لقرن 19

القرن 19 هو الفترة اللي كاتمتد من النهار اللول (1 يناير) فـ عام 1801 حتى لنهار اللخر (31 دجنبر) فـ عام 1900، على حساب التقويم الميلادي.

فهاد القرن، كملات بريطانيا السيطرة ديالها و ولات حاكمة على كثر من ربع سكان لعالم، و ف نفس الوقت بداو مملكة إسپانيا، و الإمبراطورية البرتغالية، و الدولة العثمانية كيتراجعو. و تحيدات الإمبراطورية الرومانية المقدسة و الإمبراطورية المغولية. من بعد الحروب الناپوليونية، ولات بريطانيا هي القوة العظمى ف العالم و فرضات الهيمنة ديالها، و هادشي خلا التجارة تزداهر و حاربو القرصنة. و نقصات العبودية ف العالم، خصوصاً من بعد ثورة العبيد ف هايتي.

الإستعمال تاع الضو، و الفولاذ، و الپيترول عطاو دفعة كبيرة للثورة الصناعية الثانية و دارو الطاقة اللي خلات ألمانيا، و الإمبراطورية الجاپونية، و لميريكان ولات عندهم قوة كبيرة ف العالم. هادشي جاب معاه عصر الإستعمارية الجديدة.

فالمقابل، الإمبراطورية الروسية و السلالة تشينڭ اللي كانت حاكمة ف الشينوا ماقدروش يواكبو باقي القوى الإستعمارية، و هادشي خلا المشاكل الإجتماعية تكبر عندهم ف القرن العشرين.

اللوحة تاع "إستسلام مدريد" (1808) لي رسمها أنطوان جان ڭرو و لي تتصور دخول ناپوليون للعاصمة الإسپانية خلال حرب الإستقلال الإسپانية.

الأحداث

إنتاج الألومنيوم سنة 1825

رحلة السفينة بيڭل سنة 1820

فتتاح قناة سويس ف 1869

أول ظهور ديال التيليفون لي ختارعو أليكساندر ڭراهام بيل عام 1886 (التصويرة تخادت ف 1892) و هي ديال إتصال من نيويورك دارو ڭراهام بيل ف شيكاڭو

• 1800
  • تّاحدات مملكة بريطانيا العظمى مع إرلاندا و ولات سميتها المملكة المتحدة د بريطانيا العظمى و إرلاندا، و هادشي كان فـ النهار اللول ديال يناير.
  • من بعد ما شد ناپوليون بوناپارت الحكم فـ فرانسا و ولا قنصل أول، رجع غزا الطاليان و حتل مدينة ميلانو فـ شهر يونيو ف وقت حرب التحالف الثاني.
• 1801:
  • الهزائم اللي تْلْقاتها النمسا فـ الطاليان سالات حرب التحالف الثاني، و هادشي تْدار فـ معاهدة لونيڤيل فـ شهر فبراير، اللي فيها النمسا عتارفات بلي فرانسا ولات هي الحاكمة على شمال الطاليان ، ماعادَا مدينة البندقية اللي بقات عند النمسا. و زيد عليها عتارفات بلي فرانسا عندها الحماية على الجمهورية الباطاڤية و جمهورية هيلڤيتيا.
  • المملكة المتحدة لبريطانيا العظمى و أيرلندا غلبات القوات الفرانساوية اللي بقاو فـ مصر و فرضات عليهم يسلمو راسهم و يخرجو من مصر فـ شهر شتنبر.
  • تقتل القيصر الروسي پاڤيل اللول فـ شهر مارس، و من بعدو ولا ولدو القيصر ألكساندر اللول هو اللي شاد الحكم.
• 1802:
  • المملكة المتحدة د بريطانيا العظمى و أيرلندا و الجمهورية الفرانساوية اللولة دارو معاهدة أميان فـ شهر مارس، اللي عتارفات فيها بريطانيا ب الجمهورية الفرانساوية.
• 1803:
  • معاهدة أميان ما عجبات حتى شي طرف، و كل واحد كان كيتاهم الآخر بلي خرقها. ناپوليون دخل راسو فـ نتخابات الجمهورية الپاطاڤية فـ هولندا، وتنتاخب رئيس على جمهورية الطاليان الناپوليونية. من جهة خرة، بريطانيا رفضات تسمح ف جزيرة مالطا اللي كانت ستراتيجية بالنسبة ليها. المعاهدة ما كملاتش عام، حتى عاودات بريطانيا علنات الحرب على الجمهورية الفرانساوية.
  • تحالفو النمسا و البرتغال و روسيا مع المملكة المتحدة د بريطانيا العظمى و أيرلندا ضد الجمهورية الفرانساوية ف حرب التحالف الثالث.
• 1804:
  • هايتي خذات الإستقلال ديالها من الجمهورية الفرانساوية من بعد ما نجحات الثورة الهايتية فـ شهر يناير، و ولات هي أقدم جمهورية ديال الناس السمرين فـ العالم، و ثاني دولة مستقلة فـ النص الغربي ديال الكرة الأرضية.
  • ناپوليون بوناپارت علن على راسو بلي ولا إمبراطور على الإمبراطورية الفرانساوية فـ شهر ماي. و من بعدو، فرانتس الثاني اللي كان إمبراطور روماني مقدس، جاوب عليه و علن راسو إمبراطور على الإمبراطورية النمساوية، و هي اللي بقات من الإمبراطورية الرومانية المقدسة فـ أراضي النمسا.
• 1805:
  • إعلان تأسيس مملكة الطاليان الناپوليونية بلاصت الجمهورية و تتويج نابليون بونابرت ملك ديالها ف مارس.
  • الإمبراطورية النمساوية بدات الحرب و غزات مملكة باڤاريا اللي كانت متحالفة مع فرانسا ف غشت، ولكن الجيش الفرنسي هجم على الجيش النمساوي و خلاه يرجع ل بوهيميا.
  • الجيش الروسي تحالف مع الجيش النمساوي ف شتنبر باش يواجهو الجيش الفرنسي ف معركة أوسترليتز. لكن الجيش الفرنسي قدر يهزم تحالف الرواسا و النمساويين، و دخلت قوات نابليون ل عاصمة النمسا، ڤيينا.
  • ف شهر أكتوبر، خسر الأسطول الفرنسي قدّام الأسطول البريطاني اللي كان كيقودو هوراشيو نيلسون ف معركة طرف الغار. و مات فيها نيلسون، الأسطول الفرنسي والإسپاني خرجو منها مهزومين و علاين مدمرين.
• 1806:
  • سالات معركة أوسترليتز حرب التحالف الثالث بعدما توقّع صلح پريسبورڭ. هاد الصلح مسح الإمبراطورية الرومانية المقدسة من الخريطة، و دار بلاصتها إتحاد الراين اللي جمع أهم الولايات الألمانية تحت سلطة فرانسا. و زيد عليها، النمسا كانت مجبورة تعطي البندقية ل مملكة الطاليان الناپوليونية، و تخلّي تيرول ل مملكة باڤاريا.

الحروب

الحروب الناپوليونية

الحروب الناپوليونية كانو عبارة على سلسلة ديال المعارك الكبار اللي وقعو بين 1803 و 1815. هاد الحروب كانت بين الإمبراطورية الفرانساوية اللي كان كيحكمها ناپوليون بوناپارت و الحولافا ديالو، ضد مجموعة ديال الدول الأوروپية اللي كانت كتبدل تحالفاتها و كتجمع راسها باش تحارب ناپوليون، و غالبا كانت بريطانيا هي اللي كتزعمهم و كتعطيهم السلاح و الفلوس.

هاد الحروب كانت بسباب المشاكل اللي طاحو فيها بسباب الثورة الفرانساوية و الصراعات اللي جابتها معاها. كيتقسمو الحروب الناپوليونية عادةً ل خمسة ديال الحروب الكبار، و كل وحدة منهم كتسمى على حسب التحالف اللي تجمع باش يحارب ناپوليون: التحالف الثالث (1805)، و الرابع (1806–1807)، الخامس (1809)، السادس (1813)، و المية يوم (1815).

فـ 1804، ناپوليون رد راسو إمبراطور على فرانسا، و قدر يسجّل نتصار كبير على الجيش النمساوي و الروسي فمعركة أوسترليتز. ولكن، الغزو الفرنسي ل روسيا كان نقطة التحوّل ف الحروب الناپوليونية، حيث قلب الموازين و بدات الأمور كتنقلب ضد ناپوليون.

فـ 1815، ناپوليون تنازل على الحكم و نفاوه لجزيرة إلبا. ولكن، ما طوّلش حيث هرب و رجع ل فرانسا، و بدا حرب المية يوم باش يرجّع السلطة. و قبل مايتهزم ف معركة واتيرلو، لي من موراها نفاوه ل جزيرة سانت هيلينا.

• ف 1806: الإمبراطورية الرومانية المقدسة تفككات بسباب الصلح تاع پريسبورڭ.
• ف 1815: مؤتمر ڤيينا رجع رسم الخريطة ديال أوروپا. و غلبات المحافظة و الإنفعالية على أوروپا كاملة. تناغم أوروپا حاول يحافظ على هاد التسوية، ولكن القوى ديال الليبرالية و الوطنية بداو كيدفعو ف هاد التغييرات الكبيرة. هاد الفترة كتعلن على بداية الحقبة ديال السلام البريطاني اللي غادي تستمر حتى لـ 1914.

حركات الإستقلال ب أمريكا اللاتينية

أغلب بلدان أمريكا لوسطانية و أمريكا الجنوبية خداو الإستقلال ديالهم من الدول الإستعمارية ف القرن تسعطاش. حرب الإستقلال المكسيكية كانت صراع طويل بقى ل مدة عشر سنين حتى سالا فـ 1821 بعدما علنات المكسيك الإستقلال ديالها. حتى دول أمريكا الجنوبية اللي كيهضرو ب الإسپانية خداو الإستقلال ديالهم بنفس الطريقة. و من جهة خرة، ملي هربات العائلة المالكة البرتغالية للبرازيل (من 1808 حتى 1821) بسبب الحروب الناپوليونية، بقات البرازيل عندها ملك بوحدو مفصول على البرتغال.

تفككات كولومبيا الكبيرة ف عام 1830 و ولات بلاصتها ثلاثة ديال الدول: كولومبيا (اللي كانت داك الوقت كتشمل حتى پاناما)، و الإكوادور، و ڤينيزويلا.

• 1804: تحررات هايتي من فرانسا بعدما دارو الثورة ديالهم، و ولات أول جمهورية ديال الناس اللي كيسودوها لكوحل.
• من 1838 حتى 1840: شعلات الفتنة ف جمهورية أمريكا لوسطانية الإتحادية و خرجات منها حرب أهلية، اللي قسماتها و ولات كل بلاد مستقلة براسها: ݣواطيمالا، الصالڤادور، هندوراس، نيكاراݣوا و كوستاريكا.

حرية العبيد و لحرب الوطنية لميريكانية

قدرات حركة تحرير العبيد تحقق الهدف ديالها ف القرن تسعطاش، حيث تلغات تجارة العبيد ف المحيط الأطلنطي عام 1808، و بزاف ديال الحكومات منعات العبودية ف اللخر د القرن. ف بريطانيا، خرج قانون ف 1833 كيمنع العبودية ف الإمبراطورية كاملة، و حتى ف البرازيل تلغات العبودية رسمياً عام 1888 ب القانون اللي سماوه القانون الذهبي.

شعلات الحرب الأهلية ف مريكان ما بين 1861 و 1865، ملي قررات 11 ولاية من الجنوب ينفاصلو على لميريكان. هاد الإنفصال كان سبابو الكبير هو الخلافات على العبودية. الرئيس أبراهام لينكولن خرج إعلان تحرير العبيد ف 1863. ولكن قبل منو، ف 22 شتنبر 1862، عطاهم إنذار مسبق كيقول فيه باللي خاص جميع الولايات اللي باقا متمردة (الولايات الكونفدرالية) يحررو العبيد ديالهم.

هاد الحرب ضارت بين الإمبراطورية الروسية و تحالفات فيه عسكرياً الإمبراطورية البريطانية، مملكة سردينيا، الإمبراطورية الفرانساوية الثانية و الدولة العثمانية مع إيالاتها (مصر و تونس). بدات ف 4 أكتوبر 1853 و كملات حتى 1856. السبب ديالها كان هو الأطماع ديال روسيا ف الأراضي ديال الدولة العثمانية، و ب الخصوص ف شبه جزيرة القرم اللي كانت ديما ساحة للحروب بين الرواسا و العثمانيين. فـ 30 مارس 1856، خسرات روسيا ف هاد الحرب و ضطرات توقّع تفاقية باريس.

لأدب

لأدب الرومانسي

الرومانسية كانت واحد الشوية رد فعل على الثورة الصناعية، وعلى القوانين والعادات ديال المجتمع والسياسة ديال طبقة النبلاء فوقيتة التنوير، وحتى على الطريقة اللي ولى كيشوفو بها الطبيعة بعقلية علمية. الرومانسية بانَت بقوة فالرّسم والموسيقى والكتابة، ولكن حتى فمجالات بحال التاريخ، والتعليم، والعلوم الإجتماعية والطبيعية، كان عندها تأثير كبير.

فالمجال السياسي، الرومانسية دخلات فالأفكار ديال الليبرالية، والراديكالية، وحتى المحافظة والوطنية، يعني أثّرات على بزاف ديال التيارات. ومنين وصلنا لنص القرن التسعطاش، ولات الواقعية هي اللي جاو بها باش يعارضو الرومانسية. فداك الوقت، الرومانسية بدات كاتنقص شوية بشوية، وهادشي كان بسباب بزاف د لحاجات، بحال التحولات الإجتماعية والسياسية، وزيادة النفوذ ديال القومية.