لإمبراطورية لخرانية

من ويكيپيديا
لإمبراطورية لخرانية
لإمبراطورية لخرانية
معلومات عامة
عنوان أصلي Mistborn: The Final Empire
نوع د لكتاب فنتازيا عليا
مؤلف براندن سانديرسن
لبلاد لأصلية الولايات المتاحدة د ميريكان
لّوغة لأصلية نڭليزية
تاريخ د نّشر 17 يوليوز 2006



لإمبراطورية لّخرانيةنّݣليزية The Final Empire) هيّا رّواية لّولة ف سّيرية د ميستبورن لي مألّفها لكاتب لميريكاني براندن سانديرسن. هاد رّواية شي مرات كاتسمّا ب سميت سّيرية كاملة "ميستبورن"، ؤ خرجات ف 17 يوليوز 2006.

هاد رّواية متبوعة ب جوج روايات خرين هوما لبير د لمعراج (2007) ؤ لبطل د لأزمان (2008).

ف أكتوبر 2016، شركة دي إم دجي إنترتينمنت شرات لحقوق ديال جميع رّوايات د ساندرسن ف عالم كوزمير.[1] ف 27 يناير 2017، تّعلن بلي شّركة سنات معا سكوت فرازير باش يكتب سّيناريو د فيلم مبازي على رواية لإمبراطورية لّخرانية.[2]

لمختاصر د رّواية[بدل | بدل لكود]

لعالم د ميستبورن[بدل | بدل لكود]

لقصة كاتطرا ف عالم ديسطوپي ف كوكب سكادريال، لي كيطيح فيه رّماد ديما بسباب لبراكين، لعشوب كاملين لونهوم قهوي، ؤ واحد ضّباب لي لمصدر ديالو كيبان فوقطبيعي كيغطي كولشي ف لّيل. 1000 عام قبل ماتبدا لقصة واحد شّخص تسمّا لبطل د لأزمان قدر ينقد لعالم من شر لي معروف ب سميت "لغرق" Deepness عند لبير د لمعراج. طّبيعة ؤ لماهية د هاد "لغرق" تّنسات معا مرور زّمان. هاد لبطل سمّا راسو "لّورد لحاكم" ؤ أسس لإمبراطورية لّخرانية، بعدما كتاشف سّر د لخلود. لّورد لحاكم ولّا طاغية لي متحكم ف كولشي، ماكيموتش، ؤ رد راسو رب معبود.

لّورد لحاكم بدّل لعالم على كي كان، ؤ نضم لمجتمع ب شّكل لي جاه مناسب، ب طبقة ديال نّوبالا لي كينحادرو من صحابو لي عاونوه، ؤ طبقة ديال لفلّاحين لمقهورين لي كيتسماو "سكا" skaa.

سّحور عنصر مركزي ف لقصة ؤ نقدرو نسميوه "سّحور د لمعادن"، حيت كيعتامد على لقدرة د سّحار باش يتحكم ف معدن ؤلا معادن محددين، لي كيعطيو قوة محددة على حساب نّوع د سّحور. أكتر نوع ديال سّحور معروف ف لإمبراطورية لّخرانية هوّا لألومانسيا Allomancy، لي كيخلّي سّحار يتحكم ف شي نوع ؤلا نواع د لمعادن. ؤ كاين نوع أخور كيتسما "فيروكيميا" Feruchemy لي كيخدم بشكل مختالف. كلا معدن كيعطي قدرة محدّدة (متلاً باش تزيد ف لقوة لجسدية، ؤلا لقدرة لعلاجية، ؤلا تشوف لموستقبال). كاينين غير جوج د نّواع ديال لألومانسيين: لي عندو قدرة باش يتحكّم غير ف معدن واحد كيتسما "ضبايبي" Misting، ؤ لي عندو قدرة باش يتحكم ف جميع لمعادن كيتسما "مزيود من ضّباب" Mistborn ؤ هادو قلال بزاف. ف لعادة سّحارا ماكيكتاشفو لقدرات ديالهوم تا كيجيهوم تّقاف Snapping (كاتطرا ليهوم صدمة كبيرة نفسية ؤلا جسدية ؤ كيطيحو كيقفقفو بحال يلا فيهوم مرض صّرع).

شخصيات رئيسية[بدل | بدل لكود]

  • كيلزير Kelsier: شفار مشهور لي ولّا مرفّح بعدما شفر من شحال د نّوبالا. 3 سنين قبل لقصة كان تشد هوّا ؤ مراتو ؤ تصيفطو ل "لحفاري د هاثشين"، منجم ديال معدن لأتيوم atium، باش يدوّزو لحبس لمؤبد. فاش تقتلات مراتو تماك، كيلزير جاه تّقاف ؤ كتاشف بلي راه عندو لقدرات ديال ميستبورن.
  • ڤين Vin: بنت مراهقة كانت عايشة ف زّنقة، ؤ خدّامة معا عيصابة ديال شّفارا. كان خوها لكبير "رين" Reen ديما قاتلها ب لعصا فاش كانت صغيرة، ؤ بقات دّكريات صّعيبة ديالها ديما مأرّقاها. كيلزير لقاها ؤ كتاشف بلي راها تا هيّا ميستبورن، ؤ نضمّات ل لفرقة ديالو.
  • لّورد لحاكم Lord Ruler: حاكم ماكيموتش لي رد راسو رب معبود ف لإمبراطورية لّخرانية، ؤ لي كيݣولو بلي كان بطل نقد لبشرية هادي 1000 عام، ؤ حرفياً عاود صاوب لعالم ب تضاريسو ؤ لكائنات ديالو ب شّكل لي بغا.
  • سازد Sazed: راجل من شّعب ديال تيريس Terris، لي كينتامي ل مونضّامة سرية ديال لحافضين Keepers، لي كيحاولو باش يحميو لمعرفة د تّاريخ ؤ لأديان ؤ طّيكنولوجيا لي منعها لّورد لحاكم، باش يدوّزوها ل لأجيال جّاية.

عيون لكلام[بدل | بدل لكود]

  1. ^ Lang، Brent (27 أكتوبر 2016). "DMG Nabs Rights to Brandon Sanderson's 'Cosmere' Book Universe in Massive Deal (EXCLUSIVE)". Variety (ب نڭليزية). مأرشيڤي من لأصل ف 1 نونبر 2016. تطّالع عليه ب تاريخ 23 يونيو 2022.
  2. ^ Tartaglione، Nancy (27 يناير 2016). "DMG Entertainment Taps F Scott Frazier To Adapt 'Mistborn: The Final Empire'". Deadline Hollywood. مأرشيڤي من لأصل ف 26 أبريل 2017. تطّالع عليه ب تاريخ 23 يونيو 2022.