عيون أم الربيع

من ويكيپيديا
لمقال مقطوع من شجرة، ما كايدي ليه تا شي مقال أخر، زيد ليان ديالو ف مقالات خرين.
عيون أم الربيع
عيون أم الربيع
لموقع
لبلاد لمغريب
لجيهة بني ملال خنيفرة
لجماعة أم ربيع
نهر أم ربيع
لجغرافيا
لرتفاع 1300 ميترو
خط طول -5.414936
دائرة دلعرض 33.053626


عيون أم ربيع
لعشاش في منطقة عيون أم الربيع
مقهى بمنطقة عيون أم الربيع خلال فصل الصيف

عيون أم ربيع، بلاصة طبيعية ف لمغريب، كاينة فجيهة بني ملال خنيفرة، إقليم خنيفرة، جماعة أم ربيع، بين لمدينة د أزرو و لمدينة د خنيفرة ف لأطلس لمتوسط، هاد لبلاصة الطبيعية هي بزاف ديال لعيون دلما لي مجهدة، و مجموعة ف بلاصة وحدة، و لعدد ديالها 47 عين، 40 منها حلوة، و7 مالحين، زيد على هادشي، لمنطقة فيها شلال مالح، عندو رواج سياحي كبير، تحت منو تكونات ضاية صغيرة بسباب الجهد باش تايطيح لما.[1] هاد لبلاصة هي لمنبع لكبير ديال واد أم ربيع، تاني أكبر واد ف لمغريب[2]، و لي لمصب ديالو كاين ف مدينة أزمور على لمحيط لأطلسي. زيادة على ڭاع هادشي، هاد لبلاصة فيها مغارة تايجري لما ف لقاع ديالها، هاد لمغارة جهزوها الناس د لمنطقة باش يوليو يستتمروها ف سّياحة. لإرتفاع ديال هاد لبلاصة 1300 ميترو تقريبا على لمستوى د لبحر، و تايطيح فيها خير ربي ديال التلج ف شتا.[2]

لموقع[بدل | بدل لكود]

هاد لبلاصة ديال عيون أم ربيع كاينة بين بزاف ديال لمدون و الدواور لي ف جّبل، بحال مدينة مريرت ؤ خنيفرة ؤ أزرو ؤ عين اللوح ؤ زاوية إفران،[3] بعيدة على لمدينة ديال خنيفرة ب 46 كيلوميتر، و على مدينة أزرو ب 57 كيلوميتر، و على مدينة مريرت ب 29 كيلوميرت، و كادوز عليها طّريق لإقليمية نمرة 7311 سّياحية، لي تادوز تا على معالم طبيعية وحدة خرة بحال أڭلمام (ضاية) أزيزا و ضاية ويوان، ؤ هي منطقة شبعانة غابة، ب لخصوص الشجر ديال لبلوط لخضر و لأرز د لأطلس، وسط لأطلس لمتوسط.[1]

سياحة[بدل | بدل لكود]

عيون أم ربيع هي بلاصة سياحية معروفة ف لمغريب، ب لخصوص ف صّيف. ناس ديال لمنطقة أغلبهم تايعيشو من سّياحة لي ستتمرو فيها، ف لوطيلات و دّيور لمفروشة ديال لكرا، او لقهاوي وسناكات وريسطورات ولبازرارات. أما جناب ديال لواد دارو فيه لعشاش مفرشين بزرابي تقليدية، تايكريوهم لسياح باش يستمتعو ب لما. هاد لبلاصة معروفة ب لأكلة ديال طّاجين لي كايتحط معا أتاي.[1][3]

سكان[بدل | بدل لكود]

نّاس ديال هاد لمنطقة من لأمازيغ د لأطلس لمتوسط، و لّوغة لي منتاشرة هي لّوغة لأمازيغية، و بعدها الداريجة لمغريبية.[1]

لهيدرولوجية[بدل | بدل لكود]

هاد لمنطقة فيها فرشة مائية مزيانة، لما ديالها حلو، لكن لبنية لجيولوجية د لمنطقة فيها لحجر د لملحة، تايملحو لما د لعيون لي تايدوز عليهم.[2]

لمعريض د تّصاور[بدل | بدل لكود]

عيون لكلام[بدل | بدل لكود]

  1. ^ a b c d ABENKCER، Houcine (2016-08-01). "شلالات "أم الربيع" بالمغرب.. السحر المتدفّق بين جبال الأطلس". مأرشيڤي من لأصل ف 2022-09-24. تطّالع عليه ب تاريخ 2022-09-20.
  2. ^ a b c "عيون أم الربيع، منابع الحياة Les sources d'Oum Errabie". مأرشيڤي من لأصل ف 2022-09-22. تطّالع عليه ب تاريخ 2022-09-20.
  3. ^ a b "عيون أم الربيع: ملاذ الباحثين عن المياه الباردة والجبال الهادئة (ربورتاج)". مأرشيڤي من لأصل ف 2023-04-22. تطّالع عليه ب تاريخ 2022-09-20.