لحرب لمغربية لهولندية (1775–1777)
| لمقال مقطوع من شجرة، ما كايدي ليه تا شي مقال أخر، زيد ليان ديالو ف مقالات خرين. |
 مقالة ؤلا فقرة ناقصينها مصادر.لمعلومات لّي ف هاد لمقالة ؤلا هاد لفقرة ناقصين ف توتيق، خاصّ يتزادو فيها مصادر باش تكون موتوقة. شوف هنا كيفاش تزيد لمصادر. ماتّخلعش! هاد لميصاج مديور باش تشوفو لفرقة ديال الصيانة و لمراجعة د لمقالات، و ماكيعنيش بلي درتي شي غلط! |
لحرب لمغربية لهولندية (1775–1777)
| ||
| ||
مفاوضات ديال يان هيندريك ڤان كينسبيرخن معا السلطان محمد التالت بن عبد الله (رسمة ديال لقرن 19)
| ||
| معلومات أساسية | ||
| نوع د لمطايفة | حرب | |
| لموضع | لمحيط لأطلسي و مضيق جبل طارق | |
| تاريخ د لبدية | 1 يناير 1775 | |
| لمشاركين | لإمبراطورية لمغريبية الشريفة و لجمهورية د هولاندا | |
| تاريخ د لمسالية | 29 يونيو 1777 | |
← →
| ||
لحرب لمغربية لهولندية (1775-1777)، لمعروفة حتى ب "حرب لمغرب (1775-1777)"، بدات ملّي واحد نهار ف عام 1774 زطم واحد لباطو هولندي على سفينة مغربية ب لغلط. لهولنديين تسحاب ليهم لباطو ديال لعتمانين في لجزاير ماشي مغربي. فاش وصلات لخبار للسلطان محمد بن عبد الله، علن لحرب على لجمهورية لهولندية.
سالات لحرب بخسارة د لمغريب، و سينا سلطان معاهدة تْصالح فيها مع هولندا وطلق گاع لعبيد لهولانديين للي كانو محبوسين فلمغرب بلا ما يخلصو حتى فرنك، و ف نفس لوقت بدات تجارة بين هولاندا و لمغرب تزداهر.
نهار ربعطاش شتنبر 1774، دخل ل لمرسى ديال لعرايش واحد لباطو هولاندي سميتو پرينسيس رويال فريديريكا صوفيا ڤيلهِلمينا لي رايس ديالو كان هو لكاپيتان كيرين دابينيس Quirijn Dabenis. "كيرين" جاب معاه كاضوات للسلطان محمد التالت، عربون ديال صداقة بين بلادو و لمغرب. لكاپيتان ديشارجا الباطو و زاد فحالو، و ف لمرسى كان واحد سيد سميتو روسينيول Rossingnol هو لي كان مكلف باش يمد الكاضوات لسلطان. والي لعرايش وصلاتو لخبار وصيفت للسلطان برية، سلطان جاوب لوالي وقال ليه يصيفت مخازنيا إسكورط مع روسينيول و يوصل الكاضوات ل لقصر ديال مكناس. إيوا روسينيول شد طريق ل مكناس مع عشرين ديال لمخازنيا فوق العودان، وفاش وصل لقى سلطان مشا للجبال نواحي فاس، كمل طريقو لفاس و تسنى ف السلطان حتى يرجع. نهار ربعطاش أكتوبر دخل لقصر و ورى السلطان لهدية. جوج صنادق ديال پورسلين، سيف، قرن ديال البارود، جوج ماگانات دهب، خاتم، زرابي هولندية و تشكيلة ديال قهوة و أتاي. محمد التالت معجبوهش الكاضوات، تقلق و قال ل روسينيول يرجعهم ل هولندا. روسينيول نصح سلطان يراجع قرارو حيت هاد الجيست غادي يشوفو فيه إهانة ليهم و يقدر يأزم العلاقة بيناتهم، ولكن سلطان متسوقش لهاد لهضرة. روسينيول خرج من فاس نهار تسعطاش أكتوبر ووصّل لخبار ل هولندا.
نهار واحد نونبر، روسينيول جاوه جوج بريات من عند صامويل صمبل، مستشار سلطان و يديه ليمنا. برية اللولة مسينيها السلطان، كيعلن فيها لحرب على هولندا. و لبرية تانية كيشرح فيها سبب لحرب للي على حساب هضرتو كيقول بلي لبحرية لهولندية هجمات على سفينة مغربية و غرقاتها.
روسينيول تعجب ل هاد لقرار حيت لمغرب ف داك لوقت كان منوضها مع الصبليون و الطرح بدا يسخن ف الشرق مع العتمانيين ف لجزاير، مكاينش لاش يزيد حتى هولندا ف لحساب. لمهم روسينيول صيفت لبريات بجوج و نهار 1 يناير 1775 قبلات هولندا رسميا لحرب.
هولاندا ما ضيعاتش لوقت. الكاپيتان دابينيس، اللي كان ف مضيق جبل طارق مع تمنية د باطوات حربية، جاتو أوامر باش يحاصر مدون الشمال لي على لبحر، و يحمي لباطُووَات ديال هولندا من لقراصنة لمغاربة. لحصار كان ناجح خصوصا ف لعام اللول، حيت گاع لباطوات لهولندية قدرات تدوز للمضيق عادي بلا مشاكل. لمغرب كان ملهي مع صبليون و العتمانيين فا مكانش مركز بزاف مع لهولنديين و لمواجهات ديريكت معاهم كانت قليلة. تبدل دابينيس و جا ف بلاصتو هارتسينك Andries Hartsinck، و من بعدو بيلانت Lodewijk Van Bylandt حتى ل1776 فاش جا كاپيتان جديد سميتو دانييل پيشو Daniel Pichot.
ف 1776. السلطان د لمغرب شاف بلي هاد لحرب ما مصور منها والو، هو يقول ل دانييل پيشو باش هولندا تولي تخلص كل عام تلاتين ألف پياستر (غالبا يخلصوها ب لبسيطا الصبليونية) مقابل سلام. پيشو فهم بلي السلطان مقدرش على لحرب و بلي هولندا ف موقع قوة داكشي علاش رفض شروط محمد التّالْتْ.
ف يونيو 1776، السلطان أمر الرايس علي پيريز باش يواجه لأسطول لهولاندي. واحد نهار خرج الرايس علي ب ربعة ديال شباك (Xebec: فلوكة متوسطة ف لكبر و فيها ڤوال) من طنجة و جوج قوادس (Galleys: فلوكة كبيرة و طويلة ب ڤوال و تقداف) فيهم ثمانين مجاهد من بلاصة سميتها خليج بيفي ف جنوب شرق تطوان، و كانو ناويين يقطعو الطريق على واحد السرب ديال لباطوات لهولندية، ولكن لهولنديين فاقو بيهم و جاو ربعة ديال فرگاطات حاصرو جوج قوادس ديال الرايس علي و بداو يتيريو فيهم، الرايس علي شاف لقضية حماضت هو يرجع للمينا. ف شهر تمنية عاود خرجو لمغاربة تاني للبحر و شدو واحد السفينة هولندية هازة سلعة د التجارة سميتها ماريا كاتارينا فيها خمسة و تلاتين واحد.
ف دجنبر 1776، خرج تاني الرايس علي و هاد لمرة كان معاه الرايس الطيبي ولالو ف جوج فرگاطات و شباك، حاصرو شي باطوات هولندية و قبضوهم و طلعو فوقهم باش يصوگوهم للمينا د لعرايش. ولكن ف طريق تلقاو ليهم جوج سفينات حربية ديال هولندا وحدة سميتها مارس ديال كاپيتان صامويل صالومون ديدل Salomon Dedel و لخرة ڤينوس نتاع كاپيتان ڤولتر يان بينتيك Jan Bentinck بدات لمدابزة بيناتهم فوسط لبحر. لمغاربة لي خطفو لباطوات لهولندية ستغلو فرصة و هربو لپلاج ولكن مع الزربة باش كانو غاديين ترادخو مع صخر و غرقو ب السلعة اللي عندهم.
الرايس علي و الرايس الطيبي منين شافو باللي السفينات للي خطفو هربو للمغرب و حتى هما تفرقو و كلها شد طريق. ولكن فرگاطة ديال الطيبي خرجات ف الصخر ديال لعرايش و تشخشخات و فرگاطة و شباك ديال الرايس علي حتى هما تهرسو ف الدخلة ديال لمعمورة.
لبحرية ديال لمغرب تشلات بعدما ماتو جوج روايس كبار و تفرشخو لهم أكبر و أهم فرگاطات لي كان فيهم بزاف ديال لمدافع التقال.
هاد لخصارة و لحصار، خلاو السلطان يحبس لحرب مع هولندا و يطلب صلح. هي هديك، جا لأميرال فان كينسبرخن Van Kinsbergen ل مدينة فاس و ناقش مع سلطان محمد التالت شروط السلام. و من بعد سينا لأميرال پيكوت إتفاقية صلح و صداقة مع سلطان لمغرب نهار تسعود و عشرين يونيو 1777.
من بين الشروط لي كانت ف صالح هولندا هي تحرير مابين 58 و 75 عبد و أسير هولاندي بلا فدية، و من جهة خرة لهولانديين ما بقاوش مضطرين يعطيو لجزية لسلطان و عندهم متيازات تجارية و حماية مغربية فوسط لبحر.
لحركة تجارية مع هولندا نفعات حتى لمغرب من ناحية الرواج لقتصادي و حتى سياسي حيت خلاتو يركز على لخطر الصبليوني و لعتماني و يعاود يبني قوة بحرية جديدة.
من لحوايج الزوينين ف هاد الصلح هو بلي محمد التالت فهم بلي خلق علاقات سلمية مع لقوى لأوروپية و تبادل التجاري فيه فضل كتر من لحرب. داكشي علاش من بعد دار نفس هاد لإتفاقية مع بلدان خرة بحال دنمارك، سويد، نرويج و لميريكان.