لون
اللون هو النتيجة ديال كيفاش السيستيم ديال لحواس عند لكائنات لحية كيتلقى لموجات لكهرومغناطيسية. لموجات لي عندها ترددات محددة كيتسماو ألوان، و كيتستقبلوهم أعضاء لحس و كيتفسروا ف لجهاز العصبي على حساب التردد ديال لموجة[1].
عند لفقاريات، هاد لموجات كاتشدهوم لعين و كيتفكك السيمبول ديالهوم ف لمخ. حتا للافقاريات، وخا ماعندهومش مخ مركزي بحالنا، كيقدروا يفرقوا بين لّوان؛ مثلاً النحل كيتجر ل لّون لصفر ديال لورد. بنادم كيقدر يشوف لموجات لي كاينا ف الطيف لمرئي، لي كيكون التردد ديالها بين 400 و 790 هرتز (يعني بين 380 و 750 نانومتر ف طول لموجة).
الضو ديال الشمش فيه ڭاع لّوان ديال الطيف، داكشي علاش كيبان بيض. لّوان كيبانو فاش الضو كيقيس الصبغات، ولا فاش كيوقع انكسار ديال الضو، ولا عن طريق تكنولوجيا لّومينيسونس.
الصبغات هما جزيئات كايشربوا موجات محددة و كيعكسوا موجات خرة. مثلاً الصبغة ديال لّون لزرق كاتشرب كاع لّوان و كاتعكس لينا غير لزرق. أما انكسار الضو هو لي كيعطينا لّوان ديال عروسة السما.
الشوف ديال لّوان تبدل و تطور عند لحيوانات على حساب لحاجة ديالهوم باش يعيشوا، بحال لمعاونة ف الطريق باش يفرقو بين لما والربيع ولرض من بعيد، ولا ف لمشاركة ف تقليب على لماكلة باش يعرفوا لفواكه لي طايبة و يفرقو بين لماكلة لي مزيانة و لخامجة، و كذاك ف تواصل بزاف د لحيوانات لي كيتواصلوا ب لّوان فاش كيبغيو يتزاوجوا.
عند بنادم، كاينين تلاتة د النواع ديال لخلايا لي كيشوفو لّوان ف لعين (كيتسماو لمخروطات)، و هما لي كيخليونا نخرجوا كاع لّوان لي كنشوفو ف الطبيعة. يلا كان نقص ف هاد لخلايا، كيتصاب بنادم ب عما لّوان.
حيت بنادم عندو تلاتة د النواع د لخلايا لحساسة ل لّون، كنقدرو نصاوبوا أغلب لّوان لي كاينين غير ب تخلط تلاتة ديال لّوان سّاسية (لحمر، لخضر، و لزرق). هادشي كيتلخص ف ناعورة لّوان لي هي تمثيل ديال لّوان لي كيشوفهم بنادم على شكل دائرة.
- ↑ Berns, Roy S (2000). "Billmeyer and Saltzman's Principles of Color Technology, 3rd edition". Wiley, New York. Retrieved 2026-08-04.
 هادي زريعة ديال مقالة خاصها تّوسع. تقدر تشارك ف لكتبة ديالها. |
