تورة د إديمون

تورة د إديمون
معلومات أساسية
نوع د لمطايفة	ثورة
لموضع	موريطانية طنجية
تاريخ د لبدية	40
تاريخ د لمسالية	44
← →

التورة د إديمون هيّ تورة لي طرات من 40 تال 44 ميلادية ف إقليم موريطانية الطنجية الروماني (شمال لمغريب دابا). التورة قادها إديمون، لي كان عبد محرر ديال پطوليمايوس، لماليك اللخر ديال مملكة موريطانية.

إديمون قاد التورة ضد الرومان لي كانو تحت السلطة ديال كاليڭولا و من بعد كلاوديوس. السباب ديالها كان لإغتيال ديال لماليك پطوليمايوس لموريطاني بأمر من كاليڭولا، شي لي أدى ل لإحتلال لمباشر ديال مملكة موريطانية من عند الرومان و تقسيمها ل جوج أقاليم هوما إقليم موريطانية الطنجية، و إقليم موريطانية لقيصرية، بعدما كانت مملكة كليان لي ماتابعاش ليهم نيشان، وخا كان التأتير ديالهم ف السياسة و إدارة ديالها ديجا كبير. هاد التورة كانت قصيرة نسبيا، ولايني كانت عنيفة بزاف، و شعلو بسبابها عدد ديال لإنتفاضات ف موريطانية الطنجية كاملة.

لفشل ديال إديمون كيتفسّر ب الدعم لمحلي لقوي ضد التوّار، ديال لأمازيغ لمرومنين، بحال الجينيرال لموري لوسيوس كويتوس. هادشي كان ب سباب نجاح السياسة ديال الترومين ديال النخبة لمورية ف لفترة ديال لملوك لي سبقات لإحتلال.

لقوات د التوار

عدد ديال لباحتين طرحو السؤال ديال شكون كان جزء من لقوات ديال التوار لي قادهم إديمون. د. فيشويك عتابر بلي إديمون ماغاديكونو دعموه غير طرف من الجيش ديال پطوليمايوس لي كانو موالين ليه، و ماشي ضدو، حيت هاد لماليك بشكل عام ماكانش محبوب. ولايني لمقطع لي رجع ليه هاد لباحت، ف كتاب ديال التوارخي طاكيتوس على لحكم ديال پطوليمايوس، كيهضر غير على لبدية ديال هاد لحكم، و مايمكنش ناخدوه كا دليل بلي ماكانوش مساندين ل پطوليمايوس بشكل عام.

التدخل الروماني ف نفس لوقت يقدر يكون خلّى إديمون يجمع أتباع لي ماكانوش راضيين على التبعية ل روما، وخا ماكانوش ب الضرورة حاملين پطوليمايوس براسو. إديمون و أتباعو ماواجهوش غير الجيش الروماني، ولايني حتى لمواطنين لموريين لأمازيغ بحالو لي كانو ترومنو ولّاو كيحسبو راسهم رومان. بحال نيت ف وليلي، لي ديجا من لفترة لملكية كانو فيها بزاف د لوليليين لأصليين لي خداو الجنسية الرومانية، و حاربو معا لفيلق ديال واليريوس سيويروس. ف هاد لمطايفة لعسكارية ماتو عائلات كاملة ديال لوليليين لمرومنين.

الدلائل لأركيولوجية كاتدعم هاد الشهادة التاريخية و كايبيّنو لوحشية ديال لحروب لي طراو ف وليلي، و حتى ف مدون خرين بحال تامودا لي هدّموها الرومان بشكل كامل، و ف ليكسوس.

النهاية د التورة

التورة تسالات ف 44 ميلادية، من مور معركة حاسمة لي قدرو فيها الجيوش د الرومان، مكوّنين سيرتو من أمازيغ مرومنين، قدرو يكبّدو التوار خسائر كبيرة. الرومان موراها دارو معاهدة د السلام لي ف خلالها عفاو على التوار لباقيين موقابيل باش يحطو السلاح. إديمون ف لغالب تّقتل ف هاد لمعركة.

السيطرة الرومانية وقفات ف لمنطقة د وليلي تال جوايه فين كاينة دابا مدينة مكناس، و لإمبراطورية ماحاولاتش باش تتوسع ب لعنف ف لمناطق الجنوبية ديال مملكة موريطانية لفايتة. كيبان بلي لقبايل لمسالمة بحال لبكوات تم إدماجها ف لإقليم.

مزاود

• Burian J. Die einheimische Bevölkerung Nordafrikas von den punischen Kriegen bis zum Ausgang des Prinzipats, dans Altheim F. et Stiehl R., Die Araber in der alten Welt, t. 1, Berlin, 1964, p. 465-467.
• Euzennat M. Le temple C de Volubilis et les origines de la cité, B.A.M., t. 2, 1957, p. 41-64.
• Fishwick D. The Annexation of Mauretania, Historia, t. 20, 1971, p. 467-487 (en particulier p. 473-480: The Revolt of Aedemon).
• Gascou J. M. Licinius Crassus Frugi, légat de Claude en Maurétanie, Mélanges Boyancé, Rome, Collection de l’Ecole Française de Rome, 1974, p. 299-310. — La succession des bona uacantia et les tribus romaines de Volubilis, Antiquités Africaines, t. 12, 1978, p. 109-124.
• Tarradell M. Nuevos datos sobre la guerra de los Romanos contra Aedemon, 1. Congreso Arqueológico del Marruecos Español, Tetuan, 1954, p. 337-344.