لألعاب لؤلمپية لقديمة
| لمقال مقطوع من شجرة، ما كايدي ليه تا شي مقال أخر، زيد ليان ديالو ف مقالات خرين. |
لألعاب لؤلمپية لقديمة (ب ليونانية لبالية τὰ Ὀλύμπια،[1] طا ؤليمپيا) كانت مجموعة د لمنافسات د لأطليتيزم بين ممتلين ديال لمدون الدولات ديال ليونان لقديمة، و كانت وحدة من لألعاب لهيلينية الشاملة. هاد لألعاب كانو كيتنظمو ف معبد ؤليمپيا على شاراف الرب زيوس، و ليونانيين لقدام كانو كيعتاقدو بلي عندهم أصول أسطورية. ف التقاليد، كيتّعتابر عام 776 قبل لميلاد هوّ لبدية ديال أول ألعاب ؤلامپية.[2] هاد لألعاب كانو كيدوزو مرة ف ربع سنين، و بسباب هادشي مصطلح "ؤلمپياد" ولّاو كيخدّموه ليونانيين لقدام بحال عبرة د الزمان كاتساوي ربع سنين. ليونانيين متلا كانو كيڭولو "لعام التالت ديال لؤلمپياد نمرة 18 لي كان ربح فيه لاداص من أرڭوص ف الصطاديون"، و الصطاديون (ب ليونانية لبالية στάδιον) كان منافسة ديال الجرا و لموضع نيت فين كاتدار، و هاد لكلمة منها جات stade و stadium يعني "تيران".[3] لألعاب لؤلمپية بقاو مستامرين فاش ليونان طاحت تحت السيطرة د الرومان ف لقرن 2 قبل لميلاد. لألعاب اللخرين لي تسجّلو كانو ف عام 393 ميلادية تحت لحكم ديال طيوضوسيوس اللول، ولايني لأدلة لأركيولوجية كاتشير بلي بعض لألعاب بقاو كيتدارو مور هاد التاريخ.[4][5] لألعاب لؤلمپية ف لغالب حبسو ف مرة ف عهد طيوضوسيوس التاني، غالبا بسباب لعافية لي شعلات ف معبد الرب زيوس ف وقت لحكم ديالو.[6]
ف لفترة د لألعاب كان كيتّعلن على لهدنة لؤلمپية باش الرياضيين و لحجّاج للمعبد يقدرو يسافرو من مدونهم و يحضرو للألعاب ب أمان. الجوائز ديال الرابحين كانو رزاز د الزيتون. لألعاب كانو أداة سياسية لي خدّموها لمدون الدولات باش يأكّدو لقوة و لهيمنة ديالهم على مدون دولات خرين. ف لألعاب لؤلمپية، السياسيين كانو كيعلنو على التحالفات ديالهم، و لفرايليا كانو كيديرو أضحيات للأرباب على ود الرباح. زيادة على هادشي، لألعاب عاونو ف نشر التقافة لهيلينية ف لعالم لمتوسطي لقديم. ف نفس لوقت كانو كيتدارو إحتفالات دينية، و التمتال ديال الرب زيوس ف معبد ؤليمپيا كان كيتّعتابر من عجايب لعالم السبعة د لعالم لقديم. لفنانين و الشوعارا كانو كيتجمعو ف كلا ؤلمپياد باش يعرضو لأعمال لفنية ديالهم على پاطرونات[ن 1] محتملين.
لألعاب لؤلمپية لقديمة كانو فيها رياضات قل من لي كاين ف لألعاب لؤلمپية ديال دابا، و ل مدة طويلة كانو ليونانيين الرجال لأحرار (ماشي عبيد) بوحدهم لي مسموح ليهم يشاركو فيهم،[8] ولايني كانو حالات ديال عيالات لي ربحو ف لمسابقة د لكرويلات. زيد على هادشي، سوا ف لؤلمپيات لقدام ولّا ديال دابا، لألعاب كانو ساحة ديال التعبير السياسي، بحال لمضاهرات، لمقاطعات، لحصارات، لي خدّموهم الدول و لأفراد باش يديرو تأتير على هاد لأحدات الرياضية.[9] طالمّا كانو كيحققو شروط الدخول، أي أطليط من أي مدينة دولة ولّا مملكة يونانية كان يقدر يشارك ف لألعاب لقديمة، لي كانو كيتدارو ديما ف ؤليمپيا، عكس لألعاب ديال دابا لي كيتبدّل لموضع ديالهم من مدينة ل مدينة.[10] الرابحين كان كيتدار ليهم تشريف، و لإنجازات ديالهم كانو كيتقيّدو ف السجلات باش يعرفوهم لأجيال الجايين.
- ^ لپاطرون ف لعالم لقديم و ف ؤروپا ديال لقرون لوسطانية و شوية من بعد هوّ بحال الصپونصور دابا، يعني واحد الشخص لي كيكون مرفّح (مول الشكارة) لي كيدعم مادياً شي فنان ولّا عالم، باش يقدر يعيش مزيان و يشري لماطيرييل لي محتاج ليه و يركّز على لمشروع لي خدام عليه[7]
- ^ Ὀλύμπια. هينري ليدل; روبرت سكوط; الليكسيكون ليوناني النڭليزي لمتوسط ف مشروع پيرسيوس.
- ^ "History". Olympic Games. مأرشيڤي من لأصل ف 9 غشت 2016. تطّالع عليه ب تاريخ 11 غشت 2016.
- ^ Tony Parrottet, The Naked Olympics (2004) at 145. Pausinias uses such references frequently in Description of Greece. E.g., "I found that the combat took pace when Pisistratus was archon at Athens in the 4th year . . . of the Olympiad in which Eurybotus, the Athenian, won the footrace." Pausinias, Description of Greece 2.24.7.
- ^ Tony Perrottet (8 يونيو 2004). The Naked Olympics: The True Story of the Ancient Games. Random House Digital, Inc. pp. 190–. ردمك 978-1-58836-382-4. تطّالع عليه ب تاريخ 1 أبريل 2013.
- ^ Hamlet, Ingomar. "Theodosius I. And The Olympic Games". Nikephoros 17 (2004): pp. 53–75. See also M.I. Finley & H.W. Pleket, The Olympic Games: The First Thousand Years (1976) p. 13.
- ^ Remijsen، Sofie (2015). The End of Greek Athletics in Late Antiquity. Cambridge University Press. ص. 49.
- ^ "1911 Encyclopædia Britannica/Patron". en.wikisource.org. تطّالع عليه ب تاريخ 2025-02-02.
- ^ David Sansone, Ancient Greek civilization, Wiley-Blackwell, 2003, p.32
- ^ Mark Golden, Greece & Rome, Second Series, Vol. 58, No. 1 (APRIL 2011) pp. 1–13
- ^ "The Ancient Olympics". The Perseus Project. Tufts University. مأرشيڤي من لأصل ف 10 February 2010. تطّالع عليه ب تاريخ 12 February 2010.