موضيل:قواعد د مسابقة الربيع د ؤروپا لوسطانية و الشرقية 2025
باش يتقبلو المشاركات ف المسابقة خاص يتوفّرو فيهم هاد الشروط:
- شكون:
- المشاركين خاصهم يكونو ساكنين ف المغريب، ولّا عندهم عنوان تماك، ولّا قادرين يتسلمو الجائزة ف عنوان كاين ف المغريب. ماغادي يتصيفطو حتى جوائز ل شي موضع برا د المغريب.
- خاص المشاركين مايكونوش أعضاء ف لجنة التنظيم ولّا التحكيم.
- خاص المشاركين يكونو مقيّدين ف الليستة د المشاركين.
- لي مشارك ف المسابقة راه كيتّعتابر ضمنياً بلي قابل ب الشروط العامة ديال المسابقات و الحركات د الكتابة ف ويكيپيديا.
- الموضوع: خاص يكون الموضوع ديال المقال موجود ف الطابلوات على وحدة من البلدان ولّا المجتمعات الويكيپيدية المشاركة ف الحدث، من غير المغريب. المواضيع د المغريب مديورين باش يكتبو عليهم المجتمعات الخرين. لي بغى يكتب على مواضيع المغريب برا د الإطار ديال المسابقة (بلا مايربح جوائز)، يقدر يشوف الفقرة على الإديتاطون. ماغادي يتقبلو حتى شي مواضيع زايدين لي ماكاينينش ف الطابلوات.
- اللوغة: اللوغة د الكتابة ف ويكيپيديا بالدارجة هيّ الدارجة المغريبية، ب شكالها و تنوعاتها. الكتابة ب أي لوغات ولّا لهجات وحدين خرين ماشي مقبولة، و المقال لي مامكتوبش بالدارجة غادي يتحيّد من الموسوعة. يلا خدّمتي أساليب ولّا كلمات خاصين ب شي منطقة ف المغريب و مامنتاشرينش، حاول(ي) عافاك تزيد(ي) نويطة ف التحت د المقال باش تشرح(ي)هم.
- الجودة: باش يتّقبل المقال خاصو يحقق المعايير د الجودة الأساسية زيادة على:
- الحجم: خاص المشارك يصايب ولّا يزيد ف المقال 4000 بايت ولّا كتر. أي مقال زاد فيه مشارك قل من 4000 بايت ف المجموع ماغاديش يتّحسب ليه ڭاع ف المشاركات ديالو/ديالها. (شوف: كيفاش تعرف الحجم د مقال، و كيفاش تشوف التبديلات القدام ف المقال و الإحصائيات ديالهم).
- المصادر: خاص المشارك يزيد على الأقل مصدر واحد جديد ف المقال، لي كيحقق شروط المصادر الموتوقة، باش تّحسب المشاركة. أي مقال مافيه حتى مصدر ماغاديش يتّحسب. أي إضافة ل مقال كان ديجا موجود خاص يكون ضمنها مصدر جديد باش تكون مقبولة (كيفاش تزيد لمصادر).
- التصنيفات: خاص المقال يكونو فيه تصنيف ولّا تصنيفات. أي مقال مافيه حتى تصنيف ماغاديش يتّقبل. يلا المشارك زاد ف مقال كان ديجا موجود، ماشي ضروري يزيد تصنيفات جداد يلا كانو ديجا موجودين ف المقال (شوف شنو هو تصنيف، و كيفاش تزيد تصنيف ف مقال).
- التصاور و صنادق المعلومات: يلا كان الموضوع كايتطلب الزيادة د تصويرة ولّا صندوق د المعلومات، خاص يتزادو ف المقال، بشكل و مقدار معقول (ماتديرش تصاور كتر من اللازم). المشاركة تقدر تّقبل وخا مايكونوش فيها تصاور ولّا صندوق معلومات، ولايني يقدر المشارك يمشيو ليه نقاط يلا كان الموضوع كيتطلب الزيادة ديالهم، و كانو تصاور و صندوق معلومات مناسبين متوفّرين (شوف كيفاش تختار و تزيد تصويرة ف مقال، صنادق د لمعلومات).
التنقيط
[بدل لكود]- 10 د النقاط على الزيادة د 4000 بايت اللولة ف المقال من عند كل مشارك (سوا كان المقال جديد، ولّا ديجا موجود). يقدرو مبدئيا جوج مشاركين يخدمو على نفس المقال، و مزيان يلا دارو تنسيق بيناتهم، يلا دعات الضرورة.
- 5 د النقاط على كلا 1000 بايت إضافية ف نفس المقال ل كل مشارك.
- 3 د النقاط على كلا مصدر كيحقق شروط المصادر الموتوقة، تال حدود 5 د المصادر. فوق من داكشي كاياخد المشارك نقطة وحدة على كلا مصدر إضافي.
- 3 د النقاط على الزيادة د صندوق المعلومات.
- 2 د النقاط على كلا تصويرة، ف حدود 3 د التصاور عندهم علاقة معا الموضوع ديال المقال، و ف حدود الحجم ديال المقال. أي تصويرة إضافية مامحسوباش ف التنقيط (من غير حجم البايتات ديالها).
- 1 نقطة ل أي تبديل ف الويكي عندو علاقة معا المسابقة برّا المجال السمياتي ديال المقالات (متلا مصاوبة ديال تصنيف، موضيل، سؤال ولّا جواب ف صفحة د المداكرة...) ف حدود 10 د النقاط ف النهار (التبديلات الصغار بزاف، و التبديلات ديال تحياد المحتوى مامحسوبينش)، ب فتيراض وجود مساهمة ف مقال ب 4000 بايت ولّا كتر ف نفس النهار.
- نظام التنقيط كيفتارض حسن النية ديال المشارك، و الرغبة ديالو ف تطوير المحتوى الموسوعي ديال ويكيپيديا. أي محاولة ديال التلاعب ب النظام ديال التنقيط على ود تحقيق أكبر عدد د النقاط بلا مراعاة ديال الجودة د المحتوى، يقدر يفقد بسبابها المشارك نقاط سوا بشكل جزئي ولا كلّي. لجنة التحكيم كاتحتافظ بالحق الكامل ديال مراجعة المحتوى و الجودة ديالو، و كاتعطي ولّا كاتحيّد النقاط للمشارك على حساب المنظور ديالها.
ميتال: يلا مشارك صاوب مقال ب 10000 بايت، و دار فيه 8 د المصادر، 4 د التصاور، صندوق د المعلومات و 3 د التصنيفات منها تصنيف واحد ماكانش موجود قبل ف الويكي و لي صاوب ليه صفحة جديدة، غادي يكونو عندو هاد النقاط: 10 (على 4000 بايت اللولة) + 5 * 6 (على 6000 بايت لي بقات) + 3 * 5 (على 5 د المصادر اللولين) + 1 * 3 (على 3 د المصادر زايدين) + 2 * 3 (على 3 د التصاور، و التصويرة الإضافية ماغادي ياخد عليها حتى شي نقطة) + 3 (على صندوق د المعلومات) + 1 نقطة (على المصاوبة ديال التصنيف الجديد، الزيادة ديال التصنيفات ف المقال ف حد داتها ماكاتعطي حتى شي نقطة، ولايني عدم الزيادة ديال أي تصنيف كيعني بلي المقال ماغاديش يتحسب أصلا) = 68 نقطة
الجوائز
[بدل لكود]- الجوائز غادي يكونو على شكل كتوبا لي غادي يتّعطاو للفائز شخصيا ولّا يتصيفطو ف البوسطة، ولّا على شكل قسيمة د الشرا ف شي مكتبة معروفة. التفاصيل غادي يتدارو هنا من بعد. النوعية د الجائزة ماشي قابلة للنقاش، و يلا تعدّر على الفائز باش ياخد الجائزة ديالو، سوا ب الرغبة ديالو ولّا ل ظروف قاهرة، ماغاديش تّعطى ليه قيمتها بشكل خور، سوا فلوس ولّا غيرهم.
- القيمة ديال كل جائزة:
- الفائز اللول: 600 درهم
- الفائز التاني: 400 درهم
- القيمة ديال الجائزة داخلين فيها المصاريف ديال المصيفطة يلا كانو (مابين 20 و 60 درهم على حساب البعد).