ليستة د لمغالطات د لوجيك

من ويكيپيديا
مقالة زنقة ماكاتخرجش. هاد لمقالة زنقة ما كاتخرجش، ما كاتوصّل ل تا شي مقالة خرة، حاول تزيد فيها ليانات د مقالات خرين كاينين ف لموسوعة.
ماتّخلعش! هاد لميصاج مديور باش تشوفو لفرقة ديال الصيانة و لمراجعة د لمقالات، و ماكيعنيش بلي درتي شي غلط!
مقالة ؤلا فقرة خاصها تّقاد. هاد لمقالة ؤلا هاد لفقرة مرونة شوية، خاصّها تّقاد ؤ تزيد تّنضّم. مشاكيل: زنقة ماكاتخرّجش، مقطوعة من شجرة
ماتّخلعش! هاد لميصاج مديور باش تشوفو لفرقة ديال الصيانة و لمراجعة د لمقالات، و ماكيعنيش بلي درتي شي غلط!
تمتال قابيل، ف الجردة ديال التويرلي، كايرمزو بيه بزاف لـ المغالطات د اللوجيك.

ملّي كايتعطاو حٌجج علا شي دّيعاء، المغالطة د لّوجيك هي واحد التبرير اللي ب اللوجيك كايتعتابر ماشي صحيح، ؤ ماواصلش يكون دايز كـ حُجّة، ؤ يمكن تحسبو ماشي سَليم.[1] ݣاع الطّرقان ؤ الأساليب د الهضرة يقدرو يكون فيهوم مغالطات.

المغالطات صعيب تستّفهوم، حيت متنوّعين ف الشكل ؤ التطبيق ديالهوم. تقدر ب الزز تستّفهوم ب يا إمّا الشكل ديالهوم (مغالطات ف الفورمة) ولّا ب باش كايتكوّنو (مغالطات ماشي ف الفورمة). التستيفة ديال المغالطات اللي ماشي ف الفورمة تقدر تزيد تقسّمها لـ اللي عندهوم علاقة ب اللغة، لـ اللي عندهوم علاقة ب الغفلة، لـ اللي عندهوم علاقة ب التبرݣيݣ، ؤ لـ اللي عندهوم علاقة ب الفتيراض. من جيهة اخرا المغالطات تقدر تستّفهوم علا حساب كيفاش كايوقعو، بحال المغالطات المادية، المغالطات اللفضية، ؤ عاوتاني المغالطات اللي ف الفورمة (غالاط ف الستينتاج). المغالطات المادية تقدر تحطّهوم ف الطبقة العريضة د المغالطات اللي ماشي ف الفورمة، أمّا المغالطات اللي ف الفورمة تقدر تحطهوم ف واحد الطبقة دقيقة كتار د المغالطات (الختيزالية) د اللوجيك. ؤ المغالطات المادية تقدر تحطّهوم ياإمّا معا التستيفة د المغالطات اللي ماشي ف الفورمة ولّا معا الختيزالية.

مغالطات ف الفورمة[بدل | بدل لكود]

المغالطة ف الفورمة هي واحد الغالاط ف الحُجّة اللي كايبان ف الفورمة ديالها. الأنواع ديالها:

مغالطات قتيراحية[بدل | بدل لكود]

المغالطة القتيراحية هي واحد الغالاط ف الحُجّة اللي فيها قتيراحات مركّبة. الأنواع ديالها:

  • تأكّد النفيصال – تستنتج بلّي شي جزء من شي نفيصال لوجيك غالط حيت الجزء لاخر صحيح. A ولّا B؛ A صحيحة، إدَن B غالطة.
  • تأكّد النتيجة – تعتابر السابق ف شي شرط صحيح غير حيت النتيجة صحيحة. إلا A صحيحة، إدَن B صحيحة؛ B صحيحة، إدَن A صحيحة.
  • تنكر السابق – تعتابر النتيجة ف شي شرط غالطة غير حيت السابق غالط. إلا A صحيحة، إدَن B صحيحة؛ A غالطة، إدَن B غالطة.

مغالطات د العبار[بدل | بدل لكود]

المغالطة د العبار هي واحد الغالاط ف الحُجّة ملّي العبار د الساس متعارض مع العبار د النتيجة. الأنواع ديالها:

  • مغالطة وجودية – واحد الحُجّة اللي الساس ديالها فيه الهضرة ب شكل عام ولكن الستينتاج محدد.

مغالطات د القياس[بدل | بدل لكود]

مغالطات ماشي ف الفورمة[بدل | بدل لكود]

المغالطات اللي ماشي ف الفورمة هي غالاط ف الحُجّة حيت السّاس مامݣادش.

  • تسعّف الوسطاني – تفتارض بلّي الحل الوسطاني بين جوج مواقف هو الصحيح.
  • مغالطة الكمالة – ترفض شي دّيعاء حيت ماشي دقيق.
  • تحيّد الرتيباط – تبدّل المعنى د شي حاجة باش يبان بلّي مايمكنش يكون شي بديل وحداخر (بحال: أنا ماشي غليض حيت أنا رقيق عليه).
  • تشكّك حيت مافهمتيش – تعتابر شي حاجة ماشي صحيحة، حيت ماكاتدخلش ل العقل، ولّا مايمكنش تصوّرها بحال هاكّاك.
  • مغالطة المقدّس – تݣول بلّي حيت واحد الحاجة واعرة بزاف ولّا متقونة، إدن غاتكون جات من عند شي حاجة مقدّسة، عالية، فضائية، ولّا فوق طبيعية.
  • الحساب المدوبل – تحسب شي أحدات ولّا حالات كتار من مرّة، الشي اللي كايردّ المجموع د الحتيمالات كبار من اللي خصو يكون.
  • معنى متغالط – تخدم ب شي مصطلح اللي عندو كتار من معنى واحد بلا ما تحدد المعنى اللي راك قاصدو.
    • الوسطاني ما واضحش – الحد الوسطاني عندو كتار من معنى.
    • فشوش ف المعنى – تبدّل المعنى د شي كلمة ملّي يكون شي عتيراض.
    • مغالطة النبرة – تبدّل المعنى د شي جملة ملّي تبدّل النبرة د الصوت.
    • قوالب ف المعنى – تبيّن بلّي راك خدّام بشي كلمة ف المعنى المعروف ديالها، ولكن راك خدّام ب المعنى ديالها لاخر اللي ما معروفش بزاف.
  • مغالطة د البيئة – تستدلّ على الطبيعة د شي واحد من الإحصائيات ديال الݣروپ اللي راه منتامي ليه.
  • مغالطة د أصل المعنى – تݣول بلّي شي كلمة ولّا جملة عندها نفس المعنى ب الضّرورة اللي كان شحال هادي.
  • مغالطة الجميع – تفتارض بلّي حيت شي حاجة صحيحة على واحد الطرف من شي مجموعة، إدن ديك الحاجة صحيحة عليها كاملة.
  • مغالطة الفريق – تفتارض بلّي حيت شي حاجة صحيحة على شي مجموعة، إدن ديك الحاجة صحيحة على ݣاع الطروفة ديالها ولّا شوية منهوم.
  • متكي على الراشي – تحكم ب شي مصدر اللي ما عندو علاقة، ما مأهّلش، ما معروفش، منحاز، ولّا مصاوب.
    • تجبد برّا السياق – تستاند على شي كلمات معزولة ب الضبط من السياق الدوريجين ؤ تبدّل المعنى اللي كان قاصدو المصدر.
  • تسعّف السلطة – تجيب شي هضرة د شي ختيصاصي مشكوك ف المصداقية ديالو، ولّا عندو شي رأي مامعتارفش بيه باش تبيع شي فكرة ولّا شي پرودوي.
  • ديليم د بلعاني – تبيّن أن الحل إما كحل ولّا بيض، واخّا كاين حلول اخرا.
  • ݣرين غالط – تبيّن بلّي شي جوج ولّا كتار د الهضرات بحال بحال ملّي مايكونوش.
  • مغالطة التقييم – تعوّل على التقييم كيفما كان بلا ما تراجع واش اللي دارو مسوّق ولّا لّا.
  • مغالطة المؤرخ – تفتارض بلّي مّالين القرار د شحال هادي كان عندهوم نفس المعلومة د هادوك اللي حللو هاد القرار من بعد.
  • تكبّر الصداع – تݣول بلّي إلا الختيصاصيين د شي مجال مختالفين ف شي نقطة منّو، إدن ماتقدرش توصل لشي نتيجة فيه، ولّا الصحة د هاد المجال ماشي حتا اللهيه.
  • رجل هنا ؤ رجل لهيه – حجة اللي كاتجي من الأطراف بجوج د شي قضية، تعزل شي عبارات اللي تلعب بيهوم على المشاعر د الأطراف بجوج.
  • مقارنة ما كاملاش – تدير شي مقارنة كاملة ب شي معلومات ناقصة.
  • مقارنة مامݣاداش – تدير شي مقارنة ب بزاف ديال الطرق، الشي اللي كايعطي نطيباع غالط عليها.
  • مغالطة النية – تݣول بلّي المعنى د شي هضرة خاص يكون متّاسق معا النية د هاداك اللي ݣالها.
  • مغالطة د القد د الخدمة – يسحابلك بلّي را كاين واحد القد د الخدمة اللي خاص يدّار ف شي قتيصاد، ؤ اللي تقدر تفرّقو باش تزيد ولّا تنقص خدمات اخرين.
  • اللوجيك د المقراج – تعطي بزاف د الحجج اللي مامتاسقاش باش تدافع على شي موقف.
  • مغالطة التقشاب – يسحابلك بلّي النتيجات ديال شي حدت عشوائي مامنضّمش، تقدر تغلّفهوم بشي إحصائية؛ تزݣل المجهول اللي حتا هو عندو دور ف الأحدات اللي كايوقعو.
  • مغالطة ماكنامارا – تاخد شي قرار مبازي غي على داكشي اللي كايتحسب، ؤ تجاهل العتيبارات لاخرا.
  • مغالطة د الأخلاق – تستنتج شي حاجة ف الواقع من شي حوايج د الأخلاق.
  • تحرّك البارّا – ترفض الأدلة اللي تعطاو باش يرد عليك ؤ تطلب أدلة اخرا.
  • مغالطة النيرڤانا – ترفض الحلول د شي مشكلة حيت هاد الحلول ماشي متالية.
  • إتبات ب التأكيد – تبقا تعاود القتيراح واخا يبان التناقض.
  • تتبت كتار من القياس – حجة كاتعطي واحد الستينتاج فيه تعميم كبير (بحال: الشراب خايب حيت شي سكايرية كايتعداو على عيالاتهوم ولّا ولادهوم).
  • مغالطة د المرجع – تفتارض بلّي ݣاع الكلمات كيعنيو شي حاجات كاينة ؤ المعنى ديالهوم كاين ف داكشي اللي كايشيرو ليه،ب العكس الكلمات يقدرو يكونو كايشيرو لـ شي حوايج ماكينينش ب الصح ولّا المعنى ديالهوم كايجي من الطريقة اللي تستاعملو بيها.
  • مغالطة التجسيد – تعامل معا شي معتقد مجرد، ولّا شي حاجة فتيراضية على أساس راه كاين بصح ولّا شي حاجة مقيوسة، ولّا مادّية.
  • الحتمية ب اللور – تݣول بلّي حيت شي حاجة وقعات ف شي ضروف، إدن ديك الضروف خلاوها لابدّا توقع.
  • حدورة كايزلّقو – يسحابلك بلّي شي حاجة صغيرة وقعات، لابدّا غادي تجر معاها واحد السمطة د الأحدات الكبيرة ؤ السلبية.
  • إعفاء خاص – تستشهد ب شي حاجة باش تعفيها من شي قاعدة مقبولة بلا ما تبرّر هاد الإعفاء.

ساس باطل[بدل | بدل لكود]

  • تسعّف الساس – النتيجة د شي حُجة هي نّيت وحدا من الساس د الكلام (بحال: الكماية مميتة حيت الݣارو كايقتل).
    • الزيادة من راس الحمق – ماشي نّيت مغالطة، ديك الزيادة الخاوية باش تسيپّورطي واحد النتيجة هي واحد النوع من تسعّف الساس، بحال: هاد الپومادا مزيانة ل الحريق ؤ الحبوب ؤ بزاف د الأمراض د الجلد لاخرا، هاد العيبارة اللخرا غي زايدة باش تسيپورطي الفكرة ديال را الپومادا كاتنفع ف بزاف د الحوايج.
  • ستيدلال مدوّر – ملّي اللي كايستدل كايبدا بداك الشي اللي باغي يوصل ليه. (ݣاع العزارا مامزوّجينش).
  • سؤال ملغوم – ملّي كاتسوّل شي واحد شي حاجة ديجا معروفة، غي باش تزرب عليه ؤ تسكّتو.

تعميمات غالطة[بدل | بدل لكود]

تعميمات غالطة – توصل ل شي ستينتاج من ساس راشي، حتا كاتوصل ل واحد التعميم غالط.

  • كسيدة – تميّك على شي ستيتناء ل شي تعميم.
  • العزيل – تنيّش غير على شي حالة وحدانية اللي كاتتبت شي موقف، ؤ تميّك على بزاف د الحالات لاخرين اللي يقدرو يعارضوه.
    • نحياز ل السّالك – تركز غير على اللي سلكو (نجحو) من شي حاجة ؤ تميّك على عدد كبير د اللي فشلو.
  • مقارنة غالطة – ملّي كاتقلّع التشابه المخبّي من التشابه اللي باين
  • تعميم مزروب – تدوز ل شي ستينتاج ݣدّو ݣدّاش من شي عينة صغيرة.
  • مغالطة ستيقرائية – ملّي شي ستينتاج كايدّار من ساس مامسيپورطيهش بزاف.
  • ستيتناء كبير – هو واحد التعميم صحيح اللي فيه واحد الحاجة اللي كاتحيّد بزاف د الحالات، ؤ كاتخلّي التعميم قل من اللي كنا منعوّلين عليه.
  • خضرة فوق الطعام – شي هدرة كاتݣال بزاف، بحال داكشي اللي ݣالو ناس زمان، كاتݣال باش تطفي داك التنافر المعرفي، ولّا تبدل بيها الموضوع.

سباب فيه الشك[بدل | بدل لكود]

سباب فيه الشك هو نوع عام من الغالاط فيه بزاف د المتغيرات، البلان فيه هوا التخليطة بين السباب ؤ الرتيباط، ياإما حيت وصلتي ل شي ستينتاج ب طريقة عيانة (ولّا رفضتيه ݣاع) ولّا تفشل ف التحقيق على السباب ديال شي تأتير باين.

  • معاها إدن ب سبابها – واحد الفتيراض غالط بلّي، حيت شي جوج حوايج وقعو قد قد، إدن وحدا هي السباب ف لاخرا.
  • مغالطة السباب الواحد – تفتارض بلّي كاين سباب واحد ؤ بسيط ل شي نتيجة، ملّي ف الحقيقة كاين بزاف د الأسباب الكافية ؤ المترابطة بيناتها.
  • مغالطة المستور – ترد السباب د النتيجات هو المخالفات د مّالين القرار.
  • مغالطة القمّار – العتيقاد اللي ماشي صحيح بلّي الأحدات المفرّقة ؤ المستقلّة تقدر تلعب ف الحتيمال د شي حدت عشوائي وحداخر. إيلا شي شقفة ف پيلوفاص جات عشرة د المرات متّابعة راس، غاتكون كاتخربق إيلا ݣولتي "هادشي وقع ب سباب شحال د المرات جات تاج قبل".
  • التفكير الخيالي – العلاقات السببية بين الأحدات ؤ الفعلات. ف لانطروپولوجيا، كايعنيو بيها المعتقادات التقافية، بحال الصلا، الدعاء، الطقوس، التضحية، ؤ الطابوهات، كايأترو على الطبيعة ب طريقة خارقة. ف علم النفس، كايعنيو بيها العتيقاد اللي ماشي عقلاني بلّي الأفكار براسهوم كايقدرو يأتّرو على العالم.

مغالطات د العلاقة[بدل | بدل لكود]

  • تسعّف الحجرة – ترفض شي حاجة اللي تعتابرها تخربيقة بلا ما تبيّن علاش هي تخربيقة.
  • تسعّف الجهل – تفتارض بلّي شي دّيعاء صحيح حيت ماتقدرش تتبت بلّي راه صحيح، ولّا العكس.
  • تسعّف الشك – "مانقدرش نتصوّر هادشي صحيح، إدن راه غالط".
  • تسعّف المعاودة – تبقا تعاود شي حجة حتى مايبقا حتا واحد مسوّق باش يناقشو.
  • تسعّف السكات – تفتارض بلّي شي دّيعاء صحيح حيت المصادر الرسمية ماهدروش عليه، ولّا العكس.
  • تلّف النقطة – الحجة اللي براسها تقدر تكون صحيحة، ولكن لا علاقة ليها ب الموضوع (ولّا النقطة).

مغالطات الهارينݣ الحمر[بدل | بدل لكود]

مغالطة د الهارينݣ الحمر، واحد الغالاط ف اللوجيك، ملّي كايكون القتيراح، و المقصود منو، كايتلّف باش تعطي ستينتاجات لاعلاقة ولّا غالطة. أولا بشكل عام، أي ستيدلال د اللوجيك مبني على حجج مزورة، باش يجيو بلاصت الحجج د بصّح إلا ماكانوش، ولّا باش يهرف على الموضوع د النقاش.

الهارينݣ الحمر – تعطي حجة تانية باش تجاوب الحجة اللولا اللي لا علاقة ب الموضوع باش تلّف على الموضوع الدوريجين.

  • شخصنة – تهاجم هاداك اللي كاتناقش معاه بلاصت الحجة.
    • شخصنة ف الوجه – تݣول بلّي الموقف الشخصي د اللي كاتناقش معاه ولّا الستيفادة ديالو من الستينتاج اللي عطا كاتعني بلّي الستينتاج غالط.
    • تسمم البير – تعطي معلومات خايبة على شي واحد باش تشوّهلو السمعة د أي حاجة كايݣولها.
    • تسعّف الدافع – تميّك على شي فكرة ؤ تسوّل على الدافع ديال مولاها.
    • الفخ د كافكا – واحد الحجة سفسطائية ما تقدرش تغلّطها، ملّي كايحسّس اللي كايتناقش معاه ب إحساس ب الدّنب، ؤ كايزيد النكير ديالو ل هاداك الدّنب كـ دليل وحداخر ل الدّنب.
    • تزيار على اللكنة – تركّز عل' العاطفة مور (ولّا اللي نتجات من) شي رسالة بلاصت الرسالة النّيت باش تشوّه السمعة.
    • مغالطة النتيقاد الخاين – تعتابر النتيماء د الناقد هو اللي خلاه ينتاقد شي لعيبة، بلاصت ماتعامل معا النتيقاد براسو.
  • تسعّف السلطة – تݣول بلّي شي حاجة را صحيحة غير ب سباب السلطة د اللي ݣالها
    • تسعّف الإنجاز – تݣول بلّي شي حاجة را صحيحة ولّا غالطة، غير ب سباب الإنجاز د اللي ݣالها.
    • جواب الحاشية – ترمي شي نتيقاد، غير حيت اللي دارو ماعندوش علم ، ولّا مصداقية، ولّا تدريب كافيين باش يدير النتيقاد.
  • تسعّف النتيجة – تسيپورطي الستينتاج ب النتيجة الإيجابية ولّا السلبية ديالو.
  • تسعّف العاطفة – الحجة تكون مبنية على اللعب عل' المشاعر بلاصت ماتكون مبنية على اللوجيك.
    • تسعّف الخوف – الحجة تكون مبنية على تورّق الخوف ولّا التهديد ل اللي كاتناقش معاه.
    • تسعّف الشفقة – تسيپورطي الحجة ديالك ب الإحساس د الناس ب الشفقة.
    • تسعّف الإطراء – تخدّم الإطراء باش تسيپورطي الحجة ديالك.
    • تسعّف الستيهزاء – تورّي الحجة د اللي كاتناقش معاه بواحد الطريقة باش تبان كاتضحّك.
    • تسعّف الحقد – تدير شي حجة ب التوراق د الحقد د الناس على اللي كاتناقش معاه.
    • تطياح الهدرة – تسبّ ولّا تعاير باش تأتّر على الحكام د اللي كايسمع.
    • هّاء؟ – تميّك على شي حجة حيت ماتستاهلش تدّي عليها.
    • تسنّى اللي تتمنّى – تبازي شي قرار ولّا عتيقاد على داكشي اللي كاتمنّى يكون، بلاصت ماتبازيه على الدليل ولّا الحجة.
  • تسعّف العادة – تبازي شي حكام غير على واش الموضوع "عادي" ولّا "ماشي عادي".
  • تسعّف القرطى – تعتابر را شي قتيراح عالي ولّا حسن غير حيت جديد ولا موديرن.
  • تسعّف المسكين – تتافق معا شي ستينتاج حيت مولاه مسكين. (ولّا ترفضو حيت مولاه لاباس عليه).
  • تسعّف البالي – تسيپورطي شي ستينتاج غير حيت من شحال هادي ؤ هو كايتعتابر صحيح.
  • تسعّف الشكّارة – تتافق معا شي ستينتاج حيت مولاه لاباس عليه. (ولّا ترفضو حيت مولاه مسكين).
  • تسعّف العصا – تبزّز شي حجة ب الصحّة ولّا العصا ولّا التهديد.
  • تسعّف الكترة – تعتابر شي حاجة صحيحة ولّا مزيانة غير حيت بزاف د الناس (ولّا الأغلبية) تا هوما معتابرينها صحيحة.
  • مغالطة التخلاط – تعتابر حيت جوج حوايج عندهوم واحد الخاصّية بحال بحال، إدن حتا هوما بحال بحال.
  • إصرار حفيان – تقدّم شي حاجة على أساس را صحيحة بلا شي سيپّور، بحالا مبررة راسها، ولّا صحيحة غي هاكّاك.
  • مغالطة المونيكة – تحرف الحجة د اللي كاتناقش معاه، ؤ تضرب ف ديك النسخة الضعيفة منّها اللي صاوبتيها.

عيون لكلام[بدل | بدل لكود]

  1. ^ "Logical Fallacies". مأرشيڤي من لأصل ف 2007-06-25. تطّالع عليه ب تاريخ 2023-06-19.