فعالية:نضم لينا!

مرحبا!

شكرا على الإنضمام ديالك لهاد النشاط باش تساهم(ي) ف ويكيپيديا بالداريجة! ويكيپيديا كاتخدم مزيان غير فاش ناس بحالك كايساهمو! راك(ي) تقدر(ي) تكون(ي) عنصر مهم ف المحافظة على الداريجة و التطوير ديالها ف الأنتيرنيت، بالمساعدة ف جعل ويكيپيديا كاتستاجب للإهتمامات ديال الخدايميا (users) ف السياق التقافي ديال المغريب!

وخا بزاف د الخدايميا د الأنتيرنيت ف المغريب كايخدّمو ويكيپيديا بالعربية، الفرانساوية ولّا النڭليزية حيت كايبانو كتر ف التقلاب د ڭووڭل، راه ويكيپيديا بالداريجة فيها معلومات متعلّقة كتر بالسياق ديال بلادنا. ولكن ويكيپيديا ما كاتكون مزيانة غير فاش الناس بحالك كايصايبو محتوى عندو قيمة و كايعكس الإهتمامات ديالهم!

و بالخصوص حيت جزء كبير من الأنتيرنيت غادي و كيولّي مطرجم بأدوات ديال الصوفتوير بحال الدكا الإصطناعي، راه الوجود ديال محتوى ب اللغات المحلية على موقع بحال ويكيپيديا كايعاون ف المحافظة على هاد اللغات و الثقافات ديالهم.

باش تبدا(ي)، تقدر(ي) تكليكي على "نضمّ(ي)" أولا "Join" ف الفوق ديال الصفحة و تبّع(ي) التعليمات لي التحت!

الإنضمام لهاد الحدث

ملّي كاتكليكي على البوطونة ديال "نضمّ(ي)" الفوق، غادي يتطلب منك(ي) باش تصايب(ي) كونط ف ويكيپيديا!

الكونطات كيخليو الخدمة ديالك معروفة ب سميتك، و كيسهّلو التواصل معا الكتاتبيا الخرين ف ويكيپيديا.

📧ملّي تصايب(ي) الكونط دياك:: دير(ي) لادريسة د الإيميل ديالك! 📧 هادشي كيسمح ب جوج د المسائل:

أول حاجة، المنظمين ديال هاد الحدث يقدرو يصيفطو ليك إيميل مور الحدث باش يعطيوك معلومات إضافية.
تاني حاجة، الإيميل كيعطيك الإمكانية باش تسترجع(ي) الكونط ديالك، ف حالة يلا نسيتي الموضپاص (كلمة السر).

كيفاش تبدا(ي) تعدّل(ي) ف الويكي

أغلبية د الناس كيبداو يعدّلو ف ويكيپيديا ب تبديلات صغار! عندنا أداة مديورة نيت لهاد الغرض! و كاتسمى الصفحة د الخدايمي ولّا الهوم پييج!

تبّع(ي) هاد التعليمات باش تدخل(ي) للهوم پييج ديالك، و تلقا(ي) التبديلات اللولين لي تقدر(ي) تبدا(ي) بيهم:

باش تلقا(ي) الصفحة، سير(ي) للفوق ديال الشاشة و كليكي على السمية د لخدايمي username ديالك ولّا كليكي هنا.
غادي تبان عندك صفحة بحال لي كاتشوف(ي) ف التصويرة.
(ي)تبّع(ي) التعليمات ف الصفحة باش تحدد(ي) المواضيع لي بغيتي تكتب(ي) ولّا تعدّل(ي) عليها.
غادي يبان ليك واحد المقطع عنوانو "التعديلات المقتارحة" الفوق علّيمن ديال الصفحة، و تماك تقدر(ي) تلقا(ي) شي حاجة تقدر(ي) تساهم(ي) بيها ف ويكيپيديا بالداريجة!
- تلميح: تقدر(ي) تجرّب(ي) ميزة "زيد الليانات" لي غادي تعلّمك كيفاش تزيد(ي) ليانات لمقالات د ويكيپيديا.

جرّب(ي) ميزات خرين ف الصفحة، باش تزيد(ي) تتعلم(ي) كيفاش تساهم(ي) ف ويكيپيديا!!

مور التعديل اللول ديالك!

بعدما تكون(ي) درتي هاد التبديلات، كانّصحوك باش تدير(ي) تبديلات ف صفاحي خرين على مواضيع عندك معرفة فيهم.

مثلا: شوف(ي) مدينة ولّا منطقة لي عندها أهمية بالنسبة ليك، و قرا(ي) المقالة ديالها! واش بانت ليك شي حاجة ناقصة؟ تقدر(ي) تلقا(ي) جميع المقالات ديال المدون د المغريب هنا: مدون د المغريب

الكتاتبيا كايطوّرو المقالات على شي مدينة ب:

تصحيح المعلومات عليها
الزيادة ديال ليانات كايدّيو لمقالات خرين ف ويكيپيديا!
التأكد بلي المقدمة ديال المقال كاتلخّص الباقي ديالو
الزيادة ديال معلومات ف الفقرات لي ديجا كاينين (ماتنسا(ي)ش عافاك تزيد(ي) المراجع)

ملي كاتكون(ي) مبتدئ(ة) ف الكتابة ف ويكيپيديا، راه مهم باش تستكشف(ي) بزاف د الأنواع ديال المقالات، باش تتعرف(ي) على المواضيع و المعلومات لي ناقصين ف الويكي ديالك!

واش ف راسك بلي ويكيپيديا كاتعتامد على المراجع؟

ويكيپيديا كاتقبل غير المعلومات لي تنشرات ديجا ف مصادر موثوقة. باستعمال المراجع (لي كيبانو تحت المقال) باش نوثقو المعلومات لي كانزيدو ف المقال، نقدرو نبقاو محايدين: كانپارطاجيو المنظور ديال الخبراء، و ماكانعبّروش على الرأي ديالنا، بل على معلومات محايدة و قابلة للمراجعة.

الهوم پييج كاتشمل إقتراحات متقدمة ديال الزيادة د المراجع و المقاطع ف المقالات.

شكرا على المساهمة ديالك!

كانقدّرو أي محاولة، صغيرة ولّا كبيرة، ديال التبديل ف ويكيپيديا ب الداريجة! ملي كاتفهم(ي) مزيان كيفاش كاتخدم ويكيپيديا، راك(ي) كاتولي جزء من واحد الجماعة لي كاتمثل الحركة المحلية و العالمية ديال ويكيميديا!

باش تزيد(ي) تتعرف(ي) على الجماعة ديال ويكيپيديا بالداريجة، شوف(ي) هاد الصفحة، و يلا عندك سؤال تقدر(ي) تمشي للساحة د الجماعة.