طاعون
 | هاد لمقال مامراجعش. (ماي 2026) |
الطاعون هو مرض معدي كتسببو واحد بكتيريا كيتسمى الاسم العلمي ديالها يرسينية طاعونية.[1] الأعراض ديالو كتكون فيها السخانة، الفشل والضعف العام، صداع الراس، وف بعض الحالات كيكحلو الشفايف.[2] غالباً هاد الأعراض كيبداو يبانو من بعد يوم واحد حتال سبعة أيام مورا ما كيتصاب الواحد بالعدوى.[1] هاد المرض عندو ثلاثة ديال الأشكال سريرية على حسب البلاصة لي تقاست ف الذات: الطاعون الرئوي لي تيقيس الراري (الرئتين) وكيصعب التنفس ويدير الكحة والألم ف الصدر؛ الطاعون الدملي (أو✗ العقدى) لي كيقيس العقد اللمفاوية وكيخليها تتنفخ؛ وطاعون إنتان الدم لي كيمشي نيشان للدم وكيقدر يدير الموت ديال الأنسجة (الغانغرين) وتكحال.[1][2]
الطاعون الدملي وإنتان الدم كينتشروا بزاف عن طريق العضات ديال البراغيث أولا يلا قاص الواحد شي حيوان مريض،[2] ف الوقت لي الطاعون الرئوي كينتقل مابين البشر عبر الجو ومن خلال الرذاذ د التنفس لي خارج من الكحة أولا العطيس.[2] التشخيص ديالو كيدار ف الغالب ملي كيلقاو البكتيريا ف السوائل د العقد اللمفاوية المنفوخة، أولا ف الدم، أولا ف التنخيمة (البلغم).[1]
اللقاح د الطاعون مديور وموصى بيه غير للناس لي مهددين بزاف يقيسهم المرض (بحال صحاب المختبرات). والناس لي تقربو من شي حالة ديال طاعون رئوي كيقدروا ياخدو دواء وقائي كحماية.[1] يلا تأكدات الإصابة، العلاج الأساسي كيكون بـ المضادات الحيوية والرعاية الطبية المرافقة.[1] ف الغالب هاد المضادات الحيوية كتكون تخلطية مابين جنتاميسين ومجموعة د فلوروكينولون.[3] النسبة د الوفيات مع العلاج كتكون حوالي 10%، ولكن يلا بقا بلا دواء تقدرتوصل حتال 70%.[4]
ف العالم كامل، كتسجل تقريبا 600 حالة ف العام.[1] ف 2017، الدول لي سجلات أكثر عدد د الحالات كانت هي جمهورية الكونغو الديمقراطية، مدغشقر، وبيرو.[1] أما ف الميريكان، كيبانو بعض الحالات مرة مرة ف العروبيات والمناطق القروية فين كتدور البكتيريا مابين القوارض (بحال الفيران وطوبات د الخلا).[5] تاريخياً، هاد المرض دار أوبئة وجوائح كبار، وأشهرهم هو "الموت الأسود" ف القرن 14، لي ماتو بسببو أكثر من 50 مليون واحد ف أوروبا وحدها.[1]
الطاعون كيبان بـ بزاف د الأشكال السريرية. النوع الدملي هو الأكثر انتشاراً، وتابعو إنتان الدم ومن بعد الطاعون الرئوي.[6] كاينين أشكال أخرى قليلة بحال التهاب السحايا الطاعوني، التهاب البلعوم الطاعوني، والطاعون لي كيقيس العينين.[6]الأعراض العامة للمرض هي السخانة، القشعريرة (التبوريشة)، الصدع ف الراس، والردان (الغيَّان).[2] أغلبية الناس لي فيهم الطاعون الدملي كيتنفخوا ليهم العقد اللمفاوية بزاف وديال بصح.[2] والناس لي فيهم الطاعون الرئوي، كتقدر تزيدهم الكحة، الحريق ف الصدر، والكحة بالدم.[2]
ملي كيعض البرغوث بنادم ويلوث الجرح بالدم لي كيردو، كتدوز البكتيريا نيشان للأنسجة. بكتيريا Y. pestis كتقدر تتوالد وتكثر داخل الخلايا، يعني وخا تعرض لـ البلعمة (الدفاع د الذات) كتقدر تعيش. ملي كتدخل للذات، كتمشي لـ الجهاز اللمفاوي لي كيصرف السوائل. هاد البكتيريا كتفرز سموم متعددة، واحد منها معروف بلي كيبلوكي مستقبلات بيتا الأدرينالية.[7]
كتنتشر البكتيريا ف الأوعية اللمفاوية د بنادم المريض حتى كتوصل لـ العقدة اللمفاوية، وتما كتدير التهاب حاد.[8] هاد العقد اللمفاوية المنفوخة هي لي كتدير دوك الوالسات الكبار أو✗ "الدبل" (Buboes) لي معروف بيهم المرض. والتشريح ديال هاد الوالسات كيبين بلي كيكون فيهم النزيف والموت ديال الخلايا.[9]
يلا هاد العقد اللمفاوية تغلبت وماقدراتش تحبس الميكروب، العدوى كتدوز للدم وكتدير "طاعون إنتان الدم الثانوي"، ويلا مشات حتى للراري كتدير "الطاعون الرئوي الثانوي".[10]
السوائل د اللمف ف التالي كتصب ف مجرى الدم، داكشي علاش بكتيريا الطاعون كتقدر تدخل للدم وتمشي لأي بلاصة ف الذات. ف طاعون إنتان الدم، السموم ديال البكتيريا كتدير تخثر داخل الأوعية منتشر (DIC)، يعني كيدير جلطات صغيرة ف الذات كاملة، وكتؤدي للموت ديال الأنسجة حيت الدم مابقاش كيوصل ليها. هاد التخثر المنتشر كيخلي الذات تخسر كاع المكونات لي كتجمع الدم، ومابقاش كيقدر يتحكم ف النزيف. النتيجة هي كيبدا النزيف ف الجلد واللواد د الدخلانيين، وكتبان بقع حمرين أو✗ كحلين، مع الكحة بالدم والردان بالدم. يلا مادتواش هاد النوع، ف الغالب كيموت المريض، ولكن الدواء البدري بالمضادات الحيوية كيهبط نسبة الوفاة لمابين 4% و15%.
هاد النوع الرئوي كيجي نيشان ملي كتقاس الرئة بالعدوى. كيدير الكحة وكيخرج رذاذ طاير ف الهواء فيه البكتيريا، وكيعدي أي واحد استنشق هاد الهوا. فترة الحضانة ديال الطاعون الرئوي قصيرة بزاف، مابين يومين وربع أيام، وبعض المرات غير سوايع قليلة. الأعراض الأولية ديالو كتشبه لأمراض البرد والراري الأخرى: الصداع، الفشل، والبصق أو✗ الردان بالدم. المرض كيمشي سريع بزاف؛ يلا ماتشخصش ومادتواش ف السوايع الأولى، الموت كيقدر يجي ف ظرف يوم حتال ستة أيام؛ وف الحالات بلا دواء النسبة د الموت قريبة لـ 100%.[11]
.jpg)
العدوى ديال Y. pestis كتقدر تنتقل لشخص صحيح بهاد الطرق:[12]
- الرذاذ والمخالطة: الكحة أولا العطيس ف وجه بنادم.
- القيسان المباشر: تقيس بنادم مريض أو✗ السوائل ديالو.
- القيسان غير المباشر: تقيس شي حاجة ملوثة أو✗ تراب ملوث.
- الانتقال عبر الجو: يلا بقا الميكروب معلق ف الهوا بزاف.
- الما والمكلة: عن طريق مكلة أو✗ ما ملوثين بالبراز.
- الانتقال عبر الحشرات: بحال البراغيث لي هازة الميكروب.
البكتيريا كتعيش ف الأصل ف وسط حيوانات بحال القوارض (الفيران وطوبات)، ف بؤر طبيعية ف كاع القارات من غير أستراليا، وكتكون بزاف ف المناطق المدارية وشبه المدارية والمناطق المعتدلة الدافئة ف العالم.[12]
وعكس داكشي لي كيسحاب للناس، الفيران ماشي هما لي كينقلو الطاعون الدملي نيشان، بل هو مرض د البراغيث (Xenopsylla cheopis) لي كتكون راكبة ف الفيران، والفيران بيديهم هما الضحايا الأولين. العدوى للبشر ك تطرى ملي كيعض البرغوث بنادم مورا ما عض فار مريض. البكتيريا كتكثر ف وسط البرغوث وكتسد ليه المعدة ديالو وتخليه يموت بالجوع؛ داكشي علاش كيبدا يعض بزاف ويتقيأ الدم الملوث ف الجرح د العضة، وهادشي كينقل المرض لبنادم والبرغوث ف التالي كيموت بالجوع. الأوبئة الكبار ف الغالب كيبداو ملي كيموتو الفيران بزاف ب هاد المرض، والبراغيث كتقلب على بديل بحال بنادم.[13]
الأعراض د الطاعون ف الأول ماكتكونش باينة ومحددة، داكشي علاش خاص ضروري تحاليل د المختبر باش يتأكد المرض.[14] كيتعرفو على البكتيريا بالميكروسكوب أولا بالزرع المخبري للعينات.[14] هاد العينات كيخدوهم من الدم، أو✗ التخيمة، أو✗ السائل د الوالسات (الدبل).[14] يلا خذا المريض المضادات الحيوية قبل التحليلة أو✗ تعطلات العينة ف الطريق، كاين احتمال تخرج تحليلة سلبية كاذبة.[14]
كيخدمو حتى باختبار تفاعل البوليميراز المتسلسل (PCR) لي كيكشف الجينات د البكتيريا بحال جين pla وجين caf1.[14] هاد الفحص كيحتاج عينة صغيرة بزاف وناجح وخا تكون البكتيريا ميتة.
كاينين حتى تحاليل د الدم باش يشوفو الأجسام المضادة، ولكن هادي كتحتاج سحب عينات ف أوقات متباعدة باش يشوفو الفرق مابين فترة المرض وفترة الشفاء.[14]
طوّر عالم الأحياء الدقيقة "والديمار هافكين" أول لقاح ضد الطاعون ف عام 1897. ودار حملة كبيرا د التلقيح ف الهند البريطانية؛ وكتقول التقديرات بلي صيفطو حوالي 26 مليون جرعة مابين 1897 و1925، وهادشي نقص الوفيات بالطاعون بنسبة مابين 50% و85%.[15][16]
حيت الطاعون البشري رجع قليل بزاف ف العالم دابا، التلقيح الروتيني مابقاش مطلوب إلا للناس لي مهددين بزاف بحال صحاب الأبحاث والمختبرات.[17]
التشخيص البدري كينقص بزاف من انتشار العدوى مابين الناس.[14] الوقاية الدوائية قبل التعرض ماشي ضرورية للفرقة الطبية طالما ملتزمين بالكمامات والاحتياطات اللازمة.[18] ولكن الوقاية الدوائية مورا التعرض (بالمضادات الحيوية الوقائية) ضرورية وموصى بيها لأي واحد كان قريب (أقل من متر ونص) ومن غير حماية لشي مريض بالطاعون الرئوي، أولا صحاب البيطرة والناس لي قاسو حيوانات مريضة.
يلا تم اكتشاف المرض ف الوقت، كاع الأنواع د الطاعون كتستجيب مزيان للمضادات الحيوية.[6][14] من بين الأدوية لي كتخدم بزاف كاين ستربتوميسين، كلورامفينيكول، وتتراسيكلين. والجيل الجديد بحال جنتاميسين ودوكسيسيكلين حتى هما بينو فاعلية كبيرا كـ علاج أحادي.[6]
المشكل لي كيبقا ديما مطروح هو أن البكتيريا تقدر تطور مقاومة ضد هاد المضادات الحيوية، بحال واحد الحالة لقاوها ف مدغشقر ف عام 1995، ومنظمة الصحة العالمية أبلغات على تفشيات موسمية تما ف سنين موراها.[19]
ف العالم دابا، كتسجل حوالي 600 حالة ف العام.[1] وأغلب الحالات المعاصرة كاينا ف بؤر محددة ف جمهورية الكونغو الديمقراطية، مدغشقر، وبيرو.[1]
ف عام 2022، دارت دراسة جينية بينات بلي الأصل د السلالات الحديثة كاملة د الطاعون لقاوه ف بقايا د بنادم ف مقابر قديمة ف قيرغيزستان كترجع لعام 1338 و1339، وهي الفترة لي سبقات نيشان الجائحة د الموت الأسود لي مشات موراها لأوروبا عبر السفن التجارية.[20]
الطاعون عندو تاريخ طويل ف السجلات العسكرية القديمة، حيت كاينين تقارير تاريخية كتقول بلي جثث الحيوانات أو✗ البشر الميتة بالطاعون كانت كتلوح بالمنجنيق ف وسط المدن المحاصرة ف العصور الوسطى لإفساد الما ونقل المرض للأعداء (بحال حصار كافا ف 1347).[21]
دابا، الهيئات د الصحة العالمية بحال مراكز السيطرة على الأمراض (CDC) كتصنف بكتيريا الطاعون كعامل ممرض كيحتاج مراقبة وتتبع وبائي صارم. وحيت المرض كيستجيب بفاعلية للمضادات الحيوية لي كاينا ف المخزون الاستراتيجي د الدول، البرامج الصحية كتركز بالأساس على تتبع الأوبئة، ومحاربة الناقلات (البراغيث والفيران ف الخلا)، وتوفير التشخيص المخبري السريع باش تمنع أي انتشار للعدوى.[22]
- 1 2 3 4 5 6 7 8 9 10 11 "Plague". World Health Organization. October 2017. Retrieved 8 November 2017.
- 1 2 3 4 5 6 7 "Symptoms Plague". CDC (ب American English). September 2015. Retrieved 8 November 2017.
- ↑ "Resources for Clinicians Plague". CDC (ب American English). October 2015. Retrieved 8 November 2017.
- ↑ "FAQ Plague". CDC (ب American English). September 2015. Retrieved 8 November 2017.
- ↑ "Transmission Plague". CDC (ب American English). September 2015. Retrieved 8 November 2017.
- 1 2 3 4 Nelson, Christina A; Fleck-Derderian, Shannon; Cooley, Katharine M; Meaney-Delman, Dana; Becksted, Heidi A; Russell, Zachary; Renaud, Bertrand; Bertherat, Eric; Mead, Paul S (2020-05-21). "Antimicrobial Treatment of Human Plague: A Systematic Review of the Literature on Individual Cases, 1937–2019". Clinical Infectious Diseases. 70 (Supplement_1): S3 – S10. doi:10.1093/cid/ciz1226. ISSN 1058-4838. PMID 32435802.
- ↑ Brown, SD; Montie, TC (1977). "Beta-adrenergic blocking activity of Yersinia pestis murine toxin". Infection and Immunity. 18 (1): 85–93. doi:10.1128/IAI.18.1.85-93.1977. PMC 421197. PMID 198377.
- ↑ Sebbane, F; Jarret, C.O.; Gardner, D; Long, D; Hinnebusch, B.J. (2006). "Role of Yersinia pestis plasminogen activator in the incidence of distinct septicemic and bubonic forms of flea-borne plague". Proc Natl Acad Sci U S A. 103 (14): 5526–5530. Bibcode:2006PNAS..103.5526S. doi:10.1073/pnas.0509544103. PMC 1414629. PMID 16567636.
- ↑ Sebbane, F; Gardner, D; Long, D; Gowen, B.B.; Hinnebusch, B.J. (2005). "Kinetics of Disease Progression and Host Response in a Rat Model of Bubonic Plague". Am J Pathol. 166 (5): 1427–1439. doi:10.1016/S0002-9440(10)62360-7. PMC 1606397. PMID 15855643.
- ↑ "Plague". Centers for Disease Control and Prevention. Retrieved 2014-08-05.
- ↑ Ryan, K. J.; Ray, C. G., eds. (2004). Sherris Medical Microbiology: An Introduction to Infectious Diseases (4th ed.). New York: McGraw-Hill. ISBN 978-0-8385-8529-0.
- 1 2 Plague Manual: Epidemiology, Distribution, Surveillance and Control, pp. 9, 11. WHO/CDS/CSR/EDC/99.2
- ↑ Yersin, Alexandre (1894). "La peste bubonique à Hong-Kong". Annales د l'Institut Pasteur. 8: 662–67.
- 1 2 3 4 5 6 7 8 خطأ استشهاد: وسم
<ref>غير صحيح؛ لا نص تم توفيره للمراجع المسماة ":0" - ↑ خطأ استشهاد: وسم
<ref>غير صحيح؛ لا نص تم توفيره للمراجع المسماة ":1" - ↑ Hawgood, Barbara J. (February 2007). "Waldemar Mordecai Haffkine, CIE (1860–1930): prophylactic vaccination against cholera and bubonic plague in British India". Journal د Medical Biography. 15 (1): 9–19. doi:10.1258/j.jmb.2007.05-59. ISSN 0967-7720. PMID 17356724. S2CID 42075270.
- ↑ "Plague Vaccine". CDC. June 11, 1982. Retrieved Apr 30, 2015.
- ↑ خطأ استشهاد: وسم
<ref>غير صحيح؛ لا نص تم توفيره للمراجع المسماة ":3" - ↑ "Plague – Madagascar". World Health Organization. 21 November 2014.
- ↑ Spyrou, Maria A.; Musralina, Lyazzat (23 June 2022). "The source of the Black Death in fourteenth-century central Eurasia". Nature. 606 (7915): 718–724. doi:10.1038/s41586-022-04800-3. PMC 9217749. PMID 35705810.
- ↑ Wheelis M. (2002). "Biological warfare at the 1346 siege of Caffa". Emerg Infect Dis. 8 (9): 971–975. doi:10.3201/eid0809.010536.
- ↑ Tamparo, Carol; Lewis, Marcia (2011). Diseases of the Human Body. F.A. Davis Company. p. 70.
