حزب سياسي
حزب سياسي
| ||
| معلومات عامة | ||
| شنو هو | تنظيم سياسي | |
| بالنگليزية | Political party | |
| بالفرانساوية | Parti politique | |
| شنو كايدير | كايشارك فلنتيخابات، وكايقدّم لمرشحين، وكايحاول يوصل للحكم ولا يشارك فيه | |
| شكون كايكون فيه | لمنخرطين، لقيادة، ولمرشحين | |
| شكون كايسيّرو | لرئيس ولا لأمين لعام، على حساب لقوانين ديال كل حزب | |
| فين كايخدم | فلسياسة ولنتيخابات ولمجالس لمنتاخبة | |
| لأنواع ديالو | ||
| على حساب لأفكار | ليسار، ليمين، لوسط، وتوجّهات خرين | |
| على حساب لموقع ف لحكم | أحزاب كاتشارك ف لحكومة وأحزاب فلمعارضة | |
| التنظيم | ||
| لأجهزة اللي يقدر تكون فيه | لمؤتمر، لمجلس لوطني، لمكتب السياسي، ولمكاتب لمحلية | |
| منين كايجيب لفلوس | لانخراطات، التبرعات، ولدعم ديال لدولة فشي لبلدان | |
حزب سياسي ( لجمع: أحزاب سياسية ) هو واحد تنظيم سياسي كايجمع ناس اللي عندهم نفس لأفكار السياسية، ولا متافقين على شي أهداف باغين يوصلو ليها. كايحاول لحزب يوصل للحكم، ولا يشارك فيه، عن طريق لنتيخابات، وكيقدّم مرشحين باسم ديالو باش يربحو لمقاعد فلبرلمان ولا فشي مجالس منتاخبة. كل حزب كيكون عندو برنامج سياسي كايشرح فيه شنو باغي يدير، وشنو هي تغييرات اللي كايقترحها فطريقة تسيير لبلاد.[1]
لأحزاب السياسية ماشي كلهم بحال بحال. كاين اللي كايعطي لأهمية للاقتصاد، وكاين اللي كايركّز على لقضايا لإجتيماعية، ولا لحريات، ولا دين، ولا لبيئة. وحتى طريقة اللي كايتنظّمو بها كتختلف من حزب لواحد آخر. فشي بلدان كاينين غير شي أحزاب اللي عندهم تأتير كبير، وفبلدان خرين كاين عدد كبير د لأحزاب اللي كايتنافسو على لحكم.[1]
لأحزاب السياسية بالشكل اللي معروف دابا بدات كاتنتاشر مع تطوّر لبرلمانات ولنتيخابات، خصوصاً فلقرن 19. قبل من هادشي، كانو كاينين مجموعات ديال السياسيين اللي كايتافقو على شي مواقف وكيخدمو مع بعضياتهم، ولكن ما كانوش ديما منظّمين بحال لأحزاب ديال دابا.
ملي بدا حق ديال تصويت كايتوسّع وولاو ناس كتر كايشاركو ف لنتيخابات، بدات لأحزاب كاتكبّر وكتولّي عندها مكاتب ومنخرطين وناس كايسيّروها. ؤولات كتوجد برامج وكتنظّم حملات باش تقنع ناخبين يصوّتو على المرشحين ديالها.[1]
مع لوقت، ولات لأحزاب عندها بلاصة مهمة فالحياة السياسية ديال بزاف د لبلدان، ؤولات كاتشارك فتشكيل لحكومات وفمناقشة لقوانين وفتسيير شؤون ديال لبلاد.
لحزب السياسي يقدر يدير بزاف د لأدوار، على حساب واش مشارك ف لحكم ولا خدام فلمعارضة، وعلى حساب النظام السياسي ديال لبلاد.
واحد من لأهداف لكبار ديال لحزب هو يشارك ف لنتيخابات ويربح لمقاعد. باش يدير هادشي، كايختار لمرشحين ديالو، وكايوجد لبرنامج اللي غادي يقدّمو للناخبين، وكايدير حملة نتخابية باش يعرّفو الناس بالأفكار ديالو. فالحملة، كايشرح لحزب شنو باغي يبدّل ولا يصلح، وكيحاول يقنع ناخبين بلي لبرنامج ديالو كايستاهل يصوّتو عليه.
إلا ربح لحزب شي أغلبية كاتسمح ليه يشكّل لحكومة، يقدر يسيّر بوحدو ولا يتافق مع أحزاب خرين باش يخدمو مجموعين، على حساب لقانون ديال لبلاد. ومن بعد ما يدخل للحكومة، كايولي مسؤول على شي قرارات وقطاعات، وكيحاول يدير سياسات اللي كاينة فالبرنامج ديالو.
ماشي ضروري لحزب يشارك ف لحكومة باش يكون عندو دور فالسياسة. كاينين أحزاب اللي كاتكون فلمعارضة، وكتراقب شنو كاتدير لحكومة، وكتنتاقد شي قرارات ديالها، وكتقترح حلول خرين. أحزاب لمعارضة تقدر حتى تقدّم مقترحات قوانين وتسول أعضاء لحكومة ف لبرلمان، إلا كان النظام السياسي ديال لبلاد كايعطيها هاد لحق.
لحزب يقدر يجمع شي مطالب ديال لمواطنين ويحاول يوصلها للمؤسسات اللي كاتّاخد لقرارات. وكيقدر حتى يخدم على شي قضايا اللي كاتهمّ الناس، بحال لخدمة، وصحة، ولقراية، وسكن، ولبيئة. وكاينين أحزاب اللي كايركّزو على شي فئات من لمجتمع، ولا على شي مناطق، ولا على شي أفكار سياسية معينة.
كل حزب عندو لقوانين ديالو اللي كاتبيّن شكون كايسيّرو، وكيفاش كايتختارو لمسؤولين ديالو، وشنو هي لحقوق ولواجبات ديال لمنخرطين. وبزاف د لأحزاب عندها رئيس ولا أمين عام، ومكتب سياسي، ومجلس وطني، ومكاتب محلية.
رئيس ولا لأمين لعام هو لمسؤول اللول فالحزب. كايمتّلو قدّام لمؤسسات ولأحزاب لخرى، وكايشرف على لخدمة ديالو، على حساب صلاحيات اللي عطاها ليه لقانون ديال لحزب.
ماشي ڭاع لأحزاب عندها نفس طريقة باش تختار لمسؤول اللول. شي أحزاب كاينتاخبوه فالمؤتمر، وشي وحدين كايختاروه بشي طريقة خرى.
لمؤتمر ديال لحزب هو واحد تجمّع كايحضرو ليه منخرطين ولا ناس كايمتّلوهم. كايتناقشو فيه على لخدمة اللي دارت لقيادة، وعلى لأفكار ديال الحزب، وعلى شنو خاصو يدار فالسنين اللي جاية. وفبزاف د لأحزاب، لمؤتمر هو اللي كاينتخب لقيادة جديدة ولا كايصادق على تغيير لقوانين الداخلية.
كاينين أحزاب عندها مجلس وطني ومكتب سياسي. لمجلس لوطني كايجمع ممتلين من جهات ولا من تنظيمات ديال الحزب، وكايناقش لقرارات لكبار. أما لمكتب السياسي، فكايكون فيه عدد أقل د لمسؤولين، وكايتابع لخدمة اليومية ديال الحزب وكيحضّر لقرارات السياسية ديالو. وكتختلف لخدمة ديال هاد لمؤسسات من حزب لواحد آخر.
بزاف د لأحزاب كايديرو مكاتب ف لمدن ولجهات ولأقاليم. هاد لمكاتب كاتنظّم لأنشطة ديال الحزب فالمنطقة اللي كاينة فيها، وكتعاون فالحملات لنتخابية وفتأطير لمنخرطين.
لمنخرطين هما الناس اللي دخلو للحزب ووافقو على لقوانين ديالو. يقدرو يحضرو لاجتماعات، ويشاركو ف لأنشطة، ويصوّتو فشي نتيخابات داخلية، ويترشحو لشي مسؤوليات إلا كان عندهم لحق فداكشي. وماشي كل واحد كايصوّت على حزب كيكون منخرط فيه. الناخب يقدر يصوّت على الحزب ف لنتيخابات بلا ما يدخل ليه ولا يشارك فخدمتو.
لأحزاب كتختلف على حساب لأفكار والمواقف اللي كاتتبنّى. ومن بين توجهات السياسية لمعروفة كاين ليسار، وليمين، ولوسط.
أحزاب ليسار كاتركّز، بدرجات مختلفة، على تقليل لفرق بين لناس فالفلوس والفرص، وعلى دور دولة فتوفير لخدمات بحال لقراية وصحة، وعلى لحقوق ديال لخدّامة.
وكاينين بزاف د تيارات داخل ليسار، بحال الاشتراكية والديموقراطية الاجتماعية، وماشي كلها عندها نفس لأفكار.
أحزاب ليمين كاتضم تيارات مختلفة. شي وحدين كايركّزو على لمحافظة على لعادات والتقاليد، وشي وحدين كايدافعو على لحرية ديال لمقاولات والسوق وتقليل تدخّل دولة فالاقتصاد. وماشي ڭاع لأحزب من ليمين كيكون عندهم نفس لموقف فالقضايا لإجتيماعية ولقتصادية.
أحزاب لوسط كاتتبنّى فالغالب شي أفكار من ليسار وشي أفكار من ليمين، وكتحاول تلقى حلول فالوسط فشي قضايا سياسية وقتصادية. ويمكن لمواقف ديالها تختلف على حساب لبلاد ولحزب.
كاينين أحزاب اللي ما كايركّزوش بالضرورة على تقسيم ديال ليسار وليمين. شي وحدين كايهتمّو بحماية لبيئة، وشي وحدين كايركّزو على دين، ولا لهوية ديال شي منطقة، ولا على حقوق شي فئات من لمجتمع. ويمكن حزب واحد يجمع بين كتر من توجّه سياسي.
ماشي ڭاع لبلدان عندها نفس عدد لأحزاب ولا نفس طريقة ديال لمنافسة على لحكم.
فنظام لحزب لوحيد، كايكون حزب واحد هو اللي كايسيطر على لحكم، وكتكون لمنافسة بين لأحزاب ممنوعة ولا محدودة بزاف.
فنظام لحزبين، كايكونو جوج د لأحزاب هما اللي عندهم لحضور لكبير ف لنتيخابات، وكيكون لحكم كايتبدّل فالغالب ما بينهم.
وهادشي ما كايعنيش بالضرورة بلي ما كاينينش أحزاب خرين، ولكن التأتير ديالهم كايكون أقل.
فنظام تعدد لأحزاب، كايتنافسو عدد من لأحزاب على لمقاعد ولحكم. ويمكن حتى واحد منهم ما يربح لأغلبية بوحدو، وهادشي كيخلي شي أحزاب يتافقو باش يشكّلو حكومة مجموعين.
لحزب السياسي كايحتاج لفلوس باش يخلص لكرا ديال لمقرات، وينظّم لاجتماعات، ويطبع لملصقات، ويدير الحملات لنتخابية.
وكيقدر يجيب لفلوس من واجبات لانخراط، ولا من تبرعات كايسمح بها لقانون، ولا من دعم ديال دولة ف لبلدان اللي كاتعطي هاد دعم للأحزاب.
وفبزاف د لبلدان، خاص لأحزاب تبيّن شحال دخلات ليها د لفلوس وشحال صرفات، باش تكون لمراقبة على طريقة اللي كاتصرف بها لفلوس ديالها.[2]
كاتكون عند لأحزاب السياسية بلاصة مهمة فلديموقراطية التمتيلية، حيت كاتخلي ناخبين يختارو بين برامج ومترشحين مختلفين. وكتعطي لناس حتى لمجال باش يدخلو للسياسة ويشاركو ف لقرارات عن طريق لانخراط ولا الترشح ف لنتيخابات.[2]
ولكن لأحزاب تقدر حتى تواجه شي مشاكل، بحال ملي كاتكون لقرارات كلها ف يد شي مسؤولين قلال، ولا ملي ما كايكونش عند لمنخرطين دور كبير فاختيار لقيادة، ولا ملي كايكون تأتير ديال لفلوس على لقرارات السياسية.
وهكا كاتكون طريقة اللي كايتسيّر بها لحزب، وكيفاش كايتختارو لمسؤولين ديالو، ومنين كايجيب لفلوس، من لمواضيع اللي كاتناقش فالدراسات على لأحزاب وديموقراطية.
- 1 2 3 "Political party" (ب الإنجليزية). Encyclopaedia Britannica.
- 1 2 "International Institute for Democracy and Electoral Assistance" (ب الإنجليزية). International IDEA.