مصامدا

هادي مقالة على قبيلة أمازيغية. ل معاني وحدين خرين، شوف مصمودة (توضيح).

لمصامدا ولا إمصمودن واحد لقبيلة أمازيغية كبيرة فرع من لبرانصا و كاينة معا زناتيين و صناهجا وهوارة، لمصامدا بلعكس ديال دوك جوج لقبايل لخرين ماتشتتوش بزاف فشمال إفريقيا و تكونصونطراو بواحد لمانيرة خاصة فلمغريب لأقصى (لمغريب ديال دابا) سيرتو فلغرب ديالو، تما كايضومينيو السواحل دلمحيط التيلاسي (بحال سهول ديال تامسنا اللي غادة من من سلا و أزمور حتال آسفي) و جبال دلأطلس لكبير (جبل درن)، و واحد الطرف من الريف لغربي لمعروف بجبالة ؤلا جبال غمارة. التواسع ديال لموحدين خلات بزاف منهوم و شوف ݣاع فاميلات كاملة باش يتانسطالاو بعيد على لبلاد لاصيلي ديالهوم و بلخصوص سكنو إيفريقية (تونس ديال دابا) وكانو بعضين منهوم حتا فلأندلوس. هوما دارو تلاتة ديال لملايك: لبورغواطيين و لموحدين ؤ لحفصيين.

لأصل د سمية

لكلمة ديال مصمودة جات من لامازيغية "ⵉⵎⵚⵎⵓⴷⵏ" (إمصمودن ؤلا إمزمودن) ومقادة من جوج دلكلمات: أمص غاتولي أمز، واللي كاتعني " شاد شي حاجة" (حݣا منها نيت مناش جات لكلمة ديال "ماسينيسا" واحد لماليك ديال نوميديا) و أمود زعما "الزرع/لحصاد". أمز أمود "AmezAmud" باش تولي أمزمود و فاش تعرب غاتولي أمصمود لكلمة كاتجي فالداريجة بلمعنى ديال "مالين الزرع". هادشي كايبين باللي كانو فلاحا و سكنو لبلايص اللي فيها الصابة و الرواضي اللي كاتفلّح.

رد لبال: تاشلحيت غالبا كاتحول الصاد لزاي بحال، الصلا غاتولي تازاليت، داكشي علاش كانلقاو مصمودي هيا سمية عربية ل أمزمودي.

التقسيم

على حساب التقسيم ديال كولان Colin، قسم القبايل لمصمودية لتلاتة:

-جماعة ديال مصمودة الشامالية غادية من لبحر لمتوسط حتال واد سبو وهوما اللي معروفين بغمارة.

-جماعة ديال مصمودة الوسطانية غادية من واد سبو حتال واد مّربيع وهوما برغواطة.

-جماعة ديال مصمودة الجانوبية غادية من مربيع حتال جبال الأطلس الصغير و أغلبهوم شلوح.

لقبايل لمصمودية

لقبايل دلمصامدا اللي تدكرو فواحد لكناش قديم على ماتݣال تكتب فلقرن 14م سميتو مفاخر البربر و مولاه مامعروفش و راه كاينين فيه جوج نسخات فلخيزانة لعامة ديال الرباط و اللي قراه ؤ حقق فيه سي عبد لقادر بوباية (فاݣد باللي لبعض منهوم تعربو ؤ مابقاوش كايدويو بلمصمودية):

• إحاحان قبايل مصمودية بين الصويرة و أݣادير.
• رݣراݣة كان لمكان ديالهوم هوا واد تانسيفت، ومنبعد تفرقو على بلاد سوس ؤ السراغنة.
• ؤوريكا
• هزميرة
• جدميوة
• هنفيسة
• هزرجة فلحوز ديال مراكش.
• دكالة اللي براصها كاتقسم على جوج: دكالة لحمرا وهيا لجانوبية واللي كاضور بآسفي و كاتسما ب "عبدة" ؤ دكالة لبيضا فالشمال و بقات شادة فسميتها "دكالة".
• هنتاتة منهوم منا جا أبوحفص عمر الشيخ دلحفصيين فتونس، مامعروفش بالضبط فين كاينين دابا حيت تفرقو لشلا قبايل خرين ولايني كاينين شي فاميلات فتونس سيرتو فصفاقص كايتنسبو ليهوم، لفاميلة دلهنتاتي و دلمصمودي.
• بني ماغوس
• تحلاوة

فالصراحة، ماشي هادو ݣاع لقبايل لمصمودية مول النص نسا مادكر شلا قبايل خرين ومن بينهوم "هرغة" و "مسكالة" لقبايل اللي جا منهوم لمهدي بن تومرت و نسا حتا "غمارة" واحد لقبيلة جبلية كبيرة و مشهورة فالريف لغربي شادين من جوايه ديال أنفا (كازا فلقديم) حتال جوايه نكور واللي حتاهوما مصامدا واخا دابا لغالبية فيهوم تعربو أما لبعض لاخور كايدويو بتاغماريت و اللي عندها واحد لقرب لتاشلحيت ؤ زيد و زيد. خلاص، وعلى مادكر مول لكتاب ديال "مفاخر البربر" براصو، هوما قبايل كتار بزاف و مكايتحصاوش ؤ بلادهوم مجموعة كتر ماهيا مفرقة.

لوغة

كاينين جوج لوغات مصمودية دابا اللي بقاو وهوما تاشلحيت ؤ تاغماريت وحدة مبين اللوغات لأمازيغية واللي تابعة لّفرع الشمالي فلأطلس اللي كاينين فالريف، واحد لعداد كبير دلمصامدا اللوغة اللولة ديالهوم دابا هيّا الداريجة.

تامصموديت كاتّعتابر بحال تاشلحيت لقديمة، يعني اللي كايهضر بتاشلحيت غايݣد يفهمها ولايني فيها شي كلمات تنساو ؤ مابقاوش كايداولو دابا، هاد اللوغة غاتعرف زمان الدهبي ديالها فلوقيتة دلموحدين معا لمهدي بن تومرت كانت لوغة دلعيلم ديك ساع و بلخصوص فالضومين ديال لبوطانيك و دلبهايم وهادشي غايشيّر ليه إبن لبيطار ، ماشي غير هادشي كاين حݣا واحد لمخطوط كايرجع لقرن 12م كايتسما ب" لكتاب دسميات" وهوا واحد ديكسيونير عربو-أمازيغي كتبها واحد لجازايري سميتو بن-تونارت (1085-1172) كانو كايخدموه لقضا كيف مرجيع باش يزممو لعقود و كانو كايخدموه حتا الطبا و لفرماسيانا و السحارا ديال ديك الساع، هاد لكتاب مكتوب بتامصموديت و شي كليمات فيه كايتدواو دابا غير فتاقبايليت و ديال الشاوية فلجازاير. هادشي كايوري باللي تامصموديت فلعهد دلموحدين كانت هيا اللي رايجة فلمغريب لبعيد.

شي كلمات مدكورين فلمخطوط

لمخطوط ديال عبد الله محمد بن جعفر لقايسي اللي مكنّي ب "بن تونارت" ترجم فيه شلا كلمات من لمصمودية للعربية لفصحى، و ندكرو كيف متال:

• "أسّنتل" (بالداريجة: هيا لحاجة اللي كاتخبّي ؤلا كاتغطّي ؤلا كاتحجب).
• "أسارن" ؤلا "بو إسارن" (بالداريجة: الرقاص، النبي، لمصيفط، لمرسول).
• "تازݣّوت" (بالداريجة: لمزاݣية، تباتة).
• "تيفاضليوين" (بالداريجة: التولال).
• "أكنّاض" (بالداريجة: لخديعة، لقالب).
• "إكمربّي" (بالداريجة: عهد، ميتاق).

لقران لبرغواطي

لمصامدا ديال برغواطة اللي كانو فتامسنا. من بورݣراݣ حتال أم الربيع ؤ من سلا حتال آسفي مادخلوش ل إسلام بديك سّهولة ولايني دارو نبي ؤ ديانة ديالهوم ؤ سميتها ل"برغواطية" و اللي كايعبدو فيها الرب "أكوش ؤلا ياكوش" . و قايدهوم كان هوا صالح بن طريف واللي شعلها حروب ضد لمسلمين لفاتحين و حفيدو يونس كان هوا اللي نشر هاد الديانة وقال فيها باللي صالح تدكر فلقران دلمسلمين و برر تانبيّيت ديال جدو ، وقال باللي "الرسول محمد معا هوا عربي و كايهضر لعربية مايمكنش يدوز الديانة ديالو للأمازيغ، هاد لخدمة غايديرها النبي صالح اللي كايهضر بلسانهوم" وكان كايستادل بالآية 14 من سورة إبراهيم: "وما أرسلنا من رسول إلا بلسان قومه"، هادشي اللي خلاه يدير واحد لقران بلمصمودية اللي على حساب توارخيا كانو فيه تمانين سورة. هادشي غايخليه مكروه من لعرب ؤ حتا من لمرابطيا اللي غايفضيو معا ديانتو والارباما هادا كان سباب تاريخي علاش ݣاع الناس ديال تامسنا تعربو كاملين دابا واخا تعربو ولايني حافضو على لسانهوم لمصمودي وهادشي كايبان مزيان فالداريجة و اللكنة الداريجية لمتميزة اللي كايتهضر بيها مابين سلا ؤ آسفي.

لغماريين

هوما تسعود دلقبايل فالشامال دلمغريب على لبحر المتوسط وبضبط فالريف لغربي و جوج منهوم صافي اللي باقيين كايدويو بلمصمودية، كايروج باللي لاصل دسمية جاي من "إمغارن" وتقلبات لميم معا لغين ؤ ولات "إغمارن" و كاين اللي كايقول بلي جات من لعربية من لفعل ديال "غمر" يعني بالدارجية "عمّر/فزݣ". على حساب لكتاب ديال "معجم البلدان" ديال ياقوت الحماوي واللي تكتب فلقرن تلطاش كايقول باللي لغرب دلمغريب اللي كايطل على لمحيط التيلاسي كان سميتو "سوس" و قسمو على جوج : "سوس لأدنى" ولعاصمة ديالو هيا طنجة و "سوس لأقصى" اللي بعيد عليها بشهراين دلمسير و مورا هاد سوس لأقصى كاين لبحر دالرمل و مامعروفش شنو كاين فلجنوب ديالو (كايقصد الصحرا). مابعيدش باللي هادشي يقدر يعطي لفرضية ديال فواحد لوقت قديم و قبل من دخول دلعرب كان جبالة و تامسنا و سوس "لأقصى" (يعني لقنت الشّمال-لغربي دلمغريب) كايدويو تقريبا نفس اللهجة و اللي هيا لمصمودية.

تأتير ديالهوم برا دلمغريب

بن تومرت فاش دار الدولة الموحدية كان لمقصود ديالها ماشي غير ديني ولايني حتا قبايلي، وعلى هادشي دار واحد السلّوم دلحكام دقيق بزاف واللي كايخلي لقياد دلقبايل لمصمودية من غير واحد الزناتي سميتو عبد لمومن واللي غايجي موراه هوما اللي كانو شادين لحكام و تجمعو فواحد لمجلس اللي كايتسما "لمجلس دلعشرة" (بلفرانساوية: conseil des dix) وهيا اللي كانت لهيكل و لقوام دليدارة لموحيدية و عاد تدار واحد لمجلس د "لخمسين" واللي كايجمع فيه لعيان من ݣاع ليمبراطورية ديالو سيرتو من لقبايل لمصمودية بحال هرغة، أهل تينمل، هنتاتة، ݣدميوة، هسكورة وزيد ؤزيد... ، هادشي الللي غايخلي التأتير لمصمودي يوصل للأندالوس و حتا تونس اللي حكم فيها "أبو حفص لهنتاتي" عشير بن تومرت و هوا من لقبيلة ديال هنتاتة فسوس و كاين ݣاع واحد الجامع قديم فلعهد دلحفصيين فتونس لعاصيمة سميتو "جامع لهنتاتي" ومنسوب لهاد لقبيلة.

جامع لهنتاتي فلعاصيمة ديال تونس

كاينين شلا قبايل مصمودية سكنو لأندالوس، ولايني الشمال ديال لأندالوس كان كاملو تقريبا حاكمين فيه طواسل مصمودية(سوس،غمارة و برغواطة) وسكنو سيرتو الشمال دلبرطقيز بينما فلجانوب الشرقي كانو حاكمينو زناتا بالدرجة اللولة.

فلكناش ديال بن خلدون "المقدمة"

هضر ابن خلدون (1332-1406) على لمصامدة وݣال فيهوم: "وأمّا المصامدة وهم من ولد مصمود بن يونس بربر فهم أكثر قبائل البربر وأوفرهم، من بطونهم: برغواطة وغمارة وأهل جبل درن. ولم تزل مواطنهم بالمغرب الأقصى منذ الأحقاب المتطاولة. وكان المتقدّم فيهم قبيل الإسلام وصدره برغواطة. ثم صار التقدّم بعد ذلك لمصامدة جبال درن إلى هذا العهد.

" طرجامة: "أمّا لمصامدة هوما ولاد مصمود ولد يونس ولد بربر وهوما اللي فيهوم لقبايل لكتار، اللي مابينهوم برغواطة وغمارة وولاد جبل درن، ومازال كايسكنو فلمغريب لبعيد من شحال هادا. وكانو برغواطة هوما اللي شادّين لإسلام اللوالة، من بعد داز هاد لفضل لولاد جبل درن لدابا."

وزاد: "فالمصامدة هم أهل الجبال بالمغرب الأقصى إلّا قليلا منها وغيرهم في البسائط." طرجامة: "لمصامدة هوما صحاب اللي كايسكنو الجبولة ليوما من غير واحد الشوية منهوم فالسهول."

وكان ݣال على بورغواطة باللي: "وهم الجيل الأوّل منهم، كان لهم في صدر الإسلام التقدّم والكثرة وكانوا شعوبا كثيرة مفترقين، وكانت مواطنهم خصوصا من بين المصامدة في بسائط تامسنا وريف البحر المحيط من سلا وأزمور وأنقى وأسقى."

طرجامة: "وهما اللوالة من هاد لمصامدة، كان عندهوم لإسلام شي حاجة كبيرة وكانو كتار ساكنين فالسهول ديال تامسنا وبرّا لمداين د لمحيط التيلاسي من سلا وأزمور ؤ سير جبد."على الناس ديال جبال درن (لأطلس لكبير): "يعمرها من قبائل المصامدة أمم لا يحصيهم إلّا خالقهم، قد اتخذوا المعاقل والحصون وشيّدوا المباني والقصور واستغنوا بقطرهم عن سائر أقطار العالم، فرحل إليهم التجر من الآفاق، واختلفت إليهم أهل النواحي والأمصار، ولم يزالوا مذ أوّل الإسلام وما قبله معتمرين بتلك الجبال قد أوطنوا منها أقاليم تعدّدت فيها الممالك والعمالات بتعدد شعوبهم وقبائلهم، وافترقت أسماؤها بافتراق أجيالهم."على الناس ديال جبال درن (لأطلس لكبير): "يعمرها من قبائل المصامدة أمم لا يحصيهم إلّا خالقهم، قد اتخذوا المعاقل والحصون وشيّدوا المباني والقصور واستغنوا بقطرهم عن سائر أقطار العالم، فرحل إليهم التجر من الآفاق، واختلفت إليهم أهل النواحي والأمصار، ولم يزالوا مذ أوّل الإسلام وما قبله معتمرين بتلك الجبال قد أوطنوا منها أقاليم تعدّدت فيها الممالك والعمالات بتعدد شعوبهم وقبائلهم، وافترقت أسماؤها بافتراق أجيالهم."

على الناس ديال جبال درن (لأطلس لكبير): "يعمرها من قبائل المصامدة أمم لا يحصيهم إلّا خالقهم، قد اتخذوا المعاقل والحصون وشيّدوا المباني والقصور واستغنوا بقطرهم عن سائر أقطار العالم، فرحل إليهم التجر من الآفاق، واختلفت إليهم أهل النواحي والأمصار، ولم يزالوا مذ أوّل الإسلام وما قبله معتمرين بتلك الجبال قد أوطنوا منها أقاليم تعدّدت فيها الممالك والعمالات بتعدد شعوبهم وقبائلهم، وافترقت أسماؤها بافتراق أجيالهم."

طرجامة: "فيها (جبال درن) بزاف دلبشري ما يحسبهوم غير اللي خلقهوم، بناو ديور و سوار وقلاع (إݣودار) وبناو قصور ؤ كانو قادرين يعيشو معزولين بلا مايحتاجو لباقي دلعالام حيت خيراتهوم كافيينهوم. جاو ليهوم التجار من شلّا بلايص، وكانو من لبدية ديال إسلامهوم وقبل منو ݣاع ساكنين فدوك الجبولا ودارو بزاف د لملايك تمّا،ؤ شحال ما هزاتهوم لرض حيتاش كتار وتفرقات سمياتهوم فاش تفرقات لقبايل والدواور ديالهوم."