قومية باسكية
| لمقال مقطوع من شجرة، ما كايدي ليه تا شي مقال أخر، زيد ليان ديالو ف مقالات خرين. |
لقومية لباسكية (ب لباسكية eusko abertzaletasuna، ب الصبليونية nacionalismo vasco، ب لفرانساوية nationalisme basque) هيّ شكل ديال لقومية لي كايأكد بلي لباسكيين، لي هوما مجموعة إتنية أصلية ف لغرب ديال جبال لپيريني، كايشكّلو شعب واحد، و كاتدعو للتوحيد السياسي ديال لباسكيين لي دابا راهم مفرّقين مابين فرانسا و سپانيا. من نهار فاش بانت ف لقرن 19، لقومية لباسكية كانو ضمنها حاراكات لي كاتدعو للإستقلال ديال بلاد لباسك.
لقومية لباسكية كاينة ف تلاتة ف لمناطق هوما الجماعة لمستاقلة د لباسك و ناڤارا ف سپانيا و إقليم لباسك لفرانساوي ف فرانسا. و كاتّعتابر إديولوجيا "وحداوية ف طبيعتها"،[1] حيت باغية باش جميع لأقاليم الهاضرة ب لباسكية تتوحّد سياسياً.
لحاراكة لقومية لباسكية، لي كانت ديجا بدات من لقرن 19، قدرات تستامر بلا مشاكيل كبار ف لوقت ديال الديكاتورية د ميڭيل پريمو ريڤيرا، تحت لغطا ديال الجمعيات التقافية و الرياضية. لحيزب لوطني لباسكي تّقسم على جوج ف لبدية د لقرن 20، و خرجات منو "الجماعة لوطنية لباسكية" Comunión Nacionalista Vasca. لوطنيين لباسكيين تحالفو معا لحاراكة لكارلية لمدعومة من عند لكنيسة لكاطوليكية ضد ليساريين لمعارضين للكنيسة، ولايني التحالفات بداو كيتبدلو ف لبدية د الجمهورية الصبليونية التانية (1931).
فاش بدات الجمهورية الصبليونية التانية، واحد لفئة صغيرة ديال لوطنيين لباسكيين لعلمانيين زرعو لبوادر ديال لحاراكة لوطنية لباسكية EAE ف لوقت لي وحدين خرين بقاو شادين ف التقليدية لكاطوليكية. ولايني لفشل ديال لكارليين باش يدعمو لقانون لباسكي د 1932، و التشدد ديال لخطاب الضد-جمهوري ديالهم، خلّى لوطنيين يقلّبو على تحالفات جداد معا لأحزاب الجمهورية و ليسارية، شي لي عطا توجه تدريجي ل موقف مسيحي ديموقراطي لي مستاعد للمساومة معا ليسر.
ف 1936، لمسيحيين الديموقراطيين ديال حيزب PNV تحالفو معا الجمهورية الصبليونية التانية ف لحرب لأهلية الصبليونية. لوعود ديال لحكم الداتي تعطات ليهم لأولوية بلاصت لإختلافات لإديولوجية، سيرتو ف لمسائل لمتعلقين ب الدين، و لحيزب دعم لحكومة الجمهورية. بعدما نهازمو لمتمردين ليمينيين، تحقق لحكم الداتي ف أكتوبر 1936. لحكومة لباسكية لمستاقلة تدارت، ب رياسة ديال خوصي أنطونيو أڭيرّي من لحيزب لمسيحي الديموقراطي، و وزارا من نفس لحيزب و أحزاب خرين (سيرتو يسارية منها).
ولايني ف 1937، تقريباً ف النص ديال لحرب، ضطرات لحكومة لباسكية لمستاقلة باش تستسلم قدّام لحليف الطالياني لي كان معا الجينيرال فرانكو، ب مبادرة تعاونو فيها لكنيسة لباسكية و لڤاتيكان. هاد لإستسلام كان مشروط باش مايتقاسوش الصناعة التقيلة و لإقتصاد لباسكي.[2]
ليساريين ف سپانيا سمّاو لإستسلام ديال لعساكريا لباسكيين ف صانطونيا "لخيانة د صانطونيا". بزاف د لعساكريا خداو عفو يلا نضمو للجيش د فرانكو ف الجبهة الشمالية. لوطنيين لباسكيين ستسلمو، كاين من منهم لي ردو النشاطات ديالهم سرية، ولّا مشاو للحبس، و لقادا السياسيين هربو، ل قارة أميريكا، ل فرانسا و بلدان لبينيلوكس. غير عدد قليل منهم لي ولّى ل سپانيا بعدما رجعات الديموقراطية ليها ف السبعينات.
ف لوقت د لحرب لعالمية الجاوجة، لحكومة د لمسيحيين الديموقراطيين ف لمنفى حاولات باش تنضمّ للحولافا، و ستاقرات ف نيويورك باش تاخد الدعم و لإعتراف ديال لميريكان، ولايني نيشان مور لحرب، فرانكو ولّى حليف ديال لميريكان ف السياق ديال لحرب لباردة، شي لي حرم لحيزب لمسيحي الديموقراطي لباسكي من أي فرصة باش ياخد السلطة ف بلاد لباسك.
ف 1959، لقوميين الشباب (abertzaleak) أسسو ڭروپ نفيصالي سميتو Euskadi Ta Askatasuna (إيطا ETA، لي كاتعني "لوطن و لحرية لباسكية").[3] النشاط ديالها لي بدا ب حاراكة تقافية و سلمية فيها رسومات، دعم ديال الراية لباسكية و توزيع منشورات، داز ل مرحلة لعنف بعدما خرجو خبارات صادمين ديال التعديب د الناشطين لباسكيين من عند لبوليس الصبليوني ف الستينات. ف داك لوقت كانت إيطا تحولات بشكل كامل للإديولوجيا لماركسية، و كانت كاتستلهم من لحاراكات لماركسية و الشيوعية بحال ديال فيديل كاسطرو ف كوبا، و هو شي مين ف ڤييطنام. لإغتيال اللول لمأكد لي دارتو إيطا كان ف عام 1968، و هاد لممارسات د لعنف و لقتيلة ستامرو موراها. إديولوجياّ، إيطا ماكانش منظمة عنصرية، و كانت كاتركز سيرتو على لأهمية ديال اللوغة و التقاليد.
ف 1978، رجعات سپانيا للنظام الديموقراطي، و تّعطى لحكم الداتي للباسكيين، لي وصلو ل درجة ديال لإستقلالية ماعمّرها طرات قبل ف التاريخ ديالهم. لباسكيين عندهم بوليس ديالهم، و كيجيريو لمالية لعامة ديالهم براسهم. لمنطقة لمستاقلة د لباسك كايترأسها لحيزب لوطني لباسكي لي كيتبع توجه مسيحي ديموقراطي من التمانينات، من غير ف لفترة ديال 2009 تال 2012، فاش كانت لحكومة لحيزب لإشتراكي. لمجموعة لحيزبية ليسارية Euskal Herria Bildu (لي كاتعني "بلاد لباسك، توحّدي") كاتمتل أهم حيزب ديال لمعارضة من نهار تشكّلات ف 2012.
ف ناڤارا، لقومية لباسكية ماعمرّها وصلات للحكومة لي أغلبية كان كايشدها حيزب لإتحاد الشعبي الناڤاري UPN، ب دعم من لحيزب لإشتراكي د ناڤارا PSN. ولايني لوطنيين لباسكيين قدرو يشدو السلطة ف جوج د الجماعات لمحلية الصغيرة و لمتوسطة، لي كاينين فيهم أغلبية لي كاتهضر ب لباسكية. ف 2015، ؤشوي باركوص Uxue Barkos ولّات أول لقوميين لباسكيين لي وصلو للسلطة، ملي ولات رئيسة ديال إقليم ناڤارا. حيزب "بلاد لباسك، توحّدي" تا هوّ التأتير ديالو غادي و كيتزاد ف لمنطقة، و وصل ل منصب لعمودية ف پامپلونا ف 2023، و عندو دور مهم ف لبرلمان الناڤاري.
ف فرانسا لي النظام ديالها مركازي، كاين حيزب إتحاد لقوميين Abertzaleen Batasuna، لي هوّ حيزب قومي باسكي، و كان عندو وجود ف لبلديات تال التواخر ديال عوام 2000. ف 2077، تشكّل التحالف لإنتخابي لقومي لباسكي "بلاد لباسك، أه" Euskal Herria Bai و ولّى حيزب. ف 2015 ولات عندهم تمتيلية جهوية، و ف 2024 خداو كرسي واحد ف لبرلمان لفرانساوي، ف إطار الجبهة الشعبية الجديدة Nouveau Front populaire.
- ^ Bookman 1993, p. 111.
- ^ Alcalde، Ángel؛ Chamberlin، Foster؛ Leira-Castiñeira، Francisco J. (2021-10-01). The Crucible of Francoism: Combat, Violence, and Ideology in the Spanish Civil War (ب نڭليزية). Liverpool University Press. ص. 186. ردمك 978-1-78284-704-5.
- ^ ETA BASQUE ORGANIZATION, Encyclopaedia Britannica 20 October 2011
- Bookman، Milica Z. (1993). The Economics of Secession. Palgrave Macmillan. ردمك 978-0-312-08443-1.
- Lecours، André (2007-07-13). Basque Nationalism and the Spanish State (ب نڭليزية). University of Nevada Press. ردمك 978-0-87417-731-2.
- Pérez-Agote، Alfonso (2006-03-08). The Social Roots Of Basque Nationalism (ب نڭليزية). University of Nevada Press. ردمك 978-0-87417-665-0.