شي نواع خداو تقدير على قبل دورهم كا عوامل ديال لكونطرول لبيولوجي ضد لأفات. وخا هاكداك قدرتهم على ستيغلال لموارد تقدر ترد النمل ف واحد الصراع معا بنادم، لاحقاش كايقدرو يخسّرو لغلّة و يغزيو لباطيمات و لبنايات. شي نواع، كيف ما نملة لعافية لحمرا لمستوردة (Solenopsis invicta) من أمريكا الجنوبية، كاتشاف ب صيفتها نوع غازي ف بلايص خرين ف لعالم، و دارو الساس ل ريوسهم ف بلايص تدخّلو ليهم غير علّاه.
لفاميلة نمليات (Formicidae) كاتنتامي ل التنضيمة غشاويات الجناوح (Hymenoptera)، لي كاتجمع عاوتاني دبانات لمنشار، النحل و الرزوزي. النمل تطورو من واحد النسل وسط الرزوزيات التكاكين (Ateculeata؛ مولات الشوكة)، و واحد الدراسة د 2013 كاتقتارح بلي هوما واحد لݣروپ خت ل شبيهات النحليات (Apoidea). غير هو، ماحد شبيهات النحليات فاميلة فوقانية، النمل خص يتطلّعو ل نفس لمقام. واحد الطاكسونوميا ساسية مفصّلة كتر تقتارحات ف 2020. تلاتة ديال النواع من لݣنوس لمنقارضين من لوسط د لفترة الطاباشيرية النملة الجملية (Camelomecia) الرزوزية الجملية (Camelosphecia) تبلاصاو برا النمليات، ف واحد التقسيمة مفارقة وسط لفاميلة لفوقانية لعامة شبيهات النمليات (Formicoidea)، لي، هي و شبيهات النحليات، كايصايبو لݣروپ الطالع ف لمقام شباه النملونحليات (Formicapoidina). فيرنانديس و معاونينو (2021) كايقتارحو بلي الجدود لمشروكين ديال النمل و شبيهات النحل وسط شباه النملونحليات ف لغالب وقع بكري ف اللخر ديال لفترة الجوراسية، قبل من التعراش ديالهم ف لفترة الطاباشيرية.
علاقات النمل ب فاميلات الرزوزيات مولات التكاكة
| مولات التكاكة (Aculeata) |
| |||||||||||||||||||||||||||||||||||||||||||||||||||
لموضع لفيلوجيني ديال النمليات كيف ما كايبان ف دجونسون و معاونينو (2013)[1][2]
لعلاقات بينات لفاميلات التحتانيين ديال النمل
| شباه النمليات |
| |||||||||||||||||||||||||||||||||||||||||||||||||||||||||||||||||||||||||||||||||||||||||||||
| (نمليات) |
واحد لفيلوجينيا ديال لفاميلات التحتانيين ديال النمل لباقي.[3][4][5]
*غليضات لݣرون (Cerapachyinae) كايتعتابرو مشابهات التعراش
‡ لفاميلات التحتانيين لفايتين ديال شباه الرمحيات (dorylomorph) – لمحرّكات (Ecitoninae)، لغامضات (Aenictinae)، جارات لغامضات (Aenictogitoninae)، غليضات لݣرون (Cerapachyinae)، شبيهات رقيقات لخاتم (Leptanilloidinae) – ولّاو مرادف تحت الرمحيات من برايدي و معاونينو ف 2014.[6]
}}
ف 1966، إي. أو. ويلسن و رفاقو عرفو الشياطات لفوصيليين د واحد النملة (ݣنس النملة الرزوزية؛ Sphecomyrmex) لي عاشت ف لفترة الطاباشيرية. لعيّنة، حصلات ف واحد لكهرمان متورخ ل جوايه 92 مليون عام هادي، عندها خصايل تصابو ف شي رزوزيات، و لايني ماتصابوش ف النمل لعصري. أقدم فوصيلات ديال النمل متورخين ل لوسط د لفترة الطاباشيرية، جوايه 113–100 مليون عام هادي، لي كاينتاميو ل لݣروپات الجدع لمنقارضين كيف ما نمليات هاديس (Haidomyrmecinae)، النمليات الرزوزيين (Sphecomyrminae)، و نمليات زيݣراسي (Zigrasimeciinae)، معا لفاميلات التحتانيين د النمل بانو قبالة لمسالية د لفترة الطاباشيرية 80–70 مليون عام هادي تقريباً. النمل بداو يتعرشو ب شكل مجهد وقيت التورة لأرضية د النبات لمنوّر (Angiosperm Terrestrial Revolution) و بداو يفرضو حكامهم لإيكولوجي جوايه 60 م.ع.ه. شي ݣروپات، بحال الرقيوقيات (Leptanillinae) و نمليات مارس (Martialinae)، كايتقتارحو بلي تعرّشو من النمل لبدائي لبكراني لي كانو ف لغالب مفتارسين تحت من السورفاص د لحمري.
وقيت لفترة الطاباشيرية، شي نواع قلال د النمل لبدائي توسعو ب شكل عريض ف السوپر قارة لوراسيا (النص الشمالي د لرض). التمتيلية ديالتهم ف التسجال لفوصيلي ضعيفة، ب لمقارنة معا النسمات د لبخوشات لخرين، حيت كايمتلو غير جوايه 1٪ من الدليل لفوصيلي د لبخوشات من هاد لإيرا. النمل والو فارضين حكامهم من بعد التعراش لأضاپتيڤ (adaptive radiation) ف لبدية د لفترة لپاليوجينية. ف عصر لأوليݣوسين و لميوسين، النمل ولاو كايمتلو 20–40٪ من ݣاع لبخوش لي تلقى ف لمراسب لفوصيليين لكبار. من النواع لي عاشو ف عصر لإيوسين، غير ݣنس واحد من 10 د لݣنوس لي نجى حتى ل دابا. لݣنوس الناجيين ليوما كايصايبو 56٪ د لݣنوس ف لفوصيلات د كهرمان لبلطيق (بدية لأوليݣوسين)، و 82٪ د لݣنوس من فوصيلات لكهرمان الدومينيكي (من لبدية د لميوسين كيف ما كايبان).
الطرميطات كايعيشو ف مستعمارات و شي مرّات كايعيّطو ليهم "النمل لبيض"، بلحق هوما مرتابطين ب النمل ب شكل بعيد. هومايا ف التنضيمة التحتانية مساويات الجناوح (Isoptera)، و هوما و سراق الزيتات، كايصايبو التنضيمة شبيهات سراق الزيتات (Blattodea). شباه سراق الزيت مرتابطين ب عمام لحاج، الصرّارات، و بخوشات لمجنحين لخرين لي ماكايدوزوش من ميطامورفوز كاملة. كيف ما النمل، الطرميطات كايكونو فوق جتيماعيين، ب خدّاما عاݣرين، و لايني مبدلين ب زايد ف الجينات ديال لمكاترة. لمشابهة ديال قلدتهم الجتيماعية معا ديك د النمل كاترجع ل التطور لمقارب. النمل لݣاطيفة (Velvet ants)، كايبانو بحال شي نملات كبار ف لقد، و لكن هوما رزوزيات نتوات بلا جناوح.
النمل عندهم واحد التوزيع عالمي. هومايا كايتلقاو ف ݣاع لقارات من غير أنطاركتيكا، و غير شي ݣزاير كبار قلال، بحال ݣرينلاند، إيسلاندا، شي قنات ف پولينيزيا و لݣزاير د هاواي ماعندهمش النواع لمستوطنين ب شكل أصلي ديال النمل. النمل كايعمّرو واحد النطاق عريض ديال النيشات لإيكولوجيين (ecological niches) و كايستاغلو شلا موارد مبدلين د لماكلة ب صيفتهم عواشبيين، مفتارسين ولا قمايميا مباشرين ولا لامباشرين. لغالبية ديال نواع النمل كايكونو حيوانات عامّين قارتين، بلحق شوية منهم كايكونو وكّالا مختصين. كاين واحد التبدال كايتخاد ف لبال ف لكترة د النمل على طول لموايل، كايوصلو ل الدروة ديال لكترة ف لبلايص لمداريين لفازݣين ب علاين ستة لخطرات على النمل لي كايتصابو ف لموايل لي لايقين ب شكل قل. لحكام ديالهم لإيكولوجي تدرس فيه ب شكل لولاني ب تخدام تقديرات على لبيوماص ديالتهم: عالم د النمل إي. أو. ويلسن قدّر ف 2009 بلي ف أي وقيتة النمرة الطوطال ديال النمل بينات واحد كوادريليون حتى ل عشرة كوادريليون (السلوم لقصير) (متلاً، بينات 1015 و 1016) و ب تخدام هاد التقدير هو قتارح بلي لبيوماص الطوطال ديال ݣاع النمل ف الدنيا كانت مساوية تقريباً معا لبيوماص الطوطال ديال ݣاع لبشر. تقديرات موخود فيهم لحذر كتر تصاوبو ف 2022 لي حسبو التبدالات لي من بلاصة ل بلاصة كايحطو لمساهمة لعالمية د النمل ف 12 ميݣاطون ديال لكاربون الناشف، لي كايشكل جوايه 20٪ من لمساهمة الطوطال د بنادم، و لايني كتر من ديك د الطيور لبرّيين و لبزوليات مجموعين. هاد الدراسة عاوتاني كاتحط واحد التقدير محافض ديال النمل ف جوايه 20 × 1015 (20 كوادريليون).
النمل كايتفاوتو ف لقد من 0.75 ل 52 ميليميطر، أكبر نوع هو لفوصيل النملة لمضخمة لعملاقة (Titanomyrma giganteum)، لي لملكة من هاد النوع كانت طولتها 6 سم ب تيساع الجناوح د 15 سم. النمل عندهم لوان مبدلين؛ جل النملات كايكونو ب الصفر حتى ل لحمر ولا لقهوي حتى ل لكحل، و لكن شي نواع قلال كايكونو خوضر و شي نواع مداريين فيهم واحد لبريو ميطالي (metallic lustre). كتر من 13,800 نوع معروف دابا (ب تقديرات طالعين ديال وجود محتامل د جوايه 22,000 نوع)، ب التنواع لكبر كاين ف لبلايص لمداريين. الدراسات الطاكسونوميين مكملين ف حلان لكلاصاج و السيسطيميات د النمل. الضاطاباز لأونلاين د نواع النمل، بحال AntWeb و Hymenoptera Name Server، كايعاونو ف تتباع الطراص ديال النواع لمعروفين و النوع لي عاد توصفو. السهولة النسبية لي بيها يمكن يتجمعو عيّنات د النمل و يتدرس فيهم ف لإيكوسيستيمات خلّاتهم يكونو نافعين ب صيفتهم بيومؤشرات (Bioindicators) ف الدراسات على لبيوتنواع (biodiversity).
النمل مفرّزين على لبخوشات لخرين ف مورفولوجيتهم لاحقاش عندهم أنطيرات مكروشيين (geniculate)، غدد مور جنبيين (metapleural glands)، و واحد النسيداد مجهد د التقسام لكرشي الجاوج ديالهم ل واحد الرجيّلة (petiole) دايرة بحال شي حزمة. لكسدة مقسّمة ل تلاتة د لقسام لمفرّزين (معروفين ب شكل رسمي ب الطاݣمات، tagmata): الراس، لكسدة لموسطة (mesosoma)، و لكسدة اللورانية (metasoma). الرجيّلة كاتشكل واحد لخاصرة ضيّقة بينات لكسدة لموسطة (الصدر زيد التقسام لكرشي اللول، لي مدموج فيه) و لبْطن (Gaster؛ لكرش من غير التقسامات لكرشيين لي ف الرجيّلة). الرجيّلة تقدر تتشكل ب حزمة ولا جوج حزمات (التقسام لكرشي الجاوج بوحديتو، ولا التقسامات لكرشيين الجاوجين و التالتين). النديماج الطرݣوݣصي (Tergosternal fusion)، هو منين كايدّمجو لقشرة الطرݣية (tergite) و لقشرة لݣصية (sternite؛ ولا السطيرنية) د شي تقسام معا بعضياتهم، هادشي يقدر يطرا ب شكل ݣزوي ولا ب شكل كامل ف التقسام لكرشي الجاوج، التالت و الرابع و كايتخدّم ف معرفة النوع ولا لݣنس. النديماج الطرݣوݣصي لكرشي الرابع كان كايتخدّم ف لفايت ب صيفتو كاراكطير لي ضبط لفاميلات التحتانيين د شباه لمشرارات، لمشراريات (Ponerinae) و قرابهم وسط تقسيمتهم، بلحق هادشي مابقاش كايتعتابر واحد لكاراكطير فيه لمخاصلة لمعرّشة لمماتلة (synapomorphism).
بحال مفصليات الرجلين لخرين، النمل عندهم سكوليط براني (exoskeleton)، لي هو واحد لغطا براني لي كايعطي واحد التطواق كايحمي جوايه لكسدة و واحد النقطة د الربيط ديال لعضلات، عكس السكوليط الدخلاني ديال بنادم و السنسوليات لخرين. لبخوش ماعندهمش الريّات؛ لؤكسيجين و لݣازات لخرين، بحال ديوكسيد لكاربون، كايدوزو من سكوليطاتهم لبرانيين من لڤالڤات لݣليولين لي كايسميوهم التنفيسات (spiracles). لبخوش عاوتاني ماعندهمش لوعيّة الدمّيين لمسدودين؛ ف عاوض عادشي، هوما عندهم واحد النبوب متقّب طويل و رقيق على طول لفوق د لكسدة (كايسميوه "لأبهر الضهري، dorsal aorta") لي كايخدْم بحال شي قلب، كايبومبي الدمولمف جيهة الراس، و بحال هاكدا كايݣوّدو التسركيل د لموايع الدخلانيين. السيستيم لعصبي كايتصايب من واحد لحبل عصبي كرشي لي دايز على طولة لكسدة، ب شلا عݣدات (ganglia) و عروشا على طول الحريق حتى كايوصلو ل لقنات ديال الزوايد (appendages).
الراس د شي نملة فيه شلا أعضاء حسّيين. بحال لغالبية ديال لبخوشات، النمل عندهم عينين مركبين مصايبين من شلا عدسات صغيورين لاصقين معا بعضياتهم. عينين النمل كايكونو مزيانين ف الضبيط لماضي د لحركة، بلحق ماكايمدوش شي تفراز شوفي (resolution image) د التصاور طالع. هوما عاوتاني عندهم تلاتة د لعويّنات صغار (عينين بساط) لفوق د راسهم لي كايضبطو نيڤوات الضو و الستيقطاب. ب لمقارنة معا السنسوليات، النمل كايميلو باش يكون عندهم نضر مضبب، ب الضبط عند النواع الصغر ف لقد، و شي طاكسونات تحت أرضيين قلال كايكونو عميين ف خطرة. وخا هاكداك، شي نملات، كيف ما نملة التور لأوسطرالية، عندها شوف مخيّر و قادرة على تفراز لمسافة و لقد د لأوبجيات لمحرّكين لي بعْد منها ب ميطرو. على حساب تجارب تدارو باش يطسيطو قدرتهم على التفراز بينات الطول د موجات الضو لمعزولين، شي نواع د النمل بحال كامپونوتوس بلاندوس، سولينوپسيس إينڤيكطا، و فورميكا كونيكولاريا كايتشافو بلي كايملكو واحد الدرجة من الشوف لملوّن.
جوج أنطيرات ("حساسات") كايكونو مربوطين ف الراس؛ هاد لأعضاء كايضبطو لمواد لكيماويين، كورانات لهوا، و لڤيبراسيو؛ كايتخدّمو حتى ف تدواز و ستيقبال السينيالات على طريق لمسّان. الراس فيه جوج فكاك صحاح (mandibles)، كايتخدّمو ف رفيد لماكلة، لملاعبة ب لأوبجيات، لبني د لعشاش، و على قبل الدفاع. عند شي نواع، واحد الجيب صغير (بيّتة تحت فمّية infrabuccal chamber) لداخل د لفم كاتخزْن لماكلة، باش هاد لماكلة تتدوّز ل النملات لخرين ولا اللارڤات دياولهم.
لكسدة لموسطة ("لكرش") د النملة كاتسكّن أعضاء دخلانيين مهمين، بحال السيستيمات د لمكاترة، التنفس (قصبة لهوا)، و ديال لإفراز. النملات لخدّامات من بزاف ديال النواع تموديفياو لقلدات د حطان لبيض دياولهم ل تكّاكات لي كايتخدّمو ف غليب لفرايس و الدفاع على لعشاش.
كاين تعداد الشكال (Polymorphism) عند النمل. ف لمستعمارات د شي نواع قلال، كاين واحد الطبقية كسدية–النمل لخدّام (ergates) من كلاصات د لقد مبدلين، كايعيّطو ليهم خداما صغار (micrergates)، موسطين (median)، ولا كبار (macrergates). دايماً، النمل لكبر ف لقد عندهم ريوس كبر ب شكل مامتناسبش، و ف التالي فكاك صح. لفراد من هاد الشكل د النمل كايسميوهم "لعساكريا ولا لمحاربين" (dinergates) حيتاش فكاكهم لي صحاح كايخلّيوهم يكون عندهم مفعولية كتر ف لمضاربة، وخا هاكداك كايبقاو خداما و شغلهم ماكايتبدلش بزاف على الشغل ديال لخداما لموسطين ولا الصغار. عند شي نواع، لخداما موسطين لقد كايكونو غايبين، هادشي لي كايخلق واحد التقسام كبير بينات النملات الصغار و لكبار. نمل لحباك، متلاً، عندهم واحد التوزيع قدّي جاوجي لموض (Bimodal) مفرّز. شي نواع خرين كايورّيو تبدال كمّال ف قد لخداما. لخدّاما لكبر و الصغر ف نملة لحصّاد الشرق هندية (Carebara diversa) كايورّيو واحد لفرق ديال 500 خطرة ف لوزن الناشف.
النمل لخدّام ݣاعما يمكن ليهم يديرو لملاقية؛ غير هو، ب سباب السيستيم د تحديد الجنس لهاپلوديپلويدي (haplodiploid؛ فرادي-مدوبل الصيغة الصبغية) عند النمل، لخدّاما د نواع معددين يمكن ليهم يحطو بيض مامخصبش لي كايولّيو دكور هاپلويديين، خصبين ب لكامل. الشغل د لخدّاما يقدر يتبدل معا لكبورية ف لعمر ديالهم و عند شي نواع، بحال نمل ݣربة لعسل، لخدّاما الشابّين كايتعلّفو حتى كايتنفخو لبطون (Gasters) دياولهم، و كايخدْمو ب صيفتهم خزاين حيين د لماكلة (Repletes). متلاً، هاد لخدّاما لخزاين كايدّيڤلوپاو عند نملة لعسل لميكسيكية (Myrmecocystus mexicanus). لخدّاما لكبر ف لقد ف لمستعمارة عادةً كايدّيڤلوپاو ل خزاين د لماكلة؛ و يلا هاد لخزاين تزوّلو من لمستعمارة، خدّاما خرين كايوليو خزاين بلاصتهم، هادشي لي كايبيّن الليونة د هاد التعداد الشكلي ب الضبط. هاد التعداد الشكلي ف لمورفولوجيا و السلوك د لخدّاما تشاف ف لبدو بلي كايتحدد ب عوامل بيئيين بحال التقاوت و لهورمونات لي ودّاو ل طرقان مبدلين ف الديڤلوپمو؛ وخا هاكداك، تقشعو تبدالات جينيين بينات لمقامات د لخدّاما ف النواع د ݣنس النملة لمقمقمة (Acromyrmex). هاد التعدادات د الشكل سبابهم تبدالات جينيين صغار نسبياً؛ تبدالات ف جين واحد عند نملة لعافية لحمرا لمستوردة (Solenopsis invicta) يقدر يقرر واش لمستعمارة غايكون عندها ملكة ولا بزاف د لملكات. النملة النقازة لأوسطرالية (Myrmecia pilosula) عندها غير فردة وحدة د لكروموزومات (الدكور عندهم غير كروموزوم واحد حيتاش هوما هاپلويديين)، لي هو أقل رقم د لكروموزومات معروف عند أي حيوان، هادشي لي كايردّها واحد لموضوع مهم على ود الدراسات ف علم الجينات و لبيولوجيا د الديڤلوپمو الجنين عند لبخوشات الجتيماعيين.
لحياة د شي نملة كاتبدا من واحد لبيضة. يلا لبيضة تخصّبات، لخلفة غايكونو نتوات ديپلويديين (مدوبلات الصيغة الصبغية)؛ يلا لا، غايكونو دكور هاپلويديين (فرّاديين الصيغة الصبغية). النمل كايدّيڤلوپاو من ميطامورفوز كاملة (metamorphosis) ب لمرحالات اللارڤيين (Larval) كايدوزو من واحد لمرحالة پوپية (Pupal) قبل مايعرّيو رويسهم من لپوپا ب صيفتهم بالغين. اللارڤا ب شكل كبير ماكاتكونش محرّكة و كاتوكل و كايتهلاو فيها لخدّاما. لماكلة كاتعطى ل اللارڤا على طريق التباديل التقواتي (trophallaxis)، لي هي واحد عملية فين النملة كاترجّع لماكلة السايلة لي كاتخزن ف لحوصلة (Crop). لبالغين حتى هوما كايشركو لماكلة على هاد الشكل، لي كاتخزن ف "لمعدة الجتيماعية". اللارڤات، خصوصاً ف لمرحالات اللخرانيين، يقدر تتعطاهم ماكلة صليبة، بحال لبيض التقاوتي (trophic eggs)، لي هوما پياسات د لفرايس، و الزريعة لي جابوهم لخدّاما.
اللارڤات كايكبرو من واحد السيرية ديال ربعة حتى ل خمسة د النسيلاخات (moults) باش يقفلو لمرحالة لپوپية. لپوپا عندها زوايد حرّين و مامدموجينش معا لكسدة كيف ما عند لپوپا د لفراشة. لمفارزة (Differentiation) ل ملكات و خدّامات (لي ب جوج كايكونو نتوات)، و لمقامات لمبدلين د لخدّامات، كايتأترو عند شي نواع ب التقوات لي كايتعطى ل لپوپا. التأتيرات الجينيين و لكونطرول د التعبير الجيني (gene expression) ب لبيئة د الديڤلوپمو كايكونو معقدين و تحديد لمقام باقي كمّالين ب صيفتهم موضوع د لبحات. الدكور لمجنحين د النمل، كايعيّطو ليهم ضرونات، كايعرّيو على ريوسهم من لپوپات هوما و النتوات لمجاوجات لي كايكونو ف لعادة ب الجناوح. شي نواع بحال النمل لعسكر، عندهم ملكات بلا جناوح. اللارڤات و لپوپات خصهم يتحفضو ف درجات ديال لحرارة تابتين باش يتضمن ديڤلوپمو لايق، و دايماً كايترفدو و كايتنقْلو ل شلا لبيّتات لعشيين وسط لمستعمارة.
نملة خدّامة جديدة كاتدوّز ليامات لقلال اللولين من لحياة لبالغة ديالتها و هي كاتهلى ف لملكة و الصغار. عاد من بعد كاتطلع ف لݣراض و كايولي شغلها لحفير و الشغل لاخر د لعش، و ف اللاحق كاتولي كاتحامي على لعش و لعلف. هاد التبادلات كايكونو شي خطرات على غفلة، و كايحددو شنو كايتسمى لمقامات مربوطين ب لوقت. بحال هاد التخصص ف الطاش (لمهام) لمبازي على لعمر ولا تعداد الشغل (polyethism) فايت تقتارح بلي تطوّر ب سباب كترة الضر لمشمول ف لعليف و الدفاع، هادشي لي كايردّو واحد الريسك مقبول غير ل النملات لي كايكونو كبار ف لعمر و لي ف لغالب غايموتو ب سبابات طبيعيين. عند نملة فوريل لبرازيلية لݣليولة (Forelius pusillus)، دخلة لعش كاتكون مسدودة من برا باش تحامي عل لمستعمارة من نواع النمل لفرايسيين ف وقيت لغروب كل نهار. نملة حتى تمنية د النملة لخدّامات كايݣفلو دخلة لعش من برا، ف لحقيقة هوما كايغامرو ب ريوسهم، مادام ماكاتبقى ليهم حتى شونص باش يرجعو ل لعش. مازال ماتحددش واش هاد لخدّامات لي كايبانو نتيحاريات كايكونو خدّامات كبارات ف لعمر.
مستعمارات النمل يقدر يكون عمرهم طويل. لملكات يمكن ليهم يعيشو حتى ل 30 عام، و لخدّامات كايعيشو من عام ل تلت سنين. الدكور، وخا هاكداك، عابرين كتر، كايكون عمرهم قصير ب زايد و كايبقاو عايشين غير ل شي سيمانات قلال. لملكات د النمل كايتقدّرو بلي كايعيشو 100 خطرة الطولة د عيشة لبخوشات لخلويين من نفس لقد.
النمل كايكونو نشيطين لعام كامل ف لبلايص لمداريين؛ وخا هاكداك، ف لبلايص لبرد، كاينجاو الشتا ب السبات الشتوي (hibernation). شكال اللانشاط كايكونو مبدلين و شي نواع د لبلايص لمعتادلين عندهم لارڤات كايدوزو من لحالة اللاناشطة (لخمول؛ Diapause)، ف لوقيتة لي وحدين خرين، لبالغين بوحديتهم لي كايدوّزو الشتا ف واحد لحالة ديال نشاط قليل.
واحد لمادى واسع ديال سطراتيجيات لمكاترة فايت تقشع عند نواع النمل. النتوات د شلا نواع معروفين قادرين على لمكاترة ب شكل لاجنسي على طريق لموالدة لعزرية النتوية (thelytokous parthenogenesis). ليفرازات من لغدد لأكسيسواريين عند شي نواع يمكن ليهم يبوشيو لفتحة لمناسلية د النتوا و يجنّبو النتوات من معاودة لملاقية. لغالبية ديال نواع النمل عندهم واحد السيستيم فين غير لملكة و النتوات لمجاوجات لي عندهم لقدرة على باش يتلاقاو. عكس الشوفة الشعبية، شي عشاش د النمل فيهم بزاف ديال لملكات، أما شي عشاش يقدرو يكونو بلا حتى ملكة. لخدّامات لي عندهم لقدرة على لمكاترة كايعيّطو ليهم "لخدّامات لمجوجات" (gamergates).
عند نملة الصحرا السبليونية (Cataglyphis hispanica)، لخدّامات كايتنتجو ب التكرويز د جوج نسولا مفرّزين ف لوقيتة لي الدكر و النتوا من النمل د لمكاترة كايتنتجو ب لموالدة لعزرية (parthenogenesis؛ ب شكل لاجنسي). لينتاج د لخدّامات لمكروزين ب لوجود د لملكات لمامكروزاتش و الدكور تحط عليه مصطلح "لموالدة لكروازية" (hybridogenesis). هادشي فايت تقشع ف ݣنوس لحصّادة (Messor)، النملة مو لحية (Pogonomyrmex)، تحتانية النقشة (Cataglyphis)، و نبوبية السيفة (Solenopsis). تخدام لماني د نواع خرين من النتوات تحط عليه مصطلح التبرزيط لمنوي (sperm parasitism). واحد لحالة معقدة كتر تكتاشفات ف 2025 فين لملكات د النملة لحصّادة لإيبيرية (Messor ibericus) تشافو كايحطو شي بيضات لي تديڤلوپاو ل خدّامات هادشي لي كايتواتى ب شكل جيني معا واحد النوع مبدل د النمل، النملة لحصّادة لبنّاية (Messor structor). وخا النواع ب جوج كايدّاخلو في پارتيات من لمادى نتاعهم، لمستعمارات لي تدرسو كانو ف ݣزيرة صقلية فين تصابت ن.ح. لإيبيرية بوحدها. لملكة د ن.ح. لإيبيرية ف هاد لمنطاقة كانت قارة باش تنتج الدكور ديال النملة لحصّادة لبنّاية على طريق لكلوناج د لماني ف لكياس د لماني نتاوعهم و إنتاج خدّامات مكروزات ب تخصاب لبيض ديالها ب لماني لمكلوني (لمستنسخ). لخدّامات لمكروْزات عندهم واحد لفينوتيپ د ن.ح. لبنّاية ب آديئين ميطوكوندري د ن.ح. لإيبيرية. هاد لموض د لمكاترة تحط عليه مصطلح "لموالدة لعجيبة" (xenoparous)، و لي تعرّف ب نوع واحد قادر ينتج التفريخة د نوع واحد آخر.
عند شي نواع قلال، النملات الضرونات يمكن ليهم يدخلو ل شي مستعمارة برانية و يتلاقاو معا لملكات لي ديجا تماكين كيف ما عند النمل الجيش. منين كايتهجم على النملة الضرون ف لبدو من لخدّامات، كاتطلق واحد لفيرومون د لملاقية. يلا تعرفات ب صيفتها دكر ملاقي، غادي تترفد ل لملكة على قبل لملاقية. الدكور يقدرو حتى هوما يديرو دورية ف لعش و يدابزو معا لخرين ب شقيمهم ب لفكاك دياولهم، تتقاب السكوليط لبراني ديالهم و من موراها يرشموهم ب واحد لفيرومون. الدكر لمرشوم كايتأوّل من النملات لخدّامات كا واحد لغازي و كايتقتل.
لغالبية ديال النمل كايكونو وحدانيين التفريخة (univoltine)، كايتنتجو جيل جديد كل عام. ف لوقيتة د لمجاوجة محددة النوع، النتوات لمجنحات و الدكور لمجنحين، معروفين عند عولاما د لبخوش ب لآلات (alates)، كايخلّيو لمستعمارة ف واحد الطيرة معروفة ب سمية طيرة لمجاوجة (nuptial flight). هاد الطيرة ف لعادة كاطرا ف اللخر د الربيع ولا بدية الصيف منين الجو كايكون سخون و فيه الرطوبة. الصهد كايخلّي الطيران يكون سهل، و الشتا لي عاد كاتكون صابّة كاتخلّي لوطا ليْن على قبل لملكات لمجاوجات باش يحفرو لعشاش. الدكور عادةً كايطيرو قبل من النتوات. الدكور من بعد كايخدّمو ليمارات الشوفيين باش يصيبو شي موضع مشروم ديال لملاقية، متلاً، شي علمة أرضية بحال شي شجرة د الصنوبر فين الدكور لخرين لي ف لمنطاقة كايتجمعو. الدكور كايفرْزو واحد لفيرون د لملاقية لي كاتبعو النتوا. الدكور كايركبو على النتوات ف لهوا، بلحق لعملية ديال لملاقية د بصح كاتطرا ف لعادة ف لوطا. النتوات د شي نواع كايتلاقاو غير معا دكر واحد ولايني عند وحدين خرين كايتلاقاو حتى معا عشرة ولا كتر، و كايخزنو لماني ف لكياس لمنويين (spermathecae) نتاوعهم. لݣنس قلبية لبرݣمة (Cardiocondyla) فيه نواع ب دكور مجنحين و مامجنحينش، فين اللخرين غايتلاقاو غير معا النتوات لي كايعيشو ف نفس لعش. شي نواع ف لݣنس ترزاو ليهم الدكور لمجنحين ف خطرة، و كاينتجو غير الدكور بلا جناوح. عند النوع النملة قلبية لبرݣمة لأنيقة (C. elegans)، لخدّامات يقدرو ينقلو لملكات لي عاد بانو ل عشاش خرين د نفس النوع فين الدكور بلا جناوح من لمستعمارات لمامرتابطينش يقدرو يتلاقاو معاهم، لي هو واحد لأضاپطاسيو سلوكية لي تقدر تقلل ف الشونص د لمجاوجة الدخلانية.
النوع هيپوپونيرا أوپاسيور (Hypoponera opacior) كاتخرّج ملكات و دكور مجنحين و مامجنحينش. لآلاتات لمجنحين كايتلاقاو ف طيرات د لمجاوجة ف شهر يونيو، و لايني لملكات و الدكور لي بلا جناوح عندهم واحد شكل مبدل ديال لمكاترة. وقيت لخريف، لملكات لمامجنحاتش كايتلاقاو وسط لعش. من بعد، لمستعمارة كاتفرْق و لملكة كاتمشي ف حالها معا ب واحد لحق من لخدّامات د لمستعمارة، على قبل باش تبدا مستعمارة جديدة. لملكة كايخصها تخلْي لعش، ماحد لخدّامات غايجرّبو يقتلوها يلا مامشاتش ف حالها. الدكور لي بلا جناوح كايتلاقاو معا لملكات و هوما مازال شرنقات (cocoons)، و عكس ݣنس قلبية لبرݣمة، ماكايطايفوش. الدكور كايتلاقاو معا لملكات ل 40 ساعة تقريباً، و كايتشاف بلي كايعسّو على لملكات على ود باش يتجنبو الدكور لخرين يتلاقاو معاهم.
النتوات لي تلاقاو كايقلّبو من بعد على شي بلاصة صالحة باش يبنيو شي مستعمارة. تماكين، كايݣرضو جناوحهم ب تخدام الشواك لقصبيين (Tibial spurs) و كايبداو يحطو و يتهلاو ف لبيض. النتوات يقدرو يخصّبو ب شكل تعازيلي مستقبل لبيضات ب لماني لمخزّن باش يتنتجو لخدّامات الديپلويديين ولا يحطو بيضات هاپلويديين مامخصبينش باش ينتجو الضرونات. لخدّامات لي كايفقسو هوما اللولات، معروفات ب سمية النملات لقزميات (nanitics)، كايكونو ضعف و صغر ف لقد على لخدّامات اللاحقات و لكن كايبداو الشغل ف لمستعمارة فيساع. هوما كايكبّرو لعش، كايسرحو على قبل لماكلة، و كايتهلاو ف لبيضات لخرين. النواع لي عندهم بزاف د لملكات يقدر يكون عندهم شي ملكة كاتخلّي لعش هي و شي خدّامات باش يلقاو شي مستعمارة ف شي موضع خر، لي هي واحد لعملية كاتشبه ل التݣجݣيج عند نحل لعسل.
النوع النوعي د النمل عندو مستعمارة شادّة عش واحد، كاتسكّن ملكة ولا كتر، فين التفريخة كاتكبر. وخا هاكداك كاين كتر من 150 نوع ديال النمل ف 49 ݣنس لي معروف بلي عندهم مستعمارات مشكلين من شلا عشاش كاين تيساع بيناتهم. هاد لمستعمارات معددات السكنة (Polydomous) عندهم ماكلة و خدّامات كايتحركو مابين لعشاش. لعضوية د شي مستعمارة كاتعرف ب الستيجابة د النملات لخدّامات لي كايعرفو واش شي فرد كاينتامي ل لمستعمارة نتاعتهم ولا لا. واحد لكوكطيل سينياتور ديال لمواد لكيماويين د سورفاص لكسدة (كايعيّطو ليهم حتى هيدروكاربونات الجليّدة ولا CHS) كايصايب داكشي لي كايسميوه ريحة لمستعمارة لي يمكن ل لأعضاء لخرين يفرّزوها. شي نواع د النمل كايبانو بلي قل ف التمييز؛ عند نملة لأرجونتين (Linepithema humile)، لخدّامات لي تنقلو من شي مستعمارة ف أي قنت من الميكسيك و جنوب ميريكان كايتقبلو ف أي مستعمارة خرى ف نفس لمنطاقة. ب شكل مشابه، لخدّامات من لمستعمارات لي كاينين ف أوروپا كايتقبلو ف أي مستعمارة خرى وسط أوروپا، بلحق ماشي من لمستعمارات لي ف لأمريكيتين. التأويل د هاد لمراقبات تتناقش فيه و شي وحدين حطو على هاد النسمات لكبار مصطلح سوپر-مستعمارة ف لوقيتة لي وحدين خرين حطو على هاد النسمات مصطلح وحدانيات الستيعمار.
النمل كايتواصلو معا بعضياتهم ب تخدام لفيرومونات، الصوات، و لمسّان، كايخدّمو السورفاص د لحمري باش يخلّيو سكّات لفيرومون لي يقدر يتبعوهم نملات خرين. عند النواع لي كايرعاو ف ݣروپات، النملة لي كاتلقى لماكلة كاترشم واحد السكّة (علمة طريق) و هي راجعة ل لمستعمارة؛ هاد السكّة كايتبعوها نملات خرين، هاد النملات من موراها كايعززو هاد السكّة منين كايتمو راجعين ب لماكلة ل لمستعمارة. منين لعوينة د لماكلة كاتقاضى، حتى شي علمة جديدة ماكاترشم من النملات الراجعات و الريحة كاتبدا تتبدد ب شوية ب شوية. هاد السلوك كايعاون النمل ف لمعاملة معا التبدالات ف لبيئة. متلاً، منين شي طريق موكّد كايودّي ل شي عوينة د لماكلة كايتحبس ب شي عائق، النملات السارحات كايخلّيو الطريق باش يصيبو شي طرقان جداد. يلا شي نملة فلحات، ف الرجوع ديالها، كاتخلّي واحد السكّة جديدة لي كاتكون أقصر طريق. السكّات لفالحين كايتبعوهم نمل كتر، هادشي لي كايعزز طرقان حسن و ب شوية ب شوية كايبيّن أحسن طريق.
النمل كايخدّمو لفيرومونات ماشي غير على قبل رشيم السكات. شي نملة مبجوغة كاتطلق واحد لفيرومون آلارم لي كايسيفط النملات لقريبات ل لاطاك مجعورات و كايجدب نمل كتر من لقنات لبعاد. نواع معددين د النمل كايخدّمو ݣاع "لفيرومونات لپروپاݣانضا" باش يشوّشو عل النمل لعدو و يخلّيوهم يضاربو بيناتهم. لفيرومونات كايتنتجو من تنويعة عريضة ديال لقلدات بحال غدد دوِفوغ (Dufour's glands)، غدد السم، و لغدد ف لمصران اللوراني (hindgut)، الديّالة (pygidium)، لݣص (sternum)، و لقصبة اللورانية (hind tibia). لفيرومونات عاوتاني كايوقع ليهم كايتبادلو، كايتخلّطو معا لماكلة، و كايتدوّزو ب التباديل التقواتي (trophallaxis)، لي كاينقل لمعلومة وسط لمستعمارة. هادشي كايخلّي النملات لخرين يضبطو إينا ݣروپات طاش (متلاً، التقلاب على لماكلة ولا التهلية ف لعش) كاينتاميو ليهم لاعضاء لخرين ديال لمستعمارة. عند نواع د النمل ب مقامات د لملكة، منين لملكة لحاكمة كاتحبس لينتاج د شي فيرومون فلاني، لخدّامات كايبداو يكبّرو ملكات جداد ف لمستعمارة.
شي نملات كايتنتجو الصوات ب التصرصير (stridulation؛ طليق الصوت ب حكان طراف من لكسدة)، ب تخدام تقسامات لبْطن و فكاكهم. الصوات يقدرو يتخدّمو على قبل التواصل معا لاعضاء د لمستعمارة ولا معا النواع لخرين.
النمل كايهجمو و كايحاميو على ريوسهم ب لعضان، و عند شي نواع، ب التكّان لي ف لغالب كايكون ب لحݣين ولا بخّان لمواد لكيماويين. نملات لقرطاسة (ݣنس قريبة لمشرارة، Paraponera)، لي كاينين ف أمريكا الجنوبية و لوسطانية، كايتعتابرو بلي كايملكو أكتر تكة كاتوعّت من ݣاع لبخاخش، وخا ݣاعما كاتكون قتالة ل لبنادم. هاد التكة تعطى ليها أزيْد معدال ف موشّر شميت د تقصاح التكة. (Schmidt sting pain index).
التكة د النملات النقازات تقدر تكون قتالة ل لبنادم، و بدا كايدّيڤلوپا واحد لأونتي-سم على وديت هادشي. نمل لعافية، لي هوما نواع ف ݣنس نبوبية السيفة، كايكونو فرّاديين من نوعهم لاحقاش عندهم واحد لكيس سمي فيه شبيهات قلويات لپيپيريدين (piperidine alkaloids). التكات نتاوعهم كايوعّتو و يمكن يكونو خطيرين على الناس الزايدين ف لحساسية. النملات من لفاميلة التحتانية نميّيليات (Formicinae) كايفرْزو واحد السم (Poison) من لغدد دياولهم، لي مصايب ف الساس من حمض النمل (formic acid؛ حمض لفورميك).
نمل فكاك لمصيدة من ݣنس لمقاتلة لمسننة (Odontomachus) مسلحين ب فكاك كايعيّطو ليهم فكاك لمصيدة (trap-jaws)، لي كايشقمو زرب من أي زايدة (appendages) فريس وسط مملاكة لحيوان. واحد الدراسة على أوضونطوماتشوس باوري (Odontomachus bauri) سجلات دروة ديال الزربات بينات 126 و 230 كم/ساعة، ب فكاك كايتسدو بينات 130 ميكروتانية ف لمتوسط. النمل تقشعو عاوتاني كايخدّمو فكاكهم كا منجنيق باش يلوحو لمدرّمين بعيد ولا يزاوطو ريوسهم ل اللور باش يهربو من شي تهديد. قبل ما كاتضرب، النملة كاتحل فكاكها عريض ب شكل شديد و كاتقفل عليهم ف نفس لوضعية ب واحد لميكانيزم دخلاني. لينيرجي كاتخزن ف واحد لبانضا غليضة ديال لعضلات و كاتسرّح ب شكل مفرݣع منين كاتّزند ب التحفيز د لاعضاء لحسيين لي كايشبهو ل الزغب وسط لفكاك. لفكاك عاوتاني كايسمحو ب التحراكات التقال و الدقيقين على قبل الطاشات لخرين. نمل فكاك لمصيدة تشافو عاوتاني ف لمشراريات لخرين بحال ݣنس فوقانية الزغب (Anochetus)، و حتى ف ݣنوس ف قبيلة لمعليات (Attini)، بحال لعضاضة (Daceton)، ممدودة لفك (Orectognathus)، و منفوخة لݣادومة (Strumigenys)، لي تشافو كا إيكزومپلات على التطور لمقارب.
النملة لمفرݣعة لماليزية ف لݣروپ مقوسة الضهر السطوانية (Camponotus cylindricus) من ݣنس مقوسة الضهر عندها غدد فكيين مكبرين لي كايتمدو وسط لبطن ديالهم. يلا لمطايفة كفاست، شي نملة خدّامة تقدر تدير واحد لفعلة ختامية ديال لغيرية النتيحتارية (Autothysis؛ التضحية الداتية) ب تشراݣ لغشا ديال لبطن ديالها، هادشي لي كايخلّي لمضمون د لغدد لفكيين دياولها يتفرݣعو من لموضع الدخلاني د راسها، ب طليق د واحد ليفراز سام و كايحرق فيه لآسيطوفينون (acetophenones) و لمواد لكيماويين لخرين لي كايجمّدو لحركة ديال لبخوشات الصغار لهاجمين. لخدّامة ف اللخر كاتموت.
زيد على الدفاع ضد لمفتارسين، النمل كايخصهم يحاميو على لمستعمارات دياولهم من لمرّاضات (pathogens). ليفرازات من لغدة لمور جنبية، لفرّادية من نوعها عند النمل، كايطلقو واحد لمادى معقد من لمواد لكيماويين كايجمعو بزاف ديال لمواد ب مزيّات أونتيبيوتيكيين. شي خدّامات كايتهلاو ف النقا د لمستعمارة و النشاطات دياولهم كايشملو تنحية الجتت (necrophoresis)، لي هو التصراف ديال لفراد لي ماتو وسط لعش. حمض الزيت (Oleic acid) تعرف ب صيفتو لمركب لكيماوي لمطلوق من النمل لميّت لي كايزند السلوك د تنحية الجتت ف النوع آطا ميكسيكانا (Atta mexicana)، أما لخدّامات د لينيپيثيما هوميل (Linepithema humile) كايستاجبو ل غياب لخصايل د لمواد لكيماويين (ضوليتشوديال و إيريدوميرميسين) لحاضرين ف الجليّدة د رفاقهم لعايشين ف لعش باش يزندو واحد السلوك مشابه. عند ميݣاپونيرا أناليس (Megaponera analis)، النملات لمعطوبات كايتداواو من رافاقهم د لعش ب إفرازات من لغدد لمور جنبيين دياولهم لي كايحميوهم من التعفان. نمل د ݣنس مقوسة الضهر (Camponotus) ماعندهمش لغدد لمور جنبيين و لخدّامات كامپونوتوس ماكولاتوس (Camponotus maculatus) و حتى لخدّامات ك. فلوريدانوس (C. floridanus) تصابو كايقطعو كراوع النملات لمعطوبات منين لفخد كايتعطب. شي فخد معطوب كايرفد معاه واحد الريسك كبر ديال التعفان عكس شي عطبة ف لقصبة (التيبيا).
لعشاش يقدرو يمنعو من التهديدات لفيزيكيين بحال لفيضان و السخونية فوق لحد ب واحد لقلدة معمارية د لعش معقدة. لخدّامات د كاطاولاكوس موتيكوس (Cataulacus muticus)، لي هوما واحد النوع شجري لي كايعيشو ف تجوافات النبات، كايستاجبو ل لفيضان ب شريب لما وسط لعش، و كايصرّفوه برّا. كامپونوتوس أنديرسيني، لي لعشاش دياولهم كايكونو ف التجوافات د الشجر ف لغابات الشتويين (لمانݣروڤ)، كايتعاملو معا التغماس ديالهم تحت لما ب لقليب ل التنفاس اللاؤكسيجيني (anaerobic respiration).
شلا حيوانات يقدرو يتعلمو السلوكات ب التقليد، و لكن النمل يقدرو يكونو لݣروپ لفرّادي من غير لبزوليات فين التعلام التفاعلي فايت تّقشع. شي نملة معلمة قلّابة على لماكلة )Forager) من النوع طيمنوثوراكس ألببپينيس (Temnothorax albipennis)تقدر تݣوّد شي رفيقة ف لعش باقية نيّة (Naive nestmate) ل لماكلة لي عاد تكتاشفات على طريق الجرا لمرادف (tandem running). النملة التابعة كاتكسب واحد لمعرفة و كاتعلم من النملة السايݣة. النملة السايݣة كاتكون حساسة ب شكل شديد معا و حاضية معا النملة التابعة و كاتقّل ف الزربة منين النملة التابعة كاتقال و كاتزرب منين التابعة كاتقرّب ب زايد.
التجارب لمكونطروليين معا لمستعمارات د النوع سيراپاتشيس بيروي (Cerapachys biroi) كايقتارحو بلي شي فرد يقدر يختار إينا شغل ف لعش على حساب التجارب لفايتين دياولو. واحد الجيل كامل ديال لخدّامات لمشابهات تقسّم ل جوج ݣروپات لي لمردود ديالهم ف التقلاب على لماكلة تكونطرولا فيه. واحد لݣروپ د النمل تجازاو ب لفرايس ب شكل مكمل، ف لوقيتة لي تيْقن بلي لݣروپ لاخر غايسقط. لحاصول، لاعضاء من لݣروپ لي فلح كتّرو من لمحاولات دياولهم ف التقلاب على لماكلة ف لوقيتة لي لݣروپ لي مافلحش بداو كايخرجو يقلّبو على لماكلة ب شكل غادي و كايقلال. شهر من بعد، لݣروپ لي نجح د النملات لقلّابات كمّلو ف الشغل ديالهم أما لخرين بدّلو الشغل باش يوليو مختصين ف التهلية ف لعش.
شلا نواع د النمل كايبنيو عشاش معقدين، و لايني شي نواع كايكونو رحّالا و ماكايبنيوش قلدات عشيين دايمين. النمل يقدرو يصايبو عشاش تحت أرضيين ولا يبنيوهم ف الشجر. هاد لعشاش يقدرو يتصابو ف لوطا، تحت الصخر ولا جدوع الشجر، وسط الجدوع د الشجر، التجوافات د الشجر، ولا حتى تمرات لبلوط. لمواد لمخدّمين ف لبني كايجمعو التراب و لمواد النباتيين، و النملات كايعزلو مواضع لعشاش ب شكل مسيّس؛ النملة طيمنوثوراكس ألببپينيس كاتجنب لمواضع لي فيهم النمل لميّت، حيت يقدرو يلمّحو ب لحضور د شي آفة ولا مرضة. هوما داغي كايهجرو لعشاش لمديور ليهم الساس ف أول يمارة على شي تهديد.
النمل الجيش د أمريكا الجنوبية، كيف ما النواع ديال إيسيطون بوركيلي (Eciton burchellii)، و النمل لمحارب ديال إفريقيا ماكايبنيوش عشاش دايمين، ف بلاصة هادشي، كايبدّلو مابين الترحال و لمرحالات فين لخدّامات كايصايبو واحد لعش موقّت (بيڤواك bivouac) من لكسدات نتاوعهم، ب شدّان بعضياتهم حتى كايصاوبو عش.
لخدامات د النمل لحبّاك (النواع د قبيلة مورقات السكنة Oecophylla) كايبنيو عشاش ف الشجر ب ربيط وراق الشجر معا بعضياتهم، ف اللول كايلصقو لوراق معا بعضياتهم قنطرات من لخدّامات من بعد كايخلّيو اللارڤات دياولهم يطلقو لحرير و هوما غاديين بيهم ف لحوافي د لوراق. شكال شبيهين ديال لبني د لعش تشافو ف شي نواع من ݣنس معدد الشواك (Polyrhachis).
فورميكا پوليكطينا (Formica polyctena)، من بينات نواع خرين من النمل، كايبنيو عشاش لي كايحافضو درجة حرارة دخلانية متبتة نسبياً لي كاتعاون ف الديڤلوپمو د اللارڤات. النمل كايحافضو على درجة حرارة لعش ب لعزيلة د لموضع، لمواد لعش، التهوية لمكونطرولية و لمحافضة على السخونية من لإشعاع الشمشي، النشاط و الستيقلاب ديال النملة لخدّامة، و ف شي عشاش مميّهين، النشاط لميكروبي ف لمواد د لعش.
شي نواع ديال النمل، كيف ما دوك لي كايخدّمو التجوافات الطبيعيين، يقدرو يكونو نتيهازيين و كايستغلو لميكرو-جو لمكونطرولي لي كايتمد من السكنة د بنادم و لقلدات الصطيناعيين لخرين باش يسكّنو لمستعمارات و لقلدات لعشيين دياولهم.
جل النمل كايكونو مفتارسين عامّيين، قمايميين، ولا عشاشبيين لامباشرين، و لايني شي وحدين منهم طوّرو شكال مختصين ف كسيب التقوات. كايتشاف بلي بزاف د النواع من النمل لي كايدخلو ف السلوك لعشاشبي اللامباشر كايعوّلو على واحد لمكافلة مختصة معا لميكروبات ديال مصارنهم باش يطلّعو ف لقيمة القوتية ديال لماكلة لي كايجمعوها و كاتخلّيهم ينجاو ف لبلايص لي فيهم النيطروجين قليل، بحال لغطا الشجري ديال لغابات لمطيرين. النمل قطاع لورق (ݣنوس لمعلّي و النملة لفوقانية) كاياكلو ب شكل حصري واحد لفݣيع لي كايكبر غير ف لمستعمارات دياولهم. هوما كايجمعو لوراق ب شكل مكمل لي كايدّيوهم ل لمستعمارة، و كايقطعوهم ل طراف صغيورين و كايحطوهم ف جردات فݣيعيين. لخدامات كايتخصصو ف هاد الطاشات على حساب قدهم. النملات لكبيرات ݣاع كايقطّعو السيقان، لي صغر كايمضغو لوراق و الصغيرات ݣاع كايتهلاو ف لفݣيع. النمل قطاع لوراق حساسين ب لكفاية باش يعرفو الستيجابة د لفݣيع ل لمواد النباتيين لمبدلين، كيف كا كايبان كايضبطو السينيالات لكيماويين من لفݣيعة. يلا شي نوع فلاني د لوراق تصاب مسموم ل لفݣيع، لمستعمارات ماكاتبقاش تجمعهم ف خطرة. النمل كاياكلو قلدات خارجين من لفݣيع كايسميوهم لكويورات (gongylidia). لباكتيريات لمكافليين ف السورفاص لبرانية د النمل كايطلقو أونتيبيوتيكات لي كايقتلو لباكتيريات لي تدخلو ل لعش و لي يقدرو يضرّو لفݣيع.
النملات لقلّابات على لماكلة كايسافرو مسافات كايوصلو حتى ل 200 ميطرو على عشهم و سكّات الريحة كايخلّيوهم يصيبو طريقهم وخا تكون الضلمة. ف لبلايص السخان و لݣاحلين، النملات لي كايرعاو ف النهار كايتعرّضو ل لموت ب التنشاف (Dessication)، عليها لقدرة باش يلقاو أقصر طريق ل لعش كايقلل هاد الريسك. نمل الصحرا النهاري من ݣنس تحتانية النقشة كيف ما النملة الصحراوية د الصحرا لكبرى كايفتشو (Navigate) ب لحضية معا لمسالك د التيجاهات و حتى لمسافة لمقطوعة. لمسافات لمقطوعين كايتعبرو ب تخدام واحد لپيضوميطر دخلاني (Pedometer؛ عبّار الزطمات) لي كايحسب لخطاوي لي تدارو و حتى ب تقييم لحركة د لأوبجيات ف لمجال الشوفي (التدفاق لبصري؛ optical flow). التيجاهات كايتعبرو ب تخدام لموضع د الشمش. هوما كايدمجو هاد لمعلومة باش يلقاو أقصر طريق ل عشهم. بحال النملات كلهم، كايمكن ليهم عاوتاني يخدّمو لعلمات الطبيعيين منين كايكونو موجودين و حتى ليمارات الشمّيين و لمسّيين باش يفتشو. شي نواع د النمل كايكونو قادرين باش يخدّمو لمجال الجيومغناطيسي على ود التفتاش. لعينين لمركبين د النمل فيهم خلايا مختصين لي كايضبطو الضو لمستقطب من الشمش، لي كايتخدّم ف ضبيط التيجاهات. هاد الديطيكطورات ديال الستيقطاب كايكونو حساسين ف لموضع لفوق بنفساجي ف الطيف د الضو. عند شي نواع د النمل الجيش، شي ݣروپ من النملات لقلاّبات لي كايوليو مفارقين على الركيزة الساسية يقدرو شي خطرات يبداو يدورو على بعضياتهم و يصايبو واحد الطاحونة د النمل (ant mill) مدوّرة. لخدامات يقدرو موراها يبقاو كايدورو حتى كايموتو ب التسخسيخ.
النملات لخدّامات النتوات ݣاعما عندهم الجناوح و النتوات لمكاتريين كايترزاو ليهم جناوحهم من بعد طيرات لملاقية دياولهم على قبل باش يبداو لمستعمارات دياولهم. عليها، عكس الجدود ديال الرزوزيات، لغالبية ديال النمل كايسافرو ب لمشي. شي نواع كايكونو قادرين ينقّزو. متلاً، النملة النقازة لهندية (Harpegnathos saltator) قادرة تنقز ب مزامنة لحركة ديال لفردات لوسطانيين و اللورانيين من كراوعهم. كاينين شلا نواع ديال النمل لهاف (Gliding ant؛ كايتحركو ب لهفّان) بحال سيفالوطيس أطراتوس (Cephalotes atratus)؛ هادي تقدر تكون واحد لمزية مشروكة بينات النمل الشجري ب مستعمارات صغار. النمل ب هاد لقدرة كايقدرو يكونطروليو التحراك لأفقي ديالهم باش يشدّو ف جدوع الشجر لوقيتة منين كايطيحو من لفوق د سقف لغابة. نواع خرين من النمل كايمكن ليهم يصايبو من ريوسهم سنسلات باش يربطو الطرعة فوق لما، تحت لرض، ولا بينات التيساعات د النبتات. شي نواع عاوتاني كايشكلو طوّافات عايمين لي كايعاونو ف النجو من لحملات. هاد الطوّافات يقدر يكون عندهم واحد الشغل ف السماح ل النمل باش يستعمرو لݣزاير. پوليراتشيس صوكولوڤا (Polyrhachis sokolova)، واحد النوع د النمل كايتلقى ف لݣلاتي ديال لغابات لمطيرين د أوسطراليا، كايمكن ليه يعوم و يعيش ف عشاش تحت لما. مادام كاينقصوهم لخياشم. كايمشيو ل الجيوب د لهوا لعاركين ف لعشاش لغاطسين باش يتنفسو.
ماشي ݣاع النملات عندهم نفس النوع ديال لمجتمعات. نمل التور لأوصطرالي من أكتر الشكال د النمل ف لقاعدية (Basal) و من أكبر النملات ف لقد. بحال ݣاع النمل، هوما كايكونو فوق جتيماعيين، و لايني سلوكهم الجتيماعي قليل ف التحسان ب لمقارنة معا النواع لخرين. كل فرد منهم كايصيّد بوحدو، كايخدّمو عينيهم لكبار باش يلقاو لفرايس ف عاوض لحواس لكيماويين.
شي نواع كايهجمو و كايهرفو على لمستعمارات د النمل لمحاديين. كاينين شي مختصين ب شكل مطرّف بينات هاد النمل لي كايستعبد (slave-raiding ants)، كيف ما نمل لأمازون لي ݣاعما قادرين يوكّلو ريوسهم و كايخصهم يقبطو لخدّامات د نواع خرين د النمل باش ينجاو. لخدّامات لمقبوطات من النواع لي كايستعبدو د ݣنس مفصولة الصدر (Temnothorax) طوّرو واحد السطراتيجية مضادة، ب تخراب غير لپوپات النتوات ديال النوع لي كايستعبد طيمنوثوراكس أميريكانوس (Temnothorax americanus)، بلحق كايعفيو الدكور (لي ماعندعمش دور ف لغزوات د الستيعباد ب صيفتهم بالغين).
النمل كايعرفو لقراب و الرفقا د لعش ب ريحتهم، لي كاتجي من ليفرازات لمخلطين ب لهيدروكاربون لي كايغلّفو السكوليطات لبرانيين دياولهم. يلا شي نملة تفرقات عل لمستعمارة لأصل، غاتضيّع ف اللخر ريحة لمستعمارة. أي نملة كادخل ل شي مستعمارة بلا شي ريحة مواتية غايتهجم عليها.
النواع لپارازيطيين د النمل كايدخلو ل مستعمارات النمل لمضيّف و كايديرو الساس ل ريوسهم ب صيفتهم پارازيطات جتيماعيين؛ النواع بحال سطروميجينيس زينوس (Strumigenys xenos) كايكونو پارازيطيين ب لكامل و ماعندهمش لخدّامات، ف بلاصة هادشي، كايعوّلو على لماكلة لمجموعة من النوع لمضيّف ديالهم سطروميجينيس پيرپليكسا (Strumigenys perplexa). هاد الشكل من التبرزيط كايتشاف على طول شلا ݣنوس من النمل، و لايني هاد النملة لپارازيطية ف لعادة واحد النوع لي كايكون مرتابط ب شكل قريب ب لمضيّف ديالها. واحد التخليطة ديال لميطيودات كايتوضّفو ف الدخول ل لعش ديال النملةلمضيّفة. شي ملكة پارازيطية تقدر تدخل لعش لمضيّف قبل ماتفقس التفريخة اللولى، باش تدير الساس ل راسها قبل من الديڤلوپمو د ريحة لمستعمارة. نواع خرين كايخدّمو لفيرومونات باش يشوّشو النمل لمضيّف ولا يقولبوهم و يخلّيوهم يرفدو لملكة لپارازيطية ل لعش. شي وحدين ب بساطة كايتقاتلو باش يشقو طريقهم ل لعش.
واحد الصراع بينات الجنسين من نفس النوع تشاف عند شي نواع د النمل ب هاد النمل لي كايتكاتر كايتنافسو باش ينتجو تفريخة مرتابطة بيهم ب شكل قريب. الشكل لمطرّف ݣاع كايشمل لينتاج د تفريخة مطابقة جينياً. واحد التطراف ف الصراع الجنسي تشاف ف واسمانيا أورپونكطاطا (Wasmannia auropunctata)، فين لملكات كاينتجو بنات ديپلويديين ب لموالدة لعزرية النازية و الدكور كاينتجو كلونات ب واحد لعملية فين لبيضة الديپلويدية كاتخسر لمساهمة لأمومية ديالتها باش تنتج دكور هاپلويديين لي هوما كلونات (مستنسخين) د لبو.
النمل كايصاوبو مرافقات مكافليين معا واحد لمادى ديال النواع، بحال نواع خرين د النمل، لبخوشات لخرين، النبات، و لفݣيع. هوما عاوتاني كايتفرسو من بزاف ديال لحيوانات و حتى من شي فݣيعات فلانيين. شي نواع من مفصليات الرجلين كايدوّزو طرف من حياتهم وسط عشاش النمل، يا إما كايفرسو النمل، اللارڤات نتاوعهم، و لبيض، ب لكونصوماسيو د خزاين لماكلة د النمل، ولا كايتجنبو لمفتارسين. هاد السكّانات (inquilines؛ كائن حي كايعيشو وسط السكنة د كائن حي خر) يقدرو يكونو كايشبهو ب زايد ل النمل. الطبيعة د تاميميكيت النمل (التشباه ب النمل؛ myrmecomorphy) كاتبدّل، ب شي حالات كايشملو لميمك لباطيسي (Batesian mimicry)، فين لميميك كايقلل الريسك د لفريس. وحدين خرين كايورّيو لميميك لڤاصماني (Wasmannian mimicry)، لي هو واحد الشكل د التاميميكيت كايتشاف غير ف السكّانات.
لمن (Aphids) و لبخوشات نصيات الجناوح (hemipteran) لخرين كايفرْزو واحد السايل حلو كايتسمى الندى لمعسّل (honeydew)، منين كايبداو ياكلو النسغ (sap) ديال النبات. السكريّات ف الندى لمعسّل كايكونو عوينة د لماكلة زايدة ف لينيرجي، لي بزاف د النواع ديال النمل كايجمعوه. ف شي حالات، لمن كايفرْزو الندى لمعسّل كا ستيجابة ل النمل و هوما كايطبطبو عليهم ب لانطيرات دياولهم. النمل من جيهتهم كايخلّيو لمفتارسين بعاد على لمن و كايرفدوهم من شي موضع ف لاني د لماكلة ل موضع خر. منين كايرحلو ل شي بلاصة جديدة، شلا مستعمارات كايدّيو معاهم لمن، باش يضمنو واحد الدعامة كمّالة ديال الندى لمعسّل. النمل عاوتاني كايتهلاو ف لبق الدݣيݣي (mealybugs) باش يحصدو الندى لمعسّل ديالهم. لبق الدݣيݣي يقدرو يولّيو واحد لآفة خطيرة على لآناناص يلا النمل كان حاضر باش يحامي على لبق الدݣيݣي من لعديان الطبيعيين دياولهم.
ليرقات النملوفيليين (لعشاقا د النمل) من فاميلة لفراشات لمديّبيات (Lycaenidae؛ لفراشات الزورق، النحاسيين، ولا مستفات الشعر) كايتسرْحو من النمل، و كايتݣوّدو ل بلايص لماكلة ف النهار، و كايترجّعو وسط عش النمل ف الليل. ليرقات عندهم واحد لغدة لي كاتفرْز الندى لمعسّل منين النمل كايكمّدوهم. لمواد لكيماويين لي ف ليفرازات د ليرقة ناراثورا جاپونيكا (Narathura japonica) كاتغيّر السلوك ديال النملات لخدّامات د پريسطوميرميكس پونكطاطوس (Pristomyrmex punctatus)، هادشي لي كايردهم متبتين و قل ف لعدوانية. هاد لعالاقة، لي كان مخصّلة ف لفايت ب صيفتها "تقايضية"، دابايا كاتعتابر ب قدر ليمكان حالة د ليرقات ملاعبين ب شكل پارازيطي ب النمل. شي يرقات كايطلقو ڤيبراسيوات و صوات لي كايحسو بيهم النمل. واحد لاضاپطاسيو شبيهة تقدر تتشاف ف لفراشات النقازات الشايبين (Grizzled skipper) لي كايطلقو ڤيبراسيوات ب توساع جناوحهم على قبل باش يتواصلو معا النمل، لي هوما مفتارسين طبيعيين د هاد لفراشات. يرقات خرين تطورو من لحب د النمل ل ماكلة النمل: هاد ليرقات النملوفيليين كايفرْزو واحد لفيرومون لي كايرد النمل يتعامل بحال يلا ليرقة وحدة من اللارڤات نتاوعهم. ليرقة من بعد كاترفد ل عش النمل فين كاتبدا تاكل اللارڤات نتاع النمل. عدد من لباكتيريات لمختصين تصابو ب صيفتهم مكافلين دخلانيين (endosymbionts) ف مصارن النملة. شي باكتيرات من لباكتيريات الشايعين كاينتاميو ل التنضيمة ميكروبيات النسيجيين (Hyphomicrobiales) لي لاعضاء ديالها معروفين بلي هوما مكافلين رصّايا د النيطروجين (nitrogen-fixing) ف النبات لقطاني (legumes) بلحق النوع لي تصاب ف النمل ناقصاه لقدرة باش يتبّت النيطروجين. النمل ربّاي لفݣيع لي كايصايبو لقبيلة لمعلّيات (Attini)، لي كايشملو النمل قطّاع لوراق، كايربّيو نواع فلانيين ديال لفݣيع ف لݣنوس لݣاريك لبيض (Leucoagaricus) و لخرية لبيضة (Leucocoprinus) من فاميلة لݣاريكيات (Agaricaceae؛ حرفياً، فݣيعيات الشجر). ف هاد لمقايضة النملو-فݣيعية، النواع ب جوج كايعوّلو على بعضياتهم ف النجو. النملة آلوميروس ديسيمارتيكولاتوس (Allomerus decemarticulatus) طورات واحد لمرافقة تلاتية طرقان معا النبتة لمضيّفة، هيرطيلا فيسوفورا (لبلوطيات الدهبيين، Chrysobalanaceae)، و واحد لفݣيعة معلّكة لي كاتخدّم باش توحّل لبخوشات لفرايس دياولها.
نملات لحامض (Lemon ants) كايصاوبو جردات الشيطان (devil's gardens) ب قتيلة النبتات الدايرين بيهم ب التكّان و باش يخلّيو بقعة صافية ب شجر نمل الليمون (Duroia hirsuta). هاد التعدال ف لغابة كايمد ل النمل مواضع كتر ل التعشاش وسط سيقان شجر الدورويا (ݣنس Duroia). وخا شي نملات كاياخدو النيكطار من النوّار، التلقاح (pollination) ب شي شكل نادر، واحد ليكزومپل هو التلقاح د النوع من السحلبية ليپوريلا فيمبرياطا (Leporella fimbriata) لي كاتحفز الدكر د النملة ميرميسيا أورينس (Myrmecia urens) باش يتناسل ب شكل مزوّر (pseudocopulate) معا النوّارات، هادشي لي من جيهتو كايدوّز حبوب اللقاح. واحد لفرضية لي فايت تقتارحات على قبل الندرة د التلقاح هي بلي ليفرازات من لغدة لمور جنبية كايديزاكتيڤيو و كايقللو لقابلية لحيوية ديال حبة اللقاح. شي نبتات، جلهم وعاويات الزريعة (النبتات لمزوهرين؛ angiosperms) و لايني حتى شي فرسيوات، عندهم قلدات كايخرّجو نيكطار سپيسيال، غدّات نيكطاريين بّرا النوارة (extrafloral nectaries)، لي كايمدّو لماكلة ل النمل، لي من جيهتهم كايحاميو على النبتة من لبخوش لعشاشبي لي كايهلك كتر. النواع بحال نبتة الكلح ݣرون التور (Acacia cornigera) ف أمريكا لوسطانية فيها شواك مجوّفين لي كايسكّنو مستعمارات د النمل التّاك (Pseudomyrmex ferruginea) لي كايدافعو عل الشجرة من لبخوش، لبزوليات لي كايرعاو، و لكرمات علويين التنبيتة (epiphytic). الدراسات د التعلام مساوي لموضع (Isotopic labelling؛ الترشام لإيسوطوپي) كايقتارحو بلي النبتات كاياخدو حتى النيطروجين من النمل. ب لمقابل، النمل كاياخدو لماكلة من لكسدات لبيلتيين (Beltian bodies) لعامرين ب لپروتين و الليپيد. ف النملة فيليدريس ناݣاساو (طويلات لعنق؛ Dolichoderinae) د فيجي معروفة بلي كاتعزل و كاتربّي نواع من لݣنس فوقاني التنبيتة، مولات لفرينجة (Squamellaria) د فاميلة لفويات (Rubiaceae) لي كاينتجو دويّرات (domatia) كبار لداخل فين كايتعشش مستعمارة النمل. النملات كايزرعو الزريعة و الدويّرات د الشتيلات ب لخف كايتعمّرو و النمل منين كايخرا وسطهم كايساهم ف النمو لمزروب ديالهم. مرافقات شبيهين ديال التفراق تصابو ف طويلات لعنق وحدين خرين ف هاد لمنطاقة عاوتاني. واحد ليكزومپل خر على هاد الشكل د لمكافلة لبرانية (ectosymbiosis) جاي من شجرة لماكارانݣا (Macaranga)، لي فيها جدوع مأضاپطين باش يسكّنو مستعمارات من النمل ف ݣنس مدلّية لكرش (Crematogaster).
شلا نواع ديال النبات عندهم زريعات لي كايكونو مأضاپطين باش يتفرّقو من النمل. تفراق الزريعة من النمل ولا لحلقة الدايرة النملية (myrmecochory) كاين ب شكل عريض، و التقديرات الجداد كايقتارحو بلي علاين 9٪ من ݣاع نواع النبات يقدر يكون عندهم بحال هاد لمرافقات معا النمل. النملات لي كايفرّقو الزريعة دايماً كايديرو تفراق موجّه، ب حطان الزريعات ف مواضع لي كايزيدو ف ف حتيمال النجو د الزريعة باش توصل ل مرحالة لمكاترة. شي نبتات ف السيستيمات لݣاحلين، و لمحسوسين ل لعافية كايكونو ب الضبط عوّالين على النمل ف النجو و التفراق مادام الزريعة كاتنقل ل شي موضع سالم تحت لرض. بزاف ديال الزريعات لمفرّقين من النمل عندهم قلدات برانيين سپيسيال، لكسدات لمزيّتين (ولا لإيلايسومات، elaiosomes)، لي كاياخدوهم النمل ب صيفتهم ماكلة. النمل يمكن ليهم ب زايد يغيّرو ف معدال التحلال و دوران التقاوت ف عشهم. ب لحلقة الدايرة النملية و التعدال ف لحالة د التراب هوما كايقدرو يغيّرو لغطا النباتي و دوران التقاوت ف لإيكوسيستيمات الدايرين بيهم.
واحد لمقاربة، يمكن شي شكل د التاميميكيت، كاتشاف ف لبيض د بخوش لعصيات لماشيات (stick insects). هوما عندهم واحد لقلدة صالحة ل لماكلة كاتشبه لكسدة لمزيّتة و كايترفدو ل عش النمل فين الصغار ديالهم كايتفقسو.
لغالبية د النمل كايكونو فرايسيا و شي وحدين كايفرسو و كايخدو ماكلتهم من لبخوش الجتيماعي لاخر بحال النملات لخرين. شي نواع (النمل من ݣنس لمشرارة لكبيرة، و مشرارة الطيرميت) كايختصو ف فريس الطيرميطات (Termites، ولا النمل لبيْض؛ ف لحقيقة ماشي نمل) ف لوقيتة لي شوية د النمل من لفاميلة التحتانية غليضات لݣرون (Cerapachyinae) كايفرسو النملات لخرين. شي طرميطات، بحال ناسوتيطيرميس كورنيݣير (Nasutitermes corniger)، كايصاوبو معاشرات معا نواع فلانيين د النمل باش يخلّيو النواع لفرايسيين د النمل بعاد. الرزوزية لمدارية (Mischocyttarus drewseni) كاتغلّف الرجيّلة (pedicel) د عشها ب واحد لمادة كيماوية نفّارة د النمل (ant-repellent). كايتقتارح بلي شلا رزوزيات مداريين يقدرو يبنيو عشاشهم ف الشجر و كايغطيوهم باش يحاميو على ريوسهم من النمل. رزوزيات خرين، كيف ما أ. مولتيپيكطا (A. multipicta) كايدافعو ضد النمل ب التجرية عليهم من لعش ب د موجات ديال تفرفيرات الجناوح. النحل اللاتكاك (ݣنس تلاتية لقنات و خدّامة لعسل) كايخدّمو الدفاعات لكيماويين ضد النمل.
الدبان ف ݣنس لبنݣالية (Bengalia) ديال لعالم لقديم (فاميلة حمّالات الزين، Calliphoridae) كايفرسو النمل و كايكونو پارازيطات شفّارا (kleptoparasites)، كاينترو لفرايس ولا التفريخات من لفكاك د النمل لبالغ. النتوات د الدبانة الجرّاية لماليزية (Vestigipoda myrmolarvoidea) لي بلا كراوع و جناوح، كايعيشو ف عشاش النمل من ݣنس لغامضة (Aenictus) لي كايتهلاو فيهم.
لفݣيع ف ݣنوس هراوية الراس (Cordyceps) و هراوية الراس لمحنشة (Ophiocordyceps) كايعاديو النمل. النمل كايستاجبو ل لعدوى ب تشعبيط النبتة و غريس فكاكهم ف التوب د النبتة. لفݣيعة كاتقتل النمل، كاتكبر عل الشياطة ديالتهم، و كاتخرّج واحد لكسدة متمرة (Sporocarp؛ تمرة بوغية). كايبان بلي لفݣيعة كاتغيّر السلوك د النملة باش تعاون ف تفراق لبويغات دياولها ف واحد لميكروموؤل لي كايصلاح ل لفݣيعة حسن. لبخوشات ملويين الجناوح (Strepsipteran) لپارازيطيين حتى هوما كايتلاعبو ب لمضيّف النملة ديالهم باش تشعبط سيقان الربيع، باش تعاون لپارازيط يلقى لملاقيين.
واحد الدودة سطوانية (Myrmeconema neotropicum) لي كاتعادي نمل الضلّة (Cephalotes atratus) كاتخلّي لبطون لكوحل ديال لخدّامات يوليو حومر. لپارازيط عاوتاني كايبدّل ف سلوك النملة، هادشي لي كايخلّيهم يبداو يهزو بطونهم عاليين. لبطون لحمرين و لواضحين كايتغالطو ل الطيور معا لفواكه الطايبين، كيف ما هيرونيما ألكورنيويديس (Hyeronima alchorneoides)، و من بعد كايتكالو. لبزاق (لخرا) د الطير كايتجمع من النملات لخرين و كايوكلوه ل صغارهم، هادشي لي كايودّي ل تفراق كبر ديال الدودة السطوانية (nematode؛ خيطية).
واحد الدراسة على مستعمارات نملة طيمنوثوراكس نيلانديري (Temnothorax nylanderi) ف ألمانيا لقات بلي لخدّامات لمبرزطات من الدودة السينتية آنوموطينيا بريڤيس (Anomotaenia brevis) (النملات غير مضيّفات وسيطات، لمضيّفين لمضبوطين كايكونو نقارا د لخشب) كايعيشو كتر ب زايد من لخدّامات لمامبرزطاتش و كان عندهم معدال قل د لموت، ب لمقارنة معا لملكات د نفس النوع، لي كايعيشو حتى ل جوج عقود.
جرانات النبلة السامة الجنوب أمريكيين ف ݣنس مشعبطة الشجر (Dendrobates) كاياكلو النمل ف الساس، و الطوكسينات ف الجلدة د شي نواع من هاد الجرانة كايجيو من النمل. النملات النميّليين (من فاميلة النميّليات Formicinae) ف ݣنوس النملة لقصيرة (Brachymyrmex) و قريبة الجرّاية (Paratrechina) تصاب فيهم لپوميلوطوكسين (pumiliotoxin) لي كايتلقى ف الجرانة ديندروباطيس پوميليو (Dendrobates pumilio). الجرانة لغرب إفريقية فرينومانتيس ميكروپس (Phrynomantis microps) قادر يتحرك وسط عشاش نمل پالطوثيريوس طارساتوس (Paltothyreus tarsatus)، ب إنتاج پيپتيدات على جلدتو لي كاتمنعو من قريص النمل.
النمل الجيش كايقلّبو عل لماكلة ف واحد لعمود محرّك واسع، كايهجمو على أي حيوان ف هاد لعمود لي ݣاعما قادر يهرب. ف أمريكا لوسطانية و الجنوبية، النملة إيسيطون بورتشيلي (Eciton burchellii) هي النملة لݣجݣاجة و أكتر نملة كايتبعوها الطيور "تباعين-النمل" بحال طيور النمل (antbirds) و زحافات الشجر (woodcreepers). هاد السلوك تعتابر ف واحد لخطرة سلوك تقايضي، بلحق الدراسات اللاحݣين صابو بلي الطيور پارازيطيين. التبرزيط ب الشفرة لمباشر (الطيور كايسرقو لماكلة من لقبطة د النمل) كايكون نادر و فايت تقشع ف يمامات لإينكا لي كايلݣطو الزريعات ف دخلات لعشاش و هوما كايتنقلو من النواع د ݣنس النملة مو لحية (Pogonomyrmex). الطيور لي كايتبعو النمل كاياكلو شلا فرايس من لبخوش و عليها كايقللو نجاح التقلاب عل لماكلة د النمل. الطيور كايدخلو ف واحد السلوك عجيب كايعيّطو ليه التنمال (anting)، لي مازال مامفهومش مزيان. ف هاد السلوك الحيور كايريّحو على عش النمل، ولا كايلݣطو و كايسيّبو النمل ل جناوحهم و ريشهم؛ هادشي يقدر يكون واحد لوسيلة باش يزوّلو لپارازيطات لبرانيين منهم.
وكّالين النمل (Anteaters)، لأرضڤاركات (ولا حلوف لرض، aardvarks)، لپانݣولينات (ولا وكالين النمل لمحرشفين، pangolins)، لإيخيدنات (ولا وكالين النمل لمشوّكين، echidnas) و النومباطات (ولا وكالين النمل الجرابيين، numbats) عندهم أضاپطاسيوات سپيسيال على قبل لعيشة ب ريجيم مصايب من النمل. هاد لأضاپطاسيوات كايشملو لسانات طوال و معلّكين باش يشقمو النمل و مخالب صحاح باش يفرعو عش النمل. الدبوبا لقهويين (Ursus arctos) تصابو كاياكلو النمل. جوايه 12٪، 16٪ و 4٪ من لحجم لخراوي ديالهم ف الربيع، الصيف و لخريف، ب شكل مرادف، مشكل من النمل.
النمل كايديرو شلا ديال لأدوار لإيكولوجيين لي كاتكون فيهم لفايدة ل لبنادم، كيف بحال لقميع د النسمات لآفات و التهوية د التراب. كايتقدّر بلي النمل كايحرّكو متوسط د جوايه 1.5 طن د التراب التحتاني ل السورفاص (لبيوتعكار، bioturbation) ف لعام ف كل ݣطار. كايتعتابر تخدام النمل لحبّاك ف زريع لفواكه من ݣنس لحامض ف جنوب الشينوا واحد من أقدم التطباقات لمعروفين ديال لكونطرول لبيولوجي. من الجيهة لخرى، النمل يقدرو يولّيو ديرونجمو منين كايستعمرو لباطيمات ولا منين كايسببو خسارات قتيصاديين.
ف شي قنات ف الدنيا (إفريقيا و أمريكا الجنوبية ف الساس)، النمل لكبير ف لقد، خصوصاً النمل الجيش، كايتخدّمو ب صيفتهم غرزات جراحيين. الجرحة كاتجمّع معا بعضياتها و من بعد كايتحط النمل على طول الجرحة. النملة كاتشقم قنات الجرحة ب فكاكها و كاتبت ف بلاصتها. من بعد لكسدة ديالتها كاتقطع و الراس و لفكاك كايبقاو ف موضعهم باش يسدو الجرحة. الريوس لكبار ديال النملات لعسكريات (dinergates) د نوع النمل قطّاع لوراق، آطا سيفالوطيس (Atta cephalotes) حتى هوما كايتخدّمو من الجرّاحا د السكان لأصليين ف سدان الجرحات.
شي نملات عندهم سم طوكسيك و عندهم واحد لاهمية طبية. النواع كايجمعو النوع پاراپونيرا كلاڤاطا (Paraponera clavata؛ نمل لقرطاس) و النواع ف ݣنس لمشرارة لمهيّبة (Dinoponera؛ نمل لقرطاس لمزوّر) د أمريكا الجنوبية و النملات لأوسطراليين د ݣنس النميلة (Myrmecia).
ف جنوب إفريقيا، النمل كايتخدّمو باش يعاونو ف الجني د زريعات الرويبوس (Aspalathus linearis)، لي هي نبتة كاتخدّم ف مصاوبة واحد لاتاي عشوبي. النبتة كاتفرّق زريعتها ب شكل عريض، هادشي لي كايرد الجميع ب ليدّين صعيب. النمل لكحل كايجمعو و كايخزنو هاد الزريعة و الزريعات لخرين ف عشهم، لي يقدر بنادم يجمّعهم ب كترة. كتر من 200 ݣرام د الزريعة يقدرو يتجمعو من كل جبّيل د النمل.
وخا لغالبية ديال النمل كاينجاو من محاولات بنادم باش يفنّيوهم، غير شوية منهم لي مهددين ب زايد. هاد النملات كايميلو باش يكونو النواع د لكزاير لي طوّرو مزيّات مختصين و لي كايريسكيو ب بلاصتهم تتخاد من شي نوع مدخّل د النمل. ليكزومپلات كيف ما النملة الشايطة السريلانكية (Aneuretus simoni) لي مهددة ب شكل مجهد و أضيطوميرما ڤيناطريكس (Adetomyrma venatrix) د مدغشقر.
=== ب صيفتهم ماكلة ===
النمل و اللارڤات نتاوعهم كايتكالو ف قنات مبدلين ف لعالم. لبيض ديال جوج نواع د النمل كايتخدّم ف مصايبة لإيسكامولي (escamoles) د ل[[ميكسيك]. هوما كايتعتابرو واحد الشكل د لكاڤيار لبخوشي و يقدرو يسواو حتى ل 50 دولار ميريكاني ل لكيلوݣرام و طالعين ل 200 دولار ميريكاني ل لكيلوݣرام (على حساب 2006) لاحقاش كايكونو موسميين و صعاب يتلقاو. ف جيهة سانطانضير لكولومبية، أورميݣاس كولوناس (على بونت كاتطرجم ل "النمل كبير لقاع") لي هوما النوع آطا ليڤيݣاطا كايتطوستاو (كايتݣرملو ب الطياب) و هوما حيين و كايتكالو. ف بلايص ف لهند، و على طول بورما و الطايلاند، واحد لمعجون ديال النملة لحباكة لخضرا (Oecophylla smaragdina) كاتسربى ب صيفتها واحد متبل معا لكوري. بيضات و لارڤات النمل لحباك، و حتى النملات، يقدرو يتخدّمو ف واحد الشلاضة طايلاندية، يام (ยำ)، ف واحد لپلا كايسميوه يام كاي موط دينݣ (ยำไข่มดแดง) ولا شلاضة بيض النمل لحمر، لي هو پلا جاي من يسان (Issan) ولا لمنطاقة الشمال شرقية د طايلاند. ساڤيل كينت، ف جورنال ناتوراليست ف ؤصطراليا كتب "الزين، ف لحالة ديال النمل لخضر، ماشي هو سيفتهم لبرانية. الشفافية ديالتهم الجدابة، لي علاين بحال لبونبو يمكن جدبات التجارب اللولانيين د ستيهلاكهم من النوع لبنادمي". كايتدعكو ف لما، بحال الطريقة د توجاد مشروب السكواش (Squash) لبريطاني ب الليمون، "هاد النملات كايتصايب منهم واحد لمشروب حمضي بنين لي عندو مقام طالع عند السكان لأصليين د شمال كوينزلاند، و تعطات لو قيمة حتى من الدوق لأوروپي". النمل ولا لارڤاتهم كايتخدّمو كا بدّايات على قبل مصايبة لياغورت ف شي بلايص ف بلغاريا و تركيا.
ف الصيف ديالو اللول ف السنسلة الجبلية سييرا (Sierra)، دجون ميُوّر قشع بلي لحفّارا لهنود د كاليفورنيا كلاو لبطون لحمضيين لي مداقهم كايجيب لهرّة ف لفم ديال نمل النجّار لكحل. لهنود لميكسيكيين كلاو النملات لعمارات (repletes)، ولا ݣربات لعسل لحيّين ديال نمل لعسل (ݣنس نملة لكيس، Myrmecocystus).
شي نواع ديال النمل كايتعتابرو آفات، ب شكل لولاني من هادوك لي كايعمرو ف السكنات د بنادم، فين لحضور ديالهم دايماً فيه لمشاكيل. متلاً، حضور النمل غايكون مامرغوبش فيه ف لبلايص لمعقمين بحال السبيطارات ولا لكوزينات. شي نواع ولا ݣنوس كايتصنفو ب شكل شايع كا آفات بحال نملة لارجونتين (Argentine ant)، نملة الطيطوار الزماݣرية (immigrant pavement ant)، النملة الصفرا لحمقا (yellow crazy ant)، نملة السكار لمشرّطة (banded sugar ant)، نملة لفرعون (pharaoh ant)، نملة لخشب احمر (red wood ant)، نملة النجار لكحلة (black carpenter ant)، نملة الدار لمريّحة (odorous house ant)، نملة لعافية لحمرا لمستوردة (red imported fire ant)، و نملة لعافية لأوروپية (European fire ant). شي نملات كايدرّمو على لماكلة لمخزونة، شي وحدين كايقلّبو على عوينات د لما، وحدين خرين يقدرو يهلكو لقلدات لي وسط السكنة، شي وحدين يقدرو يهلكو لغلّات د لفلاحة نيشان ولا ب معاونة لأفات لمصّاصين. شي وحدين كايتكّو ولا كايقرصو. الطبيعة لأضاپتيڤ د مستعمارات النمل كاترد لمستعمارات دياولهم على بونت مستحيلين باش يتنحاو ف خطرة وحدة و لغالبية د ممارسات تدبير لأفات كايهدفو باش يكونطروليو النسمات اللوكال و كايميلو باش يكونو حلول موقّتين. نسمات النمل كايتجيراو ب واحد التنويعة ديال لمقاربات لي كايخدّمو ميطودات كيماويين، بيولوجيين، و فيزيكيين. لميطودات لكيماويين كايشملو تخدام لمصيدات د لمبيد لبخوشي لي كايتجمّعو عليهم النمل ب صيفتهم ماكلة و كايرجعو ل عشهم فين السم كايتفرّق بلا ماينويو ل لاعضاء لخرين د لمستعمارة على طريق تباديل التقاوت. ليدارة كاتكون مبازية على النوع و التقنيات يقدرو يتبدلو على حساب لبلاصة و الضروف.
تحضاو من بنادم من لبدية ديال التاريخ، السلوك د النمل توتّق و كان و مازال موضوع د لكتابات اللولانيين و لحجايات لي دازو من قرن ل قرن. هادوك لي كايخدّمو لميطود لعلمي، عولاما د النمل (myrmecologists)، كايدرسو النمل ف اللابوراطوار و ف الضروف الطبيعيين دياولهم. لقلدات الجتيماعيين دياولهم لمعقدين و لمنوعين خلّاوهم كائنات حيين موضيل (model organisms) معتبرين. النضر لفوق بنفساجي تكتاشف ل لمرّة اللولى ف النمل من سير دجون لوبوك ف 1881. الدراسات على النمل طيسطاو فرضيات ف لإيكولوجيا و السوسيوبيولوجيا، و كان ب لخوصوص مهمين ف متيحان توقوعات نضريات عزيلة لقرابة (kin selection) و السطراتيجيات التطوريين لمتبتين (evolutionarily stable strategies). مستعمارات النمل يقدر يتدرس فيهم ب تربيتهم ولا لمحافضة عليهم ف نملوكاريومات (formicaria)، لي هوما سدّات سپيسيال مبنيين و مكادريين ب الجاج. لفراد يقدرو يتّبعو على قبل الدراسة ب رشيمهم ب نقاطي ملوّنين.
التقنيات لفالحين لي تخدّمو من مستعمارات النمل تدرس فيهم ف لأنفورماتيك و الروبوتيك باش ينتجو سيستيمات موزعين و كايتسامحو معا لختيلالات على قبل حلان لمشاكيل، متلاً التحسان (optimization) د مستعمارة النمل و الروبيوتيكات د النمل. هاد لموضع ف لبيوتاميميكيت (biomimetics) ودّى ل دراسات على حركة النمل، موطورات التقلاب لي كايخدّمو "سكّات التقلاب عل لماكلة"، سيستيمات التخزان لي كايتسامحو معا لخلل، و ألݣوريتمات د النيطوورك.
من اللخر د عوام 1950 حتى ل اللخر د عوام 1970، فيرمات النمل كانو لوعاب شعبيين ترباويين ديال الطفال ف ميريكان. شي ڤيرسيوات تجاريين لاحقين كايخدّمو جيل شفاف ف عاوض التراب، هادشي كايخلّيهم يتشافو حسن بلحق كايسطريسي النمل ب ضو ماشي طبيعي.
- ↑ Johnson BR, Borowiec ML, Chiu JC, Lee EK, Atallah J, Ward PS (October 2013). "Phylogenomics resolves evolutionary relationships among ants, bees, and wasps". Current Biology. 23 (20): 2058–2062. Bibcode:2013CBio...23.2058J. doi:10.1016/j.cub.2013.08.050. PMID 24094856.
- ↑ خطأ استشهاد: وسم
<ref>غير صحيح؛ لا نص تم توفيره للمراجع المسماةFernández2021 - ↑ Borowiec, Marek L.; Moreau, Corrie S.; Rabeling, Christian (2020). "Ants: Phylogeny and Classification". In Starr, Christopher K. (ed.). Encyclopedia of Social Insects. Cham: Springer International Publishing. pp. 1–18. doi:10.1007/978-3-319-90306-4_155-1. ISBN 978-3-319-90306-4. S2CID 219873464. Retrieved 2024-02-11.
- ↑ Ward PS (2007). "Phylogeny, classification, and species-level taxonomy of ants (Hymenoptera: Formicidae)" (PDF). Zootaxa. 1668: 549–563. Bibcode:2007Zoot.1668.1.26W. doi:10.11646/zootaxa.1668.1.26. Archived (PDF) from the original on 2022-10-09.
- ↑ Rabeling C, Brown JM, Verhaagh M (September 2008). "Newly discovered sister lineage sheds light on early ant evolution". Proceedings of the National Academy of Sciences of the United States of America. 105 (39): 14913–14917. Bibcode:2008PNAS..10514913R. doi:10.1073/pnas.0806187105. PMC 2567467. PMID 18794530.
- ↑ Brady SG, Fisher BL, Schultz TR, Ward PS (May 2014). "The rise of army ants and their relatives: diversification of specialized predatory doryline ants". BMC Evolutionary Biology. 14 (93): 93. Bibcode:2014BMCEE..14...93B. doi:10.1186/1471-2148-14-93. PMC 4021219. PMID 24886136.