انتقل إلى المحتوى

سوقراط

بدل ليانات
من ويكيپيديا
سوقراط
معلومات عامة
زيادةج. 470 قبل لميلاد
Alopeke
لموت15 فبراير 399 قبل لميلاد (70/71 عام)
أتينا
طريقة دلموتالانتحار القسري
سباب لموتHemlock poisoning
لجنسيةأثينا الكلاسيكية
لحرفةفيلسوف، معلّيم، كاتب و أخلاقي
لّوغات لي كيعرفليونانية لبالية
لفاميلة
لواليدSophroniscus
لواليدةPhaenarete
شريكزنتيب
Myrto
لولادLamprocles
Menexenus
معلومات خرى
تأتر بأناكساڭوراس، فلسفة ما قبل سقراط و سفسطائيون
IMDB: nm1419271 Discogs: 5283433 Modifica els identificadors a Wikidata


سوقراط (ب ليونانية لبالية: Σωκράτης; 470-399 ق.م) كان فيلسوف يوناني من أتينا كيتنسب ليه تأسيس الفلسفة الغربية[1] و من بين أوائل لفلاسفة لأخلاقيين ف تقليد لأخلاق لفكري. شخصية غامضة، سوقراط ما ألف حتى شي نص و معروف بشكل أساسي من خلال روايات لكتّاب لكلاسيكيين لي جات من بعد وفاتو، خصوصا تلامدو أفلاطون و زينوفون. هاد الروايات مكتوبة على شكل حوارات، لي فيها سوقراط و محاوريه كيفحصو موضوع ب أسلوب السؤال و الجواب؛ هادشي عطى لحوار السوقراطي كـ نوع أدابي. الروايات لمتناقضة على سوقراط كتخلّي معاودة مصاوبة فلسفتو علاين مستحيلة، و هاد الوضعية معروفة ب لمشكلة السوقراطية.

سوقراط كان شخصية متيرة للجدل ف المجتمع الأتيني. ف 399 ق.م، تتّاهم ب عدم التقوى و إفساد الشباب. من بعد محاكمة دامت نهار، تحكم عليه ب لإعدام. دوز نهارو اللخر ف الحبس، و رفض لعروض باش يعاونوه يهرب.

حوارات أفلاطون هي من بين أشمل الروايات على سوقراط لي وصلاتنا من العصور القديمة. كيبينو لمنهج السوقراطي ف مجالات لفلسفة بما فيها نضرية لمعرفة و لأخلاق. السوقراط لأفلاطوني عطى سميتو ل مفهوم لمنهج السوقراطي، و تا للسخرية السوقراطية. لمنهج السوقراطي ف التساؤل، ولا الإلينخوس، كيتشكل ف الحوار ب تخدام أسئلة و جوابات قصيرة، و كيتجسد ف هادوك النصوص لأفلاطونية لي فيها سوقراط و محاوريه كيفحصو جوانب مختالفة من قضية ولا معنى مجرد، غالبا كيتعلق ب وحدة من الفضائل، و كيلقاو راسهم واحلين، ما قادرينش يحددو بشكل كامل داكشي لي كانو كيحسبو راسهم فاهمينو. سوقراط معروف ب مقولة "كانعرف بلي ماكانعرف والو"؛ قاصد بلي إدراك جهلنا هو أول خطوة ف التفلسف.

سوقراط أتر بزاف على لفلاسفة ف عصور لقديمة لمعطلة و بقا عندو تأتير ف لفترة لعصرية. درسوه لعولاما ف لقرون لوسطانية و لإسلامية و لعب دور مهم ف فكر النوضة الطاليانية، خصوصا ف وسط حركة تابنادميت. لإهتمام بيه بقا مستامر بلا توقف، كيما كيبان ف أعمال سورين كيركيݣارد و فريدريك نيتشه. تصوير سوقراط ف لفن، لأداب، و التقافة الشعبية خلاوه شخصية معروفة بزاف ف التقليد لفلسفي لغربي.

لمصادر و لمشكلة السوقراطية

[بدل | بدل لكود]

سوقراط ما وتقش تعاليمو. كولشي لي معروف عليه جاي من روايات ديال ناس آخرين: بشكل أساسي الفيلسوف أفلاطون والمؤرخ زينوفون، لي كانو بجوج تلامدتو؛ الكاتب المسرحي الكوميدي الأتيني أريستوفانيس (معاصر سوقراط)؛ و تلميد أفلاطون أرسطو، لي تزاد من بعد وفاة سوقراط. الروايات لي غالبا متناقضة من هاد المصادر القديمة كتزيد غير تصعب على العولاما باش يعاودو يبنيو أفكار سوقراط الحقيقية ب شكل موتوق، و هاد الوضعية معروفة ب المشكلة السوقراطية.[2] أعمال أفلاطون، زينوفون، والمؤلفين الآخرين لي كيخدمو شخصية سوقراط ك أداة تحقيق، مكتوبة على شكل حوار بين سوقراط و محاوريه و كتوفر المصدر الرئيسي للمعلومات على حياة سوقراط وفكرو. الحوارات السوقراطية (logos sokratikos) هو مصطلح بتاكرو أرسطو باش يوصف هاد النوع الأدبي الجديد.[3] واخا التواريخ المضبوطة ل تأليفها ما معروفاش، شي وحدين منهم غالبا تكتبو من بعد وفاة سوقراط.[4] كيما لاحض أرسطو ف اللول، مدى تصوير الحوارات لسوقراط ب شكل أصيل هو مسألة فيها نقاش.[5]

أفلاطون وزينوفون

[بدل | بدل لكود]

زينوفون، كان راجل صادق، ولايني ماكانش فيلسوف مدرب. مقدرش يفهم ولا يعبر ب شكل كامل على حجج سوقراط. كان كيعجبو سوقراط ل دكائو، وطنيتو، و شجاعتو ف ساحة المعركة. كيهضر على سوقراط ف ربعة ديال الأعمال: مدكرات سوقراط، لإقتصادي، الندوة، و دفاع سوقراط. كيدكر تا قصة فيها سوقراط ف كتابو أناباسيس.[6] لإقتصادي كيعاود نقاش على إدارة الدار العملية. بحال دفاع أفلاطون، دفاع زينوفون كيوصف محاكمة سوقراط، ولكن الأعمال كتختالف بزاف، و على حساب و. ك. س. ڭوتري، رواية زينوفون كتصور سوقراط عندو "رضا على النفس و راحة لا تطاق".[7] الندوة هو حوار ديال سوقراط مع أتينيين بارزين آخرين خلال نقاش بعد العشا، ولكن مختالف بزاف على ندوة أفلاطون: ماكاينش تداخل ف ليستة الضيوف. ف مدكرات سوقراط، كيدافع على سوقراط من تهم إفساد الشباب و معاداة لأرباب؛ ب شكل أساسي، هي مجموعة ديال قصص مختالفة تجمعات باش تبني دفاع جديد على سوقراط.[8]

تمتيل أفلاطون ل سوقراط ماشي ڭود.[9] أفلاطون كان تلميد ديال سوقراط و عاش من بعدو خمسين عام.[10] مدى مصداقية أفلاطون ف تمتيل صفات سوقراط هي مسألة نقاش؛ الرأي لي كيقول بلي مامتلش آراء خرة غير ديال سوقراط ما كيتشاركوش فيه بزاف ديال لعولاما لمعاصرين.[11] سباب هاد الشك هو عدم لإتساق ف شخصية سوقراط لي كيقدمها.[12] تفسير شايع ل هاد عدم لإتساق هو بلي أفلاطون حاول ف اللول يمتل سوقراط التاريخي ب دقة، بينما ف اللخر ف كتاباتو كان كيفرح يدخل ريّو الخاص ف كلمات سوقراط. تحت هاد لفهم، كاين فرق بين سوقراط السوقراطي ف أعمال أفلاطون اللولة و سوقراط لأفلاطوني ف كتابات أفلاطون اللخرة، واخا الحدود بيناتهم كتبان ضبابية.[13]

روايات زينوفون و أفلاطون كتختالف ف تقديمها ل سوقراط ك شخص. سوقراط ديال زينوفون ممل كتر، أقل فكاهة و أقل سخرية من ديال أفلاطون.[14][15] سوقراط ديال زينوفون مافيهش تا الخصائص الفلسفية ديال سوقراط أفلاطون —الجهل، المنهج السوقراطي ولا الإلينخوس— و كيشوف إنكراتيا (ضبط النفس) عندو أهمية محورية، و هادشي ماشي هو الحال مع سوقراط أفلاطون.[16] ب شكل عام، logoi Sokratikoi ماكتعاوناش نعاودو نبنيو سوقراط التاريخي حتى ف الحالات لي رواياتهم كتتداخل، حيت المؤلفين يقدرو يكونو أترو على روايات بعضياتهم.[17]

أريستوفانيس و مصادر خرة

[بدل | بدل لكود]

كتاب الكوميديا الأتينية، منهم أريستوفانيس، علقو تا هوما على سوقراط. أهم مسرحية كوميدية ديال أريستوفانيس بخصوص سوقراط هي لغيام، لي فيها سوقراط شخصية مركزية.[18] ف هاد المسرحية، أريستوفانيس كيقدم كاريكاتور ل سوقراط كيميل للسفسطة،[19] و كيسخر من سوقراط ك ملحد سخيف.[20] سوقراط ف لغيام مهتم ب الفلسفة الطبيعية، و هادشي كيتوافق مع تصوير أفلاطون ليه ففيدون. لي أكيد هو بلي ف سن 45، سوقراط كان ديجا كيجدب إهتمام الأتينيين ك فيلسوف.[21] ما واضحش واش عامال أريستوفانيس مفيد ف إعادة مصاوبة سوقراط التاريخي.[22]

مؤلفين قدام آخرين لي كتبو على سوقراط كانو إيسخينيس د سفيتوس، أنتيستنيس، أريستيپوس، بريسون، كيبيس، كريطو، إقليدس من ميݣارا، فيدون و أرسطو، كلهم كتبو من بعد وفاة سوقراط.[23] أرسطو ماكانش معاصر ل سوقراط؛ درس تحت أفلاطون ف لأكاديمية ديالو ل مدة عشرين عام.[24] أرسطو كيتعامل مع سوقراط بلا تحيز ديال زينوفون و أفلاطون، لي كان عندهم رابط عاطفي مع سوقراط، و كيتمعن ف مداهب سوقراط ك فيلسوف.[25] أرسطو كان على دراية ب لقصص لمكتوبة و ماشي لمكتوبة لمختالفة على سوقراط.[26] دورو ف فهم سوقراط محدود حيت ماكتبش بزاف عليه؛ و فاش كيكتب، كيكون مهتم ب شكل أساسي ب الحوارات اللولة ديال أفلاطون.[27] كاينين تا شكوك عامة على مصداقيتو ف تاريخ الفلسفة.[28] ولكن، شهادتو حيوية على ود فهم سوقراط.[29]

المشكلة السوقراطية

[بدل | بدل لكود]

ف عامال أساسي ب عنوان "قيمة سوقراط ك فيلسوف" (1818)، لفيلسوف فريدريش شلايرماخر هاجم روايات زينوفون؛ هجومو تلقى قبول واسع.[30] شلايرماخر نتاقد زينوفون ل تمتيلو السادج ل سوقراط. زينوفون كان عسكري، كيقول شلايرماخر، و داكشي علاش ماكانش ف موضع مزيان باش يشرح لأفكار السوقراطية. زيادة على هادشي، زينوفون كان متحيز ف تصويرو ل صاحبو و معلمو لقديم: كان كيعتاقد بلي سوقراط تعامل معاه ب شكل ماشي عادل من عند أتينا، و حاول يتبت وجهة نضرو بدل ما يقدم رواية محايدة. النتيجة، قال شلايرماخر، هي بلي زينوفون صور سوقراط ك فيلسوف ماشي ملهم.[31] ف بداية القرن العشرين، رواية زينوفون ترفضات ب شكل كبير.[32]

لفيلسوف كارل جويل، بنى حججو على تفسير أرسطو ل logos sokratikos، و قتارح بلي الحوارات السوقراطية ف الغالب خيالية: على حساب جويل، لمؤلفين ديال لحوارات كانو غير كيقلدو بعض الصفات السوقراطية ف لحوار.[33] ف نص القرن عشرين، فلاسفة بحال ؤلوف ڭيڭون و أوجين دوبريل، لي بناو على حجج جويل، قتارحو بلي دراسة سوقراط خاصها تركز على النسخ المختالفة ل شخصيتو و معتقداتو بدل ما تهدف ل معاودة مصاوبة سوقراط تاريخي.[34] من بعد، باحت لفلسفة لقديمة ݣريݣوري ڤلاستوس قتارح بلي لحوارات السوقراطية اللولة د أفلاطون كانت متوافقة كتر مع لأدلة اللخرة ا سوقراط تاريخي من كتاباتو اللخرة، و هي حجة مبنية على عدم لإتساق ف تصوير أفلاطون لمتطور ل سوقراط. ڤلاستوس تجاهل رواية زينوفون تماما إلا فاش كتوافق مع ديال أفلاطون.[34] مؤخرا، تشارلز هـ. كان عزز الموقف الشكوكي بخصوص المشكلة السوقراطية لي ماعندهاش حل، و قتارح بلي غير دفاع أفلاطون لي عندو أي أهمية تاريخية.[35]

السيرة الداتية

[بدل | بدل لكود]
معركة پوتيديا (432 ق.م): الأتينيين ضد الكورنتيين (تفصيل). مشهد سوقراط (وسط) كايعتق ألكيبياديص. نقش من القرن 18. على حساب أفلاطون، سوقراط شارك ف معركة پوتيديا، لإنسحاب د معركة ديليوم و معركة أمفيپوليس (422 ق.م).[36]

سوقراط تزاد ف 470 ولا 469 ق.م من سوفرونيسكوس و فيناييتي، لي كانو حرايفي د لحجر و قابلة، ب هاد الترتيب، ف الديم الأتيني ديال ألوپيكي؛ داكشي علاش، كان مواطن أتيني، حيت تزاد من أتينيين ميسورين نسبيا.[37] عاش قريب من قرايب باه و ورت، كيما كان العرف، جزء من ممتلكات باه، و هادشي ضمن ليه حياة خاوية نسبيا من لمشاكيل لمالية.[38] تعليمو تبع قوانين و عادات أتينا. تعلم لمهارات لأساسية ديال لقراية و لكتابة، و بحال أغلب الأتينيين لمرفحين، خدا دروس إضافية ف مجالات مختالفة بحال الجمباز، الشيعر و لموسيقى.[39] تزوج جوج مرات (ما واضحش شكون اللولة): زواجو من زانتيپي كان فاش سوقراط كان ف خمسيناتو، و زواج آخر كان مع بنت أريستيدس، و هو راجل دولة أتيني.[40] عندو تلاتة د الولاد مع زانتيپي.[41] سوقراط أدى خدمتو لعسكارية خلال لحرب لپيلوپونيسية و تميز ف تلاتة ديال لحملات، على حساب أفلاطون.[42]

حادتة خرة كتعكس حتيرام سوقراط للقانون هي عتيقال ليون من سالاميس. كيما كيوصف أفلاطون ف كتابو الدفاع، سوقراط و ربعة آخرين تعيط ليهم ل تولوس و تقال ليهم من عند ممتلين ديال الطغاة التلاتين (لي بداو كيحكمو ف 404 ق.م) يعتاقلو ليون باش يتعدم. سوقراط كان هو لوحيد لي متانع، و ختار يخاطر ب غضب الطغاة و نتيقامهم بدل ما يشارك ف داكشي لي كان كيعتابرو جريمة.[43]

سوقراط جدب إهتمام كبير من الجمهور لأتيني و خصوصا الشباب لأتيني.[44] كان شكلو خايب، عندو نيف مسطح و طالع، عينين خارجين و كرش كبيرة؛ صحابو كانو كينكتو على شكلو.[45] سوقراط ماكانش كيديها ف لمتع لمادية، بما فيها شكلو و راحتو الشخصية. كان كيهمل النضافة الشخصية، نادرا ما كيعوم، كيتمشى حافي، و عندو غير كبوط واحد مرقع.[46] كان معتادل ف ماكلتو، شرابو، و ممارستو للجنس، واخا ماكانش كيمارس المتيناع الكامل.[46] واخا سوقراط كان كينجادب للشباب، كيما كان شايع و مقبول ف اليونان القديمة، قاوم شغفو حيت، كيما كيوصف أفلاطون، كان مهتم كتر ب تعليم رواحهم.[47] سوقراط ماكانش كيقلب على الجنس من تلامدتو، كيما كان كيوقع غالبا بين الرجال الكبار و الصغار ف أتينا.[48] سياسيا، ماخداش صف ف الصراع بين الديمقراطيين و الأوليڭارشيين ف أتينا؛ نتاقدهم بجوج.[49] شخصية سوقراط كيما بانت ف الدفاع، كريتو، فيدون والندوة كتوافق مع مصادر خرة ل درجة كتعطي تقة ف تصوير أفلاطون ل سوقراط ف هاد الأعمال بلي كيمتل سوقراط لحقيقي.[50]

سوقراط مات ف أتينا ف 399 ق.م من بعد محاكمة على عدم التقوى (asebeia) و إفساد الشباب.[51] دوز نهارو اللخر ف الحبس وسط صحابو و أتباعو لي عرضو عليه طريق يهرب بيها، ولايني رفض. مات ف الصباح التالي، على حساب الحكم ديالو، من بعدما شرب فالزلاز سام (نّݣليزية: hemlock).[52] على حساب فيدون، كلماتو اللخرة كانت: "كريطو، راه كانتسالو فرّوج ل أسكليپيوس. ما تنساش تخلص الدين."[53]

محاكمة سوقراط

[بدل | بدل لكود]

ف 399 ق.م، سوقراط تتّاهم رسميا ب إفساد عقول شباب أتينا، و بـ asebeia (عدم التقوى)، أي عبادة أرباب مزيفة و عدم عبادة أرباب أتينا.[54] ف المحاكمة، سوقراط دافع على راسو بلا فايدة. لقاوه مدنب ب أغلبية لأصوات لي عطاتها هيئة محلفين من مئات المواطنين الأتينيين الدكور، و على حساب العرف، قتارح العقوبة ديالو: بلي خاصو يتعطاه ماكلة و سكنى فابور من الدولة على الخدمات لي قدمها للمدينة،[55] ولا ك بديل، بلي يتغرم مينا وحدة ديال الفضة (على حسابو، هادشي لي كان عندو).[55] المحلفين رفضو لعرض ديالو و أمرو ب عقوبة لإعدام.[55]

سوقراط تتّاهم ف مناخ سياسي متوتر.[56] ف 404 ق.م، الأتينيين تهزمو من عند السپارطيين ف المعركة البحرية الحاسمة ديال إيڭوسپوتامي، و من بعد، السپارطيين حاصرو أتينا. بدلو الحكومة الديمقراطية ب حكومة جديدة، موالية للأوليڭارشية، تسمات الطغاة التلاتين.[56] بسباب إجراءاتهم لإستبدادية، بعض الأتينيين تنضمو باش يطيحو الطغاة — و فعلا، قدرو يديروها ل مدة قصيرة — حتى وصل طلب مساعدة من الطغاة ل سپارطة و تقلب على حل وسط. ولكن، فاش مشاو السپارطيين مرة خرة، الديمقراطيين ستاغلو الفرصة باش يقتلو الأوليݣارشيين و يسترجعو حكومة أتينا.[56]

التهم ضد سوقراط بداها شاعر، ميليتوس، لي طلب عقوبة لإعدام على أساس تهمة asebeia.[56] لآخرين لي تاهموه كانو أنيتوس و ليكون. من بعد شهر ولا شهرين، ف تواخر الربيع ولا بداية الصيف، بدات المحاكمة و غالبا دامت أغلب نهار واحد.[56] كانو جوج مصادر رئيسية للتهم المبنية على الدين. اللول، سوقراط رفض التجسيم ديال الديانة اليونانية التقليدية ب نفي بلي لأرباب كيديرو حوايج خايبة بحال البشر. التاني، كان كيبان بلي كيآمن بـ دايمونيون (ليونانية لبالية: δαιμόνιον) — صوت داخلي لي، كيما قتارحو متهمينو، عندو أصل رباني.[56]

دفاع أفلاطون كيبدا ب سوقراط لي كيجاوب على بزاف د التبرڭيڭات ضدو لي سببات ليستة د لإتهام.[57] اللول، سوقراط كيدافع على راسو ضد الشايعة بلي ملحد فيلسوف طبيعي، كيما تصور ف مسرحية أريستوفانيس لغيام؛ ولا سفسطائي.[58] ضد إدعاءات إفساد الشباب، سوقراط كيجواب بلي ما عمر فسد شي حد على قصد، حيت إفساد شي حد فيه خطر لإفساد ب المقابل، و هادشي ماشي منطقي، حيت لفساد ما مرغوبش فيه.[59] ف التهمة التانية، سوقراط كيطلب توضيح. ميليتوس كيرد ب تكرار تهمة بلي سوقراط ملحد. سوقراط كيشير للتناقض بين الإلحاد و عبادة أرباب مزيفة.[60] من بعد كيقول بلي هوّ "هدية من الله" للأتينيين، حيت النشاطات ديالو ف اللخر كاتفيد أتينا؛ داكشي علاش، ف إدانتهم ليه ب لإعدام، أتينا براسها غادي تكون أكبر خاسر.[61] من مور هادشي، كيقول بلي واخا حتى شي بنادم ما يقدر يوصل للحكمة، السعي ليها هو أحسن حاجة يقدر يديرها لواحد، قاصد بلي لفلوس و لهيبة ماشي غالية كيما كيتعتاقد عادة.[62]

موت سوقراط، ديال جاك لوي داڤيد (1787). سوقراط زاروه صحابو ف آخر ليلة ليه ف لحبس. نقاشو معاهم عطى كريطو وفيدون ديال أفلاطون.[63]

سوقراط تعطاتو الفرصة باش يقتارح عقوبات بديلة ل راسو من بعدما لقاوه مدنب. كان يقدر يطلب لإدن يهرب من أتينا و يعيش ف لمنفى، ولايني مادارهاش. على حساب زينوفون، سوقراط مادار حتى شي قتيراح، بينما على حساب أفلاطون، قتارح بلي وجبات فابور خاصها توفر ليه يوميا عتيرافا ب قيمتو لأتينا أولا، ب جدية كتر، بلي غرامة خاصها تفرض عليه.[64] لمحلفين فضلو عقوبة لإعدام ب شريب كاس ديال فالزلاز سام.[65] ف لموقابيل، سوقراط نبّه لمحلفين و لأتينيين بلي إنتقادهم من عند تلامدتو لكتيرين مايمكنش يتفاداه، إلا يلا ولاو رجال مزيانين.[55] من بعد تعطال سبباتو لإحتفالات الدينية لأتينية، سوقراط دوز نهارو اللخر ف لحبس. صحابو زاروه و عرضو عليه فرصة يهرب بيها، ولايني رفض.[66]

السؤال ديال شنو لي حفز لأتينيين يدينو سوقراط باقية مسألة متيرة للجدل بين لعولاما.[67] كاينين جوج نضريات. اللولة هي بلي سوقراط تدان على أسس دينية؛ التانية، بلي تتّاهم و تدان ل أسباب سياسية.[67] تفسير آخر، أحدت، كيجمع بين الجوج نضريات الدينية و السياسية، و كيقول بلي الدين و الدولة ماكانوش منفاصلين ف أتينا لقديمة.[68]

لحجة ديال لإضطهاد الديني كيدعمها حقيقة بلي روايات أفلاطون و زينوفون على لمحاكمة كاتركز ف الغالب على تهمات ديال عدم التقوى. ف هادوك الروايات، سوقراط كيتصور على بلي مادار حتى شي مجهود باش ينفي حقيقة بلي ماكانش كيآمن ب أرباب أتينا. ضد هاد الحجة كاين حقيقة بلي بزاف ديال الشكاك و لفلاسفة لملحدين ف داك لوقت ما تتابعوش.[69] على حساب لحجة ديال لإضطهاد السياسي، سوقراط تستهدف حيت شافوه تهديد للديموقراطية. كان صحيح بلي سوقراط ماكانش كيدافع على الديموقراطية ف عهد حكم الطغاة التلاتين و بلي أغلب تلامدتو كانو ضد الديموقراطيين.[70] نظرية لإضطهاد السياسي كايعارضها وجود عفو تمنح للمواطنين لأتينيين ف 403 ق.م باش يمنعو تصعيد لحرب أهلية من بعد سقوط الطغاة. ولكن، كيما كيبين النص من محاكمة سوقراط و نصوص خرة، لي تاهموه يقدرو يكونو غدّاو لخطاب ديالهم ب أحدات قبل 403 ق.م.[71]

الفلسفة

[بدل | بدل لكود]

المنهج السوقراطي

[بدل | بدل لكود]
نقاش سوقراط و أسپازيا ديال نيكولا أندري مونصيو. نقاشات سوقراط ماكانتش مقتاصرة على مجموعة نخبوية صغيرة؛ كان كيدخل ف حوارات مع لبرانيين و مع ناس من جميع الطبقات لإجتماعية، رجال و عيالات.[72]

خاصية أساسية ديال سوقراط أفلاطون هي لمنهج السوقراطي، ولا منهج التفنيد (إلينخوس).[73] كيبرز كتر ف أعمال أفلاطون اللولة، بحال الدفاع، كريطو، ݣورݣياس، الجمهورية (لكتاب اللول)، و غيرها.[74] لإلينخوس النمودجي كيمشي ب هاد الشكل. سوقراط كيبدا نقاش على موضوع مع خبير معروف ف لموضوع، غالبا ب صحبة بعض الشباب و الدراري، و ب لحوار كيتبت بلي معتقدات و حجج لخبير متناقضة.[75] سوقراط كيبدا الحوار ب سؤال محاورو على تعريف للموضوع. فاش كيسول أسئلة كتر، أجوبة لمحاور ف اللخر كتناقض التعريف اللول. لخلاصة هي بلي الخبير ماكانش كيعرف التعريف ف لأصل.[76] لمحاور يقدر يجي ب تعريف مختالف. هاد التعريف الجديد، ب دورو، كيجي تحت تمحيص تساؤل سوقراطي. مع كل جولة من السؤال و الجواب، سوقراط و محاورو كيتأملو يقربو للحقيقة. غالبا، كيستامرو يكشفو جهلهم.[77] حيت تعريفات لمحاورين غالبا كتمتل الرأي السايد ف شي قضية، النقاش كيحط شك ف الرأي لعام.[78]

سوقراط كيختابر تا ريّو لخاص من خلال لمنهج السوقراطي. داكشي علاش سوقراط ما كيعلمش مدهب فلسفي تابت. بلاصت من هادشي، كيعتارف ب جهلو و هو كيقلب على لحقيقة مع تلامدتو و محاوريه.[78]

لعولاما شككو ف الصحة و الطبيعة المضبوطة ديال لمنهج السوقراطي، ولا فعلا واش كان منهج سوقراطي.[79] ف 1982، باحت الفلسفة لقديمة ݣريݣوري ڤلاستوس دّاعى بلي المنهج السوقراطي مايمكنش يتخدم باش يتبت صحة ولا خطأ قضية. بلاصت من هادشي، ڤلاستوس قال، بلي كانت طريقة باش يبين بلي معتقدات لمحاور ماشي متاسقة.[80] كانو جوج خطوط فكر رئيسية ب خصوص هاد الرأي، على حساب واش متقبل بلي سوقراط كيقلب يتبت خطأ إدعاء.[81] على حساب خط الفكر اللول، لمعروف ب النهج لبناوي constructivism، سوقراط فعلا كيقلب يفند إدعاء ب هاد الطريقة، و الطريقة كاتعاون ف لوصول ل تصريحات إيجابية.[82] النهج اللابناوي anticonstructivism كيقول بلي سوقراط باغي غير يتبت عدم لإتساق بين لمقدمات و لخلاصة ديال لحجة اللولة.[83]

أولوية التعريف السوقراطية

[بدل | بدل لكود]

سوقراط كيبدا نقاشاتو بإعطاء الأولوية للبحت على التعريفات.[84] ف أغلب الحالات، سوقراط كيبدا حديتو مع خبير ف موضوع ب التقلاب على تعريف — ب سؤال، متلا، شنو هي لفضيلة، لخير، لعدالة، ولا الزعامة.[85] باش يتبت تعريف، سوقراط كيجمع ف اللول أمتلة واضحة ديال شي فضيلة و من بعد كيقلب على شنو لي مشترك بيناتهم.[86] على حساب ڭوتري، سوقراط عاش ف عصر لي فيه السفسطائيين تحدّاو معنى لفضايل، و شككو ف جوهرها؛ سعي سوقراط للتعريف كان محاولة باش يصفي الجو من شكوكيتهم الراديكالية.[87]

بعض لعولاما قالو بلي سوقراط ما كيدعمش أولوية التعريف ك مبدأ، حيت لقاو حالات ما دارش فيها هكا.[88] شي وحدين قالو بلي هاد لأولوية ديال التعريف جات من أفلاطون ماشي من سوقراط.[89] لفيلسوف پيتر ڭيتش، لي كيتقبل بلي سوقراط كيدعم أولوية التعريف، كيلقى التقنية مغلوطة. على حساب ڭيتش، لواحد يقدر يعرف قضية وخا ما يقدرش يعرف لمصطلحات لي لقضية مدكورة بيها.[90]

الجهل السوقراطي

[بدل | بدل لكود]
أطلال معبد أپولو ف ديلفي، فين كانت پيثيا. لقولة الديلفية عرف راسك كانت مهمة ل سوقراط، كيما كيبان ف بزاف ديال الحوارات السوقراطية ديال أفلاطون، خصوصا ف الدفاع.[91]

سوقراط أفلاطون غالبا كيقول بلي واعي ب عدم معرفتو، خصوصا فاش كيناقش مفاهيم أخلاقية بحال أريطي (يعني لخير، الزعامة) حيت ما كيعرفش طبيعة هاد لمفاهيم.[92] متلا، ف محاكمتو، و حياتو على لحكاكة، سوقراط كيقول: "كيبان لي إيڤينوس راجل سعيد، يلا كان بصح عندو هاد لفن (technē)، و كيقرّي ب خلصة معقولة. معلوم كنت غادي نفخر و نزهو يلا كنت كنعرف (epistamai) هاد لحوايج، ولكن ما كنعرفهمش (epistamai)، أ سيادي".[93] ف شي حوارات د أفلاطون، سوقراط كيبان بلي كينسب ل راسو شوية د لمعرفة، و يقدر يبان ڭاع متشدد ف ريّو ب النسبة ل شي واحد كيقول بلي جاهل.[94]

كاينين تفسيرات مختالفة للتناقض السوقراطي (من غير بلي سوقراط ب بساطة متناقض).[95] واحد التفسير هو بلي سوقراط كيكون إما ساخر ولا متواضع ل أغراض تربوية: كيهدف يخلي محاورو يفكر ل راسو بلاصت ما يوجهو ل جواب ديجا محدد ل أسئلتو الفلسفية.[96] تفسير آخر هو بلي سوقراط عندو تفسيرات مختالفة ل معنى "المعرفة". المعرفة، ب النسبة ليه، تقدر تعني فهم منهجي ل موضوع أخلاقي، لي سوقراط كيرفض ڭاع أي نوع ديال الإتقان فيه؛ ولا تقدر تشير ل إدراك من مستوى هابط، لي سوقراط يقدر يتقبل بلي عندو.[97] كيفما كان حال، كاين إجماع بلي سوقراط كيتقبل بلي العتيراف بعدم المعرفة هو أول خطوة نحو الحكمة.[98]

سوقراط معروف بلي تبرا من المعرفة، و هو إدعاء مجسد ف المقولة "كانعرف بلي ماكانعرف والو". هادشي غالبا كينتسب ل سوقراط على أساس تصريح ف دفاع أفلاطون، واخا نفس الرأي كيلقاه الواحد كيتعاود ف كتابات أفلاطون اللولة على سوقراط.[99] ولايني ف تصريحات خرة كيشير ولا ڭاع كيقول بلي عندو معرفة. متلا، فدفاع أفلاطون سوقراط كيقول: "...ولكن بلي نضلم و نعصي داك لي علا مني، رب ولا باشار، راني كانعرف بلي هادا شر و نيڤو هابط..." (الدفاع، 29b6–7).[100] ف نقاشو مع كاليكليص، كيقول: "...راني كانعرف بلي يلا تافقتي معايا ف هاد لومور لي روحي كاتآمن بيها، غادي يكونو هوما لحقيقة براسها..."[100]

واش سوقراط كان كيعتاقد بصح بلي ماعندوش معرفة ولا غير كان كيتضاهر ب الإيمان ب جهلو باقية مسألة نقاش. تفسير شايع هو بلي كان فعلا كيتضاهر ب التواضع. على حساب نورمان ڭولي، سوقراط كان كيدير هادشي باش يغري محاوريه يهضرو معاه. من جهة خرة، تيرينس إيروين كيقول بلي كلمات سوقراط خاصها تّاخد حرفيا.[101]

ݣريݣوري ڤلاصطوص كيقول بلي كاين دليل كافي باش ينفي لإدعاءات بجوج. ف وجهة نضرو، كاينين جوج معاني منفصلة لـ"المعرفة" عند سوقراط: المعرفة-C والمعرفة-E (C كتعني "يقين"، و E كتعني إلينخوس، يعني المنهج السوقراطي). المعرفة-C هي شي حاجة مافيهاش شك بينما المعرفة-E هي المعرفة المستامدة من إلينخوس سوقراط.[102] داكشي علاش، سوقراط كيقول الحقيقة فاش كيقول بلي كيعرف-C شي حاجة، وهو صادق تا فاش كيقول بلي كيعرف-E، متلا، بلي راه شر لواحد يعصي داك لي علا منو، كيما كيقول ف الدفاع.[103] ماشي ݣاع العولاما تافقو مع هاد التنائية الدلالية. جيمس هـ. ليشر قال بلي سوقراط دّاعى ف حوارات مختالفة بلي كلمة وحدة مرتابطة ب معنى واحد (أي فهيپياس لأكبر، مينون، ولاخيس).[104] ليشر كيقول بلي واخا سوقراط دّاعى بلي ماعندوش معرفة على طبيعة لفضائل، كان كيعتاقد بلي ف شي الحالات، الناس يقدرو يعرفو شي فتيراضات أخلاقية.[105]

السخرية السوقراطية

[بدل | بدل لكود]

كاين فتيراض واسع بلي سوقراط كان ساخر، مبني ف الغالب على تصوير سوقراط من عند أفلاطون و أرسطو.[106] سخرية سوقراط دقيقة و مضحكة شوية ل درجة بلي كتخلي القاري غالبا كيتساءل واش سوقراط كيلعب بلعاني ب لكلام.[107] يوتيفرون ديال أفلاطون عامر ب السخرية السوقراطية. القصة كتبدا فاش سوقراط كيتلاقا مع يوتيفرون، راجل تّاهم باه ب القتيلة. فاش سوقراط سمع ف اللول تفاصيل القصة، علق، "ما كنضنش بلي أي واحد يقدر يدير هادشي [يقاضي باه] ب شكل صحيح، راه ضروري يكون شي حد مشا بعيد ف لحكمة". فاش يوتيفرون تفاخر ب فهمو للألوهية، سوقراط رد بلي "مهم بزاف نولي تلميدك".[108] سوقراط غالبا كيتشاف ساخر فاش كيخدم المديح للإطراء ولا فاش كيهضر مع محاوريه.[109]

العولاما مقسومين على السباب علاش سوقراط كيخدم السخرية. على حساب رأي تقدم من الفترة الهيلينيستية، السخرية السوقراطية هي طريقة لعوبة باش يجدب نتيباه الجمهور.[110] خط فكر آخر كيقول بلي سوقراط كيخبي رسالتو الفلسفية ب السخرية، و كيخليها مفهومة غير للي يقدرو يفصلو الأجزاء لي ف كلامو لي ساخرة على لي ماشي ساخرة.[111] ݣريݣوري ڤلاصطوص لقى نمط معقد كتر ديال السخرية ف سوقراط. ف وجهة نضر ڤلاصطوص، كلمات سوقراط عندها معنى مزداوج، ساخر و ماشي ساخر. متال واحد هو فاش كينفي بلي عندو معرفة. ڤلاصطوص كيقول بلي سوقراط كيكون ساخر فاش كيقول ما عندوش معرفة (فين "المعرفة" كتعني شكل هابط ديال الإدراك)؛ بينما، على حساب معنى آخر لـ "المعرفة"، سوقراط كيكون جاد فاش كيقول ما عندوش معرفة ف المسايل الأخلاقية. هاد الرأي ما كيتشاركوش فيه بزاف ديال العولاما الآخرين.[112]

اليودايمونية و الفكرية السوقراطية

[بدل | بدل لكود]

سوقراط كايعتابر بلي السعي ورا اليودايمونيا كيحفز ݣاع الأفعال البشرية، نيشان ولا ماشي نيشان.[113] الفضيلة و المعرفة مرتابطين، ف وجهة نضر سوقراط، ب اليودايمونيا، ولكن شحال كان كيعتابرهم مرتابطين بزاف باقيا مسألة نقاش. شي وحدين كيقولو بلي سوقراط كان كيعتاقد بلي الفضيلة و اليودايمونيا متطابقين. على حساب رأي آخر، الفضيلة كاتخدم وسيلة على ود اليودايمونيا (أطروحات "التطابق" و "الكفاية"، ب هاد الترتيب).[114] نقطة نقاش خرة هي واش، على حساب سوقراط، الناس كيبغيو داكشي لي هو بصح خير — أولا، ب الأحرى، غير داكشي لي كيشوفوه خير.[114]

لفكرية لأخلاقية كاتشير للدور البارز لي عطاه سوقراط للمعرفة. كان كيعتاقد بلي ݣاع الفضايل مبنية على المعرفة (داكشي علاش سوقراط كيتوصف بلي لمفكر ديال لفضيلة). كان كيعتاقد تا بلي البشر كاتوجههم القوة الإدراكية باش يفهمو شنو كيبغيو، و كان كيقلل من دور التحفيز (رأي كيتسمى فكر تحفيزي).[115] ف پروطاݣوراس أفلاطون (345c4–e6)، سوقراط كيشير بلي "حتى واحد ما كيغلط على قصد"، و هادشي ولا السمة المميزة للفكر د الفضيلة السوقراطي.[116] ف فلسفة سوقراط الأخلاقية، كتعطى الأولوية للعقل ك وسيلة باش يعيش لواحد حياة مزيانة؛ سوقراط كيقلل من أهمية المعتقدات ولا العواطف اللاعقلانية.[117] حوارات أفلاطون لي كيدعم الدافعية الفكرية ديال سوقراط — كيما تسمات هاد الأطروحة — هي ف الغالب ݣورݣياس (467c–8e, فين سوقراط كيناقش لفعايل ديال طاغية لي ماكايفيدوهش) و مينون (77d–8b, فين سوقراط كيشرح ل مينون وجهة نضرو بلي حتى واحد ما كيبغي الحوايج الخايبة، إلا يلا ما كانوش كيعرفو شنو هو الخير و الشر ف الأصل).[118] العولاما بقاو حايرين ف وجهة نضر سوقراط بلي أكراسيا (التصرف بسباب عواطف لاعقلانية، عكس معرفة ولا معتقدات الواحد) مستحيلة. أغلبهم كيعتاقدو بلي سوقراط ماخلاش بلاصة للرغبات اللاعقلانية، واخا شي وحدين كيقولو بلي سوقراط عتارف ب وجود دوافع لاعقلانية، ولايني نفى بلي كتلعب دور أساسي ف لماخدة د القرار.[119]

الدين

[بدل | بدل لكود]
طبعة هنري إستيان ديال عام 1578 د يوتيفرون، نص لاتيني و يوناني متوازي. ترجمات إستيان تخدمو بزاف و تعاودو ف الطباعة ل كتر من جوج قرون.[120] نقاش سوقراط مع يوتيفرون باقي مؤتير ف النقاشات اللاهوتية.[121]

اللامتيتالية ديال سوقراط للدين تحدات آراء عصرو و النقد ديالو عاود تشكيل الخطاب الديني للقرون الجاية.[122] ف اليونان القديمة، الدين المنضم كان مجزأ، كيتحتافل بيه ف عدد ديال المهرجانات ل أرباب معينة، بحال ديونيسيا المدينة، ولا ف الطقوس د الدار، و ماكانوش نصوص مقدسة. الدين كان كيتخلط مع الحياة اليومية للمواطنين، لي كانو كيديرو واجباتهم الدينية الشخصية ف الغالب ب القرابين ل عدد متنوع د لأرباب.[123] واش سوقراط كان راجل دين ممارس ولا 'ملحد مستفز' باقيا نقطة نقاش من العصور القديمة؛ محاكمتو تضمنت تهمات عدم التقوى، و الجدل مازال ما سالاش.[124]

سوقراط كيناقش الألوهية و الروح ف الغالب ف ألكيبياديص، يوتيفرون، والدفاع.[125] ف ألكيبياديص سوقراط كيربط الروح البشرية ب الألوهية، و كيستنتج "إدن هاد الجزء منها كيشبه الله، و كل من كيشوف فيها، و كيوصل يعرف كل ما هو رباني، غادي يلقى بيه أفضل معرفة د راسو."[126] نقاشاتو على الدين ديما كتجي تحت عدسة عقلانيتو.[127] سوقراط، ف يوتيفرون، كيوصل ل خلاصة كاتبعدو بزاف على الممارسة المعتادة ف العصر ديالو: كيعتابر القرابين للأرباب ماعندها فايدة، خصوصا فاش كتكون مدفوعة ب الأمل ف الحصول على مكافأة ف المقابل. بلاصت من هادشي، كيدعي للفلسفة و السعي ورا المعرفة تكون الطريقة الرئيسية ديال عبادة لأرباب.[128] رفضو للأشكال التقليدية ديال التقوى، و ربطها ب المصلحة الشخصية، كان كيشير بلي الأتينيين خاصهم يقلبو على التجربة الدينية من خلال فحص الدات.[129]

سوقراط قال بلي لأرباب حوكاما و عادلين ب طبيعتهم، و هو تصور بعيد بزاف على الدين التقليدي ف داك الوقت.[130] ف يوتيفرون، كاتبان معضلة يوتيفرون. سوقراط كيسول محاورو على العلاقة بين التقوى و إرادة رب قوي: واش شي حاجة خيرة حيت هي إرادة هاد الإله، ولا واش هي إرادة هاد الإله حيت هي خيرة؟[131] ب عبارة خرة، واش التقوى كاتبع الخير، ولا الإله؟ مسار الفكر السوقراطي كيتعارض مع اللاهوت اليوناني التقليدي، لي كان كياخد lex talionis (مبدأ لعين ب لعين) ك أمر مسلم به. سوقراط كان كيعتاقد بلي الخير مستاقل على لأرباب، و بلي لأرباب براسهم خاصهم يكونو أتقيا.[132]

سوقراط كيأكد إيمانو ب لأرباب ف دفاع أفلاطون، فين كيقول للمحلفين بلي كيعتارف ب لأرباب كتر من متهميه.[133] وجود لأرباب مسلم به عند د سقراط ديال أفلاطون؛ ف تا شي حوار ما كيبحت واش لأرباب كاينين ولا لا.[134] ف الدفاع، يمكن الدفاع على قضية بلي سوقراط لاأدري، مبنية على نقاشو على المجهول الكبير من بعد الموت،[135] و ف فيدون (الحوار مع تلامدتو ف نهارو اللخر) سوقراط كيعبر على إيمان واضح ب خلود الروح.[136] كان كيآمن تا ب الوحي، العرافة، و شكال خرين د التواصل من لأرباب. هاد العلامات ماعطاتوش أي إيمان إيجابي ف المسايل الأخلاقية؛ بلاصت من هادشي، كانت تنبؤات ب أحدات مستقبلية ماشي مواتية.[137]

ف مدكرات سوقراط ديال زينوفون، سوقراط كيبني حجة قريبة من حجة التصميم الدكي الغائية المعاصرة. كيقول بلي حيت كاينين بزاف ديال الخصائص ف الكون لي كاتبين "علامات على التفكير المسبق" (متلا، الجفون)، خاص يكون خالق رباني خلق الكون.[134] من بعد كيستنتج بلي الخالق خاصو يكون عالم ب كلشي و قادر على كلشي و تا بلي خلق الكون على ود تقدم البشرية، حيت البشر ب طبيعتهم عندهم بزاف ديال القدرات لي الحيوانات لخرة ماعندهاش.[138] شي مرات، سوقراط كيهضر على رب واحد، و ف مرّات خرين كيشير لـ "أرباب" ب الجمع. هادشي تفسر بلي إما كان كيعتقد بلي رب أسمى كيأمر أرباب خرين، ولا بلي لأرباب لمتنوعين كانو أجزاء، ولا تجليات، ل هاد الإله الواحد.[139]

العلاقة بين معتقدات سوقراط الدينية و إلتزامو الصارم ب لعقلانية كانت موضوع نقاش.[140] أستاد الفلسفة مارك ماكفيران كيقول بلي سوقراط فسر كل علامة ربانية من خلال العقلانية العلمانية على ود التأكيد.[141] أستاد الفلسفة القديمة أ. أ. لونڭ كيقول بلي من المفارقة التاريخية نفتارضو بلي سوقراط كان كيعتقد بلي الجوج مجالات الديني و العقلاني منفاصلين.[142]

الدايمونيون السوقراطي

[بدل | بدل لكود]
ألكيبياديص كايتلقى التعليم من سوقراط، لوحة من 1776 لفرانسوا أندري فينسنت، كاتصور دايمون سوقراط[143]

ف بزاف ديال النصوص (بحال يوتيفرون أفلاطون 3b5؛ الدفاع 31c–d؛ مدكرات سوقراط ديال زينوفون 1.1.2) سوقراط كيقول بلي كيسمع علامة دايمونية—صوت داخلي كيسمعو غالبا فاش كيكون على بونت يدير غلطة. سوقراط عطى وصف قصير ل هاد الدايمونيون ف محاكمتو (الدفاع 31c–d): "...السباب ف هادشي هو حاجة سمعتوني كاندكرها بزاف ف بلايص مختالفة — أي، حقيقة بلي كانعيش شي حاجة ربانية و دايمونية، كيما كتب ميليتوس ف إتهامو، على سبيل السخرية. بدات ف طفولتي، ضهور صوت معين. فاشما كيضهر، ديما كيردني على مسار الفعلة لي كنت ناوي نديرها، ولكن ما كيعطينيش نصيحة إيجابية. هادا هو لي عارض ممارستي للسياسة، و كنضن بلي فعلو كان مزيان بزاف."[144] الأبحات لعصرية فسرات هاد الدايمونيون السوقراطي ب شكل مختالف كـ مصدر عقلاني ديال لمعرفة، دافع، حلم ولا حتى تجربة خارقة للطبيعة حس بيها سوقراط الزاهد.[145]

الحب

[بدل | بدل لكود]
سوقراط و ألكيبياديص، ديال كريستوفر ڤيلهلم إيكرسبرڭ، 1813–1816

بعض النصوص كتقول بلي سوقراط كان عندو علاقات حب مع ألكيبياديص و شباب آخرين؛ نصوص خرة كتقول بلي صداقة سوقراط مع الشباب كانت كتهدف غير ل تحسينهم و ماكانتش جنسية. فݣورݣياس، سوقراط كيقول بلي كان عاشق مزداوج ل ألكيبياديص و لفلسفة، و مغازلتو واضحة ف پروطاݣوراس، مينون (76a–c) و فيدروس (227c–d). ولكن، الطبيعة المضبوطة ديال علاقتو مع ألكيبياديص ما واضحاش؛ سوقراط كان معروف ب ضبط النفس ديالو، بينما ألكيبياديص كيعتارف ف الندوة بلي حاول يغوي سوقراط ولايني فشل.[146]

النضرية السوقراطية ف الحب كاتّستنتج ف الغالب من ليسيس، فين سوقراط كيناقش الحب[147] ف مدرسة مصارعة ب صحبة ليسيس و صحابو. كيبداو حوارهم ب البحت ف حب الوالدين و كيفاش كيبان ب النسبة للحرية و الحدود لي الوالدين كيحطوها ل ولادهم. سوقراط كيستنتج بلي يلا كان ليسيس مافيه فايدة ڭاع، حتى واحد مغادي يبغيه — حتى والديه. واخا أغلب العولاما كيعتاقدو بلي هاد النص كان القصد منو يكون مضحك، تقتارح تا بلي ليسيس كيبين بلي سوقراط كان عندو رأي أناني ف الحب، لي على حسابو كانبغيو غير الناس لي فيهم فايدة لينا ب شي طريقة.[148] عولاما آخرين ما متافقينش مع هاد الرأي، و كيقولو بلي مدهب سوقراط كيخلي بلاصة للحب اللاأناني للزوج(ة)؛ وحدين آخرين كاينفيو بلي سوقراط كيلمح ڭاع ل أي دافع أناني.[149] ف الندوة، سوقراط كيقول بلي لولاد كيعطيو إنطباع غالط ب لخلود ل والديهم، و هاد الفهم الغالط كينتج شكل من الوحدة بيناتهم.[150] العولاما كيشيرو تا بلي عند سوقراط، الحب راه عقلاني.[151]

سوقراط، لي كيقول بلي كيعرف غير بلي ما كيعرف والو، كيدير ستيتناء (ف الندوة أفلاطون)، فين كيقول بلي غادي يقول الحقيقة على الحب، لي تعلمها من 'مرا دكية'. الكلاسيكي أرمون دونڭور قدم حجة بلي سوقراط كان قريب من أسپازيا ف شبابو، و بلي شخصية ديوتيما د مانتينيا، لي سوقراط كينسب ليها فهمو للحب ف الندوة، مبنية عليها؛[152] ولكن، ممكن تا بلي ديوتيما كانت شخصية بصح.


لفلسفة السياسية ديال سقراط

[بدل | بدل لكود]
فقرة مازالا خاوية ولا ناقصة:
هاد لفقرة مازالا خاوية ولا ناقصة، زعم باش تبدّل فيها و نزيدو نكبّروها

الترات

[بدل | بدل لكود]

العصور الكلاسيكية القديمة

[بدل | بدل لكود]

تأتير سوقراط كان هائل ف الفلسفة من بعد وفاتو. من غير لأبيقوريين و البيرونيين، علاين ݣاع التيارات الفلسفية من بعد سوقراط رجعات أصولها ليه: أكاديمية أفلاطون، ليسيوم أرسطو، الكلبيين، و الرواقيين.[153] الإهتمام ب سوقراط بقا كيتزاد حتى للقرن التالت.[154] المدارس ختالفو ف الإستجابة ل أسئلة أساسية بحال غاية الحياة ولا طبيعة أريطي (الفضيلة)، حيت سوقراط ماعطاهومش جواب، و داكشي علاش، المدارس الفلسفية تفرقات بزاف من بعد ف تفسيرها ل فكرو.[155] كايتڭال بلي سقراط حوّل تركيز الفلسفة من دراسة العالم الطبيعي، كيما كان الحال ب النسبة للفلاسفة ما قبل سوقراط، ل دراسة الشؤون البشرية.[156]

الأتباع المباشرين ديال سوقراط كانو تلامدتو، إقليدس د ميڭارا، أريستيپوس، و أنتيسطينيس، لي خرجو ب ستنتاجات مختالفة بيناتهم و تبعو مسارات مستاقلة.[157] المداهب الكاملة ديال تلاميد سوقراط صعيب معاودة تشكيلها.[158] أنتيسطينيس كان عندو حتقار عميق للسلاعي المادية. على حسابو، الفضيلة هي كولشي لي مهم. ديوجين و الكلبيين كملو ف هاد الخط الفكري.[159] ف الجهة المقابلة، أريستيپوس أيد جميع التروة و عاش حياة د لمرفحين. من بعدما غادر أتينا و رجع ل مدينتو الأصلية قورينا، أسس المدرسة الفلسفية القورينائية لي كانت مبنية على مدهب المتعة، و كاتأيد عيش حياة ساهلة مع لمتع د لڭسدة. مدرستو نتاقلات ل حفيدو، لي عندو نفس السمية. كاين حوار ف عامال زينوفون لي فيه أريستيپوس كيقول بلي باغي يعيش بلا ما يبغي يحكم ولا يتحكم فيه من عند آخرين.[160] زيادة على داكشي، أريستيپوس حافض على موقف شكوكي ف نضرية المعرفة، و كيقول بلي نقدرو نكونو متأكدين غير من مشاعرنا الخاصة. هاد الرأي كيتوافق مع الفهم السوقراطي للجهل.[161] إقليدس كان معاصر ل سوقراط. من بعد محاكمة و وفاة سوقراط، غادر أتينا للمدينة القريبة ميڭارا، فين أسس مدرسة، سماها الميڭاريين. نضريتو تبنات على واحدية ما قبل سوقراط ديال پارمينيديص. إقليدس كمل فكر سوقراط، و ركز على طبيعة الفضيلة.

الرواقيين عتامدو بزاف على سوقراط.[162] طبقو المنهج السوقراطي أداة باش يتفاداو التناقضات. مداهبهم الأخلاقية ركزات على كيفاش لواحد يعيش حياة نحيلة[ن.ل 1] ب الحكمة و الفضيلة. الرواقيين عطاو للفضيلة دور حاسم ف بلوغ السعادة و عطاو الأولوية تا للعلاقة بين الخير و التميز الأخلاقي، و هادشي كلو كان كيعكس الفكر السوقراطي.[163] ف نفس الوقت، التيار الفلسفي ديال الأفلاطونية دّاعى بلي سوقراط هو جدو، ف الأخلاق و ف نضريتو للمعرفة. أركيسيلاوس، لي ولا رئيس الأكاديمية جوايه 80 عام من بعد تأسيسها من عند أفلاطون، بدل مدهب الأكاديمية بشكل جدري ل داكشي لي معروف دابا بالشكوكية الأكاديمية، لي مركزة على الفلسفة السوقراطية د لجهل. الشكاك الأكاديميين تنافسو مع الرواقيين على شكون هو وريت سوقراط الحقيقي ف ما كايتعلق ب الأخلاق.[164] بينمّا الرواقيين شددو على أخلاق مبنية على المعرفة، أركيسيلاوس عتامد على الجهل السوقراطي. رد الرواقيين على أركيسيلاوس كان بلي الجهل السوقراطي كان جزء من السخرية السوقراطية (ما كانوش كيوافقو على تخدام السخرية)، و هي حجة ولات ف اللخر الرواية السايدة على سوقراط ف العصور القديمة المعطلة.[165]

بينمّا أرسطو كان كيعتابر سوقراط فيلسوف مهم، سوقراط ماكانش شخصية مركزية ف الفكر الأرسطي. واحد من تلامد أرسطو، أريستوكسينوس ألف حتى كتاب كيشرح فضايح سوقراط.

الأبيقوريين كانو معادين ل سوقراط.[166] هاجموه على الخرافة، و نتاقدو إيمانو بـدايمونيون ديالو و لإحترام ديالو للتنبؤات ديال ديلفي.[167] نتاقدو تا سوقراط على شخصيتو و عيوبو المختالفة، و ركزو ف الغالب على سخريتو، لي كانت كتعتابر ماشي لايقة ل فيلسوف و ماشي محتاشمة ل معلّيم.[168]

البيرونيين كانو تا هوما معادين ل سوقراط، و تاهموه بلي كان كيهضر بزاف على الأخلاق، و كيقوم ب تواضع مصطانع، و كيستهزأ و كيسخر من الناس.[169]

العالم ف لقرون لوسطانية

[بدل | بدل لكود]
تصوير ل سوقراط ف مخطوطة ديال لمبشر بن فاتك

لفكر السوقراطي لقى طريقو للشرق لأوسط لإسلامي مع فكر أرسطو و الرواقيين. أعمال أفلاطون على سوقراط، زيادة على لأداب ليوناني، تترجمات للعربية من عند عولاما مسلمين لوالا بحال لكندي، جابر بن حيان، و لمعتزلة. سوقراط تمجد عند عولاما المسلمين و تعجبو بيه حيت جمع بين أخلاقو و أسلوب حياتو، يمكن بسباب التشابه ف هاد لبلان مع شخصية محمد.[170] لمداهب السوقراطية تعدلات باش توافق لعقيدة لإسلامية: على حساب عولاما مسلمين، سوقراط قدم حجج للتوحيد و ل زوال هاد لعالم و لمكافآت ف لحياة لاخرة.[171] تأتيرو ف لعالم الناطق ب لعربية مستامر حتال دابا[172]

فلقرون لوسطانية، غير شوية ديال فكر سوقراط لي بقا ف لعالم لمسيحي ب لكامل؛ ولكن، أعمال على سوقراط من عولاما مسيحيين بحال لاكتانتيوس، إيوسابيوس و أوݣسطين تحافض عليها ف لإمبراطورية لبيزنطية، فين سوقراط تدرّس تحت عدسة مسيحية.[173] من بعد سقوط القسطنطينية، بزاف ديال النصوص رجعات ل عالم المسيحية الرومانية، فين تترجمات للاتينية. بشكل عام، الفلسفة السوقراطية القديمة، بحال باقي لأداب لكلاسيكي قبل عصر النوضة، تتعامل معاها ب شك ف العالم المسيحي ف اللول.[174]

خلال النوضة الطاليانية لمبكرة، تطورو جوج روايات مختالفة على سوقراط.[175] من جهة، لحاراكة لإنسانية عاودات حيات الإهتمام ب المؤلفين الكلاسيكيين. ليوناردو بروني ترجم بزاف ديال حوارات أفلاطون السوقراطية، بينمّا تلميدو جيانوزو مانيتي ألف كتاب منتاشر بزاف، حياة سوقراط. بجوجهم قدمو نسخة مدنية ل سوقراط، لي على حسابها سوقراط كان إنساني و مؤيد للجمهورية. بروني و مانيتي كانو مهتمين ب الدفاع على العلمانية ك طريقة حياة ماشي غالطة؛ تقديم شوفة ل سوقراط متوافقة مع الأخلاق المسيحية عاون قضيتهم. ف داكشي لي دارو، كان خاصهم يراقبو أجزاء من حواراتو، خصوصا لي كانت كتبان بلي كتروج للمتلية الجنسية ولا أي إمكانية للپيدوفيليا (مع ألكيبياديص)، ولا لي كانت كتقول بلي دايمون سوقراط كان رب.[176] من جهة خرة، تصويرة مختالفة ل سوقراط تقدمات من عند لأفلاطونيين الجداد الطاليانيين، ب قيادة لفيلسوف و لكاهن مارسيليو فيتشينو. فيتشينو تعجب ب طريقة تدريس سوقراط اللاهرمية و اللارسمية، لي حاول يقلدها. فيتشينو صور تصويرة مقدسة ل سوقراط، و لقى تشابهات مع حياة يسوع المسيح. عند فيتشينو و أتباعو، الجهل السوقراطي كان كيعني عتيرافو بلي ݣاع الحكمة من عند الله (من خلال دايمون سوقراط).[177]

لفترة لعصرية

[بدل | بدل لكود]
فقرة مازالا خاوية ولا ناقصة:
هاد لفقرة مازالا خاوية ولا ناقصة، زعم باش تبدّل فيها و نزيدو نكبّروها

نويطات

[بدل | بدل لكود]
  1. ↑ "Socrates (469—399 B.C.E.)". Internet encyclopedia of philosophy. Retrieved 27 August 2024.
  2. ↑ Guthrie 1972, pp. 5–7; Dorion 2011, pp. 1–2; May 2000, p. 9; Waterfield 2013, p. 1.
  3. ↑ May 2000, p. 20; Dorion 2011, p. 7; Waterfield 2013, p. 1.
  4. ↑ Doering 2011, pp. 24–25.
  5. ↑ Dorion 2011, pp. 7–9.
  6. ↑ Guthrie 1972, p. 335.
  7. ↑ Guthrie 1972, p. 339.
  8. ↑ Guthrie 1972, p. 345.
  9. ↑ Guthrie 1972, pp. 29–31; Dorion 2011, p. 6.
  10. ↑ Guthrie 1972, p. 30.
  11. ↑ Guthrie 1972, pp. 29–33; Waterfield 2013, pp. 3–4.
  12. ↑ May 2000, p. 20; Dorion 2011, pp. 6–7.
  13. ↑ May 2000, p. 20; Waterfield 2013, pp. 3–4.
  14. ↑ Guthrie 1972, p. 15.
  15. ↑ May 2000, pp. 19–20.
  16. ↑ Dorion 2011, pp. 4, 10.
  17. ↑ Waterfield 2013, pp. 10–13.
  18. ↑ Guthrie 1972, pp. 39–41.
  19. ↑ Guthrie 1972, pp. 39–51.
  20. ↑ Ahbel-Rappe 2011, p. 5.
  21. ↑ Konstan 2011, pp. 85, 88.
  22. ↑ Waterfield 2013, pp. 7–8.
  23. ↑ Vlastos 1991, p. 52; Kahn 1998, pp. 1–2.
  24. ↑ Guthrie 1972, pp. 35–36; Waterfield 2013, p. 8.
  25. ↑ Guthrie 1972, p. 38.
  26. ↑ Guthrie 1972, pp. 38–39.
  27. ↑ Dorion 2011, pp. 11, 16; Waterfield 2013, p. 11.
  28. ↑ Waterfield 2013, pp. 8–11.
  29. ↑ Waterfield 2013, p. 11.
  30. ↑ Dorion 2011, pp. 1–3.
  31. ↑ Dorion 2011, pp. 2–3.
  32. ↑ Dorion 2011, p. 5.
  33. ↑ Dorion 2011, pp. 7–10.
  34. 1 2 Dorion 2011, pp. 12–14.
  35. ↑ Dorion 2011, pp. 17–18.
  36. ↑ Guthrie 1972, p. 2.
  37. ↑ Ober 2010, pp. 159–160; Ahbel-Rappe 2011, p. 1; Guthrie 1972, p. 58; Dorion 2011, p. 12; Nails 2020, A chronology of the historical Socrates in the context of Athenian history and the dramatic dates of Plato's dialogues.
  38. ↑ Ober 2010, pp. 160–161.
  39. ↑ Ober 2010, pp. 161–162.
  40. ↑ Ober 2010, p. 161.
  41. ↑ Guthrie 1972, p. 65.
  42. ↑ Guthrie 1972, p. 59.
  43. ↑ Guthrie 1972, p. 65; Ober 2010, pp. 167–171.
  44. ↑ Guthrie 1972, p. 78.
  45. ↑ Guthrie 1972, pp. 66–67.
  46. 1 2 Guthrie 1972, p. 69.
  47. ↑ Guthrie 1972, pp. 70–75; Nails 2020, Socrates's strangeness.
  48. ↑ Obdrzalek 2013, pp. 210–211; Nails 2020, Socrates's strangeness.
  49. ↑ Guthrie 1972, pp. 92–94; Nails 2020, Socrates's strangeness.
  50. ↑ Kahn 1998, p. 75.
  51. ↑ Ahbel-Rappe 2011, pp. 15–19.
  52. ↑ Ahbel-Rappe 2011, pp. 17, 21.
  53. ↑ Plato. "Phaedo". Perseus. Retrieved 1 March 2024. See §118a
  54. ↑ May 2000, p. 30, 40.
  55. 1 2 3 4 May 2000, pp. 47–48.
  56. 1 2 3 4 5 6 Nails 2020, A Chronology of the historical Socrates.
  57. ↑ May 2000, p. 31.
  58. ↑ May 2000, pp. 33–39.
  59. ↑ May 2000, pp. 41–42.
  60. ↑ May 2000, p. 42.
  61. ↑ May 2000, p. 43.
  62. ↑ May 2000, pp. 45–46.
  63. ↑ Guthrie 1972, pp. 65–66.
  64. ↑ Guthrie 1972, pp. 63–65; Ahbel-Rappe 2011; Ober 2010, p. 146.
  65. ↑ Guthrie 1972, pp. 64–65.
  66. ↑ Guthrie 1972, pp. 20, 65–66; Ober 2010, p. 146.
  67. 1 2 Ralkowski 2013, p. 302.
  68. ↑ Ralkowski 2013, p. 323.
  69. ↑ Ralkowski 2013, pp. 319–322.
  70. ↑ Ralkowski 2013, pp. 307–308.
  71. ↑ Ralkowski 2013, pp. 303–304.
  72. ↑ Ahbel-Rappe 2011, p. 53.
  73. ↑ Benson 2011, p. 179; Wolfsdorf 2013, pp. 34–35.
  74. ↑ Wolfsdorf 2013, p. 34: كاتشمل أعمال خرة شارميدس، كريطو، يوتيديموس، يوتيفرون، هيپياس لأكبر، هيپياس لأصغر، أيون، لاخيس، ليسيس، پروطاݣوراس. Benson 2011, p. 179, و ڭزوات من مينون.
  75. ↑ Benson 2011, pp. 182–184; Wolfsdorf 2013, pp. 34–35.
  76. ↑ Benson 2011, p. 184.
  77. ↑ Guthrie 1972, pp. 125–127.
  78. 1 2 Guthrie 1972, pp. 128–129.
  79. ↑ Benson 2011, pp. 179, 185–193.
  80. ↑ Benson 2011, p. 185; Wolfsdorf 2013, pp. 34–35; Ambury 2020, The Elenchus: Socrates the Refuter.
  81. ↑ Benson 2011, p. 185; Wolfsdorf 2013, p. 44; Ambury 2020, The Elenchus: Socrates the Refuter.
  82. ↑ Benson 2011, p. 185.
  83. ↑ Ambury 2020, The Elenchus: Socrates the Refuter: بينصون (2011) كايدكر ف ملاحضة عولاما كيتبناو النهج البناوي constructivism و اللابناوي anticonstructivism: "من بين هاد "لبناويين": بريكهاوس و سميت 1994، الفصل 6.1؛ بورنيت 1924، ص 136-137؛ ماكفيرين 1985؛ رابينوفيتز 1958؛ ريف 1989، الفصل 1.10؛ تايلور 1982؛ و ڤلاستوس 1991، الفصل 6. أما دوك اللي ماكيعتاقدوش بلي النص يتضمن حساب سوقراطي للتقوى ("اللابناويين") فا كايشملو ألين 1970، ص 6-9، 67؛ و ڭروت 1865، ص 437-457. بيكمان 1979، الفصل 2.1؛ كاليف 1995؛ و فيرسيني 1982" ص 118
  84. ↑ Benson 2013, p. 136.
  85. ↑ Benson 2013, pp. 136–139; Ahbel-Rappe 2011, p. 71.
  86. ↑ Guthrie 1972, p. 112.
  87. ↑ Guthrie 1972, pp. 110–111.
  88. ↑ Benson 2013, pp. 143–145; Bett 2011, p. 228.
  89. ↑ Benson 2013, pp. 143–145, 147; Bett 2011, p. 229.
  90. ↑ Benson 2013, p. 145.
  91. ↑ Ahbel-Rappe 2011, p. 144.
  92. ↑ Guthrie 1972, p. 122; Bett 2011, p. 215; McPartland 2013, pp. 94–95.
  93. ↑ McPartland 2013, p. 98.
  94. ↑ McPartland 2013, pp. 108–109.
  95. ↑ McPartland 2013, p. 117.
  96. ↑ McPartland 2013, p. 119.
  97. ↑ McPartland 2013, pp. 117–119.
  98. ↑ McPartland 2013, pp. 118–119.
  99. ↑ Vlastos 1985, p. 1.
  100. 1 2 Vlastos 1985, pp. 6–7.
  101. ↑ Vlastos 1985, pp. 1–2; Lesher 1987, p. 275.
  102. ↑ Lesher 1987, p. 276.
  103. ↑ Lesher 1987, p. 276; Vasiliou 2013, p. 28.
  104. ↑ Lesher 1987, p. 278; McPartland 2013, p. 123.
  105. ↑ McPartland 2013, pp. 123–124.
  106. ↑ Lane 2011, p. 239.
  107. ↑ Vasiliou 2013, p. 20.
  108. ↑ Vasiliou 2013, p. 24; Lane 2011, p. 239.
  109. ↑ Lane 2011, pp. 249–251.
  110. ↑ Lane 2011, pp. 241–242.
  111. ↑ Lane 2011, p. 243.
  112. ↑ Vasiliou 2013, pp. 28–29.
  113. ↑ Brickhouse & Smith 2013, p. 185; Vlastos 1991, p. 203.
  114. 1 2 Reshotko 2013, p. 158.
  115. ↑ Brickhouse & Smith 2013, p. 185.
  116. ↑ Segvic 2006, pp. 171–173.
  117. ↑ Segvic 2006, p. 171.
  118. ↑ Brickhouse & Smith 2013, pp. 185–186.
  119. ↑ Brickhouse & Smith 2013, pp. 190–191.
  120. ↑ Ausland 2019, pp. 686–687.
  121. ↑ McPherran 2011, p. 117.
  122. ↑ McPherran 2013, p. 257.
  123. ↑ McPherran 2013, pp. 259–260.
  124. ↑ McPherran 2013, pp. 257–258.
  125. ↑ Guthrie 1972, pp. 151–153.
  126. ↑ Guthrie 1972, p. 153.
  127. ↑ McPherran 2013, pp. 260–262; McPherran 2011, p. 111.
  128. ↑ McPherran 2013, p. 265.
  129. ↑ McPherran 2013, p. 266.
  130. ↑ McPherran 2013, pp. 263–266.
  131. ↑ McPherran 2013, p. 263:See also note 30 for further reference; McPherran 2011, p. 117.
  132. ↑ McPherran 2011, pp. 117–119.
  133. ↑ McPherran 2013, pp. 272–273.
  134. 1 2 McPherran 2013, pp. 270–271.
  135. ↑ Guthrie 1972, pp. 157–158.
  136. ↑ Guthrie 1972, pp. 160–164.
  137. ↑ McPherran 2011, pp. 123–127.
  138. ↑ McPherran 2013, pp. 270–271; Long 2009, p. 63.
  139. ↑ McPherran 2013, p. 272; Long 2009, p. 63.
  140. ↑ McPherran 2011, pp. 114–115.
  141. ↑ McPherran 2011, p. 124.
  142. ↑ Long 2009, p. 64.
  143. ↑ Lapatin 2009, p. 146.
  144. ↑ Long 2009, pp. 63–64.
  145. ↑ Long 2009, pp. 65–66, 70.
  146. ↑ Obdrzalek 2013, pp. 210–211.
  147. ↑ Obdrzalek 2013, pp. 211–212; Rudebusch 2009, p. 187.
  148. ↑ Obdrzalek 2013, pp. 214–215.
  149. ↑ Obdrzalek 2013, p. 212.
  150. ↑ Obdrzalek 2013, p. 231.
  151. ↑ Obdrzalek 2013, p. 230.
  152. ↑ D'Angour 2019.
  153. ↑ Guthrie 1972, pp. 99, 165; Long 2011, p. 355; Ahbel-Rappe 2011, pp. 95–96.
  154. ↑ Long 2011, pp. 355–356.
  155. ↑ Guthrie 1972, pp. 165–166; Long 2011, pp. 355–357.
  156. ↑ Long 2011, p. 358.
  157. ↑ Guthrie 1972, p. 169.
  158. ↑ Guthrie 1972, pp. 179–183.
  159. ↑ Guthrie 1972, p. 170.
  160. ↑ Guthrie 1972, pp. 170–174.
  161. ↑ Guthrie 1972, pp. 175–177.
  162. ↑ Long 2011, p. 362.
  163. ↑ Long 2011, pp. 362–264.
  164. ↑ Long 2011, pp. 364–365.
  165. ↑ Long 2011, p. 367.
  166. ↑ Long 2011, pp. 368–369.
  167. ↑ Long 2011, p. 374.
  168. ↑ Campos-Daroca 2019, p. 240; Lane 2011, p. 244; Long 2011, p. 370.
  169. ↑ "Diogenes Laertius, Lives of the Eminent Philosophers Book II, Chapter 5, Section 19". Archived from the original on 24 January 2022. Retrieved 24 January 2022.
  170. ↑ Alon 2009, pp. 317–318.
  171. ↑ Alon 2009, pp. 325–326.
  172. ↑ Alon 2009, p. 332.
  173. ↑ Trizio 2019, pp. 609–610; Hankins 2009, p. 352.
  174. ↑ Hankins 2009, pp. 337–340.
  175. ↑ Hankins 2009, pp. 348–349.
  176. ↑ Hankins 2009, pp. 341–346.
  177. ↑ Hankins 2009, pp. 346–348.

نويطات لوغاوية

[بدل | بدل لكود]
  1. ↑ ب لعربية: سلسة‎

مصادر

[بدل | بدل لكود]

مزاود

[بدل | بدل لكود]
Wikimedia Commons ويكيميديا كومنز عندا تصاور و معلومات على سوقراط.
مرجّعة من "https://ary.wikipedia.org/w/index.php?title=سوقراط&oldid=449874"