لبوراق
| لمقال مقطوع من شجرة، ما كايدي ليه تا شي مقال أخر، زيد ليان ديالو ف مقالات خرين. |
لبوراق (ب لعربية البُراق، ب لحروف اللاتينية Al Boraq) هوّ سربيس ديال تران ب زربة كبيرة (ب النڭليزية high-speed train) مابين طانجا و الدارلبيضا، لي كيوصل تال 323 كيلوميطر ف الساعة. لبوراق هوّ أول تران ب زربة كبيرة ف إفريقيا، و بدا لمرة اللولة ف 15 نونبر 2018، مور 10 سنين ديال التخطيط من عند المكتب الوطني ديال السكّات د الحديد.[1]
مابين طانجا و قنيطرة، كيدوز لبوراق على سكة طولها 186 كلم مجهّزة ليه بشكل خاص، و كيوصل فيها ل 320 كلم ف الساعة. ف لمقطع التاني لي طولو 137 كلم، كيدوز على سكة تدارت ليها صيانة من قنيطرة ل الرباط و من الرباط ل الدارلبيضا.[2]
هاد لخط غير الطرف اللول ف الريزو د السكاكي د لحديد ب زربة كبيرة لي معوّل يتبنى ب طول إجمالي د 1500 كم.[3]
لماليك محمد السادس سمى هاد السربيس "لبوراق" على لكائن ف الترات لإسلامي لي كيتّعتاقد بلي دّا الرسول محمد من مكة ل لقدس ف لحادتة د لإسراء.[4]
الدراسات اللولين على لقابلية د تنفيد سكة ب زربة كبيرة ف لمغريب بداو ف 2003. ف 2006 تحدد بلي الطريق مابين طانجا و قنيطرة غاتكون لخط اللول لي غادي يتّبنى.[5] ف 2007، لإتفاقيات اللولين ديال تدبير لمشروع تّسناو، و لمكتب لوطني علْن على الشرا د 18 مجموعة د لقاطرات من شركة ألسطوم لفرانساوية.[5][6] ف 2008، لمكتب لوطني ڭال بلي غادي يبدا لبني داك لعام، و بلي السربيس غادي يتلونصى ف 2013.[5]
لميزانية ما كملات تال فبراير 2010، ملي لمكتب لوطني د السكاكي د لحديد سنى تيفاقية ديال 20 مليار درهم.[7] لإستتمار لمباشر جا من عند لحكومة لمغريبية، لي حطات 4,8 مليار درهم ف لمشروع، زيادة على مستتمرين ؤروپيين لي عطاو 1,9 مليار. باقي لميزانية جا من قروض تيجارية.[7] 10 د لميار كان مخطط باش تستتمر ف لقلدة التحتانية، 5،6 مليار ف التجهيزات، و 4،4 مليار ف لعربات د التران.[7] ف داك لوقت، كان متوقع بلي لخدمة غادي تبدا ف النص د عام 2010، و السربيس غادي يتّطلق ف دجنبر 2015.[7] ف دجنبر 2010، لمكتب لوطني سنى التيفاقية اللخرة معا ألسطوم باش يشري 14 مجموعة د لقاطرات.[8] من بعد عدد ديال التعطيلات، لبني ديال لخط بدا ف 29 شتنبر 2011، مور حفلة ديال التدشين ف طانجا.[9]
ف 25 شتنبر 2012، بدات لخدمة على مشروع ديال تكبار لقدرة ف السكة مابين قنيطرة و الدارلبيضا.[10] زيادة على لبني د السكة، 4 د لڭيران د التران (ف طانجا، قنيطرة، الرباط أڭدال، و الدارلبيضا) إما تبناو من الساس ولّا تدار ليهم إصلاح.[11] ف 19 يونيو 2015، وصلو لقاطرات د التران د لبوراق اللولين ل طانجا.[12] ف شتنبر، تسالا لبني ديال لمرافق د التران ف طانجا، و تسنى مشروع مشتارك مابين لمكاتب لوطنية د السكاكي د لمغريب و فرانسا، على ود الصيانة د الترانات ب كونطرا د 15 عام.[13] ف فبراير 2017، بدا التيست ديال التران ب زربات عاليين. الروكور لي وصل ليه كان 357 كيلوميطر ف الساعة.[11]
ف أكتوبر 2017،، لبني ديال السكة سالا، و تبعوه السلوكا لفوقانيين ف نونبر.[3] السيستيم د التريسينتي تشعّل لمرة اللولة ف يناير 2018، و لمرافق ديال لكونطرول د لخط بداو ف فبراير.[3] ف النص د 2018، تسالات لخدمة على لڭيران، ولايني تأجلات لبدية د السربيس تال اللخر د لعام، حيت باقي كان خاص يتدارو تجارب على لخط.[3][11]
ف 15 نونبر 2018، تدارت حفلة د التدشين ديال لبوراق ف رحلة خاصة لي مشات تال الرباط. السربيس ب لخلاص بدا ف اللخر د لعام.[4] ف 25 دجنبر 2018، كان جدول لخدمة ديال لبوراق كيبدا من كازا كلا ساعتاين من 6 د الصباح تال 9 د الليل.
التدشين ديال لخط د سكة ب زربة كبيرة جا ف نفس لوقت معا لحلان ديال 4 د لڭيران جداد ولّا مجدّدين: ڭار ديال طانجا لمدينة،[14] ڭار د قنيطرة،[15] ڭار د الرباط أڭدال،[16] و ڭار ديال كازا لمسافرين.[17]
ف يناير 2022، محمد عبدجليل، لوزير ديال الطرونصپور و اللوجيستيك، علن بلي لبوراق غادي يوصل حتال أڭادير، و بلي غادي تّبنى سكة ديال خط ب زربة كبيرة مابين مراكش و أڭادير.[18] عبد الجليل ڭال بلي لخط لي غادي يوصل ل مراكش غادي يجي نيشان من قنيطرة.[18] لبني ديال السكة غادي يدوز من 3 د لمراحل. اللولة طولها 150 كلم كيكونيكطي قنيطرة معا عين السبع. التانية ب طول د 130 كلم، مابين عند السبع و النواصر. و التالتة مابين النواصر و مراكش (212 كلم).[18] ف يناير 2023، تدارو تجارب على السكات لي كاينين دابا مابين كازا و مراكش، لي وصلو ل زربات ديال 80 كلم ف الساعة. لمكتب لوطني د السكاكي د لحديد باغي يستامر ف هاد التجارب باش يوصل ل 160 كلم/س بشكل آمن.[18]
الطرف التاني ديال السكة، مابين قنيطرة و كازا، معوّل باش يتعوض ب سكة جديدة مخصصة لي بدات لخدمة عليها ف 2020.[4] جوج د النواع د التريسينتاج مخدّمين: مابين طانجا و قنيطرة الطراك مبني ب تريسينتاج 25 كيلوڤولط 50 هيرتز، و مابين قنيطرة و كازا بقى نفس لأنسطالاسيو لقديمة ب 3.000 ڤولط DC.[4] السيستيم د السينيال من نوع ETCS قادوه شركات أنصالضو STS و Cofely Ineo.[19]
فاش تّطلق هاد السربيس ف 2018، لوقت د التسافير مابين كازا و طانجا نقص من 4 د السوايع و 45 دقيقة ل ساعتاين و 10 د الدقايق. فاش غادي يكمل الطرف التاني ديال السكة الجديدة، غادي يزيد ينزل لوقت ل ساعة و نص.[4]
كاينين 12 مجموعة د لقاطرات (من بين 14 لي تكومونضاو) من عند شركة ألسطوم، لي خدّامين دابا، و عندهم قدرة ستيعابية ديال 533 مسافر.[4][8] كلا مجموعة د لقاطرات مكوّنة من جوج عربات ديال الدفيع و تمنية د لعربات ديال لمسافرين (جوج كلاص 1، 5 ديال كلاص 2، و عربة ديال لبوفي).[8]
تران د لبوراق من نوع يورودوپليكس
تيكي ديال التران من طانجا ل كازا
لكراسى ديال لكلاص اللولة
لكراسى ديال لكلاص التانية
- ↑ "صاحب الجلالة الملك محمد السادس يتفضل ويطلق إسم "البراق" على القطار المغربي الفائق السرعة". Maroc.ma (ب العربية). 12 يوليوز 2018. Archived from the original on 2 أكتوبر 2022. Retrieved 5 مارس 2020.
- ↑ "TrainReview's guide to Morocco's Al-Boraq high speed train". Archived from the original on 25 يوليوز 2020. Retrieved 22 يوليوز 2020.
- 1 2 3 4 "ONCF prepares for launch of high-speed services". International Rail Journal. 12 مارس 2018. Retrieved 21 نونبر 2018.
- 1 2 3 4 5 6 "Africa's first high speed line inaugurated". Railway Gazette International. 16 November 2018. Archived from the original on 22 نونبر 2020. Retrieved 21 November 2018.
- 1 2 3 "Work on Tanger - Kénitra high speed line to start soon". Railway Gazette International. 14 May 2008. Archived from the original on 25 يوليوز 2020. Retrieved 21 November 2018.
- ↑ "Morocco to order Duplex TGVs". Railway Gazette International. 23 October 2007. Archived from the original on 25 يوليوز 2020. Retrieved 21 November 2018.
- 1 2 3 4 "High speed funding package agreed". Railway Gazette International. 18 فبراير 2010. Archived from the original on 25 يوليوز 2020. Retrieved 21 نونبر 2018.
- 1 2 3 "ONCF to buy 14 Duplex high speed trains". Railway Gazette International. 10 دجنبر 2010. Archived from the original on 26 نونبر 2020. Retrieved 18 يناير 2025.
- ↑ "Ceremony launches Tanger – Casablanca high speed project". Railway Gazette International. 29 شتنبر 2011.
- ↑ "Casablanca – Kénitra upgrading starts". Railway Gazette International. 26 شتنبر 2012. Archived from the original on 26 نونبر 2020. Retrieved 21 نونبر 2018.
- 1 2 3 "Morocco's Al Boraq high speed service to launch by year end". Railway Gazette International. 30 July 2018. Archived from the original on 2 دجنبر 2020. Retrieved 21 November 2018.
- ↑ "Africa's first high speed train delivered". Railway Gazette International. 1 يوليوز 2015. Archived from the original on 8 نونبر 2020. Retrieved 21 نونبر 2018.
- ↑ "Tanger high speed train depot inaugurated". Railway Gazette International. 21 شتنبر 2015. Retrieved 21 نونبر 2018.[ليان مهرس ديما]
- ↑ "محطة القطار بطنجة تفتح أبوابها استعدادا لإنطلاق البراق". طنجة 24 (ب العربية). 19 نونبر 2018. Archived from the original on 12 فبراير 2022. Retrieved 2 مارس 2020.
- ↑ "محطة القطار في القنيطرة تنتزع "جائزة فرساي"". هيسپريس (ب العربية). 14 شتنبر 2019. Retrieved 2 مارس 2020.
- ↑ "المغرب وفرنسا يدشنان "البراق".. أسرع قطار في أفريقيا". www.aljazeera.net (ب العربية). Retrieved 2 مارس 2020.
- ↑ "فيديو: افتتاح محطة القطار الجديدة بتمارة بتكلفة 36 مليون درهم". 2M (ب العربية). Retrieved 2 مارس 2020.
- 1 2 3 4 "Morocco's High-Speed Train Trial Run Finishes in Marrakech". Morocco World News. 25 يناير 2023. Retrieved 22 مارس 2023.
- ↑ "Tanger - Kénitra high speed line signalling contract signed". Railway Gazette International. 4 أبريل 2013. Archived from the original on 18 شتنبر 2020. Retrieved 5 أبريل 2013.