لاسيڭون
لاسيڭون (ب لفرانساوية La Cignogne) موناضة مغريبية عندها لمداق ديال لحامض، بانت ف 1929، و نتجاتها شركة لمعاصر لمجمدة لعالمية Brasserie Glacière Internationale (BGI).[1]
ف عام 1929، ف لوقت ديال لإستعمار د لمغريب من عند فرانسا، طلقات شركة لمعاصر لمجمدة لعالمية مجموعة ديال لمشروبات اللاكوحولية، وخا كانت ف لأصل شركة متخصصة ف لبيرة لي لكليان ديالها ب لأساس هوما لمستعمرين لفرانساويين. لهدف ديال الشركة كان باش تستقطب لكليان من لمغاربا لمسلمين لي عندهم حرام يكونصوميو الشراب.[1]
لاسيڭون عرفات نجاح كبير ف جميع الطبقات ديال لمجتمع لمغريبي، و ولّات موجودة ف كل دار. كانو عندها 4 د لوزينات ف لبلاد، ف الدارلبيضا، فاس، مراكش و طانجا.
ف 1937، الشركة، لي كانت أسسات "شركة لمعاصر د لمغريب" Brasserie du Maroc (دابا شركة لمشروبات د لمغريب)، دارت مخزن جديد ف قنيطرة، لي كيسطوكيو فيه التمار د لأحماض (سيرتو الليمون) لي كايجي من منطقة لغرب، و لي تخدّمو ف صناعة لمشروب الجديد ديالها جيدور لي تا هوّ عرف نجاح كبير ف السوق لمغريبية.
ف اللخر ديال السبعينات، هاد لمشروبات كانو كينافسو الند للند مشروبات عالمية بحال كوكا كولا و پيپسي. ب لموازاة معا هاد النجاح، واحد لقانون ديال "تمغريب" الشركات فرض على BGI باش تغادر لمغريب و شركة خرة لي هيّ SNI ستاغلات لفرصة باش تشري لأسهم ديالها ف 1974. هاد الشركة طلقات مشروبات جديدة بحال يوكي Youki و جيل Gil،[2] لي تاهوما عرفو نجاح.
ف لبدية ديال لعولمة لإقتصادية ف لمغريب، بدات لماركة د لاسيڭون كاتنقص ف لإنتاج، بسباب إتفاقية معا كوكا كولا، و بشوية بشوية بدات كاتغبر من السوق. ف 1997، وقف لإنتاج ديال لاسيڭون بشكل رسمي،[2] وخا كانو الطلبات عليها ماكيحبسوش. الشركة خرجات بشكل كامل من السوق ديال لموناضات بعدما خسرات قضائياً ضد كوكا كولا ف 2003.[3]
لاسيڭون ماغبراتش من لعقل الجمعي ديال لمغاربا، و ولّات أسطورة ف التقافة و لفن لعصري د لمغريب.[4]
ف يونيو 2024، شركة لمشروبات د لمغريب، لي كانت تابعة ل ڭروپ كاسطيل،[5] تباعت ل ڭروپ موتانديس لي كيملكو عادل الدويري، و علنات على الرجعة ديال لاسيڭون، ف لقراعي و لكانيطات كيما كانت قبل.[2] ف 1 أكتوبر ديال نفس لعام بانت لاسيڭون لمرة اللولة ف لمارشيات د لمغريب مور غبرة ديال كتر من ربع قرن.[6]
- ^ a b "La Cigogne, Judor, Youki et Gil". www.mafhoum.com. تطّالع عليه ب تاريخ 2024-07-02.
- ^ a b c "La marque culte de boisson gazeuse « La Cigogne » fait son come-back sur le marché - Challenge.ma". www.challenge.ma. تطّالع عليه ب تاريخ 2024-07-03.
- ^ "بعد غياب 27 عامًا.. شركة المشروبات الغازية تعيد إحياء علامة "لاسيكون" التجارية في المغرب". 2024-07-03. تطّالع عليه ب تاريخ 2025-04-28.
- ^ "La Cigogne, la mythique marque marocaine opère son retour".
- ^ Mediamarketing.ma. "Le grand retour de la limonade « La Cigogne » sur le marché marocain". mediamarketing.ma (ب نڭليزية). تطّالع عليه ب تاريخ 2024-07-03.
- ^ FR، Hespress (2024-10-09). "La Cigogne, la mythique marque marocaine de limonade, opère son retour". Hespress Français - Actualités du Maroc (ب لفرانساوية). تطّالع عليه ب تاريخ 2024-10-25.