جوڤينتوس
جوڤينتوس
| ||||||
| جوڤينتوس | ||||||
.svg){kind=logo}
| ||||||
| معلومات عامة | ||||||
| السمية | Juventus Football Club | |||||
| لكنية | I Bianconeri (إي بيانكونيري) (بيضينؤكحلين) (مقوسين الضهر) I Gobbi
| |||||
| السمية لمختصرة | JUVE اليوڤي | |||||
| تأسس فـ | 1 نوڤمبر 1897 | |||||
| لمدينة | طورينو | |||||
| التيران | جوڤينتوس سطاديوم | |||||
| سعة التيران | 41,507[1] | |||||
| الشخصيات | ||||||
| الرئيس | دجيانلوكا فيرّيرو
| |||||
| لمالك | عائلة أنييللي
| |||||
| لمدريب | تياڭو موطا
| |||||
| لعميد | دانيلو
| |||||
| لقتيصاد والتدبير | ||||||
| شركة لحوايج | أديداس | |||||
| لموقع الرسمي | https://www.juventus.com/en | |||||
| ليحصائيات | ||||||
| الدوري | الدوري الإيطالي، الدوري الإيطالي و الدوري الإيطالي الدرجة الثانية | |||||
| ||||||
جوڤينتوس ؤلا اليوڤي (طاليانية:يوڤينتوس Juventus Football Club), فرقة طاليانية دلكورة, تأسست نهار 1 نوڤمبر 1897[2]، فمدينة طورينو بجيهة الݒييمونتي. أنجح فرقة فطاليان من ناحية الݒالماريس: 36 بوطولة ؤ 11 كاس طاليان ؤ 9 سوݕر (أرقام قياسية) ؤ حتى من جيهت لجماهيرية، سوا داخل لبلاد ؤلا فلخاريج.
اليوڤي معروفة ببزاف دسميات، منها: لبيض ؤلكحل (طاليانية:بيانكونيري I Bianconeri) ؤ زيبرا الّلي هو شعار ديال لفريق ؤكان ف اللوݣو لقديم. واخّا يوڤينتوس كتعني "شاباب" باللاتينية ولكن لفرقة مشهورة بسمية العجوزة (La vecchia signora "لافيكيا سينيورا" لمرا الشّارفة).
13 تلميد كيقراو ف اللّيسي ديال ماسّيمو دازيليو فمدينة طورينو تجمعو ؤ كوّنو فرقة سمّاوها سݕور كلوب جوڤينتوس فتواخير ديال 1897. من بين هاد تلامد كانو جوج خوات ؤدجينيو كانفاري ؤ إنريكو كانفاري.[3] من بعد عامين، بدّلو سمية، ولّات فوتبول كلوب جوڤينتوس.[4]
أول ماتش، لعبوه نهار 11 مارس 1900، ؤخسروه كونطر طورينيزي 1-0 [5]
فعام 1904 كانو ليوڤي كيلبسو تونيات كحلين و روز (فانيدي)، دخلوهم شي فليسات ديال واحد لبيزنيسمان ؤبدلو تيران اللّي كانو كيلعبو فيه، تيران مكركح سميتو ݕياتزا دارمي، ورحلو لتيران آخور بعقلو سيمتو ڤيلودروم ؤمبيرطو 1.
فعام 1905، جوڤنتوس ربحات أوّل شومݕيونا ليهم، وفهاد لعام نيت بداو كيلبسو لبيض ؤ لكحل.
عام 1906، ألفريد ديك، اللّي كان ديك السّاع هو الݕريزيدو، ماتفاهمش مع شي وحدين ف الفرقة، صافي هو ينساحب ؤدّا معاه شي وحدين ؤ صاوبو فرقة جديدة سمّاوها "إف بي تشي طورينو FBC Torino" لمعروفة ليوم ب إف تشي طورينو ؤلا طورينو. ؤهنا بدات لعداوا بين هاد جوج فرقات ؤ سخن الدّيربي د طورينو لمعروف ف الطاليان ب ديربي ديلاّ مولي.[6]
تكرفصات مزيان لفرق فاش بدات لحرب لعالمية اللولة، ؤ فعام 1913 تكلاصات هي لّلخرة فلبطولة ؤ طاحت للدوزيام سيري. ولكن لإتحاد د طاليان ف العام الجاي زاد فراقي ديال ݕروميان سيري ؤ هكدا تعتقات اليوڤي ؤ بقات حاضرة فݕروميان ديڤيزيون حتال 2006. [7][8]
1922 كان عام السّعد على جوڤينتوس، حيتاش نائب الرئيس ديال فياط '''إدواردو أنييلّلي''' ولّى هو الرئيس ديال لفرقة، وفنفس لعام دشنو تيران جديد. من واحد لجيهة، التّيران بدا كيدخّل ليهم دراهم صحاح ؤ من جيهة خرى أنييللي دخّل لإحتراف لكورة، رجّع اليوفي أول فرقة ݕروفيسيونيل[9] ف طاليان. موسم 1925–1926 جابو اللقب تّاني ؤ ربحو 5 شامݕيونات متابعين من 1930 ل 1935. ؤ كان لمنتخاب طالياني مكوّن من بزّاف ديال لعّابة ديال اليوڤي فكاس لعالم 1934 الّلي ربحاتو الطاليان. عاوتاني، جات لحرب لعالمية الجاوجة بعجاجتها ماربحات اليوڤي فيهم والو. حتى سالات لحرب ؤ جا "دجيانّي أنييلّلي" (ولد إدواردو)، بداو يلعبو فسطاد مينيسيݕال، ربحو شامݕيونا جوج خطرات ف 1949-50 ؤ 1951-52.
.jpg)
سيزون 1957-1958، اليوڤي شرات جوج لعابة ف لاطاك تزادو على جيامݕييرو بونيݕرتي، هما لويلزي جون تشارلز وطالياني-لارجونتيني عمر سيفوري.
سيزون 1959-1960 أوّل مرة كتربح اليوڤي شامبيونا ولكاس ف نفس لعام. 1960-1961 بطولة رقم 13.
فهاد 15عام ربحات اليوڤي 9 د بطولات سيري أ، 2 كوپا إيطاليا ؤ 5 كيسان ؤروپية. فعام 1976 سينا جيوڤانّي طراپاطوني مع ليوڤي، فنفس لعام داو شومپيونا طاليانية رقم 16 ؤ لأول مرة كيربحو شي حاجة فلوروپ، كاس ليتّيحاد ؤورپي كونطر أتليتيك بيلباو. فلمجموع، من 1976 حتال 1986، ربح مع ليوڨي 13 لقب (6 بطولة | 2 كيسان طاليان ) ؤ 4 كيسان ؤروپية منها تشومپيونز ليڭ اللولة فتاريخ لفرقة كونطر ليڤيرپول ؤ كاس إنتركونتينونتال ضد بوكا جونيورز.
طراپاطوني سينا مع لؤسطورة ميشيل پلاتيني ؤ رجّع ولد لفرقا لؤسطورة پاولو روسّي من ڨينيتسيا، ؤ زاد عليهم لپولندي زبيڭنييڨ بونييك. كان أحسن خط هجوم فؤورپا داك لوقت. پلاتيني بالون دور 3 مرات متابعة ؤ پاولو روسّي هداف كاس لعالم 1982 ؤ بالون دور 1982.
لانتير جابت طراپاطوني ؤ ماراضونا مع ناپولي ؤ ميلان بيرلوسكوني توڭضات كان صعيب على اليوڨي باش تنافس، زيرو بوطولة، 3 خطرات دوزياما ؤ دوبلي كاس طاليان ؤ كاس ليتّيحاد لؤروپي (لونترينور كان هو دينو زوف) فعام 1990.
تيران ديللي ألپي 1990 تدشّن باش يتلعبو فيه ماتشات ديال كاس لعالم 1990. ؤ ولات كتلعب فيه جوڨينتوس ماتشاتها أضوميسيل. واخّا رجع طراپاطوني ؤ سيناو مع لؤسطورة روبيرطو بادجيو مقدراتش لفرقة ترجع للطوپ، كوميم ربحو كاس ليتّيحاد عاوتاني ف1993 كونطر بوروسيا دورتموند.
كل شي بدا مع لمودريب مارتشيللو ليپي اللّي صنع فرقة كتخلع، پيروتزي، فيرّارا، بادجيو، دجيانلوكا ڨياللي ؤ ديل پييرو مازال بزغول. أول سيزون ليه جاب لبطولة اللي غابرة عليهم من 1986 ؤ كاس طاليان ؤ سوپركوپ د طاليان، ف 1995-1996 ربحو فينال تشومپيونز ليڭ كونطر أياكس أمسطردام بالپيلانتيات (لماتش سالا ب 1-1 بيت ديال جوڨنتوس ماركاه فابريتسيو راڨانيللي[10]). 1996 ربحو أنتيركونتينونتال (كاس لقارات ؤورپا سود امريكا) كونطر ريڤير پليت لارجونتيني.
لعّابا بحال زيدان، پيپو إنزاݣي ؤ داڤيدس سيناو فصيف ؤ لفرقة دات معاهم لبطولة عامين متابعة 1996-1997 ؤ 1997-1998، وخسرو جوج تشامپيونس ليڭ وحدة ف ميونيخ كونطر دورتموند 1997 ولخرى فأمسطردام كونطر الريال 1998. كيمّا طرا مع طراپاطوني، حتى مارتشيللو ليپي مشى لانتير، ولكن رجع من بعد عامين، ؤ شرا لعّابا زوينين بحال بوفون ، نيدڤيد،طورام ؤ تريزيݣي. ربحو لبطولة تاني جوج مرات متابعة 2001-2002 ؤ 2002-2003.
فأولد ترافورد 2003، خسرو مرة خرا تشامپيونز ليݣ هاد لخطرة كونطر ميلانو بالپيلانتيات (ماتش سالا 0-0). مورها مارتشيلو سينا مع لجامعة طاليانية باش يدرب لمنتخب، عامين من بعد ربح معاهم لمونديال دلالمان 2006.
فابيو كاپيللو شد لفرقة، كان دل پييرو ف طوپ، زلاتان إبراهيموڨيتش باغي يدير سميتو، فابيو كاناڨارو، طورام، زامبروطا، أدريان موتو، بوفون. كانت فريقة مليحة. ربحو لبطولة عامين متابعة 2004-2005 ؤ 2005-2006. ولكن فللخّر ديال سيزون 2006، كان تدار تحقيق على بيّن باللي شي مسؤولين فشي فراقي، ؤلجامعة طاليانية ؤ لاربيطات مداخلين فقضايا فساد ؤ رشاوي لحكام ؤ غش... اليوڨي حتى هي كانت بين لمتاهمين فهادشي، داكشي علاش حيدو ليها لبطولة ديال 2004-2005 (عطاوها لانتر ميلون) ؤ هبطوها لدوزييم ديڨيزيون، سيري ب.
_(2).jpg)
كاينين من اللعّابا الّلي مابغاوش يلعبو في سيري ب، بحال زلاتان ؤ پاتريك ڨييرا اللي مشاو لانتير، كاناڤارو ؤ إيمرسون مشاو للريال، ؤ طورام ؤ زامبروطا مشاو للبارصا، أدريان موتو مشا لفيورينتينا.
من هادوك اللي بقاو مع ليكيپ ف سيري ب، كاين ديل پييرو، بوفون، كيلليني، نيدڨيد، تريزيڭي، زالاييتا ؤ ماورو كامورانيزي. لمدريب كان ديدي ديشون. اليوڤي دوزات عام واحد وطلعات فسيزون 2007-2008 ؤللي تكلاصات فيها 3 مع لمدريب كلاوديو رانييري. لعام اللي موراه لعبو تشامپيونز ليڭ ولكن تقصاو من دووزييم تور. بدلو بزاف ديال مدربين، فيرارا، زاكيروني، ديل نيري بلا فايدة. 2011 ولّى أندريا أنييللي رئيس ؤ جاب معاه ماروتا مدير رياضي ؤ تفتاتح تيران جديد جوڤينتوس سطاديوم اللّي هو ملكية د لفرقة.
أنييللي ؤ ماروتا عرفو باللي أنطونيو كونتي هو اللي فيدّيه يرجّع ليكيݕ لقمة داكشي علاش سيناو معاه . لعام اللول ليه 2011-2012 كان خيالي حيت ربحو سكوديتو بلا مايخسرو حتى ماتش لأول مرة فتاريخ[11] (بطولة ديال 38 ماتش). 2013-2014 اليوڤي ربحات 34 ماتش من أصل 38 ؤجمعات 102 نقطة (رقم قياسي[12]).
ألليڭري كمل داكشي لي بداه كونتي، حيت زاد 5 شامپيونات آخرين، ؤ وصل فينال تشومپيونز ليڭ 2 خطرات خسرهوم بجوج. اللول ف2015 برلين مع البارصا. ؤ تاني فكارديف كونطر الريال فعام 2017.
2019-2020 ماوريتسيو سارّي كيخلف ألليݣري فتدريب ؤ كيربح حتى هو لبطولة داك لعام، باش تولّي أول مرة ف التاريخ شي فرقة تربح 9 ديال سكوديتي متابعين من 2011 ل 2020.[13]
ف الصيف ديال 2018 ؤ على غفلة، كريستيانو رونالدو كيخرج من الريال، وكيسيني كونطرا مع اليوڨي ب100 مليون جنيه استيرليني. كانت أكبر صفقة ف التاريخ لشي لعّاب عمرو فايت 30 عام.[14] من غير لجانيب لرياضي ديال الصفقة، الجانيب لاقتصادي كان حاضر، الصورة ديال اللعاب ؤ الشهرة ديالو عطات لليوڤي قيمة سوقية اكبر، من ناحيت الإشهار ؤ النقل التيليڤيزيوني ؤ لبيع ديال تونيات ؤ ڭاع لي پرودوي ديال جوڤينتوس.
مع رونالدو، اليوڤي ربحات البطولة عامين متابعة، وكاس السوپر 2 خطرات ؤ كاس الطاليان خطرة وحدة.
ف الصيف ديال 2020، أندريا پيرلو كيولّي مدريب ديال اليوڤي بعدما حيدّو ماوريتسيو سارّي. كيربح السوپر ضد ناپولي، ؤ من بعدو كيربحو كاس الطاليان كونطر أطالانطا. لإيدارا ماكانتش مقتانعة بنتايج ديال لفرقة ؤ نيڤو ديالها، جرّاو على پيرلو ؤ جابو ألليڭري فصيف 2021.
ولكن تا حاجة ما تبدلات، بالعكس، موسم 2021-2022 خرجو فيه بزيرو لقب لأول مرة من 2011. ؤ 2022-2023 كان أكفس، حيت تقصاو ف التشومپيونز ليڭ من لڭروپات بعدما ربحو ماتش 1 ؤ خسرو 5، ؤ غير بالڭولاڤيراج باش دازو لؤروپا ليڭ ؤ تقصاو ف دومي فينال كونطر سيڤييا.
فنوڤمبر 2022، ديميسيوناو ڭاع هادوك اللي كانو ف الإدارة من الرئيس أندريا أنييلّلي حتال نيدڤيد. أندريا أنييللي كان هو أنجح رئيس من ناحية لالقاب 19.
عام 2023، تحيدات لليوڤي 15 نقطة بقرار من لأيتيحاد طالياني بخصوص تخلويض فلبيدجيات فعوام لكوڤيد. تيفوزي ديال جوڤينتوس كفرو ؤ هددو باش يقاطعو سكاي سپور ؤ دازن. من بعد لمحكامة لغات 15 نقطة، ؤ من جات من بعد عاتاني ؤ حيدات ليهم 10 نقاط. لإيدارا دارت استيناف ؤ فبلاصة نقاط، عطاوهوم بروصي ديال 700 مليون ؤرو.
2024-2023 كانت أول سيزون ما كايشاركش فيها اليوڤي فؤروپا من 2011، بعدما لإيتيحاد لؤروپي دار ليهم حضر، حيتاش ما لتازموش بتفاقيات اللي دارو معاهوم. فهاد لعام ربحات اليوڤي كاس الطاليان ضد أطالانطا ب1 لزيرو، ماركاه ڤلاوڤيتش، ؤ تكلاصات 3 مورا لانتير اللي فاتها ب23 نقطة ؤ ميلان ب4. فللخر ديال لعام صيفتو ألليڭري فحالو مورا شوها اللي دار ف الفينال ديال لكاس.
2025-2024، تياڭو موطا كيولّي مدريب بعدما كاليفا بولونيا لعام لّي قبل لتشامپيونز ليڭ.
- ^ "Buon compleanno, Juventus Stadium!" (ب طاليانية). Juventus FC. 8 September 2016. مأرشيڤي من لأصل ف 9 September 2016. تطّالع عليه ب تاريخ 8 September 2016.
- ^ https://web.archive.org/web/20140610163705/http://www.juventus.com/juve/it/club/juventus%20in%20breve/01-La%20storia%20di%20una%20leggenda
- ^ "Storia della Juventus Football Club". magicajuventus.com (ب طاليانية). مأرشيڤي من لأصل ف 21 January 2008. تطّالع عليه ب تاريخ 8 July 2007.
- ^ "Juventus Football Club: The History". Juventus Football Club S.p.A. official website. مأرشيڤي من لأصل ف 29 July 2008. تطّالع عليه ب تاريخ 9 August 2008.
- ^ "11/03/1900 Juventus-Torinese F.C. 0–1, Campionato Federale 1899–1900". www.juworld.net. مأرشيڤي من لأصل ف 23 June 2021. تطّالع عليه ب تاريخ 17 June 2021.
- ^ "FIFA Classic Rivalries: Torino vs Juventus". Fédération Internationale de Football Association. مأرشيڤي من لأصل ف 14 December 2011. تطّالع عليه ب تاريخ 29 June 2007.
- ^ "Nel 1913 la Juve retrocede e viene ripescata". gazzetta.it. 26 July 2006.
- ^ "1913 e 1922, Juventus e Inter in Serie B? Ecco come andò veramente". calciomercato.com. 28 April 2018. تطّالع عليه ب تاريخ 9 September 2024.
- ^ Papa & Panico 1993, p. 271.
- ^ "1995/96: Juve hold their nerve". Union des Associations Européennes de Football. 22 May 1996. مأرشيڤي من لأصل ف 3 January 2012.
- ^ "Champions Juventus finish season unbeaten". UEFA. 13 May 2012. مأرشيڤي من لأصل ف 8 August 2016. تطّالع عليه ب تاريخ 16 May 2016.
- ^ "2013–14 Serie A review". Football Italia. مأرشيڤي من لأصل ف 22 April 2016. تطّالع عليه ب تاريخ 16 May 2016.
- ^ "JUVENTUS CHAMPIONS OF ITALY". Football Italia. 26 July 2020. تطّالع عليه ب تاريخ 27 July 2020.
- ^ "Cristiano Ronaldo: Juventus sign Real Madrid forward for £99.2m". BBC Sport (ب نڭليزية). 2018-07-10. تطّالع عليه ب تاريخ 2024-10-04.