عبد لجبّار لوزير

عبد لجبّار لوزير
معلومات عامة
زيادة	1928 مراكش
لوفاة	2 شتنبر 2020 (91/92 عام) مراكش
طريقة لموت	موتة طبيعية
سباب لموت	مضاعفات مرض السكري
لجنسية	لمغريب
لميهنة	ممثل

عبد لجبّار لوزير (خلاق ف مراكش ف 1932و توفّا ف 2 شتنبر 2020 ف مراكش) ممتّيل مسرحي مغريبي كان من رّواد د لمسرح ف لمغريب و من نّاس لّي وضعو سّاس ديال بزّاف ديال لفراقي د لمسرح ف مراكش مع سميات خرين بحال محمد بلقاس.

عبد لجبار لوزير متل حتا ف بزاف د لأعمال ف تّلفازا و سّينيما. كان لعمل لّخر ديالو لّي لقا نجاح كبير ف لمغريب هو مسلسل "دار الورثة" لّي داز ف لقناة لمغريبية لّولا ف 2010.

حياتو

عبد لجبار ولد درب لگزا ف رياض لعروس ف مراكش. كبر ف عائيلة على قدّها بحيت بّاه كان كايخدم خرّاز و من بعد خدم ف لفلاحة و تاكسّابت. كبر عبد الجبار ف لمدينة لقديمة د مرّاكش و ما كمّلش قرايتو، بدا صّنعة بكري و خدم ف دّباغة و تانجّارت.

فاش وصل ل 15 لعام تقيّد ف لكوكاب لمرّاكشي (ف نفس لعام لّي تأسّسات فيه لفرقة ف 1948) و لعب گارديان ديال لفرقة د جونيور.

عبد الجبار بدا لمسرح مع لفرقة د "الأطلس الشعبي" لّي كان كايسيرها مولاي عبد الواحد حسنين. أول مسرحية ديالو كانت هي "الفاطمي و الضاوية" ف 1951 لّي لعبها معا محمد بلقاس، و هي لمسرحية كانت تعرضات قدام لماليك محمد لخاميس ف قصر لباهية ف مراكش ف 1957.

عبد الجبار لوزير كان ناشط ف لحركة لوطنية يامات لستيعمار و تحبس من بعد ما تّنفا محمد لخاميس ف 1953. كان تّحبس ف حبس لعلو ف رّباط و تمّا تعلّم لقراية و لكتابة على يد مقاومين كانو معاه ف لحبس. من بعد لستيقلال خدم مردة ف لقوات لموساعيدة ل مدة 4 سنسن قبل ما يخرج منها و يتفرّغ ل لكاريير ديالو ف لمسرح و تّمتيل.

مع بلقاس، شكّلو بجوج تونائي فوكاهي و كانو كايقدّمو عروض تونائية كوميدية.

عبد الجبار توفا ف 2 شتنبر 2020 من بعد ما قاسا عوام طويلة مع مرض سّكار.

لأعمال ديالو

لمسرح

• الفاطمي و الضاوية (1951) - فرقة الأطلس الشعبي.
• أنا مزاوك ف الله.
• سيدي قدور العلمي.
• الزواج بالحيلة (1977).
• غلطة أم.
• الشلح و العساس.
• وليدات جامع لفنا.
• الحراز (1968) - إخراج الطيب الصديقي.
• حمان المهزلة.

تلفازا

• دار الورثة - مسلسل (2010).
• ولد مو - فيلم تيليفيزيوني (2009).

سينيما

• لورنس العرب (1962) - إخراج ديفيد لين.
• عندما تنضج الثمار.
• حلاق درب الفقراء (1982) - إخراج محمد الرگاب.
• فرسان المجد.
• عبدو عند الموحدين.