تقويم شينوي
التقويم الشينوي هو واحد النوع ديال التقويم اللي كيعتمد على الدورة القمرية-الشمشية، وكيستعملوه فالصين، و كيتعتابر من أقدم التقويمات اللي مازال كيتستعملو فالعالم. هاد التقويم ماشي بحال التقويم الميلادي اللي كيعتمد على الشمس بوحدها، ولكن كيجمع بين حركة الشمس و حركة القمر باش يحدد الشهور والأعياد.[1]
التقويم الشينوي فيه 12 شهر، و كل شهر كيبدا مع بداية القمر الجديد. حيث العام فيه تقريباً 354 يوم، كاينين بعض السنوات اللي كيضيفو فيها شهر (كيسمّيوها "سنة كبيسة") باش يجي قد الدورة الشمسية اللي فيها 365 يوم.[2]
كل عام فالتقويم الشينوي كيرتبط مع واحد الحيوان من دورة مكوّنة من 12 حيوان، وهما:
- الفار 鼠
- العجل 牛
- النمر 虎
- القنية 兎
- التنين 竜 (龍)
- اللفعة 蛇
- العودان 馬
- الحولي 羊
- القرد 猿
- الفروج 鶏 (鳥)
- الكلب 犬
- الحلوف لبرّي 猪
كل 12 عام كتسالي دورة، وكتعاود من اللول. بزاف ديال شناوا كييآمنو أن الحيوان المرتابط بسنة لي كيتزاد فيه الشخص كيعطيه صفات خاصة وكيأثر على الزهر ديالو.
راس العام الشينوي، اللي كيتسمى بـ عيد الربيع، هو أكبر وأهم عيد فالشينوا. كيتحتافلو به مع بداية الشهر اللول فالتقويم القمري الشينوي، وغالباً كيكون فـ أواخر يناير ولا بداية فبراير حسب الحساب الفلكي.[3]
فهاد المناسبة، الناس كيتجمعو مع العائلة، كيطيبوا ماكلا تقليدية، وكيعطيو فلوس فـ جوايات حمرا (كيسمّيوها "هونڭ باو") لدراري صغار، وكيكونو عروض ديال الشطيح بالتنين والشعالات.
واخا شينوا كتخدم رسمياً ب التقويم الميلادي فالإدارات والحياة عادية، ولكن التقويم الشينوي مازال حاضر فالثقافة الشينوية، خصوصاً فالمناسبات التقليدية بحال الأعياد، عراسات، وتحديد تواريخ الزهر. حتى فبلدان نتاع أسيا خرا بحال ڤييطنام، كوريا، و تايلاند كاين نسخ كتشبه للتقويم نتاع الشينوا.[3]
- ↑ "Chinese Calendar 2024&2025: Gregorian to Lunar Days Converter, Lucky Day". www.travelchinaguide.com. تطّالع عليه ب تاريخ 2025-07-17.
- ↑ "Chinese (and other) calendar support, intercalary months, year cycles". cldr.unicode.org. تطّالع عليه ب تاريخ 2025-07-17.
- 1 2 List of observances set by the Chinese calendar (ب نڭليزية). 2025-07-04.