شيبة

الشيبة
معلومات عامة
سمية لعيلمية	Artemisia absinthium
لخاصية د ترتاب	نوع
تابع ل	شيح
لمناسلة
نوع لفاكية	فقيرة
معلومات خرين
ستيعمالات	نباتات طبية *عطرية

الشيبة (سّمية لعلمية Artemisia absinthium) هي نوع ديال لعشوب ومن أكبر وأوسع لعشوب (فيها تقريباً 500 نوع) من عائلة المركبات (أولا النجميات). كاتدار ف أتاي، أصلها من شمال إفريقيا و المناطق المعتدلة ديال أوراسيا، و كاين اللي كيقول الاصل ديالها من ؤروپا، و ولات طبيعية و منتاشرة بزاف ف كانادا و شمال الولايات المتحدة.

الشيبة فيها مادة الثوجون (ب نّݣليزية: Thujone). أغلبية الخبراء كيشوفو باللي هاد المكون ما كيشكلش خطر على الصحة إلا إذا تاكل بكميات كبيرة، حيث كيقولو باللي هاد المكون كيكون مركز بزاف في زيت الشيبة. أما الكمية اللي كتكون في الوراق ما كتشكل حتى شي خطر، يعني ستهلاك الشيبة على شكل وراق بكمية معقولة ما فيهش خطر، بالعكس فيه منافع كثيرة.

لوصف

الشيبة هي عشبة كتعيش بزاف سنين و عندها جذور رقيقة. السيقان ديالها كاتكون نابتة نيشان، و كاتطوال بين 80 سم حتى متر و20 سم، و بالزربة كتوصل لـ ميترو و نص. السيقان ديالها مخددة، متفرعة، و لونها بين الفضي و الخضر.

الوراق ديالها كتكون مرونة ومرتبة بحلقة. لونها رمادي-خضر من الفوق و بيض من التحت، و كاتبان عليها واحد الشعيرات الفضية الصغيرة و كتخرج منها ريحة حيت فيها غدد صغيرة كتدير الزيت. الوراق اللي فالأرض كايطوالو حتى 25 سم و كايكونو منقاسمين بزاف و عندهم عنق طويل. الوراق اللي ف الوسط كايكونو صغار شوية، ما بين 5 حتى 10 سم، و ماشي منقاسمين بزاف. اللي فالجهة الفوقانية كايكونو صغار و بلا عنق.

النوّارات ديالها صغار و صفرين، و كيجيو مجموعين ف دويرات صغار كيبانو مدليين. هاد النوّارات كايبانو من الصيف حتى الخريف، و التلقيح ديالها كيديروه الرياح. من بعد كتعطي وحد الثمار صغار، و الزريعة ديالها كاتطيح بوحدها حيت كيتحكم فيها الثقل.

الفوائد والأضرار

الشيبة فيها زيت طيار بنسبة كتوصل لـ 3% و زيت ثابت أهم مكوناتو مادة الثوجون اللي كتستعمل في علاج الضرّان ديال لكلوة و تسهيل خروج الحصوات و تخراج البول. الزيت الطيار فيه حتى بروطامين و بيطابوربونين و الارتيميزينين و ڤيطامين أ.

الشيبة من النباتات الطبية اللي كتستعمل في علاج بزاف ديال الأمراض، ولكن تقدر دير أعراض جانبية و تسبب أضرار خطيرة إذا ما تستعملاتش بالنصائح ديال فارماسيان مختص.

عندها فوائد صحية كثيرة، ولكن خاصها مزال أبحاث، و كتساهم في تحسين الحالة الصحية ديال الناس اللي عندهم مرض (كرون) اللي كيصيب الجهاز الهضمي، حيث كاينين شي دراسات أولية كتقول باللي تناول منتج معين من عشبة الشيبة كل نهار لمدة عشرة د السيمانات كيحسن من جودة الحياة و المجاج، و كينقص من كمية الدوايات الستيرويدات اللي كيحتاجوها الناس اللي مصابين بهاد المرض.

الشيبة كتساعد حتى في علاج الملاريا كيفما جا في منشورات المنظمة العالمية للصحة، وكتحد من النمو ديال الخلايا د لكونصير، و كتحارب الطفيليات.

الشيبة كتساعد حتى في حالات فقدان الشهية، و عسر الهضم، و إضطرابات المرارة، و الجروح و لسعات الحشرات، و عدوى الديدان، و نقص الرغبة الجنسية، و تقلصات و تشنجات لمصارن، و زيادة التعرق. و كتستعمل هاد العشبة حتى في علاج السخانة و أمراض الكبدة، و الاكتئاب، و الضران ديال العضلات، و إلتهاب لمصرانة الزايدة، و الإمساك العصبي، خاصة عند العيالات، و الرمد خاصة عند الشيوخ.

و هي كتساعد حتى في تنقية لڭسدة من سموم الرصاص، و تقوية الذاكرة، و تقليل النسيان. و حتى المنقوع ديالها كيساعد في تنظيف الرحم من بقايا المشيمة من بعد الولادة، و كيسهل عملية الولادة، و كيعاون على خروج الجنين الميت من الرحم.

أما زيت عشبة الشيبة كيستعمل لتخفيف الضرّان، و ريحتو زوينة في صناعة الصابون و مستحضرات التجميل و لپارفان و ك مبيد د لبخوش.

شي أبحاث علمية بينات باللي ما كاينش مرض البلهارسيا في الولاية الشمالية ديال السودان حيت عشبة الشيبة كتنوض بزاف في المنطقة اللي ما بين الخرطوم والحدود المصرية في الشمال، ولكن حذر من باللي الإكثار من شرب منقوع الشيبة كيدي للدوخة وحتى الهلوسة.

و بخصوص الأعراض الجانبية ديال سمية الشيبة، تناول هاد العشبة بالكميات اللي كتكون عادة في الماكلة و شي مشروبات كيكون آمن إذا كانت هاد المنتجات مافيهاش مركب الثوجون، أما إذا كانت العشبة فيها هاد المركب تقدر تسبب نوبات التشنج، و نحلال العضلات المخططة الهيكلية أولا ما كيتعرف ب نحلال الربيدات، و الفشل د لكلوة، و صعوبة النعاس، و لأحلام لخايبة، و التقية، و تقلص المعدة، و حتباس البول، و العطش، و تخدير الدراع و السيقان، و الشلل، و حتى الموت.

و ممنوع على المرا الحاملة تستعمل عشبة الشيبة، حيث تقدر تسبب الإجهاض في شي حالات. و كينصح باللي مرضى الصرع يتجنبو هاد العشبة حيت تقدر تسبب ليهم نوبات.

و حتى الاستعمال ديالها لمدة طويلة يقدر يدي للإدمان على الأفسنت، اللي يقدر يسبب الهلوسة، و العصبية، و التشويش العقلي.

أتاي بنكهة الشيبة

المغرب من بين الدول اللي كتشرب أتاي بزاف في العالم. و مشروب أتاي، اللي كيتوجد بطرق مختالفة، مع مرور الوقت و الأجيال ولى رمز ثقافي و جتماعي مهم بزاف ترسخ في عادات و ذاكرة و وجدان المغاربة.

أتاي هو أول مشروب كتحرص أغلبية الأسر المغربية تقدمو للضيوف كتعبر على مدى الحفاوة و الإستقبال، الشي اللي كيخلي هاد المشروب السخون ركن أساسي في الدار المغربية سوا في المدون ولا لعروبية.

المغاربة دارو إبداع في تنكيه هاد المشروب التقليدي ب أعشاب كتختلف من فصل لآخر ومن منطقة لأخرى (النعناع، الشيبة، البابونج، الزعتر، المرمية، اللويزة...) باش يعطيو مذاق أحسن لهاد المشروب و حتى يستافدو من الفوائد الصحية ديال الأعشاب المنكهة.

غير كيبدا البرد يدخل، خاصة في شهر أكتوبر، الشيبة كتزاد للقائمة ديال الأعشاب المنكهة ل أتاي المغربي، بل كتاخد بلاصة مهمة بزاف من بين النباتات العطرية اللي كيقبلو عليها الأسر المغربية في هاد الفترة ديال العام.

المغرب هو الدولة الوحيدة اللي كتستعمل الشيبة باش تنكه أتاي ولا حتى الحليب، عكس الشائع في شي دول في العالم فين كتستعمل العشبة لأغراض علاجية ولا باش تنسم المشروبات الكحولية كيفما هو الحال في أمريكا الشمالية و أوروپا.

الشيبة كتنتج بزاف في المناطق اللي جاية في وسط المغرب خاصة جهة الدار البيضاء سطات. و كتزاد الجودة ديالها كلما شربات الما بزاف. وأجود أنواعها (المسكية) اللي ريحتها مجهدة و مذاقها حلو و كاتبان في آخر موسم الشيبة.

الشيبة ماشي عشبة اللي كتستهلك العام كامل، بل كتستعمل غير في الفصل البارد، عكس النعناع اللي كيستعمل في الصيف.

شوف تا

• أتاي
• لويزة
• أزير