عتلة
| لمقال مقطوع من شجرة، ما كايدي ليه تا شي مقال أخر، زيد ليان ديالو ف مقالات خرين. |
أمادير[1] ولّا لمادير[2][:587-588] ولّا لعتلة ولّا الصابّة[2][:477][3] (ب لعربية معزقة، ب النڭليزية hoe) هيّ أداة د ليد كاتخدّم ف لفلاحة و الجارديناج. من بين لإستعمالات ديالها كاين لمقادّة و التنقية د التراب، تحياد الربيع الضارّ، و الجبيد ديال الجدور، سوا على ود تنقية التراب ولّا جميع لمحاصيل بحال بطاطا ولّا خيزو.
كاينين بزاف د الشكال ديال لعتلات ل أغراض مختالفين. شي وحدين كيقدمو وظائف متعددة، بينما آخرين عندهم غير هدف واحد و محدد.
بشكل عام، كاينين جوج د النواع ديال لعتلات: لعتلات د الجبيد على ود لمقادة د التراب، و لعتلات د الدفيع على ود تحياد لعشوب و تهوية د التربة.
لعتلة د الجبيد كايكون الراس ديالها متعامد معا لعصا. لي مخدّمها كيضرب لأرض ب راس لعتلة و كيجبد ل عندو. التبدال ديال عبار لقنيتة مابين الراس و لعصا كيخلي لعتلة تحفر ف لغرق ولّا السطح ديال التراب. لعتلة د الجبيد تقدر ب سهولة تتخدم ف لقليب ديال التربة ف غرق ديال سنتيميترات. هاد النوع د لعتلات ف لعادة كاتكون ف الراس ديالها "عين" ولّا حلقة منين كاتدخل لعصا.[4] هاد الديزاين مستعمل من عهد الرومان.
لعتلة د الدفيع كاتخدّم ف تكشاط السطح ديال التربة، تخلخيل السنتيميترات لفوقانيين ديالها، و تحياد الجدور ديال لعشوب الضارّين. كاينين جوج د الشكال ف الديزاين ديالها: لعتلة لهولاندية و لعتلة مولات لقوس.
زيادة على هادشي، كاينة لعتلة د ليد لي كاتكون خفيفة و عندها يد/عصا قصيرة و تقدر تكون ب أي شكل.
لعتلات طيكنولوجيا لي قديمة بزاف، و بانت قبل لمحراث، و يمكن قبل من لعصا د لحفير. ف لأساطير ديال بلاد سومر، لي ختارع لعتلة هوّ الرب إنليل، سيّد لأرباب د السوماريين.[5] لعتلة مدكورة ف قصيدة سومارية لي كاترجع ل لألفية 3 قبل لميلاد، و لي كاتحاور فيها عتلة معا محراث على شكون فيهم أحسن أداة. لقصيدة كاتسالي ب لإنتصار ديال لعتلة.[6] واحد لقصيدة خرة ب السومارية من نفس لعصر كاتمدح لخصايل ديال لعتلة.
لمحراث د ليد (م-ر) كايبان ف لفن ديال مصر قبل السلالات، و مدكور ف وتايق قديمة بحال قانون حامورابي ف جوايه لقرن 18 قبل لميلاد، و سفر إشعياء ف جوايه لقرن 8 قبل لميلاد.
التخدام ديال لعتلة د ليد على لمدى الطويل، لي كايتطلب باش يتّحنى لواحد باش يوصل للرض، يقدر يتسبب ف ألام قوية ف التحت د الضهر عند لفلاحا. بسباب هادشي تعتابرات أداة ماشي آمنة، و تمنعات ف ولاية كاليفورنيا ف لميريكان ف 1975.[6][7]
ف 15 ولّا 20 عام اللخرة، ولّاو لعتلات مخدمين بزاف من عند لأركيولوجيين. وخا ماعندهمش نفس الديقّة ديال لمجرفة، لعتلة أداة مزيانة ف تنقية بلايص مفتوحين و واسعين لي عندهم أهمية أركيولوجية.
- ↑ محمد شفيق (1999). الدارجة المغربية، مجال توارد بين الأمازيغية و العربية (PDF) (ب لعربية ودّاريجة). أكاديمية المملكة المغربية. ص. 55. Archived from the original on 2023-06-17. تطّالع عليه ب تاريخ 2025-03-11.CS1 maint: unfit url (link)
- 1 2 محمد بوسلام (2024). معجم الدارجة المغربية (الجذور والاختلافات الجهوية)، الجزء الثاني (خ-ع) (ب لعربية ودّاريجة).
- ↑ محمد المدلاوي المنبهي (2019). العربية الدارجة (ب لعربية ودّاريجة). مركز تنمية الدارجة. ص. 44.
- ↑ Deppe، Carol (5 Oct 2010). The Resilient Gardener: Food Production and Self-Reliance in Uncertain Times. White River Junction, Vermont: Chelsea Green Publishing. ص. 101. ردمك 9781603583152. تطّالع عليه ب تاريخ 14 يونيو 2015.
- ↑ "Nippur, Heritage: Civilization and the Jews". PBS. مأرشيڤي من لأصل ف 14 مارس 2014. تطّالع عليه ب تاريخ 26 Nov 2012.
- 1 2 Jimenez 2017, p. 13–18.
- ↑ Bruns، Roger (2005). Cesar Chavez: A Biography. Westport, CT: Greenwood Press. pp. 91–92. ردمك 9780313334528. تطّالع عليه ب تاريخ 29 أكتوبر 2015.