انتقل إلى المحتوى

عرسيات

من ويكيپيديا
عرسيات
معلومات عامة
سمية لعيلمية Mustelidae
(يوهان غوتلف فيشر فون فالدهايم، 1817)
لخاصية د ترتاب فاميلة
تابع ل عرسيات وأشباهها و كلبيات الشكل



لعرسياتالنݣليزية: Mustelidae) واحد لفاميلة منوعة ديال لبزوليات لكارنيڤوريين، منهم بني عرس، لغريرات، تعالب لما، بني عرس لخانزين، لخزوزا، لݣريزونات، و لمهاوشين. كاملين بيهم كايصايبو لفاميلة لكبيرة ݣاع ف التنضيمة التحتانية كلبيات الشكل لي وسط التنضيمة كارنيڤورات ب جوايه 66 حتى ل 70 نوع ف تسعود د لفاميلات التحتانيين.[1]

التنويعة

[بدل | بدل لكود]
سطينيكتيس س.پ (لمتحف لميريكاني د التاريخ الطبيعي

لعرسيات كايتنوعو ب زايد ف لقد و السلوك. التنويعات الصغار ديال بن عرس الصغير (least weasel) يقدرو يكونو قل من 20 سونتيميطر ف الطول، ف لوقيتة لي تعلب لما لعملاق (Giant Otter) ديال جنوب أمريكا لأمازونية يقدر يتعبر حتى ل 1.7 ميطرو و تعالب لما ب شكل عام يقدرو يفوتو 45 كيلوݣرام ف التقل. لمهاوشين (Wolverines) كايقدرو يدݣدݣو عضام قد لغلض د لفيمور (عضم لفخد) ديال شي موض (moose) باش يوصلو ل مخ لعضم، و فايت تشافو كايجرّبو يجرّيو على الدبوبا بعيد على لمقتولات دياولهم. تعلب لما كايخدّم لحجر باش يحل كوكياجات فواكه لبحر باش ياكل. لخزوزا (martens) كايكونو شجريين ب زايد، أما لغريرات لوروپيين (European badgers) كايحفرو ريزوات واسعين د أنفاق تحت أرضيين. غير نوع واحد من لعرسيات لي تضوميستيكا؛ بن عرس لمربي (ferret). الطايرات (Tayra) حتى هوما كايخلّيوهم كا حيوانات د الدار (وخا كايخصهم واحد الليسونس د لحيوانات لبريين لخطيرين ف لمملاكة لمتاحدة)، لعرسيات يقدرو يخدّموهم كا كونطرول ضد لآفات. وحدين خرين كانو موهيمين ف لبيع و الشرا د لفرو–لمينك (Mink) دايماً كايربّيوه على ود لفرو ديالو.

ب صيفتها وحدة من أكتر لفاميلات لعامرين ب النواع ف التنضيمة كارنيڤورا، لفاميلة عرسيات عاوتاني وحدة من أقدم لفاميلات. الشكال لي بحال لعرسيات بانو ل لخطرة اللولى جوايه 40 مليون عام هادي، على بونت و كانو غايتصادفو معا لوقيتة لي غايبانو فيها لقوارض. الجد لمشروك ديال لعرسيات لعصريين بان شي 18 مليون عام هادي.[1]

لخصايل

[بدل | بدل لكود]
السكوليط د بن عرس كحل الرجلين (Mustela nigripes) ف عرض ف متحف علم لعضام

وسط واحد لمادى عريض ديال التبدالات، لعرسيات كايورّيو شي خصايل مشروكين بيناتهم. هوما ف لعادة حيوانات صغار ف لقد ب كسدات مطوّلين، رجلين قصار، جماجم قصار، ودنين قصار، و مضورين، و فرو غليض.[2] لقلدة لكسدية الطويلة و الرقيقة د لعرسيات مآضاپطيا معا تلاتة الستيلات د لعيشة ساسيين: الستيل د لعيشة لأرضي، الشجري، و لبحري/النص بحري.[3] كايورّيو حركة صبعية لمشية (Digitigrade) ولا كفّية لمشية (plantigrade)، ب خمسة د الصبعان ف كل رجل، هادشي لي كايخلّيهم قادرين يتحركو ب شكال مبدلين (لحفير، التشعبيط، لعومان).[4] جل لعرسيات كايكونو حيوانات خلويين و ليليين، و كايكونو نشيطين لعام كامل.[5] لفرو ديالهم عامر، دايماً كايخدْم ب صيفتو كاموفلاج طبيعي، لي كايدوز من تبدلات موسميين باش يعاونهم يتآضاپطاو معا لحالات لبيئيين لمنوعين.[3]

من غير تعلب لما لبحري (sea otter)،[6] هوما عندهم غوداد شرجيين د الريحة لي كايخرّجو واحد ليفراز مجهد ف الريحة لي كايخدّموه هاد لحيوانات كا سينيالات جنسيين و على قبل رشيم الزون.

لعرسيات كايبيّنو الديمورفية الجنسية، معا الدكور كايكونو كبر من النتوات ف لقد، و لكن النيڤو د هادشي كايتبدل بينات النواع و حتى ب شكل جغرافي بينات نفس النوع.[3] دكور لعرسيات عندهم لقضيب و لباكولوم (عضمة لقضيب–Baculum) معرّش.[4] لمكاترة د لعرسيات ف لغالب كاتشمل لغريس لمعطل (embryonic diapause).[7] الجنين ماكايتغرسش فيساع ف لولّادة (Uterus)، بلحق كايبقى ف حالة سبات ل شي وقت. حتى شي ديڤلوپمو ما كايطرا مادام الجنين باقي ماملاصقش ب لبطانة د لولّادة. لحاصول، لوقيتة د لحبيل لعادي كاتجبّد، شي خطرات كاتبقى حتى لعام. هادشي كايخلّي الصغار يتزادو ف ضروف بيئيين مخيّرين. لمكاترة عندها واحد التكلفة كبيرة ف لينيرجي، عليها حسن ف النفع ل شي نتوا يكونو عندها ماكلة موجودة و جو معتادل. الصغار عندهم حتيمال كتر ينجاو يلا الزيادة وقعات من مورا لفطيم ديال التفريخة لفايتة د لوالدين.

لعرسيات لحايميين ب شكل طاغي، وخا شي وحدين كاياكلو لمواد النباتيين ف شي وقات. و ف لوقيتة لي ماشي ݣاع لعرسيات كايشركو واحد التسنينة مطابقة، كاملين عندهم سنان مآضاپطيين على ماكلة اللحم، منهم لحضور ديال السنان اللحايميين (carnassials) لي كايشرّݣو. واحد لمزيّة خصلة هي الضرسة لفوقانية اللورانية لي كاتشرّݣ اللحم لي ضايرة 90°، قبالة لداخل د لفم.[8][9] وخا كاين تنواع بينات النواع، أكتر تشكيلة سنّية شايعة هي 3.1.3.13.1.3.2.[5]

إيكولوجيا

[بدل | بدل لكود]
قاقم كايقتل قنية أوروپية

لپيكان (Fisher)، الطايرا (Tayra)، و لخزوزا كايكونو شجريين ب شكل جزئي، ف لوقيتة لي لغريرات كايكونو حفايريين (Fossorial). واحد لعدد من لعرسيات عندهم ستيلات د لعيشة بحريين، لي كايتفاوتو من لمينكات (minks) و تعالب لما د لواد النص بحريين ل تعلب لما لبحري لي الستيل د عيشتو بحري ب لكامل، هادشي لي كايخلّيه واحد من لبزوليات اللارئيسيين (Nonprimate) لقلال لي معروفين ب تخدام التويشيات (tools) ف لوقيتة د لعليف. كايخدّم لحجر كيف شي "سندان" باش يهرس لكوكياجات د فواكه لبحر لي كايصايبو طرف موهيم ف ريجيمو. هو كايتعتابر "نوع مفتاحي"، لي كايخلّي نسمات لفرايس ديالوا موازنين باش شي وحدين منهم مايطغاوش ف لمنافسة على لخرين باش مايخربوش لكيلپ (kelp) فين هوما كايعيشو. . بن عرس كحل الرجل (black-footed ferret) كايعوّل ب لكامل على واحد النوع مفتاحي خر، كلب لمروج (prairie dog). فاميلة وحدة ديال ربعة د بني عرس كاتاكل 250 كلب د لمروج ف عام واحد؛ هادشي محتاج واحد النسمة تابتة ديال كلاب لمروج من شي مساحة ديال شي 2.0 كم² تقريباً.

حيوانات ب شكال مشابهين

[بدل | بدل لكود]

الضرابن (skunks) كانو شحال هادي مشمولين ب صيفتهم فاميلة تحتانية ديال لعرسيات، و لايني واحد لبحت ديال لآديئين بلاصاهم ف فاميلة مفارقة ديالهم بوحدهم (الضربانيات–Mephitidae).[10] النموسا (mongooses) كايشبهو فوق لقياس ل شلّا عرسيات، بلحق هوما كاينتاميو ل واحد التنضيمة تحتانية مبدلة ب شكل مفرّز–سنوريات الشكل (ݣاع هادوك لكارنيڤورات لي كايشركو أصول جداد كتر معا لقطوط) و ماشي كلبيات الشكل (هادوك لي كايشركو أصول جداد كتر معا لكلاب). هادشي حيتاش النموسا و لعرسيات كايعمّرو نيشات إيكولوجيين (ecological niches) مشابهين، التطوور لمقارب (convergent evolution) ودّى ل تشابيه بيناتهم ف الشكل و السلوك.[11]

التخدامات د بنادم

[بدل | بدل لكود]
ديطاي من اللوحة د ليوناردو داڤينتشي، سيدة معا قاقم 1489-1490

بزاف د لعرسيات، بحال لمينك، السمّور (sable) (نوع من لخز)، و لقاقم (stoat)، عندهم فروات لي كايتعتابرو زوينين و عندهم قيمة، عليها كايصييدوهم من الزمانات لماقبل تاريخيين. من لعصور لموسطين لبكرانيين، لبيع و الشرا ف لفرو كانت عندو أهمية قتيصادية ل الشعوب الشمال و الشرق أوروپيين ب نسمات أصليين كبار ديال لعرسيات لي هازين لفرو، و هادشي كان واحد الدافع قتيصادي كبير مورا التوسوع الروسي ف سيبيريا و التوسوع لفرانساوي و النݣليزي ف أمريكا الشمالية. ف لقرون اللخرين فيرمات لفرو، خصوصاً على قبل فرو لمينك، ولّاو عاوتاني مفرقين ب شكل عريض و هوما لي كايفورنيو أغلابية لفرو لي كايجي ل السوق.

واحد النوع، لمينك لبحري (sea mink) ديال النݣليز الجديدة و كاناضا، تجرّ ل النقيراض ب سباب الصيادا د لفرو. لمضهر ديالو و عوايدو على بونت و يكونو مامعروفينش ليوما حيت حتى عيينة كاملة ما قدرات تتلقى و حتى شي ديراسة سيسطيماتيكية معاصرة ما تدارت.

تعلب لما لبحري، لي عندو لفرو لعامر ݣاع على أي حيوان،[12] بزز باش هرب من لمكتاب لي جا ل لمينك لبحري. لكتيشاف د نسمات كبار من هاد النوع ف شمال لموحيط لهادي كان أكبر قوة قتيصادية دافعة مورا التوسوع الروسي ف كامتشاطكا، لݣزاير لآليوطيين، و ألاسكا، زيد عاوتاني كان سباب ف الصيراع معا الجاپون و الصيادا لبرانيين ف ݣزاير كوريل. هادشي و الصيادة لمتاشرة ب زايد ف كاليفورنيا و كولمبيا لبريطانية، دفعو النوع ل لحافة د النقيراض حتى لواحد لقرار د لمنع دولي لي بدا يطّبّق ف 1911.

ليوما، شي عرسيات مهددين ب حوايج خرين. تعالب لما لبحريين محسوسين ل تدفاقات لپيطرول و التأتيرات اللامباشرين ديال الصيادة د لحوت لي ما فوق لقياس؛ بن عرس كحل الرجل، لي قريب ل بن عرس لأوروپي، كايتمحن معا لخسران ديال لمرج لأمريكي؛ و نسمات لمهاوش كايقلالو شوية ب شوية ب سباب تخراب لموايل و لحݣرة. لمينك لأوروپي النادر (European mink) واحد من نواع لعرسيات لمهددين ݣاع.[13]

بن عرس لمربّي، لي هو بن عرس أوروپي خانز (European polecat) مضوميستيكي، هو حيوان كايتربّى ب شكل شايع.

التطوور و السيسطيماتيكيات

[بدل | بدل لكود]

لعرسيات هي واحد لفاميلة تحتانية ف شباه لعرسيات (Musteloidia)، لي هي فاميلة فوقانية ديال لبزوليات موحدة ب جمجومة مشروكة و خصايل د السنان. لعرسيات كايتشافو بلي تفرْقو على أقرب فاميلة حداهم، الراكونيات (Procyonidae)، 29 مليون عام تقريباً.[14] أقدم نوع د لعرسيات معروف من أمريكا الشمالية لي هو كوروميكتيس وولصاني (Corumictis wolsani) لي متورخ ل اللول حتى ل اللخر د لأوليݣوصين (لمرحالة لآريكاريّة اللولى و اللخرة، Ar1–Ar3) ديال أوريݣن،[15] موسطيليكتيس (Mustelictis) لأوليݣوصين لوسطاني ديال أوروپا يقدر يكون شي نوع عرسي حتى هو.[15] فوصيلات خرين بكرانيين ديال لعرسيات تتورخو ل اللخر ديال لأوليݣوصين ل لبدو د لميوصين. إينا شكل من هاد الشكال جدود د لعرسيات و إينا وحدين خصهم يتعتابرو أول نواع د لعرسيات باقي ماواضحش.[16]

التسجال لفوصيلي كايلمّح بلي لعرسيات بانو ف عصر لأوليݣوصين اللخراني (33 مليون عام هادي) ف أوراسيا و هاجرو ل کل قارة من غير أنطاركتيكا و أوصطراليا (ݣاع لقارات لي كانو ملاصقين ف وقيت لميوصين ولا من لبدو د هاد لعصر). وصلو ل لأمريكيتين على طريق لقنطرة لأرضية بيرين (Bering land bridge).

ال68 نوع د لعرسيات الجداد (66 نوع باقي) مرتبين ف تمنية د لفاميلات التحتانيين لي فيهم 22 ݣنس:[1][17]

فاميلة تحتانية غريريات أمريكيين (Taxidiinae)

  • ݣنس غرير أمريكي (Taxidea)
    • غرير أمريكي، T. taxus

فاميلة تحتانية غريريات لعسل (Mellivorinae)

  • ݣنس غرير لعسل (Mellivora)
    • غرير لعسل، "Mellivora

فاميلة تحتانية غريريات (Melinae)

  • ݣنس غرير حلوفي (Arctonyx)
    • غرير حلوفي شمالي A. alboqularis
    • غرير حلوفي كبير، A. collaris
    • غرير حلوفي سومطري، A. hoevenii
  • ݣنس غريريات حقيقيين (Meles)
    • غرير جاپوني، M. anakuma
    • غرير آسياوي، M. leucurus
    • غرير أوروپي، M. meles
    • غرير قوقازي، M. canescens

فاميلة تحتانية غريريات عرسيين (Helictidinae)

  • ݣنس غرير عرسي (Melogale)
    • غرير عرسي ڤييطنامي، M. cucphuongensis
    • غرير عرسي بورناوي، M. everetti
    • غرير عرسي شينوي، M. moschata
    • غرير عرسي جاڤاوي، M. orientalis
    • غرير عرسي بورمي، M. personata
    • غرير عرسي طايواني، M. subaurantiaca

فاميلة تحتانية مهاوشيات (Guloninae)[18]

  • ݣنس "طايرا (Eira)
    • طايرا، E. barbara
  • ݣنس مهاوش (Gulo)
    • مهاوش، G. gulo
  • ݣنس خز (Martes)
    • خز أمريكي، M. americana
    • خز لپاسيفيك، M. caurina
    • خز صفر لحلق، M. flavigula
    • خز الزان، M. foina
    • خز نيلݣيري، M. gwatkinsii
    • خز الصنوبر أوروپي، M. martes
    • خز جاپوني، M. melampus
    • سمّور، M. zibellina
  • ݣنس پيكان (Pekania)
    • پيكان، P. pennanti

فاميلة تحتانية زوريليات (Ictonychinae)[18]

  • ݣنس ݣريزون (Galictis)
    • ݣريزون صغير، G. cuja
    • ݣريزون كبير، G. vittata
  • ݣنس زوريليات حقيقيين (Ictonyx)
    • زوريلا مخطط صحراوي، I. libycus
    • زوريلا مخطط، I. striatus
  • ݣنس عرسيات پاطاݣونيا (Lyncodon)
    • بن عرس پاطاݣونيا، L. patagonicus
  • ݣنس عرسيات مخططين إفريقيين (Poecilogale)
    • بن عرس مخطط إفريقي، P. albinucha
  • ݣنس عرسيات رخاميين (Vormela)
    • بن عرس خانز رخامي، V. peregusna

فاميلة تحتانية تعلبيات لما (Lutrinae)

  • ݣنس تعلب لما بلا مخالب (Aonyx)
    • تعلب لما بلا مخالب إفريقي، A. capensis
    • تعلب لما صغير لمخالب آسياوي، A. cinerea
    • تعلب لما بلا مخالب كونݣولي، A. congicus
  • ݣنس تعلب لما بحري (Enhydra)
    • تعلب لما بحري، E. lutris
  • ݣنس تعلبيات لما د لعالم الجديد (Lontra)
    • تعلب لما نهري شمال أمريكي، L. canadensis
    • تعلب لما الصياد، L. felina. felina
    • تعلب لما د لعالم الجديد، L. longicaudis
    • تعلب لما نهري جنوبي، L. provocax. provocax
  • ݣنس تعلبيات لما حقيقيين
    • تعلب لما أوراسي، L. lutra
    • تعلب لما مزغب النيف، L. sumatrana
    • † تعلب لما جاپوني، L. nippon
  • ݣنس تعلب لما منقط لعنق (Hydrictis)
    • تعلب لما منقط لعنق، H. maculicollis
  • ݣنس تعلب لما ملس لفرو (Lutrogale)
    • تعلب لما ملس لفرو، L. perspicillata
  • ݣنس تعلب لما عملاق (Pteronura)
    • تعلب لما عملاق، P. brasiliensis

فاميلة تحتانية عريسيات (Mustelinae)

  • ݣنس بن عرس/عرسيات حقيقيين (Mustela)
    • بن عرس جبلي، M. altaica
    • قاقم، M. erminea
    • بن عرس السهب، M. eversmannii
    • بن عرس مربي، M. furo
    • بن عرس لهايدا، M. haidarum
    • بن عرس جاپوني، M. itatsi
    • بن عرس صفر لكرش، M. kathiah
    • مينك أوروپي، M. lutreola
    • بن عرس جبلي أندونيسي M. lutreolina
    • بن عرس كحل الرجلين، M. nigripes
    • بن عرس صغير، M. nivalis
    • بن عرس ملاياوي، M. nudipes
    • بن عرس خانز أوروپي، M. putorius
    • قاقم أمريكي، M. richardsonii
    • بن عرس سيبيري، M. sibirica
    • بن عرس كحل لخط، M. strigidorsa
  • ݣنس عرسيات لعالم الجديد (Neogale)[19]
    • بن عرس للآمازون، N. africana
    • بن عرس كولومبي، N. felipei
    • بن عرس طويل الزنطيط، N. frenata
    • مينك أمريكي، N. vison
    • † مينك لبحر، N. macrodon

لفوصيلات ديال ݣنوس لعرسيات لمنقارضين كايشملو:

  • براكيپساليس (Brachypsalis)
  • تشاميطاطاكسوس (Chamitataxus)
  • كوروميكتيس (Corumictis)[15]
  • سيرناونيكس (Cyrnaonyx)
  • إيكوروس (Ekorus)
  • إينهايدريوضون (Enhydriodon)
  • إيوميليڤورا (Eomellivora)
  • هوپليكتيس (Hoplictis)[20]
  • ميݣاليكتيس (Megalictis)
  • أوليݣوبونيس (Oligobunis)
  • پليسيكتيس (Plesictis)
  • سطينيكتيس (Sthenictis)
  • طيرويليكتيس (Teruelictis)
  • طروتشيكتيس (Trochictis)[21]

فيلوجينيا

[بدل | بدل لكود]

لفيلوجينيات د الجينات لمعددين لي تصايبو من كوپفلي و معاونينو (2008)[22] و لوو و معاونينو (2018)[1] لقاو بلي لعرسيات كايجمعو تمنية ديال لفاميلات التحتانيين باقيين. لعرسيات لبديانيين بانو بلي دازو من جوج موجات مزروبين ديال التنواع ف أوراسيا، و لحاصول د النواع تفرّقو ل لقارات لخرين غير من بعد.[22]

شجرة فيلوجينية د لعرسيات، فيها 53 نوع عرسي مفتارض من أصل 79[23]
شجرة د لمعايرة لوقتية ديال لعرسيات، كاتوري لوقيتات د التفراق بينات النسولا.[23]

تنواع د نواع لعرسيات دايماً كايتقرن ب واحد ليشعاع آضاپتيڤ لي تصادف معا التحوول لمناخي ف لوسط د لميوصين. هادشي عكس توقوعات، لوو و معاونينو (2018)[24] ما لقاو حتى دليل على قبل لمّاج د تنواع النسولا ف لأصل د لعرسيات، و تحاليل خرين د موعدالات تنواع النسولا ب تخدام ميطودات موليكيين و مبازيين عل لفوصيل ما لقاوش شي مرافقة بينات موعدالات تنواع النسولا و التحوول لمناخي ف لوسط د لميوصين كيف ما كان كايتفتارض ف لفايت.

مصادر

[بدل | بدل لكود]
  1. ^ a b c d Law, C. J.; Slater, G. J.; Mehta, R. S. (1 January 2018). "Lineage Diversity and Size Disparity in Musteloidea: Testing Patterns of Adaptive Radiation Using Molecular and Fossil-Based Methods". Systematic Biology. 67 (1): 127–144.
  2. ^ Law, C. J.; Slater, G. J.; Mehta, R. S. (2019). "Shared extremes by ectotherms and endotherms: Body elongation in mustelids is associated with small size and reduced limbs". Evolution. 73 (4): 735–749
  3. ^ a b c Macdonald, David W.; Newman, Christopher; Harrington, L. A., eds. (2018). Biology and conservation of musteloids (First ed.). Oxford: Oxford University Press.
  4. ^ a b Mammalogy: adaptation, diversity, ecology (5th ed.). Baltimore, Maryland: Johns Hopkins university press. 2020.
  5. ^ a b King, Carolyn (1984). Macdonald, D. (ed.). The Encyclopedia of Mammals. New York: Facts on File. pp. 108–109.
  6. ^ Kenyon, Karl W. (1969). The Sea Otter in the Eastern Pacific Ocean. Washington, D.C.: U.S. Bureau of Sport Fisheries and Wildlife.
  7. ^ Amstislavsky, Sergei, and Yulia Ternovskaya. "Reproduction in mustelids." Animal Reproduction Science 60 (2000): 571–581.
  8. ^ Pratt, Philip. "Dentition of the Wolverine". The Wolverine Foundation, Inc.
  9. ^ Taylor, Ken (1994). "Wolverine". Wildlife Notebook Series. Alaska Department of Fish & Game.
  10. ^ Dragoo and Honeycutt; Honeycutt, Rodney L (1997). "Systematics of Mustelid-like Carnivores". Journal of Mammalogy. 78 (2): 426–443.
  11. ^ Mills, David R.; Do Linh San, Emmanuel; Robinson, Hugh; Isoke, Sam; Slotow, Rob; Hunter, Luke (September 2019). "Competition and specialization in an African forest carnivore community". Ecology and Evolution. 9 (18): 10092–10108.
  12. ^ Perrin, William F., Wursig, Bernd, and Thewissen, J.G.M. Encyclopedia of Marine Mammals, 2nd ed. Academic Press; 2 edition (December 8, 2008). Page 529.
  13. ^ Lodé, Thierry; Cornier, J. P.; Le Jacques, D. (2001). "Decline in endangered species as an indication of anthropic pressures: the case of European mink Mustela lutreola western population". Environmental Management. 28 (6): 727–735.
  14. ^ Yonezawa, Takahiro; Nikaido, Masato; Kohno, Naoki; Fukumoto, Yukio; Okada, Norihiro; Hasegawa, Masami (1 July 2007). "Molecular phylogenetic study on the origin and evolution of Mustelidae". Gene. 396 (1): 1–12.
  15. ^ a b c Paterson, R.; Samuels, J.X.; Rybczynski, N.; Ryan, M.J.; Maddin, H.C. (2019). "The earliest mustelid in North America". Zoological Journal of the Linnean Society. 188 (4): 1318–1339.
  16. ^ Wund, M. (2005). "Mustelidae". Animal Diversity Web. University of Michigan.
  17. ^ "Explore the Database". www.mammaldiversity.org.
  18. ^ a b Nascimento, F. O. do (2014). "On the correct name for some subfamilies of Mustelidae (Mammalia, Carnivora)". Papéis Avulsos de Zoologia. 54 (21): 307–313.
  19. ^ Patterson, Bruce D.; Ramírez-Chaves, Héctor E.; Vilela, Júlio F.; Soares, André E. R.; Grewe, Felix (2021). "On the nomenclature of the American clade of weasels (Carnivora: Mustelidae)". Journal of Animal Diversity. 3 (2): 1–8.
  20. ^ Valenciano, A.; Jiangzuo, Q.; et al. (March 2019). "First Record of Hoplictis (Carnivora, Mustelidae) in East Asia from the Miocene of the Ulungur River Area, Xinjiang, Northwest China". Acta Geologica Sinica. 93 (2): 251–264.
  21. ^ Morlo, M.; LeMaitre, A.; et al. (November 2019). "First record of the mustelid Trochictis (Carnivora, Mammalia) from the early Late Miocene (MN 9/10) of Germany and a re-appraisal of the genus Trochictis". Historical Biology. 33 (8): 1183–1195.
  22. ^ a b Koepfli, Klaus-Peter; Deere, K.A.; Slater, G.J.; Begg, C.; Begg, K.; Grassman, L.; Lucherini, M.; Veron, G.; Wayne, R.K. (February 2008). "Multigene phylogeny of the Mustelidae: Resolving relationships, tempo and biogeographic history of a mammalian adaptive radiation". BMC Biology. 6: 10
  23. ^ a b ]]Law, C. J.; Slater, G. J.; Mehta, R. S. (1 January 2018). "Lineage Diversity and Size Disparity in Musteloidea: Testing Patterns of Adaptive Radiation Using Molecular and Fossil-Based Methods". Systematic Biology. 67 (1): 127–144.
  24. ^ ]Law, C. J.; Slater, G. J.; Mehta, R. S. (1 January 2018). "Lineage Diversity and Size Disparity in Musteloidea: Testing Patterns of Adaptive Radiation Using Molecular and Fossil-Based Methods". Systematic Biology. 67 (1): 127–144.