نتر

نتر
صيغة أدبية
كلاص فرعية ديال	خدمة أدابية
طرف من	أدب
كيمارسها	كاتب د النتر

النتر هو الشكل اللي كاتاخدو اللغة بشكل طبيعي (سوا الشفوية ولا لمكتوبة) باش تعبر على لمفاهيم، و هو، عكس الشيعر، ما كيخضعش للقياس و للإيقاع.

لأصل

ف لأداب ليوناني لقديم، كان أي أداب كيتسمى شيعر. ولكن، المفهوم ديال لفن ف التقافة ليونانية كان مرتابط رتيباط وتيق ب لإيقاع، و بسباب هادشي، أغلب لأعمال لأدابية كانت عندها صيغة شيعرية. من بعد، لخيطاب لمنضم إيقاعيا بدا كيتسمى شيعر، على عكس لخيطاب اللي ما مرتابطش ب لإيقاع. الرومان لقدام، اللي ورتو التقافة ليونانية، بداو كيسميوه نتر. عند كوينتيليان كنلقاو تعبير ōrātiō prōsa، وعند سينيكا - غير prōsa باش يشيرو ل حرية التعبير، و المعاودة اللاإيقاعية.

ف اللاتينية، prōsa (ōrātiō) جات من الصيفة prōsus "نيشان"، "حر"؛ prōrsus نفس الشي، ف اللاتينية لقديمة prōvorsos "غادي للقدام"، "مستقيم"، و هو سمية د مفعول من لفيعل اللاتيني لقديم prōvortere "كيمشي للقدام" (ب لاتينية: prōvertere). كان لمصطلح شي مرات كيتعارض مع سمية الشيعر، ب لاتينية: versus (prōrsā et vorsā "ب النتر و الشيعر" عند أپوليوس).

وخا كاين وضوح ف الضاهر، ماكايناش شي تفرقة واضحة بين الجوج مفاهيم "النتر" و "الشيعر". كاينين أعمال ما عندهاش إيقاع، ولكن مقسمة ل سطورا و كتعتبر شعر، و لعكس صحيح، كاينين أعمال مكتوبة ب قافية و إيقاع، ولكن كتعتابر نتر (شوف النتر الإيقاعي).

أصل لكلمة لإبداعي

المصطلح جا من التعبير اللاتيني prosa oratio "لكلام نيشان" (الشيعر بلا زواق)، حيت prosa هي مؤنت prosus، و قبلها prorsus "نيشان"، من اللاتينية لقديمة provorsus "(التحراك) للقدام"، من pro- "للأمام" + vorsus "غادي"، سمية د لمفعول من vertere "كايتاجه".

التاريخ

لكتّاب لّولين ديال الأعمال النترية اللي معروفين هما فيريسيدس من سيروس و الميليسيين. بكري كان كايتسمى قدموس الميليتي.

ف ليونان لقديمة، ب جنب الشيعر كاين نتر خيالي: أسطورة، خرافة، حكاية خرافية، كوميديا. هاد الأنواع ماكانتش كاتعتابر شيعرية، حيت بالنسبة لليونانيين القدام، الأسطورة كانت ضاهرة ماشي فنية، بل دينية، و الخرافة تاريخية، و الحكاية الخرافية ديال الدار، و الكوميديا كانت كاتعتابر واقعية بزاف. النتر اللاخيالي كان كيشمل الأعمال الخطابية، السياسية، و من بعد، العلمية. و هاكدا، ف العالم القديم، روما القديمة و من بعد فؤروپا ديال لقرون لوسطانية، كان النتر ف مرتبة تانوية، كيشكل أدب الحياة اليومية ولا الدعاية، على عكس الشيعر اللي كان فني بزاف.

ف النص التاني ديال لقرون لوسطانية، الوضع بدا كيتبدل بشوية. مع تدهور النضام القديم و من بعد المجتمع الإقطاعي، تدهورات القصيدة و الطراجيديا و النشيد. بسباب تطور البرجوازية و نموها التقافي و الإيديولوجي، الأنواع النترية بدات كتكبر و كتطور كتر على أساس تقافة المدون الكبيرة. بانو الرواية القصيرة و من بعد الرواية. النواع الشيعرية القديمة اللي كانت كتلعب دور مهم ف أدب الإقطاعية و مجتمع العبودية فقدات ب التدريج أهميتها الرئيسية، ولايني ماغبراتش ف مرة من الأداب. وخا داكشي، الأنواع الجديدة، اللي لعبات دور مهم ف الأساليب البرجوازية و من بعد ف كل أداب المجتمع الراسمالي، كانت كتميل بوضوح للنتر. النتر الفني بدا كينافس الشيعر على مكانة الصدارة، و ولى جارو، و من بعد، ف قمة الراسمالية، عوّضو ݣاع. ب حلول القرن تسعطاش، ولاو كتّاب النتر، الروائيين و كتّاب الروايات القصيرة، هما أبرز الشخصيات ف الأداب الخيالي، و قدمو للمجتمع ديك التعميمات الكبيرة النمودجية، اللي ف عهد نتصار الشيعر قدموها لمبدعين ديال لقصايد و الطراجيديات.

الأنواع الأدبية النترية

وخا مفهوم النوع كيحدد مضمون العمل كتر من شكلو، أغلب النواع كتميل للكتابة الشيعرية (قصايد، مسراحيات) ولا النترية. ولكن، هاد التقسيم ما خاصش يتاخد حرفيا، حيت كاينين أمتلة بزاف د أعمال ب نواع مختالفة تكتبات ب شكال ماشي معتادة عليها. بعض الأمتلة هي الروايات و القصص القصيرة للشوعارا الرواسا اللي تكتبات بشكل شيعري: "الكونت نولين"، "بيت ف كولومنا"، "يوجين و لانيجين"، أعمال پوشكين، "أمين الصندوق" و "ساشكا" ديال ليرمنتوڤ. زيادة على هادشي كاينين نواع كتكتب ب نفس التردد ب النتر و الشيعر (حكاية خرافية).

الأنواع الأدبية اللي تقليديا كتصنف كنتر هي السيرة، البيان، المقال، الرواية، الحكاية الرمزية، القصة القصيرة، الملحمة، إلخ.

السيرة

السيرة هي مقال كيحكي على حياة و أنشطة شخص معين. وصف ل حياة شخص؛ نوع من النتر التاريخي و الفني و العلمي. السيرة لعصرية (متلا، سلسلة "حياة العضما") كتكشف على الشرطية التاريخية و الوطنية و الإجتماعية، و النوع النفسي للشخصية، و علاقاتها السببية مع العالم الإجتماعي و التقافي.

البيان

البيان هو إعلان برنامجي على شكل نتر مرتابط ب المبادئ الجمالية ديال حركة أدبية معينة، ولا تيار، ولا مدرسة، ولا مجموعة. المصطلح نتاشر فالقرن تسعطاش، وهو واسع ف المعنى ديالو، داكشي علاش هو شرطي و قابل للتطبيق على مجموعة كاملة من الضواهر الأدبية - من الإعلانات المفصلة حتى الأعمال الجادة بحال لبريّات، المقالات و المقدمات. ف بعض الحالات، الخطابات الجمالية للكتاب و النقاد الأدبيين كتكون عندها طابع البيانات الأدبية، مع تأتير مباشر على المسار التاريخي و الأدبي، وخا بعض الإعلانات على شكل بيان كتكون مؤقتة و تأتيرها قليل. شي مرات، البيانات الأدبية و المحتوى الفعلي للمدرسة الأدبية ماكيتطابقوش. بشكل عام، البيانات كتمتل نتيجة ولا خرة من حياة جتماعية حية، كتعكس البحت الجمالي و عملية تكوين الأدب الجديد.

المقال

المقال هو نوع من الأشكال الصغيرة د لأدب الملحمي، كيختالف على الشكل الآخر ديالو، القصة، ب غياب صراع واحد كيتحل بسرعة و ب تطور كبير للصورة الوصفية. هاد الجوج فروقات كيعتامدو على خصوصيات إشكالية المقال. ماكيتناولش بزاف مشاكل تكوين شخصية الفرد ف صراعاتها مع البيئة الإجتماعية الليستة، بل كيتناول مشاكل الحالة المدنية والأخلاقية د "البيئة". المقال يقدر يكون أداب ولا صحافة.

القصة

القصة هي عمل نتري ملحمي، قريب من الرواية، كيميل ل تقديم متسلسل ديال لحبكة، محدود ب أقل عدد من الخطوط السردية. كتمتل حلقة منفاصلة من الحياة؛ و كتختالف على الرواية ب قلة كتمال و تيساع تصاور الحياة اليومية و العادات. ماعندهاش حجم تابت و كتحتل مكانة وسطية بين الرواية من جهة، و القصة القصيرة من جهة خرة. كتميل ل حبكة كرونولوجية كتعاود المسار الطبيعي د لحياة. ف روسيا القديمة، "قصة" كانت كتعني أي حكاية نترية، على عكس الشيعرية. المعنى القديم د لمصطلح - "خبار على شي حاجة طرات" - كيشير بلي هاد النوع ستوعب الحكايات الشفوية، الأحدات اللي الراوي شافها ولا سمعها شخصيا. مصدر مهم ل"الحكايات" الروسية القديمة هو السجلات ("وقايع نيستور" و غيرها). ف الأدب الروسي القديم، كانت كتسمى "قصة" أي حكاية على أحدات حقيقية ("قصة غزو باتو ل ريازان"، "قصة معركة كالكا"، "قصة بطرس و ڤيڤونيا"، و زيد و زيد)، اللي مصداقيتها و أهميتها الحقيقية (القيمة المهيمنة) ماكانتش كاتّير الشك عند معاصريها. حبكة القصة الكلاسيكية، اللي قوانينها ترسخات ف الأدب الواقعي ف النص التاني ديال القرن تسعطاش، غالبا ما كتركز على تصويرة البطل الرئيسي، اللي شخصيتو و مصيرو كيتكشفو ف الأحدات القليلة اللي كيشارك فيها مباشرة. الحبكات التانوية ف القصة، على عكس الرواية، غالبا ماكتكونش، و الكرونوتوپ السردي كيكون مركز ف فترة زمنية و مكانية ضيقة. عدد الشخصيات ف القصة، بشكل عام، قل من الرواية، و التمييز الواضح بين الشخصيات الرئيسية و التانوية ف القصة، اللي هو من مميزات الرواية، غالبا ماكيتواجدش ولا هاد التمييز ماشي مهم ل تطور الأحدات. حبكة القصة الواقعية غالبا ماكترتبط ب "هموم الساعة"، ب اللي الراوي كيلاحضو ف الواقع الإجتماعي و كيشوفو كـ واقع حالي. شي مرات، المؤلف براسو كان كيوصف نفس العمل ف فئات نوعية مختالفة.

الحكاية الرمزية

الحكاية الرمزية هي قصة قصيرة ب الشيعر ولا النتر بشكل ستعاري و توجيهي. واقع الحكاية الرمزية كيتكشف برا العلامات الزمانية و الجغرافية، بلا تحديد سميات تاريخية محددة للشخصيات. الحكاية الرمزية خاص يكون فيها شرح للستعارة باش القاري يقدر يفهم معنى الستعارة. وخا كاين شبه مع الخرافة، الحكاية الرمزية كتداعي بلي هيّ تعميم إنساني عام، و شي مرات ماتهتمش ب القضايا الخاصة. الحكاية الرمزية هي أيضا نوع ملحمي: عمل سردي صغير عندو طابع توجيهي، كيحتوي على تعليم ديني ولا أخلاقي بشكل ستعاري. المصدر الرئيسي ديال هياكل الحكايات الرمزية ف الأدب الؤروپي هو العهد الجديد. ف العهد القديم مازال ماكايناش ديك التربية النوعية الواضحة، اللي عادة كتسمى حكاية رمزية.

الأدب اليوناني

•  مقالة متعمقة: أداب يوناني

أصل النتر كيرجع لإيونيا ف القرن السادس قبل الميلاد، ف البداية كان نتر سردي ل وصف لبلايص و العادات ولا الحكايات، ب لغة عقلانية كتر، مختالفة على الشيعر الغنائي. ولكن، تطورو الكبير غايكون ف أتينا خلال لقرون الخامس و الرابع قبل الميلاد.

للمرة اللولة، توفرات أداة لغوية قادرة على خدمة الفكر المجرد: "الأسلوب اللادوري" و اللوݣوݣرافيين (حرفيا، "دوك لي كيكتبو النتر").

الكتاب الرئيسيين ف التأريخ اليوناني النتري هوما:

• هيرودوت، ب نترو السردي المستوحى من الإليادة؛
• توقيديدس، ب نترو العلمي، اللي كيسرد و كيناقش أحدات معاصرة و كيحاول يكون محايد؛
• زينوفون، ب عملو الهيلينيات، مكمل عمل توقيديدس، وخا كان كيكتب ب شكل منحاز ل صالح سپارطا.

الأدب اللاتيني والتقافة الغربية

ف التقافة الرومانية، النتر ماكانش مرتابط ب النواع السردية ولكن ب الخطابة. ماركوس توليوس شيشرون ف الخطيب ميز بين تلاتة مستويات ديال الأسلوب: منخافض، متوسط، و عالي، و تعمق ف لخصايل الموسيقية ديال النتر و وضع قواعد كتعلق ب ترتيب أجزاء الجملة، الإيقاع و خصوصا فواصل الفترة، و رتب الجزء اللخر على حساب مقاييس مشابهة ل مقاييس الشيعر. على طريق كوينتيليان، هاد النمودج وصل ل لقرون لوسطانية و أتر ففن الإملاء ديال المدارس (المدارس الرهبانية، المدارس الأسقفية، المدرسة البلاطية، الجامعات) و المستشاريات. فالقرن تلطاش، يوحنا د ݣارلانديا وصف و صنف شي نواع ديال الأسلوب النتري، و ف هاد الفترة تطور نتر لاتيني علمي و فلسفي، فوق دوق ornatus (الزخرفة)، و رجح صرامة المخططات المنطقية-البرهانية (السكولاستية).

عصر النوضة قدم مجموعة واسعة ديال النواع النترية: الشيعرية الكلاسيكية قدمات نمادج للتقليد ف النواع الأدبية المختالفة. الإنعكاس ف التيجاه ف الباروك جاب حيلات كاتدهشر. ف عصر التنوير، ولى النتر أداة مهمة للنشر و الجدل السردي، الفلسفي، الساخر، و غيرهم. فالقرن تسعطاش، التمييز بين النتر و الشيعر تعمق، و خلق التمييز بين النتر ب وضيفة نضرية-سردية و الشيعر ب وضيفة غنائية؛ و هاد التمييز كيرجع ل فهم هيمنة النتر ف الطبيعانية.

الأدب الطالياني

•  مقالة متعمقة: أداب طالياني

مع السقوط ديال لإمبراطورية الرومانية لغربية، اللاتينية التقليدية بقات حية بفضل كتّاب بحال كاسيودوروس، بويتيوس و سيماخوس. الفنون الحرة زداهرات ف راڤينا تحت حكم طيودوريك لعضيم، حيت كانو الملوك لݣواوطا كيعيّنو براسهم معلمين ديال البلاغة و النحو. بعض المدارس تأسست ف الطاليان، و حتى مؤلفين بارزين بحال إينوديوس من پاڤيا (شاعر وتني)، أراتور، ڤينانتيوس فورتوناتوس، فيليكس النحوي، پيتر د بيزا ولا پولينوس من أكويليا.

بينمّا الطاليانيين اللي كانو مهتمين ب اللاهوت كانو كيميلو ل فرانسا، لخرين كانو منجادبين عادة ل دراسة القانون الروماني. هادشي شجع على إنشاء جامعات من لقرون لوسطانية بحال پولونيا، پادوڤا، فيتشنزا، ناپولي، ساليرنو، مودينا وپارما، اللي ب دورها ساهمت ف نشر التقافة و مهدات الطريق اللي غايتطور من خلالها لأداب العامي الجديد. التقليد الكلاسيكي ماغبرش، و الحنين ل دكرى روما، و الإهتمام ب السياسة و تفضيل الممارسة على النضرية تجمعو باش يأترو على تطور الأدب الطالياني.

لأداب الصبليوني

•  مقالة متعمقة: أداب صبليوني

لأداب الصبليوني كايندرج ضمن لأداب د الصبليونية، اللي كيشمل لأداب ب لقشتالية و الصبليونية ديال جميع لبلدان لهاضرة ب الصبليونية. من جهة خرى، هو مندرج تا ضمن لأداب د سپانيا، معا باقي لأداب ب اللوغات لمهضورة ف لبلاد.

"أول النصوص المكتوبة ب الكامل ب اللغة العامية المحلية كترجع للخر ديال لقرن 11، ف كاطالونيا، اللخر لقرن 12، ف قشتالة و ناڤارا، و النص اللول ديال لقرن 13، ف ليون، ݣاليسيا و لبرطقيز، و بشكل عام، هي وتائق ما صادراش من المستشارية الملكية. ... أول شاهد على تخدام لعامية ف لمستشارية الناڤارية هو من عام 1169 ولا 1171 - من غير قوانين إستيلا و لاݣوارديا، و أول شاهد ف المستشارية القشتالية هو من عام 1194." مستشارية فرناندو التالت ملك قشتالة رسخات ممارسة تحرير الوتائق باللغة العامية (القشتالية ديال القرن التلطاش).

غير من القرن تلطاش و ب معنى جغرافي حصري ممكن نقدرو على أداب صبليوني مكتوب. حتى ل هاد الفترة، كيفترض التعايش بين شيعر شفوي ب لغة رومانسية، سوا غنائي ولا ملحمي، مع تخدامات كتابية متقفة كانت لغة تعبيرها و نقلها هي اللاتينية.

لأداب لفرانساوي

•  مقالة متعمقة: أداب فرانساوي

اللوغة لفرانساوية هي نتيجة نديماج بين لوغات ؤيل langues d'oïl مختالفة، اللي شكلها السائد تفرض تدريجيا من مقر السلطة لمؤسسية، إيل دو فرانس، اللي عطاتها سميتها. عندها خليط من لأصول من بينها الروماني، الجرماني، لكيلت و عدد د اللوغات لإقليمية. لفرانساوية بحد داتها، ممكن تعتابر شكل عصري ديال اللاتينية الداريجة.

لأداب لفرانساوي تولد ف القرن التاسع، مع أول لكتابات ب اللوغات اللاتينية. إنتاجو المهم على مر القرون أدى ل خلق حاراكات أدبية و فنية جديدة، اللي تأتيرها القوي على لآداب لخرة كيخليها تحتل مكانة بارزة ف لأداب لعالمي.

لأداب النݣليزي

•  مقالة متعمقة: أداب نݣليزي

لأداب النݣليزي هو كل ما تكتب ب النݣليزية، ب غض النضر على أصل لمؤلفين ديالو. تحت هاد السمية كايتجمعو أعمال مكتوبين ب النݣليزية القديمة، النݣليزية لوسطانية، النݣليزية لعصرية و النݣليزية ديال دابا، و تا لي مكتوبة ب اللهجات لمختالفة اللي كاينة ف اللوغة ديال دابا حول لعالم.

لأداب لألماني

•  مقالة متعمقة: أداب ألماني

لأداب لألماني (ب لألمانية) كيشمل أداب النصوص لأصلية ديال الشعوب الناطقة ب لألمانية ف ؤروپا لوسطانية. و تطورو بعدما تجاوز الحدود السياسية المتقلبة، ماكيشملش غير كتابات ألمانيا لموحدة ديال دابا ولكن تا كتابات ديال لوطريش و سويسرا.

ف لأداب لألماني كاينين تا أعمال ماشي شيعرية ولا بدون متطلبات أدابية خاصة: يعني، أعمال ديال التأريخ، تاريخ لأداب، لعولوم لإجتماعية، لفلسفة، و زيد و زيد. و تا يوميات ولا بريّات.

لأداب الروسي

•  مقالة متعمقة: أداب روسي

مصطلح لأداب الروسي كايشير ماشي غير ل أداب روسيا، ولكن حتى للأداب لمكتوب ب الروسية من عند أعضاء بلدان خرة ستاقلات على لإتحاد السوڤياتي السابق ولا من عند مهاجرين تستقبلو تماك. معا تفكاك لإتحاد السوڤياتي، شلا تقافات و دول طالبو ب شلا كتاب سوڤياتيين سابقين اللي، وخا داكشي، كانو كيكتبو ب الروسية. لأداب الروسي كيتميز ب عمقو لكبير مع شخصيات رئيسية ديال لأداب لعالمي بحال دوسطويوڤسكي ولا طولسطوي، و بدا، بحال لآداب كاملين، على شكل تقليد شفوي بدون كتابة حتى تنصير كييڤ روس عام 989، و معاها، أبجدية مناسبة ل ستقبالها.

لمبدعين ديك لأبجدية كانو لمبشرين لبيزنطيين كيرلس و ميتوديوس؛ خداو حروف مختالفة من لأبجدية اللاتينية، ليونانية و لعبرية، و بتاكرو حروف خرة. فاللول، الروسية لمكتوبة ستعملات جوج أنضمة د لكتابة —الأبجدية الكيريلية و لألفبائية لݣلاݣوليتسية—؛ لݣلاݣوليتسية، اللي كيتفتارض بلي كيرلس و ميتوديوس بتاكروها تا هي، تتخلى عليها، و لأداب الروسي كيفما كنعرفوه دابا كيتكتب و كيتقرا ب لألفبائية لكيريلية، ف نمطها لي كايتسمى ألفبائية روسية.
ف النص اللول ديال لقرن 19 هو لعصر الدهبي ديال الشيعر الروسي، لو النص التاني ديال لقرن كان لعصر الدهبي ديال النتر الروسي.

لأداب الشينوي

•  مقالة متعمقة: أداب شينوي

لأداب الشينوي عندو تاريخ كيرجع ل أقدم السجلات الرسمية ديال السلالات المحفوضة حتى ل أعمال الخيال اللي ضهرت خلال سلالة مينݣ لحاكمة للترفيه على الجماهير المتقفة ف الشينوا. كيتوقع بلي حتال لقرن 17، كانت الشينوا نتجات نصوص مكتوبة كتر من بقية العالم.

لأداب الشينوي أتر بشكل كبير على أدب لبلدان لمجاورة، خصوصا الجاپون و كوريا. بعض أعمال لأداب الشينوي مشهورة بزاف و كتعاود تّنشر ديما ف لعالم كامل، بحال داوديجنݣ.

ل قرون، لأداب الشينوي ماكانش غير كيفكّر ف لمجتمع و لحياة، ولكن كان عندو أيضا محتوى سياسي قوي. بزاف ديال لؤدابا كانو موضافين كبار ولا فلاسفة كيدرسو و كيقتارحو شكال جداد ديال لحكم ف شينوا.

شوف تا

• صحافة
• رواية
• قصة قصيرة