دم

دم
نوع ديال مادة بيوجينية، كلاص ديال كيان أناطومي، مادة بيوجينية
كلاص فرعية ديال	سوائل الجسم، منتج حيواني
طرف من	جهاز الدوران
لون	حمر، عديم اللون، خضر
كيدرسو	علم الدم
كاينتجو	أديف عضمي
عندو خصلة	فئات الدم، طونسيو
إدونتيفيكاتور ديال مكنز لمعهد لقومي د لكونصير (NCI)	C12434
كاراكطير د يونيكود	🩸

جوج قطرات ديال الدم: اللولة (اللي فاليسار) لونها حمر فاقع، وهاد النوع كيتسمى الدم المؤكسج، وهو الدم اللي كيكون فيه الأوكسيجين بزاف، وكيكون جاي من الرية وغايمشي للأعضاء عبر الشرايين. أما التانية (اللي فاليمين)، لونها حمر غامق، وهاد الدم كيتسمى الدم غير المؤكسج، وكيكون فيه نسبة قليلة ديال الأوكسيجين، وجاي راجع من الجسم للرية عبر الأوردة باش يتبدل فيه ثاني أكسيد الكربون بالأوكسيجين.

الدم هو واحد السائل مهم كيدور فالجسم ديال الإنسان وݣاع الكائنات الحية اللي فيها العمود الفقري. الدور ديالو هو ينقل المواد اللي الجسم محتاجها بحال الماكلة (المغذيات) والأوكسيجين، وكيخرج الزبل ديال الخلايا بحال ثاني أوكسيد الكربون (CO₂).

الدم كيتكوّن من بزاف ديال المكونات، بحال: خلايا ديال الدم الحمرا، وخلايا ديال الدم البيضا، والپلازما، والصفائح الدموية. وكيعتابروه واحد النوع من النسيج الرابط (نسيج ضام). الحرارة العادية ديالو فالجسم هي 37 درجة سيليسوز.

الدم كيمثل علاين 8 فالمية من الوزن ديال الجيسم. مثلا، إلى كان شي واحد الوزن ديالو هو 60 كيلو، راه عندو علاين 4.8 كيلو ديال الدم، يعني شي 5 لتر علاين.

عند الكائنات اللي فيها العمود الفقري (بحال الإنسان)، أغلب الدم كيتكوّن من الپلازما، وهي واحد السائل اللي كيمثل 55% من الدم كامل. الپلازما فيها الما بزاف، بحيث كيشكل 90% منها، وزيد عليهم الپروتينات، والسكار (الݣلوكوز)، والأملاح المعدنية، والهورمونات، وثاني أكسيد الكربون. الپلازما كتخدم بحال وسيلة نقل للزبل اللي كيخرج من الخلايا. الپروتين الرئيسي فيها هو الألبومين، واللي كينظم الضغط فالسائل ديال الدم.

أنواع خلايا الدم

• خلايا حمرا: اللي كتنقل الأوكسيجين.
• خلايا بيضا: اللي كتحارب الميكروبات.
• الصفائح الدموية: اللي كعاون فالدم يوقف إلا طرا جرح.

الخلايا الحمرا فيها واحد الپروتين سميتو الهيموغلوبين، اللي فيه الحديد، وهكدا كيقدر يشد الأوكسيجين وينقلو، ومن بعد يطلقو فأنسجة ديال الجسم. ثاني أكسيد الكربون اللي كيتصاوب من بعد عملية التنفس، كيتنقل هو الآخر فالپلازما على شكل بيكربونات.

الدم كيدور فالجسم كامل عبر الأوعية الدموية، والقلب هو اللي كيديرو يطّور (يضخّو). عند الكائنات اللي كتتنفس بالرية، الدم اللي خارج من القلب (الدم الشرياني) كيوصل الأوكسيجين للأنسجة، ومن بعد الدم اللي راجع (الدم الوريدي) كيجيب ثاني أكسيد الكربون من الخلايا باش يوصلو للرية ويتخرج مع الزفير.

الأدوار ديال الدم

الدم كيلعب دور كبير ومتنوع فالجسم، وها هما الوظائف الرئيسية ديالو:

• الدفاع على الجيسم: الدم فيه خلايا ومواد كتحارب الميكروبات والجراثيم، بحال مضادات ديال الأجسام، وكيعاون فمواجهة الأمراض اللي كتهدد الصحة ديال الإنسان.
• كيحافض على التوازن ديال الما ف الجيسم: الدم كيعاون باش يبقى توازن الما فالجسم، بحيث كينقل الما الزايد من الجهاز الهضمي، وكيساهم ف بلي يخرجو مع العرق ولا البول اللي كيصنعوه الكلاوي.
• كينضم حرارة الجسم: الدم كيساعد على تبريد الجيسم عبر إفراز العرق، و كينشط حرق السكار باش يعطي الطاقة و يسخن الجسم يلا كان محتاج.
• كينقل الأوكسيجين: كيوصل الأوكسيجين من الرية للخلايا باش يقدرو يديرو الوظائف ديالهم.
• نقل لمواد الغيدائية: كينقل المغذيات بحال الݣلوكوز، و الأحماض الأمينية، و الأحماض الذهنية للخلايا.
• التخلص من الفضلات: كيجمع الزبل اللي كتصاوبو الخلايا، بحال ثاني أكسيد الكربون، و اليوريا، و حمض اللبنيك، و كيخرّجهم من الجسم.
• كيوقف النزيف: يلى طرا جرح، الصفائح الدموية كتسدّ الطريق قدام الدم مؤقتاً، و كتعاون على لتئام الجرح و توقيف النزيف.

مكونات ديال الدم

البزوليات

عند البزوليات، الدم كيمثل علاين 7% من الوزن ديال الجسم. الكثافة ديالو كتقرب بزاف من كثافة الما، بحيث كتكون جوايه 1060 كيلوݣرام ف الميترو المكعب، و الما النقي كثافتو 1000 كݣ/م³. الإنسان البالغ عندو علاين 5 إيطروات ديال الدم ف الجسم، اللي كيتكوّن من الپلازما و مكونات خرة.

الدم فيه ثلاثة ديال الأنواع الرئيسية:

• كريات الدم الحمرا (Erythrocytes): هاد الخلايا مسؤولة على نقل الأوكسيجين من الرية للخلايا.
• كريات الدم البيضا (Leukocytes): كتدافع على الجسم ضد الأمراض والميكروبات.
• الصفائح الدموية: ماشي خلايا حقيقية، ولكن أجزاء صغار جاو من السيتوبلازم، وعندهم دور مهم فوقف النزيف وتجلط الدم.

من ناحية الحجم، الكريات الحمرا كتشكل علاين 45% من الدم، بينما الپلازما كتشكل جوايه 54.3%، و كريات الدم البيضا غير 0.7%.

الدم، بكل مكوناتو (الخلايا و الپلازما)، كيتبع قوانين ديال السوائل اللي ماكتحترمش قانون نيوتن (سوائل ماشي نيوتونية)، يعني ماكيتصرفش بحال الما العادي ف الحركة و الضغط.