كابالير سانت جون
| لمقال مقطوع من شجرة، ما كايدي ليه تا شي مقال أخر، زيد ليان ديالو ف مقالات خرين. |
كابالير سانت جون
| ||
 | ||
| معلومات عامة | ||
| نوع | cavalier | |
| لبلاد | مالطا | |
| لموضع | ڤاليطا | |
| لمالك | حكومة مالطا | |
| تصنيف تراتي | Grade 1 | |
كابالير سانت دجون (ب لمالطية: Kavallier ta' San Ġwann) هي واحد لقلعة من لقرن 16 فـ ڤاليطا، مالطا، بناوها فرسان القدّيس يوحنا. كتشوف على باراج سان جون، اللي هو واحد السور كبير ب زاوية منفارجة و كيشكّل جزء من التحصينات البرّية ديال ڤاليطا.
سانت جون كانت وحدة من تسعود ديال القلاع اللي كانو باغيين يبنيوهم فـ المدينة، ولكن فـ الآخر بنَاو غير جوج، و الثانية هي كابالير سانت دجيمس اللي كتشبه ليها بزاف. صمّمها المهندس العسكري الطالياني فرانشيسكو لاپاريلي، و لبني كان تحت إشراف مساعدو المالطي جيرولامو كاسار.
هاد القلعة جات قريبة من "سيتي گيت أركييد" City Gate Arcade و "جرادي هيستينڭس" Hastings Gardens. دابا، القلعة ولات سفارة ديال النظام العسكري السيادي ديال مالطا، اللي هو الوريث ديال نفس النظام اللي بناها فـ اللول.
من بعد الحصار الكبير ديال مالطا فـ عام 1565، اللي حاولات فيه الدولة العثمانية تسيطر على مالطا ولكن ماقدراتش، قرّرو فرسان القدّيس يوحنا يستقرّو نهائيّاً فـ الجزيرة. و خداو القرار يبنيو مدينة جديدة محصّنة باش تكون العاصمة ديالهم، و سمّاوها ڤاليطا على السمية ديال القائد الأعلى ديالهم جان پاريصو دو لاڤاليط.
باش يقدّرو يديرو هاد المشروع، دو لاڤاليط طلب مساعدات مالية من ملوك أوروپا. البابا پيوس الخامس ماعاونهمش غير ب الفلوس، ولكن زاد و بعث ليهم المهندس العسكري الطالياني فرانشيسكو لاپاريلي ل مالطا باش يصمّم التحصينات ديال العاصمة الجديدة.
بداو الأشغال فـ مارس 1566، و ستامرّو طيلة سنوات السبعينات. من بعد ما مشى لاپاريلي من مالطا و توفّى، تكملات خدمة المدينة على يد المساعد المالطي ديالو، المهندس و المعماري العسكاري جيرولامو كاسّار.[1]
قلعة سانت دجون كانت من أوّل البنايات اللي تبنات فـ ڤاليطا، مع كنيسة "سيدتنا مولات لإنتصارات" و باقي التحصينات.[2] تبنات لقلعة على شكل منصة مرفوعة، و دارو فيها مدافع باش تحمي لمدينة من لهجمات اللي كتجي من جهة البر، ف المنطقة اللي تبنات فيها من بعد مدينة فلوريانا.
لقلعة ماشي غير كتمنع العدو يدخل، ولكن حتى يلا قدرو يختارقو تحصينات لمدينة، قلعة سانت دجون كانت تقدر تهدّدهم من الداخل. و كانت مربوطة ب قلعة سانت دجيمس ب ممر تحت لرض، اللي دابا تسدّ.[3]
فـ عام 1646، القائد الأعلى جيوڤاني پاولو لاسكاريس بنى مجموعة ديال لمخازن على الجنب ديال قلعة سانت دجون، باش يخزّن فيها البارود و لموكحلات. هاد المخازن تهدمو فـ تواخر الخمسينات ديال لقرن 20، و النقش التذكاري اللي كان فوق لواجهة ديالهم دابا تْعلّق فـ لحيط ديال لقلعة.[4]
خدّمات القوات البريطانية كابالير سانت دجون خلال الحرب العالمية الثانية.[5]
فـ عام 1967، الحكومة المالطية كرات قلعة سان جون للنظام العسكري السيادي ديال مالطا، اللي هو الوريث ديال فرسان القدّيس يوحنا، ل مدة 99 عام. النظام دار فيها السفارة ديالو فـ مالطا، و دارو ترميم شامل تحت إشراف السفير دينو مارّاييني، و المهندس المالطي روجر دي جورجيو، اللي كان خبير فـ ترميم البنايات التاريخية.
فـ ظرف عاماين، كملو الأشغال، و دارو بعض التعديلات الحديثة ولكن حافظو بعناية على جميع الملامح الأصلية ديال البناية. و بْنَاو فوق السطح واحد لپاننتهاوس بسيط ما كيبانش بزاف، باش يكون سكن ل رئيس البعثة، و منو كيبان منظر واعر على لمدينة اللي تحت و على لمدون و الدواور اللي ضايرين بيها.[5]
من عام 2017، السفير الحالي هو لأمير أوڭوستو روفو دي كالابريا.[6]
لقلعة مصنّفة كا معلامة وطنية من الدرجة اللولى، و مْقيّدة حتى فـ الجرد الوطني ديال التراث الثقافي ديال ڭزاير مالطا.[7]
قلعة سانت جون هي منصة مدفعية كبيرة من نوع "كازيمات"، و عندها شكل خماسي. ما كانتش مصمّمة باش تكون زوينة من ناحية الشكل، بل كانت كتخدم غير لهدف لعسكاري لعملي ديالها.
و وخا من برا كاتْبان كبيرة، النص ديالها كان معمّر غير ب التراب المضغوط، و النص لاخر فيه بيوتا قلال و متفرقين، و زيد عليهم واحد لممر طالع (رامپة) باش يطلعو المدافع للسقف.
لقلعة شادة الجهة الخلفية ديال باراج سانت دجون، و كانت مخصصة باش تقدر تيري فوق الحاجز الرئيسي ديال الباراج بلا ما تعرقل التير ديالو. فوق الطيراس ديالها كاين مخزن ديال البارود.
فـ لقرن 17، زادو بزاف ديال لمخازن فوق لقلعة، ولكن هدّموهم فـ الخمسينات د لقرن 20.[4]
- Spiteri، Stephen C. (2003). Armoury of the Knights. Midsea Books. ص. 88. ردمك 99932-39-33-X. مأرشيڤي من لأصل ف 2016-12-27. تطّالع عليه ب تاريخ 2025-05-30.
- ↑ ICON Studios - Malta - www.icon.com.mt. "City of Valletta - History of Valletta". www.cityofvalletta.org. تطّالع عليه ب تاريخ 2025-05-30.
- ↑ "St James Cavalier | Centre for Creativity". www.sjcav.org. تطّالع عليه ب تاريخ 2025-05-30.
- ↑ "St. John's Cavalier". www.orderofmalta-malta.org.mt. مأرشيڤي من لأصل ف 2014-10-06. تطّالع عليه ب تاريخ 2025-05-30.
- 1 2 Spiteri، Stephen C. (2012). "Hospitaller Gunpowder Magazines". MilitaryArchitecture.com (2): 8–10. مأرشيڤي من لأصل ف 21 مارس 2016. تطّالع عليه ب تاريخ 21 December 2015.
- 1 2 Micallef، Martin. "St John's Cavalier". Maltese Association of the SMOM. مأرشيڤي من لأصل ف 6 October 2014.
- ↑ "Sovereign Order of Malta - Embassy in Malta". تطّالع عليه ب تاريخ 6 May 2024.
- ↑ "St John Cavalier – Valletta" (PDF). National Inventory of the Cultural Property of the Maltese Islands. 28 June 2013. مأرشيڤي من لأصل (PDF) ف 13 July 2015.