عنكبوت

عنكبوت
معلومات عامة
سمية لعيلمية	Araneae (Carl Alexander Clerck، 1757)
لخاصية د ترتاب	تنضيمة
تابع ل	عنكبيات و رباعيات الرئة
لعيشة
عايش فلفترة	319 ملاين دالسنين قبل لميلاد
معلومات خرين
لكائن مصدر ديال	حرير العنكبوت
فعايلو	لدغات العنكبوت *رهاب العناكب

لعنكبوتات (سمية علمية: Araneae؛ عنكبيات) هوما مفصليات الرجلين كايتنفسو لهوا عندهم تمنية ديال الطراف، لقاط ݣرني ب نياب قادرين ب شكل عام يحݣنو السم، و مغازل لي كايخرّجو لحرير. هومايا أكبر تنضيمة ف لكلاص عنكباويات و مرتبين السابعين ف الطوطال د تنواع النواع من بينات ݣاع التنضيمات د لكائنات لحيين. لعنكبوتات كايتصابو ف ݣاع الدنيا ف كل قارة من غير أنطاركتيكا، و دارو الساس ل ريوسهم ف أي موؤل أرضي تقريباً. على حساب يونيو 2025، 53,034 نوع د لعنكبوت ف 136 فاميلة تشجلو من الطاكسونوميستات. غير هو، كاينة واحد لمناقشة بينات لعولاما على قبل كيفاش كايخص لفاميلات يتكلاصاو، ب كتر من 20 كلاصاج مبدل تقتارح من عام 1900.

ب شكل أناطومي، لعنكبوتات (كيف ما هو لحال معا ݣاع لعنكباويات) مبدلين على مفصليات الرجلين لخرين حيت التقسامات لكسديين لموالف بيهم عند مفصليات الرجلين تدمجو ل جوج طاݣمات، الراس الصدري (cephalothorax) ولا لكسدة لقبلية، و لكسدة لقاعية (opisthosoma)، ولا لكرش، و مربوطين معا بعضياتهم ب واحد لعنق سطواني صغير، ولا الرجيّلة (pedicel). غير هو، حيتاش ماكاينش دابايا حتى شي دليل فوصيلي ولا من علم الأجنة بلي لعنكبوتات كان عندهم تقسام مفروق كايشبه ل الصدر، كاينة واحد لحجة ضد لمشروعية ديال موصطلاح صدر راسي، لي كايعني راس و صدر مدموجين. و بحال هادشي، شي حجات يقدرو يتشكلو ضد تخدام موصطلاح "كرش"، ماحد لكسدة لقاعية د ݣاع لعنكبوتات فيها لقلب و لعضاء التنفوسيين، و لي هوما أعضاء ماموالفش بيهم ف لكرش د مفصليات الرجلين.

عكس لبخوش، لعنكبوتات ماعندهمش لانطيرات. و عندهم كلهم من غير لݣروپ بدائي ݣاع، موسطات لحلمة (Mesothelae)، أكتر سيستيم عصبي ممركز بينات مفصليات الرجلين كاملين، حيت ݣاع لعݣدات دياولهم مدموجين ف كتلة وحدة ف الصدر الراسي. عكس جل مفصليات الرجلين، لعنكبوتات ماعندهمش عضلات التنيان ف طرافهم و ف بلاصة هادشي كايتنيوهم ب الضغط لهيدروليكي.

كروشهم كايهزو زوايد (الطراف)، لي تموديفياو ل مغازل لي كايخرّجو لحرير من ستة النواع د لغدد علكتر. شباكي لعنكبوت مبدلين ب شكل عريض على بعضياتهم ف لقد، الشكل و كمية لخيوط لمعلكين لمخدّمين. دابايا كايبان بلي الشبكة لعنكبوتية اللولبية كان من الشكال اللولين ف تخدام الشبكة، و لعنكبوتات لي كاينتجو الشباكي لمشابكين لمخربقين كايكونو كتر ف التنواع و لكترة على لعنكبوتات مداريين لمغزل. لعنكباويات لي كايشبهو ل لعنكبوتات لي عندهم بزابز كاينتجو لحرير (عنكبيات مزنططين) بانو ف لحقبة الديڤونية، جوايه 386 مليون عام هادي، و لايني كانو ناقصينهم لمغازل. لعنكبوتات لحقيقيين تصابو ف الصخور د لحقبة لكاربونية من هادي 318 حتى ل 299 مليون عام و كايشبهو ب زايد ل لأعضاء د التنضيمة التحتانية لبدائية ݣاع، موسطات لحلمة. لݣروپات الساسيين ديال لعنكبوتات لعصريين، رتيليات الشكل و عنكبوتيات الشكل، بانو ل لخطرة اللولى ف لحقبة الطرياسية، كتر من 200 مليون عام هادي.

النوع د لعنكبوتات النقازين باݣيرا كيپلينݣي (Bagheera kiplingi) توصف بلي هو عشاشبي ف 2008، بلحق ݣاع النواع لمعروفين لخرين كايكونو مفتارسين، كاياكلو ف لغالب لبخوشات و لعنكبوتات لخرين، وخا شي نواع كبار ف لقد كاياكلو حتى الطيور و الزرموميات. واحد التقدير بلي 25 مليون طون ديال لعنكبوتات كايقتلو 400–800 طون د لفرايس كل عام. لعنكبوتات كايخدّمو سطراتيجيات معددين باش يشدّو لفرايس: ب توحالهم ف الشباكي لمعلكين، تكتافهم ب لبالونات لمعلكين د لحرير، تقليد لفرايس باش مايديطيكطيوهمش، ولا كايتبعوهم. لغالبية فيهم كايضبطو لفرايس ف الساس ب لحسان ب لڤيبراسيوات، و لكن الصيادا النشيطين عندهم شوف ماضي و الصيادا من ݣنس پورسيا كايوريو يمارات ديال الداكا ف لعزيلة ديالتهم ل الطاكتيكات و لقدرة باش يديڤلوپيو وحدين جداد. مصارن لعنكبوت كايكونو ضيّقين ب زايد باش يدخّلو لمواد الصليبين، عليها كايميّهو ماكلتهم ب ترقادها ب أونزيمات هضميين. هوما عاوتاني كايطحنو ماكلتهم ب الركايز د اللماسات الرجليين (pedipalps) دياولهم، لاحقاش لعنكباويات ماعندهمش لفكاك التحتانيين كيف ما عند لبخوش و لقشريات.

باش يتجنبو يتكالو من النتاوي، لي كايكونو ف لعادة كبر ف لقد، دكور لعنكبوت كايبيّنو ريوسهم ما ملاقيين محتاملين ب تنويعة معقدة ديال طقوس لمغازلة. الدكور د جل النواع كايفلتو شي شوية د لملاقيات، لي حابسهم تيساع عمرهم لقصير ف الساس. النتوات كايغزلو صنادق د لبيض من لحرير، كل صندوق يقدر يكون فيه مياوات د لبيض. النتوات د شلا نواع كايتهلاو ف صغارهم، متلاً ب هزانهم ولا ب شريك لماكلة معاهم. واحد لاقلية د النواع كايكونو جتيماعيين، كايبنيو شباكي لي يقدرو يسكّنو شوية د لعنكبوتات حتى ل 50,000 فرد. السلوك الجتيماعي كايتفاوت من التسامح لهشيش، كيف ما عند لعنكبوتات لهجالات، ل الصيادة ب لمعاونة و شريك لماكلة. وخا لاغلبية د لعنكبوتات كايعيشو عاماين علكتر، الرتيلات و رتيليات الشكل لخرين يمكن ليهم يعيشو كتر من 20 عام.

وخا السم ديال شي نواع كايكون خطير على بنادم، لعولاما دابا كايقلّبو باش يخدّمو سم لعنكبوت ف الطب و كا مبيد ماكايلوّتش. حرير لعنكبوت فيه واحد لخفة، متانة و لاستيكية حسن من لمواد لمصنعين، و جينات حرير لعنكبوت تدخّلو ف لبزوليات و النبات باش يشوفوهم واش يقدرو يصلاحو كا معامل د لحرير. كا حاصول على النطاق لواسع ديال سلوكاتهم، لعنكبوتات ولاو رموز شايعين ف لفن و لخرافة، و كايرمزو ل شلا كومبوات ديال الصبر، قسوحية لقلب و لقدرات لإبداعيين. لخوف من لعنكبوتات الزايد على لحد كايتسمى فوبيا العناكب.

لأناطوميا و لفيزيولوجيا

لبلان د لكسدة

لعنكبوتات كايتعتابرو من لقاطيات لݣرون (chelicerates) و عليها هوما مفصليات الرجلين، عندهم: كسدات مقسمين ب طراف مفصليين، مغطيين كلهم ب واحد الجليّدة (cuticle) مصاوبة من لكيتين (chitin) و لپروتينات؛ ريوس لي مركبين من بزاف د التقسامات لي كايدّمجو وقيت الديڤلوپمو د الجنين. ب صيفتهم لقاطيات لݣرون، كساديهم مشكلين من جوج طاݣمات (tagmata)، لي هوما تستيفة ديال التقسامات لي عندهم وضايف مشابهين: لقدّامية ݣاع، كايعيّطو ليها الصدر الراسي (cephalothorax) ولا لكسدة لقبلية (prosoma)، لي هو واحد النديماج د تقسامات لي يلا كانو عند شي بخوشة غايشكلو جوج طاݣمات مفارقين، الراس و الصدر؛ الطاݣما اللورانية كاتسمى لكرش ولا لكسدة لقاعية (opisthosoma). عند لعنكبوتات، الراس الصدري و لكرش مربوطين ب واحد لعنيّق سطواني صغير، لي كايعيّطو ليه الرجيّلة (pedicel). النمط د نديماج التقسام لي كايشكل ريوس لقاطيات لݣرون كايكون فرّادي من نوعو بينات مفصليات الرجلين، و التقسام لي ف لعادة كان غايكون اول اقسام د الراس كايغبر ف مرحالة بكرانية ف الديڤلوپمو، عليها لقاطيات لݣرون كاينقصوهم لانطيرات النوعيين لي عند جل مفصليات الرجلين. ف لحقيقة، الزوايد لوحيدين قدام لفم عند لقاطيات لݣرون هوما واحد لفردة ديال اللقاطات لݣرنيين (chelicerae)، و كاينقصوهم ݣاع لحوايج لي يقدرو يتوضفو نيشان كا "فكاك". الزوايد اللولين مور لفم كايتسماو اللماسات الرجليين (pedipalps)، و كايشغلو وضايف مبدلين وسط ݣروپات مبدلين ديال لقاطيات لݣرون.

لعنكبوتات و لعݣارب هوما أعضاء ف واحد لݣروپ د لقاطيات لݣرون، لعنكباويات (arachnids). اللقاطات لݣرنيين د لعݣارب فيهم تلاتة د التجزاءات و كايتخدّمو ف لماكلة. اللقاطات لݣرنيين د لعنكبوتات فيهم جوج تجزاءات و كايتسالاو ف النياب لي كايكونو ب شكل عام مسمومين، و كايتطواو بعيد مورا التقسامات لفوقانيين منين ماكايتخدّموش. التقسامات لفوقانيين ب شكل عام عندهم "لحية" غليضة لي كاتصفّي الشناتف الصليبين من لماكلة نتاعتهم، لاحقاش لعنكبوتات كايقدرو غير ياخدو لماكلة السايلة. اللماسات الرجليين د لعݣارب ب شكل عام كايشكلو مخالب كبار على ود شقيم لفرايس، أما هادوك لي عند لعنكبوتات كايكونو زوايد صغار تقريباً لي ركايزهم كايخدْمو عاوتاني ب صيفتهم متيداد د لفم؛ زيد على هادشي، هادوك لي عند لعنكبوتات الدكور كايكون فيهم تقسامات لخرانيين مكبرين كايتخدّمو على قبل تدواز لماني.

عند لعنكبوتات، الراس الصدري و لكرش مربوطين ب واحد لعنق سطواني صغير، لي كايخلّي لكرش قادرة باش تحرّك ب شكل مستاقل وقيت تخراج لحرير. السورفاص لفوقانية د الراس الصدري كاتكون مغطية ب واحد لكاراپاص حدبة (convex carapace)، أما لتحت كايكون مغطي ب جوج صفايح فطحين. لكرش كاتكون رطبة و على شكل بيضة. ماكاتبانش حتى يمارة على التقسام، من غير موسطات لحلمة لبدائيين، لي لأعضاء لعايشين منهم هوما ناقصات الشبكة (Liphistiidae)، لي عندهم صفايح مقسمين ف السورفاص لفوقانية.

الدورة الدمية و التنفس

كيف ما مفصليات الرجلين لخرين، لعنكبوتات كايتعتابرو كائنات سيلوميين (coelomates) معناتها السيلوم (coelom) كايتنّقص ل مواضع صغار جوايه السيسطيمات د التنفس و التخراج. بلاصتو تخادت ب شكل كبير من الدموسيل (hemocoel)، لي هو تجواف لي دايز تقريباً على طولة لكسدة و لي منو الدم كايدوز. لقلب كايكون واحد النبوبة ف لموضع لفوقاني من لكسدة، ب فتيّحات قلال لي كايخدْمو ب صيفتهم ڤالڤات ماكايرجّعوش الدم، هادشي لي كايخلّي الدم يدخل ل لقلب من الدموسيل بلحق ماكايخلّيوهش يرجع قبل مايوصل ل لختمة لقدّامية. غير هو، عند لعنكبوتات، لقلب شاد غير لموضع لفوقاني من لكرش، و الدم كايتّخوى ف الدموسيل من شريان واحد لي كايتحل ف لختمة اللورانية من لكرش و من الشريانات لمعرشين لي دايزين من الرجيّلة و كايتحلو ف مواضع معددين من الصدر الراسي. هادشي علاش لعنكبوتات عندهم سيستيم دوراني محلول. الدم ديال شلا عنكبوتات لي عندهم ريّات كتابيين (book lungs) عندهم الصبغي التنفسي الدموسيانين (hemocyanin) باش يخلّيو الطرونسپور د لؤكسيجين فعال كتر.

لعنكبوتات ديڤلوپاو بزاف ديال لأناطوميات التنفسيين لمبدلين لمبازيين على الرية لكتابية، السيستيم قصباوي (قصبة د لهوا)، ولا بجوج. لعنكبوتات من رتيليات الشكل و موسطات لحلمة عندهم جوج فردات ديال ريات لكتابيين عامرين ب الدمولمف (haemolymph)، فين لفتحات ف السورفاص لكرشية (ventral؛ التحتانية) د لكرش كايخلّيو لهوا يدخل و يديّع لأوكسيجين. نفس لحالة معا شي عنكبوتات قاعديين (basal؛ بدائيين ف تعراش لعنكبوتات)، بحال فاميلة تحتانيات الشلقومة (Hypochilidae)، و لايني لأعضاء لباقيين من هاد لݣروپ عندهم غير لفردات الدخلانيين من الرية لكتابية لي مامقيوصينش أما لفردات لبراويين من لأعضاء د التنفس تموديفياو ب شكل جزئي ولا كامل ل قصبات د لهوا، لي منهم لأوكسيجين كايديع ف الدمولمف ولا نيشان ل النسيج و لأعضاء. السيسطيم لقصباوي ف لغالب تطور عند الجدود الصغار ف لقد باش يعاون على مقاومة النشوفية (desiccation). لقصبة لهوائية كانت ف لأصل مربوطة معا لي حداها من واحد لفردة د لفتحات كايعيطو ليهم التنافس (spiracles)، بلحق عند لغالبية د لعنكبوتات هاد لفردة د التنافس تدمجات ل فردة وحدة لوسط، و تساخرات ل اللور حدا لمغازل. لعنكبوتات لي عندهم قصبات لهوا ب شكل عام عندهم معدالات ستيقلابيين (metabolic rates) زيْد و محافضة حسن على لما. لعنكبوتات كايكونو براويين لحرارة (ectotherms)، عليها درجات لحرارة د لبيئة ديالتهم كاتأتر على النشاط ديالهم

لماكلة، لهضيم و التخراج

ب شكل فرادي من نوعو بينات لقاطيات لݣرون، التجزاءات اللخرين د اللقاطات لݣرنيين عند لعنكبوتات كايكونو نياب، و لغالبية لعضمى من لعنكبوتات يمكن ليهم يخدّموهم باش يحݣنو السم ف فرايسهم من لغدد د السم لي كاينين ف الجدورا د اللقاطات لݣرنيين. لفاميلات كاملات لفريس (Uloboridae) و كاملات لقدومية (Holarchaeidae)، و شي عنكبوتات من ناقصات الشبكة، ترزاو ليهم لغدد د السم، و ف عاوض هادشي كايقتلو فرايسهم ب لحرير. كيف ما لغالبية ديال لعنكباويات، ب لحساب د لعݣارب، لعنكبوتات كايكون عندهم مصران ضيّق لي يقدر يعدّي غير لماكلة السايلة و فيه جوج تستيفات د الصفايات باش يخلّيو لمواد الصلبين برا. سيستيمات مبدلين ديال لهضيم لبراوي. شي وحدين كايضخو لؤنزيمات لهضميين من لمصران لوسطاني ف لفريسة و من موراها كايمصو لأنسيجة لممّيّهين د لفريسة ل لمصران، باش ف اللخر كايشيّطو غير لقشرة لخاوية د لفريسة. شي وحدين خرين كايطحنو لفريسة حتى تولي عصيدة ب تخدام اللقاطات لݣرنيين و الركايز د اللماسات الرجليين، و هوما كايغرقوها ب لؤنزيمات؛ عند هاد النواع، اللقاطات لݣرنيين و الركايز د اللماسات الرجليين كايشكلو واحد التجواق قبل فمّي لي كايحبس لماكلة لي هوما كايعالجوها.

لمعدة لي ف الصدر الراسي كاتخدْم كا بومبا لي كاتسيفط لماكلة لمواضع غارقين ف السيستيم لهضمي. لمصران لوسطاني هاز بزاف د لأعضاء من للعور لهضمي، لي هوما بيوت بلا خرجة، لي كايخرّجو التقاوت من لماكلة؛ جلهم كاينين ف لكرش، لي مسيطر عليها السيستيم الهضمي، بلحق شي شوية منهم كاينين ف الصدر الراسي.

جل لعنكبوتات كايردّو لمنتوجات د الشياطا النيطروجينية ل حمض بولي (uric acid)، لي يمكن ليه يخرج ب صيفتو مادة ناشفة. النبيّبات لمالپيݣيين (Malphigian tubules؛ نبوبات صغار) كايخرّجو هاد الشياطا من الدم وسط الدموسيل و كايخويوها وسط لبيت لمدرقي (cloacal chamber)، لي من كايطّردو على طريق الشرج. لينتاج د حمض لبول و التزوال ديالو على طريق النبيّبات لمالپيݣيين هوما واحد لمزيّة حفاضا على لما لي تطورات ب شكل مستاقل ف شلا نسولا من مفصليات الرجلين لي كايقدرو يعيشو بعاد عل لما، متلاً النبيّبات د لبخوش و لعنكباويات تديڤلوپاو من مواضع مبدلين ب لمرّة د الجنين. غير هو، شي شوية د لعنكبوتات لبدائيين، ف التنضيمة التحتانية موسطات لحلمة و التنضيمة السفلية رتيليات الشكل، بقاو عندهم النفريدات (كلوات صغار) من جدودهم مفصليات الرجلين، لي كايخدّمو كميات كبار من لما باش يخرّجو لمنتوجات د الشياطا النيطروجينية بحال لأمونياك.

السيستيم لعصبي لمركزي

السيستيم لعصبي لمركازي الساسي عند مفصليات الرجلين كايتشكل من فردة د لحبال لعصبيين دايزين تحت لمصران، ب عݣدات (ganglia) مفاردين ب صيفتهم مراكز لوكال د لكونطرول ف التقسامات كلهم؛ دماغ مركب ب الدميج ديال لعݣدات على قبل تقسامات الراس ف لقدّام و اللور د لفم، على قبل باش يكون لمريء مطوّق ب هاد التجماعات د لعݣدات. من غير موسطات لحلمة لبدائيين، لي لݣروپ لوحيد لعايش فيهم هوما ناقصات الشبكة، لعنكبوتات عندهم السيسطيم لعصبي لممركز ݣاع لي موالف بيه عند لعنكباويات: ݣاع لعݣدات ديال ݣاع التقسامات كايكونو مدموجين مورا لمريء، باش يعمر الصدر الراسي ب شكل كبير ب لانسيجة لعصبيين و عاد ماكاينينش لعݣدات ف لكرش؛ عند موسطات لحلمة، لعݣدات د لكرش و لپارتية اللورانية ديال الصدر الراسي بقاو مامدموجينش.

وخا السيستيم لعصبي لمركازي ديالهم صغير ب شكل نسبي، شي عنكبوتات (بحال ݣنس پورسياويات؛ Portia) كايوريو سلوكات معقدين، بحال لقدرة باش يخدمو لمقاربة نتاع التجربة و لغلط.

لأعضاء د لحسان

لعينين

لعنكبوتات ف الساس عندهم ربعة ديل لفردات د لعينين ف لموضع لقدّامي لفوقاني من الصدر الراسي، و مشكلين ف نماط لي كايتنوعو من فاميلة ل لفاميلة. لفردة الرئيسية ف لقدّام كايعيّطو ليهم لعويينات صبغي لكاس (pigment-cup ocelli)، لي كايكونو قادرين عند جل مفصليات الرجلين غير على ضبيط الجيهة منين جاي الضو، ب تخدام الضل الطايح ب لحيوط د لكاس. غير هو، هاد لعينين عند لعنكبوتات قادرين باش يصايبو تصاور. لفردات لخرين، كايعيّطو ليهم لعينين التانويين، كايتشافو بلي تشتقو من لعينين لمركبين (compound eyes) ديال جدودهم مفصليات الرجلين، و لكن مابقاوش عندهم لفاصات لمفارقين النوعيين دلعينين لمركبين. عكس لعينين الرئيسيين، هاد لعينين التانويين عند لعنكبوتات كايضبطو الضو لمعكوس من واحد الطاپية الشفافة (tapetum lucidum) عاكسة، و لعنكبوتات الديبيين يمكن ليهم يتقشعو ب الضو د لپيل لمعكوس من الطاپيات دياولهم. ف الجيهة لخرى، لعينين التانويين ديال لعنكبوتات النقازين مافيهمش الطاپيات الشفافين.

التبدالات لخرين بينات لعينين الرئيسيين و التانويين هوما اللخرين فيهم الرابدوميرات (rhabdomeres؛ پارتيات عصويين) لي كاينعتو بعيد على الضو لماجي، كيف ما عند السنسوليات، أما التشكال عند اللولين كايكون لعكس. لعينين الرئيسيين غير هوما عاوتاني لي فيهم عضلات لعين، هادشي لي كايخلّيهم قادرين يحركو الشبكية. أما لعينين التانويين لي مافيهمش عضلات ݣاعما كايتحركو.

لمضى الشوفي (visual acuity) د شي عنكبوتات نقازات كايفوت عشرات د لخطرات من داك ديال طيارات لما (dragonflies)، لي عندهم أحسن شوف بينات لبخوشات. هاد لمضى كايوصلو ب واحد السيرية طيليفوطوݣرافية ديال لعدسات، شبكية ب ربعة د الطبقات، و لقدرة باش يشقلبو لعينين و يشكلو التصاور من مراحل مبدلين من السكانينݣ. لعيب لي عندهم هو السكانينݣ و عمليات تشكال التصاور كايكونو تقال نسبياً.

كاينين عنكبوتات ب عدد ناقص د لعينين، الشايعين ݣاع فيهم عندهم ستة د لعينين (متال، Periegops suterii) ب فردة ناقصة د لعينين ف لخط الدخلاني لوسطاني (anterior median line). نواع خرين عندهم ربعة د لعينين و شي أعضاء ف فاميلة لكاپونيات (Caponiidae) يقدرو يكونو عندهم حتى جوج عينين. النواع لي كايزحفو ف لغيران ݣاعما عندهم لعينين (بحال لعنكبوت الديبية د غار كاوائي)، ولا كايكونو عندهم عينين أتاريين ماقادرينش على النضر (كيف ما Holothele maddeni).

أعضاء خرين

كيف ما عند مفصليات الرجلين لخرين، جليّدات (cuticles) لعنكبوتات غايحبسو لمعلومات على لعالم لبراني، كون ماكانوش متقبين ب شلا مستشعرات ولا كونيكسيوات من لمستشعرات ل السيستيم لعصبي. ف لحقيقة، لعنكبوتات و مفصليات الرجلين لخرين عدلو جليداتهم ل تشكيلات معقدين ديال لمستشعرات. شلا مستشعرات د لمسان، جلهم زغيّبات كايعيّطو ليهم لهلبات (setae)، كايستاجبو ل نيڤوات مبدلين ديال لقوّة، من لكونطاكط لمجهد ل لكورانات د لهوا الضعاف بزاف. لمستشعرات لكيماويين بحال حاسة الدوق و الشمان، دايماً كايكونو على طريق لخلفيات. عنكبوتة بالغة من ݣنس لعنكبوت (Araneus) يقدرو يكونو عندها كتر من 1,000 هلبة بحال لهلبات لكيموستيشعاريين، لغالبية منهم كاينين ف لݣدام (tarsi) و لفردة اللولانية من لكراوع. الدكور عندهم زغيبات كيموستشعاريين ف اللماسات الرجليين على النتوات، هاد اللماسات تشافو بلي هوما ستيجابة ل فيرومونات الجنس لي كايتنتجو من النتوات، لمقيوصين و لمهزوزين ف لهوا. لعنكبوتة النقازة إڤارتشا كوليسيڤورا (Evarcha culicivora) كاتخدّم ريحة الدم ديال لبزوليات و السنسوليات لخرين، لي كاتكسبها ب شدان الناموسات لعامرين ب الدم، باش تجدب الجنس لاخر. و حيتاش هوما قادرين يفرّقو إينا جنس، كايتستنتج بلي ريحة الدم كاتكون مخلطة ب لفيرومونات. لعنكبوتات عاوتاني عندهم فتيحات ستيشعاريين (slit sensillae) ف لمفاصل د طرافهم لي كايضبطو لقوة و التزعزيعات. عند لعنكبوتات لي كايبنيو الشبكة، ݣاع هاد لمستشعرات لميكانيكيين و لكيماويين كايكونو مهمين كتر من لعينين، أما لعينين كايكونو مهمين كتر عند لعنكبوتات لي كايصيدو ب شكل أكتيڤ.

بحال لغالبية ديال مفصليات الرجلين، لعنكبوتات كاينقصهم ريسيپطورات د التوازن و لكسيراج و كايعولو على عينيهم يوريوهم إينا جيهة لفوق. الريسيپطورات لحسيين لغارقين (proprioceptors) د مفصليات الرجلين، لي هوما مستشعرات لي كايعلْمو ب لقوة لمبدولة من لعضلات و درجة التنيان ف لكسدة و لمفاصل، مفهومين مزيان. ف الجيهة لخرى، مامعروفش بزاف على لمستشعرات الدخلانيين لي يقدرو يكونو عند لعنكبوتات و مفصليات الرجلين لخرين.

شي عنكبوتات كايخدّمو شباكيهم على قبل السميع، أما الشباكي لعملاقين كايخدْمو ب صيفتهم مستشعرات سمعيين موسعين و يمكن ليهم يتعاودو يصايبو.

لحركة

كل كراع من التمنية د لكراوع د شي عنكبوتة كايتشكلو من سبعة د لپارتيات مفرّزين. لپارتية لقرب لقرب ݣاع من الصدر الراسي و لي ملصقة لكراع معاه هي لكوكسا (coxa؛ لورك)؛ التجزاء التالي هو لعضم الجرّاي (trochanter) لقصير لي كايخدْم كا مفصل جاوجي التحراك (hinge) على قبل التجزاء الطويل الجاي، لفيمور (femur؛ عضم لفخد)؛ من بعد كاينة الركبة د لعنكبوتة، لي كاتسمى الرضفة (patella)، لي كاتخدْم ب صيفتها مفصل جاوجي التحراك على قبل التيبيا (tibia؛ عضم الساق)؛ من بعد كاين لݣدم لبعدي (metatarsus)، لي كايربط التيبيا ب لݣدم (tarsus، لي كايتشاف ب صيفتو شكل من الرجل)؛ لݣدم (tarsus) كايسالي ف واحد لمخلب مصايب من جوج ولا تلاتة د التقمقيمات، على حساب إينا فاميلة كاينتاميو ليها. وخا ݣاع مفصليات الرجلين كايخدّمو لعضلات لملاصقين لداخل ديال السكوليط لبراوي باش يتنيو (flex) طرافهم، لعنكبوتات و شي ݣروپات خرين قلال مازال كايخدّمو الضغط لهيدروليكي باش يتجبّدو (extend)، لي هو سيستيم موروت من جدودهم لي ماقبل مفصليات الرجلين. لعضلات ديال التجباد لوحيدين ف كراوع لعنكبوت كاينين ف لمفاصل التلاتة د لورك (عندهم حدود مع لكوكسا و لعضم الجرّاي). لحاصول، شي عنكبوتة ب صدر راسي مقمقم ݣاعما يمكن ليها تجبّد كراوعها، و لكراوع ديال لعنكبوتات لميتين كايتقوسو ل لداخل. لعنكبوتات يقدرو يولّدو ضغوطات كتر ب تنمية د لمرّات على النيڤو لي كايكونو فيه مريّحين باش يجبّدو كراوعهم، و لعنكبوتات النقازين يقدرو ينقزو 50 خطرة كتر من طولتهم ب زيادة ضغط الدم على غفلة ف لفردات التالتين و الرابعين ديال كراوعهم. وخا لعنكبوتات لكبر ف لقد كايخدّمو لقدرة لهيدروليكية باش يسݣمو كراوعهم، عكس لعنكبوتات النقازين كايعولو على عضلات التنيان باش يولّدو لقوة الدافعة على قبل التناقز.

لغالبية ديال لعنكبوتات لي كايصيّدو ب شكل أكتيڤ، ف عاوض التعوال على شباكيهم، عندهم خصلات كتيفين من زغيّبات رقيوقين بينات لمخالب لمفاردين ف لقمقومات ديال كراوعهم. هاد لخصلات، معروفين ب الشطيطيبات (scopulae)، مشكلين من زغيّبات لي لختمات نتاوعهم كايتعرشو حتى ل 1,000 عرش، و كايردو لعنكبوتات لي كايملكوهم قادرين يتمشاو ف الجاج لعمودي و ف السقوفا مقلوبين. كايبان بلي الشطيطيبات كايقدرو يبقاو شاقمين ب سباب لكونطاكط معا الطبقات ديال لما الرقاق ب شكل شديد عل السورفاصات. لعنكبوتات، كيف ما لغالبية ديال لعنكباويات، كايخلّيو ربعة د لكراوع على السورفاص علاقل منين كايكونو كايتمشاو ولا كايجريو.

لإنتاج د لحرير

لكرش مافيهاش الزوايد (appendages) من غير هادوك لي تموديفياو باش يشكلو وحدة حتى ل ربعة (ف لعادة تلاتة) ديال لمغازل (spinnerets) لقصار و لمحركين، لي كايطلقو لحرير. كل مغزل عندو بزاف د لبزابز (spigots)، كل بزبوز مربوط ب غدة وحدة د لحرير. كاين علاقل ستة د النواع ديال غدد لحرير، كل نوع كاينتج نوع مبدل ديال لحرير. لعنكبوتات لبزاقات (Spitting spiders) حتى هوما كاينتجو لحرير ف غدد معدلين د السم.

لحرير ف الساس مركب من واحد لپروتين كايشبه بزاف ل هاداك لمخدّم ف لحرير د بخوشات. هو ف لبدو كايكون سايل، و كايقصاح ماشي حيت كايتعرى ل لهوا و لكن كا حاصول على التمداد، هادشي لي كايبدّل لقلدة الدخلانية د لپروتين. هادشي كايشبه ل لقوة الشادّة ديال النيلو (nylon) و لمواد لبيولوجيين بحال لكيتين، لكولاجين و السيلولوز، و لكن لاستيكي كتر. ب معنى خر، يمكن ليه يتجبّد كتر من هاد لمواد قبل ما يتّقطع ولا يخسر شكلو

شي عنكبوتات كايكون عندهم واحد لغريبيل (cribellum)، لي هو مغزال معدل ب كتر من 40,000 بزبوز، كل واحد فيهم كاينتج واحد الليف رقيق ب زايد. اللياف كايتّجرو من لقصيبة (calamistrum)، لي هي تستيفة ديال الزغيّبات كاتشبه ل لمشطة ف لقمقومة لمفصلية ديال لغريبيل، و كاتدمج ل واحد النسيج صوفي مركّب لي كايكون فعال ب زايد ف تخبال الزغيّبات ديال لبخوشات. لعنكبوتات لبكرانيين كانو عندهم لغريبلات، لي نتجو أول حرير قادر على قبيط لبخوش، قبل ما يطورو لعنكبوتات لحرير لمغلف ب لقطيرات لمعلكين. غير هو، لغالبية نتاع لݣروپات لعصريين ديال لعنكبوتات ترزى ليهم لغريبيل.

حتى النواع لي ماكايبنيوش الشباكي على قبل شدان لفرايس كايخدّمو لحرير ب شكال معددين: ب صيفتو ملاية على قبل لماني و على ود لبيض لمخصب؛ ب صيفتو "حبل السلامة"؛ على وديت لبني د لعش؛ و ب صيفتو "پاراشوت" من الصغار د شي نواع.

لمكاترة و دورة لحياة

لعنكبوتات كايتكاترو ب شكل جنسي و التخصاب عندهم دخلاني و لكن ماشي نيشان، ب معنى خر لماني ماكايتخشاش ف كسدة النتوا من لاعضاء الجنسيين ديال الدكر بلحق من واحد لمرحالة وسيطة. عكس شلا مفصليات د الرجلين لي كايعيشو ف لوطا، دكور لعنكبوت ماكاينتجوش حمّالات منويين (spermatophores؛ باكيات د لماني) أصلاّ واجدين، و لايني كايدوّرو شبكات صغار مخصوصين على ود لماني لي كايرميوه فيهم و من بعد كايدوّزو لماني ل واحد لقلدات سپيسيال على شكل برا، لي سميتهم لبصيلات اللمسيين (palpal bulbs) ولا لأعضاء اللمسيين، لي كاينين ف لقمقومات ديال اللماسات الرجليين ديال الدكور الناضجين. منين شي دكر كايضبط يمارات على شي نتوا قريبة كايبدا يقلّب واش هي من نفس النوع و واش هي واجدة ل لملاقية؛ متلاً عند النواع لي كاينتجو الشباكي ولا "حبال السلامة"، الدكر يقدر يعرف النوع و الجنس ديال هاد الشباكي ب "الشمان".

لعنكبوتات ف لعادة كايخدّمو طقوس معقدين ديال لمغازلة باش يتجنبو النتوات لكبار ف لقد ماياكلوش الدكور الصغار قبل من التخصاب، من غير يلا كان الدكر صغر ب زايد ل درجة كايولي مايسواش لماكلة. ف النواع لحباكا د الشبكة، النماط الدقيقين ديال لڤيبراسيوات ف الشبكة كايكونو مهمين عند شلا عنكبوتات لي كايصيّدو ب شكل أكتيڤ، و يقدرو "ينوّمو" النتوا. لفعايل لكسديين و الشطحات من الدكر كايكونو مهمين عند لعنكبوتات النقازات، لي عندهم نضر معتابر. يلا لمغازلة فلحات، الدكر كايحݣن لماني ديالو من لبصيلات اللمسيين ف النتوا على طريق فتحة ولا جوج فتحات ف الجنب التحتاني ديال كرشها.

مجاري لمكاترة ديال نتوات لعنكبوت كايكونو مرتبين على جوج شكال. الترتاب السلفي ("هاپلوجين" haplogyne؛ أعضاء بساط د لمكاترة ولا "مامعقدينش" non-entelegyne) كايتكونو من واحد لفتحة وحدة د عضو لمناسلة، لي كاتودّي ل جوج مخازن منويين (جوايات منويين؛ spermathecae) فين كايخزنو النتوات لماني. ف الترتاب لي محسن كتر (لمعقد؛ entelegyne)، كاينين جوج فتحات كايودّيو نيشان ل الجوايات لمنويين، هادشي لي كايصاوب واحد السيستيم د "تدفاق مكمل" ف عاوض السيستيم د "الداخل اللول لخارج اللول". لبيضة ب صيفة عامة كايتخصّب غير ف وقيت حطان لبيض (oviposition) فين لماني لمخزون كايتسرح من لبيت لي فيه، ف عاوض التجواف لبويضي. موجودين شي ستيتناءات قلال، كيف ما Parasteatoda tepidariorum. عند هاد النوع كاتبان النتوا قادرة باش تأكتيڤي لماني الراݣد قبل حطان لبيض، هادشي لي كايخلّيه يسافر ل التجواف لبويضي فين كايوقع التخصاب. لإيكزومپل لي بوحدو معروف ب التخصاب الديريكت بين الدكر و النتوا هي لعنكبوتة السادية (Harpactea sadistica)، لي طورات التلقاح ب الجروح (traumatic insemination). عند هاد النوع الدكر كايتقب لحيط لكسدي د النتوا ب اللماسات الرجليين دياولو و كايحݣن لماني ديالو نيشان ف لمبايض، ف لوقيتة لي لأجينة وسط لبيض لمخصب كايبداو يديڤلوپاو قبل مايتحطو.

الدكور من ݣنس تيدارينيات (Tidarren) كايقطعو لماسة قبل ماينضجو و يدخلو ل مرحالة لبلوغ و كايبقاو غير ب وحدة صافي. اللماسات كايشكلو 20٪ من لكتلة لكسدية د الدكر ف هاد النوع، و التزوال د اللماسة كايزيد ف التحراك. عند النوع ليمني Tidarren argo، اللماسة الشايطة كاتنترها النتوا. اللماسة لمفصولة كاتبقى لاصقة ف لعضو التناسلي لبراني (epigynum) د النتوا شي ريعة د السوايع و كايبان بلي كايبقى يخدم ب شكل مستاقل. ف هاد لوقيتة، النتوا كاتاكل الدكور لي بلا لماسات. ف كتر من 60٪ من لحالات، النتوا ديال لعنكبوتة حمرة الضهر لؤصطرالية كاتقتل و كاتاكل الدكر من مور ماكايخشي اللماسة الجاوجة ديالتو ف لفتحة التناسلية د النتوا؛ ف لحقيقة، الدكور كايرصّيو ريوسهم ف النياب د النتوا. لمراقبات وراو بلي جل الدكور د لعنكبوتة حمرة الضهر عمرهم ماكايلقاو لفرصة باش يتلاقاو، و لفراد "لمزهارين" كايزيدو ف لعدد لمحتامل د التفريخة ب الضمان بلي النتوا كاتاكل مزيان. غير هو، الدكور د لغالبية د النواع كاينجاو غير شوية د لملاقيات، و هادشي كايحدو ف الساس تيساع عمرهم الصغير. شي وحدين كايعيشو مدة ف الشباكي ديال النتوات.

التنوات كايحطو حتى ل 3,000 بيضة ف كيس واحد د لبيض ولا كتر، لي كايحافضو ل شي درجة فلانية على نيڤو مستاقر د ليميديتي. عند شي نواع، النتوات كايموتو بعد ما كايحطو لبيض، و لكن النتوات د نواع خرين كايحاميو على لكياس ب تلصاقهم ف شباكيهم، التخبية ديالتهم ف لعشاش، هزانهم ف اللقاطات لݣرنيين ولا تلصاقهم ف لمغازل و جرّانهم.

لعنكبوتات الطفال كايدوّزو ݣاع لمرحالات اللارڤيين (larval) وسط لكيس د لبيض و كايخرجو منو ب صيفتهم عنيكيبات (spiderlings)، لي كايكون صغار بزاف ف لقد و ماناضجينش جنسياً بلحق كايشبهو ف الشكل ل لبالغين. شي عنكبوتات كايتهلاو ف صغارهم، متلاً، الصغار د شي عنكبوتة ديبية كايشدّو ف الزغيّبات لحرشين لي على ضهر لم، و النتوات د شي نواع كايستاجبو ل السلوك ديال "لمزاوݣة" د صغارهم ب عطيانهم لفريسة ديالتهم، يلا مايبقاتش كاتفركل، ولا حتى الترجاع د لماكلة (regurgitation). ف واحد لحالة ستيتنائية، النتوات ديال لعنكبوتة النقازة، عنكبوتة النبال لكبيرة (Toxeus magnus) كاينتجو واحد لمادة مقوّتة بحال لحليب على قبل صغارهم، و كايبقاو يوكلوهم حتى كايوليو بالغين جنسياً.

بحال مفصليات الرجلين لخرين، لعنكبوتات ملزوم عليهم ينسالخو باش يكبرو مادام جليّداتهم (جلداتهم) مايمكن ليهم يتجبّدو. عند شي نواع الدكور كايتلاقاو معا النتوات لي عاد نسالخو، لاحقاش كايكونو ضعاف ب زايد على يكونو خطيرات على الدكور. لغالبية د لعنكبوتات كايعيشو غير عام ولا عاماين، وخا شي رتيلات (tarantulas) يقدرو يعيشو كتر من 20 عام ف لحبس، و واحد لعنكبوتة د السدة أوسطرالية (trapdoor spider) نتوا توتقات بلي عاشت 43 عام ف لبرية، و ماتت ب واحد لهجمة د رزوزية پارازيطية.

لقد

لعنكبوتات عندهم نطاق واسع ديال لقدود. النوع الصغر ݣاع، پاتو ديݣوا (Patu digua) من كولومبيا، قل من 0.37 مم ف عبار لكسدة. لعنكبوتات لكبر و التقل ݣاع كايكونو عند الرتيلات، لي يقدرو يكونو عندهم طولات د لكسدة كايوصلو حتى ل 90 مم و تيساع د الرجلين كايوصل حتى ل 250 مم.

التلوينة

غير تلاتة د لكلاصات د الصبغيات اللونيين (أوموكرومات، بيلينات، و لݣوانين) تعرفو عند لعنكبوتات، وخا صبغيات خرين تضبطو و لايني باقيين ماتخصلو. لميلانين، شباه لخيزوينات (carotenoids)، و لپطيرينات، لي شايعين عند لحيوانات لخرين، كايكونو غايبين كيف ما كايبان. عند شي نواع، الجليّدة لبرانية (exocuticle) د لكراوع و د لكسدة لقبلية كايتموديفياو ب واحد لعملية د الدباغة، لي كاتودّي ل تلوينة قهوية. لبيلينات (Bilins) كايتصابو متلاً ف النوع، صغيرة لعينين لمخضرة (Micrommata virescens) لي كايودّيو ل اللون لخضر. لݣوانين (Guanine) هو السباب ديال لعلمات لبويض عند عنكبوتة الجردة لأوروپية (Araneus diadematus). هاد الصبغي كايكون عند شلا نواع مكدس ف خلايا مختصين كايعيّطو ليهم لݣوانوسيتات (guanocytes). عند لݣنوس بحال رباعيات لفكاك (Tetragnatha)، بلقاويات لامعين (Leucauge)، شبيهات لفضة (Argyrodes) ولا وحيحشي لكسدة (Theridiosoma)، لݣوانين هو السباب على لمضهر ديالهم لفضي. وخا لݣوانين ف لأصل منتوج ختامي على ستيقلاب لپروتين، التخراج ديالو يقدر يتحبس من لعنكبوتات، هادشي لي كايودّي ل واحد الزيادة ف لمخزون ديالو. اللوان لقلديين (Structural colors) لي كايكونو عند شي نواع، لي هوما لحاصول ديال التهراس، التشتات ولا لمداخلة ديال الضو، متلاً ب لهلبات ولا لحراشف. لكسدة لقبلية لبيضة عند ݣنس فضيات لوجه سبابها الضو لمعكوس من الزغيّبات، ݣنوس لعنكبوت الديبي (Lycosa) و جوسا (Josa) ب جوج بيهم عندهم مواضع ديال جليدات معدلين لي كايخدْمو ب صيفتهم عكاسات د الضو. عنكبوتات الطاوس د أوسطراليا (ݣنس عشاقيات؛ Maratus) معروفين ب لوانهم لقلديين اللامعين عند الدكور.

وخا اللون عند شلا عنكبوتات كايكون تابت على طول حياتهم، ف شي ݣروپات، اللون يقدر يتنوّع كا ستيجابة على الضروف لبيئيين و الدخلانيين. عزيلة لفريسة تقدر تكون قادرة على تغيار اللون د لعنكبوتات. متلاً، لكرش ديال عنكبوتة مبشورة لوجه لهوايية (Theridion grallator) كاتولي ليمونية يلا لعنكبوتة قصّات شي نواع فلانيين من نصيات الجناوح (Diptera) و لبالغين من حرشفيات الجناوح (Lepidoptera)، و لايني يلا قصّات نصيات الجناوح ولا اللارڤات ديال حرشفيات الجناوح، لكرش كاتولي خضرا. التبدالات د اللون الجايين من لبيئة يقدرو يكونو مورفولوجيين (كايطراو على شلا يامات) ولا فيزيولوجيين (كايوقعو ف لبلاصة). التبدالات لمورفولوجيين كايخصهم التشكال و التكشاف (degradation). عكس هادشي، التبدالات لفيزيولوجيين كايطراو ب تبدال موضع لخلايا لي فيهم الصبغي. واحد لمتال ديال التبدالات د اللون لمورفولوجي هو لمواتية د لخلفية. عنكبوتة نوار لعقريش (Misumena vatia) متلاً تقدر تبدل لون كسدتها باش تواتى معا السورفاص لي كاتعيش فيها هادشي لي كايرد لمفتارسين صعيب يضبطوها. واحد لمتال على تبدال اللون لمورفولوجي تشاف ف عنكبوتة لقبة (Cyrtophora cicatrosa)، لي يمكن ليها تبدل لون كسدتها من لبيض ل لقهوي فيساع.

لإيكولوجيا و السلوك

لماكلة اللافرايسية

وخا لعنكبوتات ب شكل عام كايتعتابرو فرايسيين، لعنكبوتة النقازة باݣيرا كيپلينݣية (Bagheera kiplingi) كاتاخد كتر من 90٪ من ماكلتها من لكسدات لبلتيين (Beltian bodies)، لي هوما مواد نباتيين صليبين كايتنتجو من الطلح (acacias) كا طرف ف واحد لعلاقة تكافلية معا واحد النوع ديال النمل.

الصغار د شي عنكبوتات ف فاميلات لحباكيات (Anyphaenidae)، كورينيات (Corinnidae)، كورداويات (Thomisidae)، كلوبونيات (Clubionidae) و النقازيات (Salticidae) كاياكلو نيكطار النبات. الدراسات د اللابوراطوار وراو بلي كايديرو هادشي إيرادياً و على طول وقيتات مجبدين، و من خطرة ل خطرة كاينقيو ريوسهم و هوما كاياكلو. هاد لعنكبوتات عاوتاني كايخيّرو محلولات د السكار على لما لعادي، هادشي لي كاينعت بلي هوما كايقلّبو على التقاوت. مادام بزاف ديال لعنكبوتات كايكونو ليليين، لمادى ديال لكونصوماسيو د النيكطار من لعنكبوتات يقدر يكون مامقدّرش مزيان. النيكطار فيه لأحماض لأمينيين، الليپيدات، لڤيطامينات و لمعادن أپار من السكار، و الدراسات وراو بلي نواع لعنكبوتات لخرين كايعيشو كتر منين كايكون النيكطار موجود. لماكلة على النيكطار كاتجنبهم الريسك د التمحان معا لفريسة، و التمن د تخراج السم و لأونزيمات لهضميين.

نواع منوعين معروفين بلي كاياكلو مفصليات الرجلين لميّتين (التقمام)، الشباكي د لحرير، و السكوليط لبراوي ديالهم لي طاح. حبوب اللقاح لي وحل ف الشباكي يقدرو حتى هو يتكال، و الدراسات بيّنو بلي لعنكبوتات الصغار عندهم شونص ديال النجو حسن يلا لقاو لفرصة باش ياكلو حبوب اللقاح. ف لحبس (captivity)، نواع معددين من لعنكبوت معروفين عاوتاني بلي كاياكلو لبانان، لمارمولاد، لحليب، مح د لبيض، و لمرݣاز (سوصيط). لبويغات لڤݣيعيين (fungal spores) لمهزوزين ف لهوا لي وحلو ف الشبكة ديال لعنكبوتات مداريين لحبكة يقدرو يتقصّاو معا الشبكة لقديمة قبل لمصايبة د شي شبكة جديدة. لؤنزيم كيتيناز (chitinase) لي حاضر ف السايل لهضمي ديالهم كايسمح ب لهضيم د هاد لبويغات

لعنكبوتات تقشعو كايكونصوميو لمواد النباتيين د تنويعة كبيرة من الطاكسونات و النواع. عكس هادشي، لعنكبوتات الجرّايات (cursorial) كايشملو لاغلابية الساحقة ديال لوقايع لمعلومين ديال ماكلة النبات.

قبيط لفرايس

لميطود لمعروفة ݣاع د قبيط لفريسة هي لي كاتكون على طريق الشباكي لمعلكين. لبلاصاج لمنوع ديال الشبكات كايخلّي نواع مبدلين د لعنكبوت باش يوحّلو بخوشات مبدلين ف نفس لموضع، متلاً، الشباكي لأفقيين لفطحين كايوحّلو لبخوش الطاير ل لفوق من النبتات لي لتحت أما الشباكي لعموديين لفطحين كايوحّلو لبخوشات لي طايرين ب شكل أفقي. لعنكبوتات لبنايا د الشباكي عندهم شوف ضعيف، و لايني كايكونو حساسين ب زايد ل لڤيبراسيو.

عنكبوتة لما (Argyroneta aquatica) كاتبني شباكي بحال شي "سرسار غاطس" (diving bell) تحت لما لي كايعمروهم ب لهوا و كايخدّموهم ف هضيم لفريسة و النسيلاخ. لملاقية و تربية التفريخة كايطراو ف السرسار د النتوا. هومايا على بونت كايعيشو ب شكل كامل وسط السراسر، و كايتزاوطو ب لخف باش يشدّو لفرايس لي كايمسو السرسار ولا لخيوط لي كايرصّيوه. شي عنكبوتات قلال كايخدّمو السورفاصات د الضايات و لݣلاتي ب صيفتهم "شباكي"، لي كايضبطو لبخوش لواحل ب لڤيبراسوات لي كايديروهم هاد لبخوشات منين كايكونو كايفركلو و هوما واحلين.

لعنكبوتات الطرّاحا د الشبكة (Net-casting) كايحبكو غير شبكات صغار، و كايتلاعبو بيهم باش يوحّلو لفرايس. هادوك لي من ݣنس مشقلبات التعليقة (Hyptiotes) و فاميلة وحيحشيات لكسدة (Theridiosomatidae) كايجبّدو شباكيهم و من بعد كايطلقوهم منين لفريسة كاقيصهم، و لكن ماكايحركوهمش ب شكل أكتيڤ. هادوك لي ف فاميلة خلاعيات السيفة (Deinopidae) كايحبكو شباكي صغر ݣاع، كاقبطوهم و هوما مجبّدين بينات لفردات الجوج اللولين د كراوعهم، و من موراها كايزاوطو و كايفيّرو شباكيهم حتى ل جوج مرّات من طولة كسدتهم باش يشدّو لفريسة، و هاد لحركة تقدر تزيد مساحة الشبكة ب عامل يقدر يوصل حتى ل عشرة. التجارب وراو بلي عنكبوتة خلاعة السيفة لمشوكة (Deinopis spinosus) عندها جوج تقنيات مبدلين على ود توحال لفريسة: الضربات اللورانيين باش يقبطو لبخوشات الطايرين، لي لڤيبراسيوات دياولهم كايضبطوهم؛ و الضربات لقداميين باش يشدو لفرايس لممشيين ف لوطا لي كايشوفوهم. هاد الجوج تقنيات تقشعو عاوتاني ف خلاعات السيفة خرين. لبخوش لممشي كايشكل جل لفرايس ديال لغالبية د خلاعات السيفة، بلحق واحد النسمة ديال خلاعة السيفة لحمرانية (Deinopis subrufa) كاتبان بلي كاتعيش ف الساس على الدبان من فاميلة عنكبوتيات لما (tipulid؛ ماشي عنكبوتات) لي كايشدوهم ب الضربات اللورانيين دياولهم.

النتوات لبالغات د عنكبوتات لبولاس من ݣنس حمالات لبزولة (Mastophora) كايبنيو "شبكات" لي مشكلين من غير "خيط مدلي" واحد، لي كايدوزو منو. هوما عاوتاني كايبنيو واحد لبولاس (bolas؛ جوج كورات) مصاوبين من خيط واحد، و ف قمقومتو واحد لكورة كبيرة كاتكون من واحد لحرير معلك و فازݣ ب زايد. كايطلقو مواد كيماويين لي كايشبهو لفيرومونات د لفرطاطوات (moths). وخا كايضيّعو جوايه 50٪ د الضربات، هوما كايقبطو نفس لكمية د لبخوش ف الليلة ب لمقارنة معا لعنكبوتات مداريين لحبكة من نفس لقد. لعنكبوتات كاياكلو هاد لكواري يلا ما دارو حتى قتلة ف جوايه 30 دقيقة، من بعدها كايرتاحو شي وقيّت، من موراها كايصايبو كواري جداد. الدكور الصغار و لبالغين كايكونو صغر ب زايد و ماكايصايبوش لكواري. ف عاوض هادشي هوما كايطلقو فيرومونات مبدلين لي كايجدبو دبانات لفرطاطو (moth flies) و كايشدوهم ب لفردات لقداميين د كراوعهم.

ناقصات الشبكة لبدائيين، "عنكبوتات لبيبان لفخيين" من فاميلة مشاطيات (Ctenizidae) و بزاف د الرتيلات كايكونو مفتارسين د لغفلة لي كايتليّدو ف لوكورا، دايما كايكونو سادين على ريوسهم وسط بيبان فخيين (trapdoors) و مدورين بيهم شباكي من لخيوط د لحرير لي كايعلموهم ب لحضور د شي فريسة. مفتارسين خرين د لغفلة كايديرو هادشي بلا عوين، بحال شلا عنكبوتات عقريشيين، و شي نواع لي كايفرسو النحل، و لي كايشوفو الشعا لفوق بنفساجي، و لي يمكن ليهم يريݣلو لعكيس لفوق بنفساجي ديالهم باش يتواتى معا النوّار لي مليّدين فيه، لعنكبوتات لحواتات و شي عنكبوتات عقريشيين كايقبطو لفريسة ب تبيعها، و كايعولو ف الساس على الشوف ف تقلاع لفرايس.

شي عنكبوتات نقازات من ݣنس پورسيا (Portia) كايصيّدو عنكبوتات خرين ب طرقان لي كايبانو دكيين، كايسبقو لڤيكتيمات دياولهم ولا كايغويوهم من شباكيهم. الدراسات د اللابوراطوار وراو بلي الطاكتيكات لغرايزيين د پورسيا هومايا غير نقاط د لبدية على قبل واحد لمقاربة د التجربة و لغلطة لي منها هاد لعنكبوتات كايتعلمو ب الزربة كيفاش يتفوقو على نواع لفرايس الجداد. غير هو، كايبانو بلي هوما كايفكرو "تقيل" نسبياً، و هادشي ماشي مفاجئ، مادام مخاخهم كايكونو صغر ب شكل كبير على هادوك ديال لمفتارسين لبزوليين.

لعنكبوتات لي كايميميكيو النمل عندهم تحديات معددين: هومايا ب شكل عام كايديڤلوپيو كروش مسلوتين و "خصور" مزوّرين ف الصدر الراسي باش يميمكيو (يقلدو) لمواضع التلاتة لمفرّزين (الطاݣمات) د لكسدة د شي نملة؛ كايطيّشو لفردة اللولانية د لكراوع قدّام ريوسهم باش يميميكيو لانطيرات، لي ماعندش لعنكبوتات، و باش يسترو لحقيقة بلي هوما عندهم تمنيا د لكراوع ف عاوض ستة؛ كايديڤلوپيو طبايع ملونين كبار دايرين ب فردة وحدة د لعينين باش يخبّيو لحقيقة بلي هوما عندهم ب شكل عام تمنيا د لعينين لبسيطين، أما النمل عندهم غير جوج عينين مركبين؛ كايغطيو كساديهم ب الزغيّبات لعكّاسات باش يشبهو لكسدات اللامعين د النمل. عند شي نواع من لعنكبوت، الدكور و النتوات من نفس النوع كايميميكيو نواع مبدلين د النمل، حيت نتوات لعنكبوت كايكونو عادةً كبر بزاف على الدكور. لعنكبوتات لي كايميميكيو النمل عاوتاني كايموديفيو سلوكهم باش يشبه ل السلوك د النواع لمستهدفين د النمل؛ متلاً، شلا عنكبوتات كايتبناو واحد النمط زيݣ زاݣ د لحركة، لعنكبوتات النقازات لي كايميميكيو النمل كايتجنبو التنقاز، و لعنكبوتات د ݣنس سينيموسينا (Synemosyna) كايتمشاو على لقنات لبرانيين د لوراق ب نفس الشكل لي كايمشاو عليه النمل من ݣنس النمل لمزوّر (Pseudomyrmex). لميميك د النمل عند شلا عنكبوتات و مفصليات الرجلين خرين يقدر يكون على قبل لحماية من لمفتارسين لي كايصيّدو على طريق الشوف، بحال الطيور، الزرموميات و لعنكبوتات. غير هو، بزاف ديال لعنكبوتات لي كايميميكيو النمل كايفرسو يا إما النمل ولا "لكسيية" د النمل، كيف ما لمن (aphids). منين كايكونو مريّحين، لعنكبوتات لعقريشيين لي كايميميكيو النمل من ݣنس آميسياي (Amyciaea) ماكايشبهوش ب شكل قريب ل النمل من ݣنس مورقات لمرݣد (Oecophylla)، بلحق منين كايكون ف وقيت الصيادة كايبدا يقلّد السلوك د شي نملة كاتموت باش يجدب النمل لخدّام. من مور لقتلة، شي عنكبوتات كايميميكيو النمل كايقبطو لڤيكتيمات دياولهم بيناتهم و بينات ݣروپات كبار د النمل باش يتجنبو مايتهجمش عليهم.

الدفاع

كاين واحد الدليل مجهد بلي التلوينة د لعنكبوت هي كاموفلاج لي كايعاونهم باش يتجنبو لمفتارسين الساسيين دياولهم، لي هوما الطيور و الرزوزيات لپارازيطيين، لي ب جوج بيهم عندهم شوف مزيان د اللوان. شلا نواع د لعنكبوتات كايكونو ملونين باش يتدمجو معا لخلفيات دياولهم لكتر ف الشيعان، و شي وحدين عندهم تلوينة مشتتة (disruptive coloration)، شراطي و جلاخي لي كايهرّسو لقنات دياولهم. عند شي نواع قلال، كيف ما لعنكبوتة لهاوايية فرحانة لوجه (Theridion grallator)، شيمات معددين ديال التلوينة كايكونو حاضرين ب واحد لموعدال لي كايبان بلي كايبقى تابت، و هادشي يقدر يصعّب كتر على لمفتارسين لمعرفة د النوع. جل لعنكبوتات ݣاعما خطيرين ب شكل لكافي ولا مداقهم خايب ب الشكل لكافي باش تنفعهم التلوينة التحديرية. غير هو، شي نواع قلال ب سم مجهد، فكاك كبار ولا زغيّبات مهيّجين عندهم طبعات ديال اللوان التحديريين، و شي وحدين كايورّيو ب شكل أكتيڤ هاد اللوان منين كايحسو ب التهديد.

شلا وحدين من فاميلة وحيحشيات مصوفين (Theraphosidae)، لي كاتجمع الرتيلات و عنكبوتات لبابون، كايكون عندهم زغب لسّاع ف كروشهم و كايخدّمو كراوعهم باش ينيّشو هاد الزغب على لهاجمين. هاد الزغيّبات كايكونو هلبات رقاق ب ساسات ضعاف و صف ديال الشويكات ف لقمقومة. الشويكات كايسببو تهياج شديد و لكن ماكاينش حتى دليل بلي كايهزو أي نوع من السم. شي وحدين كايدافعو على ريوسهم ضد الرزوزي ب الشمول د ريزوات ديال لخيوط الصليبين ب زايد ف شباكيهم، هادشي لي كايعطي ل لعنكبوتة لوقت باش تهرب ف لوقيتة لي الرزوزيات كايتمحنو معا لعراقل. عنكبوتة الرويضة الدهبية (Carparachne aureoflava) د الصحرا الناميبية كاتهرب من الرزوزيات لپارازيطيين ب الدوران على جنابها و التشقليب على لكتبان د الرملة. شي نواع قلال من لعنكبوتات لي كايبنيو الشباكي كايعيشو معا بعضياتهم ف مستعمارات كبار و كايوريو السلوك الجتيماعي، وخا ماكايكونش معقد كيف ما عند لبخوش الجتيماعي. لعنكبوتات من نوع أنيلوسيموس إيكسيموس (Anelosimus eximius؛ فاميلة وحيحشيات Theridiidae) يقدرو يشكلو مستعمارات يقدرو يوصلو حتى ل 50,000 فرد. ݣنس عديمات لݣلتة (Anelosimus) عندو واحد لميلان مجهد ل الجتيماعية: ݣاع النواع لأمريكيين كايكونو جتيماعيين، و النواع ف ماداغشقار كايكونو علاقل ب شي شكل جتيماعيين. لأعضاء د شي نواع خرين ف نفس لفاميلة بلحق من ݣنوس مبدلين ديڤلوپاو ب شكل مستاقل السلوك الجتيماعي. متلاً، وخا عنكبوتة ثيريديون نيݣروأنولاتوم (Theridion nigroannulatum) كاتنتامي ل واحد لݣنس ما فيهش النواع الجتيماعيين، ث.نيݣروأنولاتوم كاتبني مستعمارات لي يقدرو يكونو فيهم لأولوفات د لأفراد لي كايتعاونو ف قبيط لفريسة و كايشركو لماكلة. عنكبوتات خرين كايجمّعو كايشملو نواع من ݣنس عشاقات الشقا (Philoponella، فاميلة قتالات لقبطة Uloboridae)، أجيلينا كونسوسياطا (فاميلة لفرݣيات Agelenidae) و مالوس ݣريݣاليس (فاميلة الشباكيات Dictynidae). لعنكبوتات الجتيماعيين لفرايسيين كايخصهم يدافعو على فرايسهم من لكليپطوپارازيطات ("الشفارا")، و لمستعمارات لي كبر كايكونو فالحين ف هادشي. لعنكبوتة لعشاشبية باݣيرا كيپلينݣي (Bagheera kiplingi) كاتعيش ف مستعمارات صغار لي كايعاونو ف حماية لبيض و لعنيكبات. حتى عنكبوتات لهجّالة (ݣنس سرّاقيات لعضة Latrodectus)، لي معروفين ب صيفتهم كانيبالات، شكلو مستعمارات صغار ف لحبس (captivity)، كايشركو الشباكي و كاياكلو معا بعضياتهم.

ف التجارب، نواع لعنكبوت بحال عنكبوتة لمجر، لهجالة لكحلة لغربية و لعنكبوتة لمشردة كايبعّدو على مستعمارات النملة لحمرا الشايعة. هاد النمل كايكون مفتارس و لفيرومونات لي كايطلقو على قبل التواصل عندهم واحد التأتير رادع على هاد النواع د لعنكبوت.

نواع الشبكات

ماكايناش شي علاقة منتاضمة بينات لكلاصاج د لعنكبوتات و النواع د الشباكي لي كايبنيوهم: نواع من نفس لݣنس يقدرو يبنيو شباكي كايتشابهو بزاف ولا مبدلين بزاف. و ماكاينش واحد التوافق بينات كلاصاج لعنكبوتات و التركيب لكيماوي ديال حريرهم. التطور لمقارب ف لبني د الشبكة، ب معنى خر التخدام ديال تقنيات مشابهين من نواع مرتابطين ب شكل بعيد، كايكون ب ب كترة. ديزاينات الشباكي لمداريين و السلوكات د التدوار لي كاينتجوهم، مفهومين مزيان. التسلسيل الساسي الشعاوي (radial) عاد اللولبي (spiral) لواضح ف الشباكي لمداريين و لحسان ب التيجاه لي كايكون مشروط منو على قبل لبني د الشباكي يقدرو يكونو موروتين من الجدود لمشروكين ديال جل لݣروپات د لعنكبوتات. غير هو، لاغلابية د لعنكبوتات كايبنيو شباكي لامداريين. كان كايتشاف بلي الشبكة لمدارية لمعلكة واحد لإبداع تطوري كان السباب ف التنواع د لمداريات (Orbiculariae). غير هو، دابايا، كايبان بلي لعنكبوتات اللامداريين هوما واحد لݣروپ تحتاني لي تطور من لعنكبوتات مداريين الشبكة، و لعنكبوتات اللامداريين عندهم نواع كتر ب 40٪ و كايكونو كتار ب ربعة د لخطرات على لعنكبوتات مداريين الشبكة. النجاح لكبر ݣاع ديالهم يقدر يكون ب سباب الرزوزي من فاميلة الرزوزيات (sphecidae)، لي كايكونو ديما لمفتارسين الشايعين د لعنكبوتات، لي كايخيّرو يهجمو على لعنكبوتات لي عندهم شباكي فطحين.

الشبكة لمدارية

جوايه النص د لفرايس لمحتاملين لي كايمسو الشباكي لمداريين كايهربو. الشبكة كايخصها تدير تلاتة د الشغالات: التلقية ل لفريسة (مقاطعة)، مصان الزخم بلا تكسار (التوقاف)، و توحال لفريسة ب لهريف عليها ولا تلصاقها فيها (لحتيجاز). حتى شي ديزاين ماكايكونو هو لحسن عند ݣاع لفرايس. متلاً، لمباعدة لي عرض د خطوط الشبكة كاتزيد لمساحة د الشبكة و ب التالي لقدرة على التعراض ل لفريسة، و لايني كاتنقص من الجهد ديالها على التوقاف و لحتيجاز؛ لمباعدة لي قرب، لقطيرات لمعلكين لي كبر و خطوط الشبكة لي غلض كايحسنو ف لحتيجاز، و لايني كايخلّيو سهل على لفرايس لمحتاملين يقشعوهم و يتجنبو الشبكة، علاقل وقيت النهار. غير هو، ماكاين حتى شي تبدالات منتاضمين بينات الشباكي لمداريين لي تبناو على قبل تخدامهم ف النهار و هادوك لي تبناو على ود التخدام ف الليل. ف لحقيقة، ماكاين حتى شي علاقة بسيطة بينات خصايل ديزاين الشبكة لمدارية و لفرايس لي كايشدوهم، لاحقاش كل نوع مداري لحبكة كاياخد ساس عريض د لفرايس.

لمحور ديال الشبكات لمداريين، فين كايتليدو لعنكبوتات، كايكونو عادةً فوق من السونطر، حيت لعنكبوتات يمكن ليهم يتحركو ل لتحت زرب من لفوق. يلا كانت شي جيهة باينة فين تقدر لعنكبوتة ترجع ليها باش تجنب لمفتارسين دياولها، لمحور كايكون ف لعادة مايل ل جيهة هاد الجيهة.

الشبكات لمداريين لأفقيين كايكونو شايعين ل شي حد، وخا كاتكون عندهم مفعولية قل ف تعراض و حتيجاز لفريسة و كايكونو محسوسين كتر ل لهليك من الشتا و لحطام الطايح. بزاف ديال لباحتين قتارحو بلي الشبكات لأفقيين كايمدو مزيّات تعويضيين، بحال محسوسية قل ضد لهليك د الريح؛ وضوح قل ل لفرايس الطايرين ل لفوق، ب سباب الضو اللوراني الجاي من السما؛ لقدرة على التزعليل على قبل شدان لبخوشات الطايرين تقال ب شكل أفقي. غير هو، ماكاينش حتى شي تفسير على قبل التخدام الشايع ديال الشبكات لمداريين لأفقيين.

لعنكبوتات دايماً كايلصّقو فشباكيهم بانضات د لحرير واضحين ب زايد، كايتسماو ديكورات ولا رصايات (stabilimenta)، لبحت لميداني كايقتارح بلي الشباكي ب بانضات ديكوريين كتر كايقبطو فرايس كتر ف الساعة. وخا هاكداك، واحد الدراسة د اللابوراطوار ورات بلي لعنكبوتات كايقللو ف لبني د هاد الديكورات يلا حسو ب لحضور د لمفتارسين.

كاينين شلا تنويعات مامولفش بيهم ديال الشبكات لمداريين، بزاف منهم تطورو ب شكل مقارب، بحال: اللصيق د لخطوط مع السورفاص د لما، يمكن على ود قبيط لبخوش وسط السورفاص ولا فوق منها؛ الشبكات لي فيهم لعواد ف لمراكز نتاوعهم، يكمن كايكونو على ود تخبية لعنكبوتات من لمفتارسين؛ الشباكي لي بحال "السلوم" كايبانو بلي هوما لفعالين كتر ف قبيط لفرطاطوات. غير هو، لاهمية ديال شلا تنويعات مازال مامعروفاش. النوع مداري لحبكة، عنكبوتة السيكطور فضية الجنب (Zygiella x-notata)، متلاً، لخصلة ديالتها لمعروفة هي واحد الشبكة مدارية ناقصها سيكطور. السيكطور الناقص فيه واحد لخيط سينيال كايتخدّم على قبل ضبيط ڤيبراسيوات لفرايس ف الشبكة د النتوا.

ف عام 1973، داو ف الرحلة لفضائية سكايلاب 3 (Skylab 3) جوج عنكبوتات مداريين الشبكة على قبل باش يطيسطيو لقدرات دياولهم نتاع غزيل الشبكة ف زيرو جادبية. ف لبدو، لعنكبوتات ب جوج بيهم نتجو شبكات مخربقين، و لكن من بعد تأضاپطاو دغيا.

الشباكي لمشعككين

أعضاء فاميلة لوحيحشيات كايحبكو شباكي مامنتاضمينش، مشعككين و تلاتيين لأبعاد، معروفين ب الشباكي لمشعككين (cobwebs). كايبان بلي واحد لميلان تطوري جيهة التقلال ف كمية تخدام لحرير لمعلّك، هادشي لي ودى ل خسرانو ف خطرة عند شي نواع. لبني د الشباكي لمشعككين كايكون قل ف النمطية على الشباكي لمداريين، و يقدر ياخد شلا يامات.

حوايج خرين

كتانيات الشبكة (Linyphiidae) ب شكل عام كايصايبو صفايح د لحرير أفقيين و لكن مامساويينش، ب شعكوكات ديال لخيوط لحابسين فوقهم. لبخوشات لي كايدخلو ف هاد لخيوط لحابسين كايطيحو ف الصفيحة ولا كاتزعزعهم لعنكبوتة باش يطيحو فيها، و كايبقاو مقبوطين ب لخيوط لمعلكين ف الصفيحة حتى كاتقدر الرتيلة تهجم من التحت.

ديزاين الشبكة ف زيرو جادبية

بزاف د التجارب تدارو على ود دراسة التأتير ديال زيرو جادبية على الديزاين د شباكي لعنكبوت. ف اللخر ديال 2020، تقارير على التجارب لي تدارو مؤخراً تنشرو و لي لمّحو بلي وخا الديزاين د الشبكة تقاص ب شكل سلبي ف الضوروف ديال زيرو جادبية، لوجود د واحد لمصدر د الضو قدر يوجّه لعنكبوتات و خلّاهم قادرين يبنيو شباكيهم ف الشكل النورمال وسط هاد الضروف.

التطور

التاريخ لفوصيلي

التاريخ لفوصيلي ديال لعنكبوتات كايتعتابر ضعيف، وخا هاكداك تقريباً 1000 نوع توصف من لفوصيلات. حيتاش كسدات لعنكبوتات كايكونو رهافين ب زايد، لغالبية لعضمى ديال لعنكبوتات لفوصيليين تصابو صاينين ف لكهرمان (amber). أقدم كهرمان معروف بلي فيه مفصليات الرجلين فوصيليين متورخ ل 130 مليون عام هادي ف لبدية د لحقبة الطاباشيرية. و من غير لمحافضة على ألأناطوميا د لعنكبوتات ب تفاصل دقيقين بزاف، شي پياسات د لكهرمان وراو عنكبوتات كايتلاقاو، كايقتلو لفرايس، كاينتجو لحرير و واقيلا كايتهلاو ف صغارهم. ف شي حالات قلالين، تصابو ف لكهرمان كياس د لبيض و شباكي صاينين، و ف شي خطرات فرايس لاصقين ف لعنكبوتات؛ أقدم شبكة فوصيلية تلقات حتى ل دابا ف عمرها 100 مليون عام. لفوصيلات د لعنكبوت لبكرانيين جاو من لاݣرشطاتات (lagerstätten؛ مخازن فوصيليين) قلال، لي هوما بلايص فين الضروف كانو لايقين ب شكل ستيتنائي ل شي حد فلاني على قبل لمحافضة على لأنسيجة الرهافين.

أقدم نوع عنكباوي أرضي معروف ب شكل حصري هو پاليوطاربوس يرامي (Palaeotarbus jerami) لي من متلتات الطربوش (trigonotarbid)، من جوايه 420 مليون عام هادي ف لحقبة السيلورية، و كان عندهم واحد الصدر راسي متلت و كرش مقسمة، و حتى تمنية د لكراوع و فردة من اللماسات الرجليين. أطيركوپوس فيمبريونݣيس (Attercopus fimbriunguis) من هادي 386 مليون عام ف لحقبة الديڤونية، كايرفد معاه أبكر بزابز معروفين د تخراج لحرير، و عليها توصف ب صيفتو عنكبوت ف وقيت لكتيشاف ديالو. غير هو، هاد لبزابز يقدرو يكونو تحطو تحت من لكرش ف عاوض لمغازل، لي هوما زوايد معدلين و لي تحراك ديالهم مهم ف لبني ديال الشبكات. و عليها ݣنوس مسموم الراس (Attercopus) و لݣنس لعنكباوي د لحقبة لپيرمية لي كايشبهلو لعنكبوت لپيرمي (Permarachne) يقدرو مايكونوش عنكبوتات د بصح، و من لمحتامل خدّمو لحرير على قبل تبطان لعشاش ولا لإنتاج د كياس لبيض ف عاوض لبني د الشباكي. أكبر عنكبوت فوصيلي معروف على حساب 2011 هو عنكبوتي الشكل (araneomorph)، لعنكبوت لمونݣولي الجوراسي (Mongolarachne jurassica)، من هادي 165 مليون عام تقريباً، تشجل ف ضاوخووݣو، مونݣوليا الدخلانية، الشينوا. طولة كسدتو على بونت 25 مم.

شلا عنكبوتات كاربونيين كانو أعضاء ف موسطات لحلمة، لي هوما ݣروپ بدائي ممتلين دابايا ب ناقصات الشبكة. النوع موسط لحلمة پاليوثيلي مونكوينسيس (Palaeothele montceauensis)، من اللخر د لحقبة لكاربونية كتر من 299 مليون عام هادي، كانو عندو خمسة د لمغازل. وخا شافت لحقبة لپيرمية هادي 299 حتى ل 251 مليون عام هادي واحد التنواع زربان ديال لبخوش الطاير، كاينين فوصيلات قلال ب زايد د لعنكبوتات من هاد لحقبة.

لݣروپات الساسيين ديال لعنكبوتات لعصريين، رتيليات الشكل و عنكبوتيات الشكل، بانو ل لخطرة اللولانية ف لحقبة الطرياسية قبل بزايد من 200 مليون عام هادي. شي رتيليات الشكل طرياسيين بانو بلي هوما أعضاء ف فاميلة ستاويات لحلمة (Hexathelidae)، لي لأعضاء ديالهم لعصريين كايشملو عنكبوتة شبكة الدواز السيدنية خايبة السمعة، و مغازلهم كايبانو بلي تأضاپطاو على قبل لبني د الشباكي لي شكلهم بحال الدواز باش يشقمو لبخوشات لي كاينقزو. عنكبوتيات الشكل واخدين لغالبية لعضمى ف نوامر لعنكبوتات لعصريين، ب لحساب د هادوك لي كايحبكو شباكي مداريين الشكل لي معروفين. لحقبة الجوراسية و الطرياسية عطاو عداد كبار ديال لعنكبوتات لفوصيليين، ب لحساب د ممتلين د شلا فاميلات عصريين.

على حساب واحد الدراسة د 2020 خدّمو فيها الساعة لموليكية معيّرة ب 27 فوصيل ديال لقاطيات لݣرون، كايبان بلي لعنكبوتات ف لغالب تعرّشو من لقاطيات لݣرون لخرين بينات 375 و 328 مليون عام هادي.

لعلاقات لبرانيين

لعنكبوتات (تنضيمة لعنكبيات؛ araneae) كايتعتابرو وحدانيين التعراش (متلاّ، شي تقسيمة مشكلة من شي جد مشروك لخراني و ݣاع لخلفة ديالتو). كاين واحد النقاش على شكون هو أقرب قريب قريب ليهم ب شكل تطوري، و كيفاش كاملين بيهم تطور من لقاطيات لݣرون السلفيين، لي كانو حيوانات بحريين. هاد لكلاضوݣرام ديال 2019 كايصوّر لعلاقات لفيلوجينيين ديال لعنكبوتات.

لعنكباويات (Arachnids) كاينقصوهم شي خصايل عند لقاطيات لݣرون لخرين، بحال لفّام منعتين ل اللور و الساسات لفكيين (gnathobases) ف الساسات د رجليهم؛ هاد لخصلات ب جوج طرف من السيستيم السلفي ديال مفصليات الرجلين. ف بلاصة هادشي، هوما عندهم فّام لي كاينعتو ل لقدّام و ل لتحت، و كلهم عندهم شي وسايط ديال تنفاس لهوا. لعنكبوتات (عنكبيات Araneae) مفرّزين على لݣروپات د لعنكباويات لخرين ب شلا خصايل، كيف ما لمغازل، و عند الدكور ب اللماسات الرجليين لي مأضاپطيين ب لخصوص على قبل تدواز لماني.

لقاطيات لݣرون	كتيفات الركابي (عنكبوتات لبحر) صدراسيات الرجلين سيفيات الزنطيط (عقريشات حدوة الخيل) †عريضات الجناوح (عݣارب لبحر) عنكباويات لارياويات (لݣراد و لحصادات الخ) رياويات عݣربيات رباعيات الرية عنكبيات (عنكبوتات) رجليات اللماسة (عقارب لمسويطة, الخ)

لعلاقات الدخلانيين

عنكبيات	موسطات لحلمة ناقصات الشبكة لورانيات لحلمة رتيليات الشكل شباه اللانوعيات طويريات عنكبوتيات الشكل تحتانيات الشلقومة شباه الشلقوميات الجنوبيين حافريات الزطمة شلقوميات جنوبيين عنكبوتيات التعراش بسيطات لمناسل كاملات لمناسل

الطاكسونوميا

لعنكبوتات مقسمين ل جوج تنضيمات تحتانيين، موسطات لحلمة (Mesothelae) و لورانيات لحلمة (Opisthothelae)، لي اللخرة فيهم فيها جوج تنضيمات سفليين (infraorder)، رتيليات الشكل (Araneomorphae) و عنكبوتيات الشكل (Araneomorphae). شي 50,356 نوع عايش ديال لعنكبوتات (لعنكبيات) تعرّفو، مرتبين ف 132 فاميلة و 4,280 ݣنس من لعولاما د لعنكبوت ف 2022.

	التنواع د لعنكبوت (النوامر تقريبيين)			لخصايل
التنضيمات التحتانيين/السفليين	لفاميلات	لݣنوس	النواع	الصفايح لمقسمين لفوق د لكرش	لعݣدات ف لكرش	لمغازل	التيجاه د ضربة النياب
موسطات لحلمة (Mesothelae)	2	8	169	آه	آه	ربعة لفردات، عند شي نواع، فردة وحدة كاتكون مدموجة تحت لوسط د لكرش	لتحت و لفوق
لورانيات لحلمة (Opisthothelae): رتيليات الشكل (Mygalomorphae)	31	368	3,327	غير ف شي فوصيلات	لا	وحدة، جوج ولا تلاتة ديال فردات تحت اللور د لكرش
لورانيات لحلمة: عنكبوتيات الشكل (Araneomorphae)	99	3,899	46,770				من الجناب ل لوسط بحال شي قرّاصة

موسطات لحلمة

لأعضاء لي بوحديتهم مازال عايشين من موسطات لحلمة لبدائيين هوما فاميلة ناقصات الشبكة (Liphistiidae)، لي كايتصابو غير ف جنوب شرق آسيا، الشينوا و الجاپون. لغالبية د ناقصات الشبكة كايبنيو مراݣد مبطنين ب لحرير ب سدّات رقاق، وخا شي نواع من ݣنس ناقص الشبكة (Liphistius) كايبنيو نبوبات د لحرير مكاموفليين ب سدّات (trapdoors) حتياطيين ب صيفتهم مخرج د لورجونص. لأعضاء من ݣنس ناقص الشبكة كايدوّر لحرير "خيوط معكلين tripwires" برا لوكورا ديالهم باش يعاونوهم ف ضبيط لفرايس لمقربين، أما هادوك من ݣنس ستاوي لحلمة (Heptathela) ماكايديروش هادشي، و كايعولو على لمستشعرات لڤيبراسيو لي عندهم ف كساديهم. لعنكبوتات من ݣنس ستاوي لحلمة ماعندهمش غدد السم، وخا پريزات د غدد السم ف قمقومة نيابهم.

لفاميلات لمنقارضين لمفصليات الديبيين (Arthrolycosidae)، لي كايتصابو ف الصخور ديال لحقبة لكاربونية و لپيرمية، و لمفصليات الرتيليين (Arthromygalidae)، لي حتى ل دابا كايتلقاو غير ف الصخور د لحقبة لكاربونية، تكلاصاو كا أعضاء من موسطات لحلمة.

رتيليات الشكل

رتيليات الشكل، لي بانو ل لخطرة اللولانية ف لفترة الطرياسية، كايكونو ب شكل عام قلدتهم عامرة و "مزغبين"، ب لقاطات ݣرنيين و نياب كبار، و صليبين (ب شكل تقني، لعنكبوتات ماعندهمش زغب د بصح، بلحق هلبات). إيكزومپلات معروفين مزيان كايشملو الرتيلات (tarantulas)، عنكبوتات السدة لمشطيين و لعنكبوتات نبوبيين الشبكة لأوسطراليين. لغالبية فيهم كايقيّلو جل وقتهم ف لوكورا دياولهم، و شي وحدين كايدلّيو لحرير كيف لفخاخ برا لوكر، و لكن غير شي وحدين قلال لي كايبنيو الشباكي على قبل شدان لفرايس. غير هو، رتيليات الشكل مايمكنش ليهم ينتجو لحرير نݣاصي الشكل (piriform) لي كايخدّموه عكبوتيات الشكل كا لصاق فيساع باش يلصّقو لحرير عل السورفاصات ولا على لخيوط د لحرير لخرين، و هادشي كايرد لبني د الشبكة صعيب كتر عند رتيليات الشكل. مادام رتيليات الشكل نادراً فاش كايتنقلو بحال "لمنطاد" ب تخدام كوران لهوا، النسمات دياولهم دايماً كايصاوبو جماعات. زيد على مفصليات الرجلين، شي رتيليات الشكل معروفين كايفرسو الجران، لبزوليات الصغار، الزرموميات، لحيّات، لغلال، و الطيور الصغار.

عنكبوتيات الشكل

من غير لحقيقة بلي هوما كايشكلو كتر من 90٪ د نواع لعنكبوت، عنكبوتيات الشكل (Araneomorphae)، لي عاوتاني معروفين ب "لعنكبوتات لحقيقيين"، لي كايشملو لعنكبوتات مداريين لحبكة، لعنكبوتات الديبيين الجرّايا، و لعنكبوتات النقازات، و زيد حتى لعنكبوتة لي بوحدها معروفة عشاشبيا، باݣيرا كيپلينݣي. هوما مفرّزين ب لمليك د نياب لي مقابلين معا بعضياتهم و كايتقاطعو ب واحد لفعلة د لقريص، عكس رتيليات الشكل، لي عندهم نياب لي على بونت و يكونو غاديين ب شكل موازي.

لمفاعلة معا بنادم

التغطية لميدياوية و الشوفات لغالطين

لمعلومات على لعنكبوتات ف لميديا ديما كايكونو مركّزين على شحال هوما خطر و مامحمولينش. بينات لمقالات د الجورنالات أونلاين على لعضّات لملاقيات بين لعنكبوت و بنادم لي تنشرو من 2010 ل 2020، واحد الدراسة لقات بلي 47٪ د لمقالات كانو فيهم غلطات و 43٪ كانو بوحاطيين.

لعضات

وخا لعنكبوتات كايخافو منهم ب شكل عريض، غير شوية ديال النواع لي كايكونو خطيرين على الناس. لعنكبوت كايعضو بنادم غير منين كايكونو كايحاميو على ريوسهم، و غير شوية لي كاينتجو تأتيرات خيْب على عضة د شي ناموسيات ولا قرصة د شي نحلة. لغالبية د هادوك ب عضة خطيرة ب شكل طبي كيف ما لعنكبوتات لوحدانيين (ݣنس عوج لكراوع؛ Loxosceles) و لعنكبوتات لهجالات (ݣنس بانضي لعضة)، كايخيّرو يهربو و كايعضو غير منين كايكونو واحلين، وخا هادشي يقدر يطرا ب كسيدة. الطاكتيكات الدفاعيين د عنكبوتات شبكة الدواز لأسطراليين (فاميلة لفاخريات Atracida) كايشملو تورية د النياب. سمهم، وخا نادراً فاش كايتحݣن ب زايد، فايت سبب ف 13 لموتة بنادمية على ف 50 عام. هاد لعنكبوتات طلقو عليهم أخطر لعنكبوتات ف الدنيا لا ف جيهة الطبية ولا ف السميّة د سمهم، وخا هاد لدّيعا تطلق عاوتاني على لعنكبوتة لبرازيلية الجوالة (ݣنس لقتالة Phoneutria).

شي 100 موتة ب سباب عضات لعنكبوت تريپورطاو ب شكل موتوق ف لقرن 20، ب لمقارنة معا جوايه 1,500 موتة من لقرصات د قنديل لبحر. شلا حلات مزعومين د عضات لعنكبوت يقدرو يمتّلو تشخيصات ماصحاحش. هادشي لي غايصعّب كتر التقلاب على لمفعولية د الدوايات على قبل لعضات د بصح. واحد الريڤيو تنشر ف 2016 تّافق معا هاد الستينتاج، و ورى بلي 78٪ من 134 دراسة طبية منشورة على لعضات لمفتارضين د لعنكبوت ماكانش فيهم لمعايير الضروريين على واش لعضة بصح د شي عنكبوت. ف لحالة د جوج ݣنوس لي ب أزيد عدد د لعضات لمعلومين، عوج لكراوع و بانضي لعضة، عضات لعنكبوت ݣاعما تحقق فيهم ف كتر من 90٪ د التقارير. و حتى ف لوقيتة لي تحققو فيهم، التفاصل د الدوا و التأتيرات كانو ناقصين.

لحرير

حيت لحرير د لعنكبوتة كايكون خفيف و قوي ب زايد، تدارو تجارب باش ينتجوه ف حليب لماعز و ف وراق النبات، على طريق لهنداسة الجينية.

فوبيا د لعنكبوت

فوبيا د لعنكبوت هي واحد لفوبيا محددة–معنيتها واحد لخوف ماشي عادي من لعنكبوتات، كيف ما الشباكي ولا الشكال لي كايديو ل لعنكبوت. هاد لفوبيا من لفوبيات لمحددين الشايعين ݣاع، و شي سطاتيستيكات كايوريو بلي 50٪ من النسا و 10٪ من الرجال كايوريو لأعراض د هاد لفوبيا. تقدر تكون واحد الشكل فايت لحد د شي ستيجابة غريزية لي عاونات لبشر اللولانيين على النجو، ولا شي ضاهرة تقافية لي كاتكون شايعة كتر ف لمجتمعات لي أغلبيتهم أوروپيين.

ب صيفتهم ماكلة

لعنكبوتات كايتخدّمو ب صيفتهم ماكلة، الرتيلات الطايبين كايتعتابرو ماكلة فاخرة ف كامبوديا، و من هنود لپياروا ديال جنوب ڤينيزويلا – ب لخودان ف لبال الزغيّبات لي كايهيّجو الجلد، السيستيم الساسي د الدفاع، كايتزوّل هو اللول.