ملكية
لملكية هي واحد طريقة د لحكيم فيها واحد عاهل (ماليك) اللي كيحكم حتا لموت ؤلا لإستقالة ديالو. على حسب لموسوعة لبريطانية هي سيستيم سياسي على حساب لحكيم لموحد د واحد شخص. لملكية يمكن تكون وراثية ؤلا منتاخبة، كيما لعاهل ديالها يمكن يحكم إما بشكل مطلق ؤلا محدود ب لقانون الدستوري.
النوع د لملكية اللي كان ف لّول هوّ لملكية لمطلاقة (نّݣليزية: Absolute monarchy)، و فيها لملك كيحكم على لحوكومة و لإدارة كاملين و تّا على الشؤون د الدولة. لملكية لمطلقة يمكن تكون عندها برلمان ولكن مايقدرش يحكم إلا بشكل رمزي ؤلا إستشاري. لإمبراطورية الرومانية و لمملكة د فرانسا (987-1792) هوما من أبرز لأمتيلة التاريخية ديال لملكية لمطلاقة.
ملي بدات التورة لفرانساوية و التورات د عام 1848 ف ؤروپا، بداو بزاف د لبلدان يقررو باش يحددو لحكيم د لماليك ف الشؤون ديالهم ؤلا باش يزيدو لقوة ديال لبرلمان، و من ديك الساعة ولاو ملكيات دستورية. تقدر تكون واحد ملكية نص دستورية، يعني كاين سيستيم دستوري ولكن لعاهل عندو صلاحيات كبيرة من اللي يقدرو يحتاجو لملوك الدستورية لوخرا، متلاً ف الشؤون لبرانية.
كاين دابا 43 دول مستاقلة ملكية ف لعالم.
لعاهل لبريطاني (دابا لماليك تشارلز التالت) هو رئيس الدولة تّا ديال 14 دول ؤخرين جاو ف أميريكا و ؤقيانوسيا، و كاملين هوما دول مستاقلة ديموقراطية و ممالك دستورية ف منظمة لكومونويلت. لعاهل لبريطاني هو رئيس د كنيسة النݣليز، اللي هي لكنيسة الرسمية ف النݣليز، ولكن لممالك لوخرا ماعندهاش أي دين رسمي.
باقي كاين 11 ملكيات ؤخرين ف ؤروپا، منهم 8 دول ملكية دستورية، بحال بلجيكا، سپانيا، السويد ؤلا هولاندا. كاينة جوج إمارات ف ؤروپا (ليخطنشطاين و موناكو) هوما نص دستورية فيهم لأمير كيحكم ب صلاحيات كبيرة من اللي كاين ف لممالك لؤروپيين لوخرا. لڤاتيكان هي لملكية لوحيدة ف لعالم اللي هي منتاخبة و ماشي وراثية، لبابا د لكنيسة لكاطوليكية كيحكم عليها بشكل مطلاق.
ماليزيا هي مملكة دستورية إسلامية جات ف أسيا فيها 9 ملوك و سلاطين كينتاخبو واحد ملك فيديرالي منهم كل 5 سنين،[1] و بروناي اللي جات حداها محكومة من سلطان ب قوة مطلاقة على حساب الدستور د بروناي و لقانون د الطوارئ من 1962.[2]
لمملكة د طونݣا اللي تأسسات ف عام 1875[3] هي لملكية لمستاقلة لوحيدة اللي كاينة دابا ف ؤقيانوسيا و ف لمنطقة د پولينيزيا.
- ↑ "How Malaysia elects the King". The Star (ب الإنجليزية). 2024-07-20. Retrieved 2025-07-24.
- ↑ "Brunei" (ب American English). وزارة لخارجية د لميريكان. Retrieved 2025-07-24.
- ↑ "Tonga's Constitution among the oldest in the world". Matangi Tonga (ب الإنجليزية). 2014-11-06. Retrieved 2025-07-22.
- ملكية ف لموسوعة لبريطانية (ب نّݣليزية)
- ملكية على فرانس 24 (ب لفرانساوية)
 |
ويكيميديا كومنز عندا تصاور و معلومات على ملكية. |
