ماري كوري
_(cropped).jpg)
ماريا سالوميّا سكودوڤسكا-كوري (النطق ب الپولونية: [ˈmarja salɔˈmɛa skwɔˈdɔfska kʲiˈri]؛ السمية الأصلية سكودوڤسكا؛ تولدت نهار 7 نونبر 1867، و توفات نهار 4 يوليوز 1934)، اللي معروفة ب سمية ماري كوري (/ˈkjʊəri/ كوري؛ النطق ب الفرانساوية: [maʁi kyʁi])، كانت عالمة ديال الفيزيك و الشيمي من پولونيا و من بعد ولات عندها الجنسية لفرانساوية ، و قدمات أبحاث رائدة ف مجال لفيزيك النووية.
هي كانت أول مرا كتربح جائزة نوبل، و أول شخص كيربح جائزة نوبل جوج مرات، و الوحيدة اللي ربحات جائزة نوبل ف جوج مجالات علمية مختالفة. راجلها، پيير كوري، كان شريكها ف الفوز بالجائزة اللولة ديالها، و ب هادشي ولاو أول وحدين متزوجين كيربحو جائزة نوبل. العائلة ديال كوري عندها ف لمجموع خمس جوائز نوبل (ربحاتها تا بنتها إيرين جوليو كوري معا راجلها). فـ1906، كانت أول مرا تولي پروفيسورة ف جامعة باريس.
ماري كوري تزادت ف مدينة وارسو، ف مملكة پولونيا، و كانت جزء من الإمبراطورية الروسية. قرات ف جامعة طيارة سرية ف وارسو و بدات التدريب العلمي ديالها تماك. فـ1891، و هي عندها 24 عام، مشات ورا ختها الكبيرة برونيس لافا باش تقرا ف باريس، تما فين خذات الشواهد العليا ديالها و دارت البحوث العلمية ديالها من بعد. فـ1895 تزوجات ب الفيزيائي لفرانساوي پيير كوري، و شاركو جايزة نوبل ديال الفيزيا فـ1903 مع الفيزيائي هنري بيكيريل على الخدمة الرائدة ديالهم ف النظرية ديال "النشاط الإشعاعي" – وهو المصطلح اللي هي اللي خترعاتو. فـ1906، پيير كوري مات ف كسيدة ف الزنقة ف باريس. ماري ربحت جائزة نوبل ديال الشيمي فـ1911 على الإكتشاف ديال عناصر الپولونيوم و الراديوم، ب ستعمال تقنيات هي اللي خترعاتها باش تعزل النظائر المشعة.[1]
ف شهر دجنبر 1903، الأكاديمية الملكية السويدية د لعلوم عطات جائزة نوبل د فيزيك ل پيير كوري، ماري كوري، و هنري بيكيريل، "كتقدير للخدمات الكبيرة اللي داروها ف البحوث المشتاركة ديالهم على الظواهر الإشعاعية اللي كتاشفها الپروفيسور هنري بيكيريل". ف البدية، اللجنة كانت ناوية تكافئ غير پيير كوري و هنري بيكيريل، ولكن واحد العضو ف اللجنة كان كيدافع على حقوق العالِمات، الرياضي السويدي ماݣنوس ݣوستا ميتاݣ-ليفلر، نبه پيير على الوضع، ومن بعد ما تشكا، تزادت سمية ماري كوري على الترشيح. ماري كوري كانت أول مرا ف العالم كتاخد جائزة نوبل.
ف الحرب العالمية اللولة، ماري كوري فهمات باللي الجرحى خاصهم يتعالجو بأسرع ما يمكن. شافت باللي خاص يكونو مراكز ديال الشعا قراب من الخطوط الأمامية باش يعاونو الجراحين ف الميدان، و حتى باش يقدرو يتفاداو القطيع ديال الأطراف إيلا كان ممكن ينجى الطرف. من بعد دراسة سريعة ف الشعا، التشريح، و ميكانيك ديال الطوموبيلات، جمّعات معدات ديال الشعا إكس، طوموبيلات، و مولدات ديال الضو، و طورات وحدات ديال شعا متنقلة اللي ولّات معروفة بالإسم الشعبي "الصغار ديال كوري" (Petites Curies). ولات مديرة ل خدمة الشعا ديال الصليب الحمر و أسسات أول مركز عسكاري ديال الشعا ف فرانسا، اللي بدا يخدم ف اللخر ديال 1914. فاللول كانو كايعاونوها طبيب عسكاري و بنتها إيرين اللي كانت عندها 17 عام، و ساهمات ف تركيب 20 طونوبيلة شعا متنقلة و زادت على 200 وحدة شعا ف سبيطارات الميدان ف السنة اللولة ديال الحرب. من بعد، بدات كتدرّب نسا أخريات باش يعاونوها كمساعدات.
- ↑ "Marie Curie". موسوعة بريطانيكا. Retrieved 2025-06-01.
| عالمي | |
|---|---|
| وطني | |
| أكاديميا | |
| فنانين | |
| ناس | |
| غيرهم | |
