تاريخ د الجاپون
| طرف من سيرية على |
| تاريخ د الجاپون |
|---|
 |
التاريخ ديال الجاپون كيغطي أرخبيل الجاپون و علاقتها مع العالم، و تميز ف شي وقات ب الإنعزال، و وقات خرين ب الإنفتاح و و وقات خرين عاوتان ب الرغبة ف التوسع.
تيرجع أول ستقرار د بنادم ف الجاپون للوقيتة ديال جوايه هادي 38000 تال 39000 عام.[1] من بعد جات وقيتة الجومون. هاد الفترة هادي تسمات على حساب صناعة المواعن ديال الغيس، من بعد جات مرحلة يايوي ف الألفية اللولة قبل الميلاد، و فيها دخلات طيكنولوجيا جديدة من القارة الآسيوية. ف هاد الوقيتة، تكتب أول كتاب معروف على الجاپون واللي هو كتاب هان الشينوي ف القرن اللول من الميلاد.
بين القرن ربعة و تسعود، ولاو ممالك و قبايل كتار ف الجاپون متاحدين ب شوية ب شوية تحت حكومة مركزية اللي كيسيطر عليها الإمبراطور (و شي مرات الإمبراطورة). هاد العرق الإمبراطوري ما زال كيسيطر على الجاپون. ف عام 794، تأسسات عاصمة إمبراطورية جديدة ف هييان كيو (دابا كيوطو)، و هكا بدات فترة هييان، واللي ستامرات حتى ل عام 1185. كتعتبر الوقيتة ديال هييان، العصر الذهبي ديال التقافة الجاپونية القديمة. الحياة الدينية الجاپونية من هاد الوقت ولات مزيج ديال ممارسات الشينطو الأصلية و البودية.
ف العصور اللي جات من بعد، بدات كطيح قوة الإمبراطور و لقصر الإمبراطوري ب شوية ب شوية، هاد القوة كانت ف اللول ف يد فاميلات مدنية كبيرة اللي لاباس عليها، بحال قبيلة فوجيوارا - موراها دازت للفاميلات ديال العسكر اللي أشهرها الساموراي. خرجات فاميلة ميناموطو تحت حكم ميناموطو نو يوريطومو منتاصرة من حرب ݣينپيي اللي كانت بين 1180 و 1185, حيت هزمات فاميلة تايرا لي كانت منافسة ليها. من بعد ما شد الحكم، أسس يوريطومو العاصمة ديالو ف كاماكورا و ولى كيتلقب ب شوݣون. ف عوام 1274 و 1281, صمدات الشوݣونيا د كاماكورا قدام جوج هجومات ديال لمنݣول، و لكن واخا هكاك طاحت ف عام 1333 من قيبال واحد من المنافسين على الشوݣونيا، و من تم بدات وقيتة موروماتشي. ف هاد الوقيتة، زادت القوة ديال قيّاد إقليميين د الحرب اللي تسماو داي-ميو، لي توسعو على حساب الشوݣونيا. ف النهاية، الجاپون دخلات ف حرب أهلية. خلال لقرن سطاعش، توحدات الجاپون تحت قيادة الداي-ميو ؤضا نوبوناݣا و الخليفة ديالو طويوطومي هيدييوشي. بعد وفاة هيدييوشي ف عام 1598، جا طوكوݣاوا إياسو للحكم و عينو الإمبراطور شوݣون. حكم طوكوݣاوا إياسو من إيدو (طوكيو لعصرية)، و كانت وقيتة الشوݣونيا د طوكوݣاوا مزداهرة و سلمية و تسمات ب وقيتة إيدو (1600–1868). الشوݣونيا د طوكوݣاوا فرضات واحد النظام طبقي صارم على المجتمع الجاپوني و علاين قطعات العلاقات مع العالم لبراني.
بداو لبرطقيز و الجاپون أول رتباط بيناتهم ف عام 1543, من بعد ما ولاو البرطقيزيين أول أوروپيين وصلو للجاپون و خاصة الجزر ديالها اللي ف الجنوب. كانو مؤثرين بزاف ف الجاپون، حيت واخا التفاعل ديالهم كان محدود، تمكنو يدخلو السلاح د لقرطاس ف الحرب الجاپونية. هولاندا كانت أول دولة كاتدير علاقات تجارية مع الجاپون، كترجع العلاقات الجاپونية الهولندية ل عام 1609. البعتة لميريكانية ديال پيري ف عام 1853-1854 حيدات العزلة على الجاپون ب الكامل؛ و ساهمات ف سقوط القيادة العسكرية الشوݣونية، و رجعات السلطة للإمبراطور ف حرب بوشين عام 1868. حولات القيادة الوطنية الجديدة ف الوقيتة ديال مييجي (1868–1912) الدولة الجاپونية الجزرية المعزولة ل إمبراطورية كتتبع النمودج الغربي بشكل كبير و هكا ولات قوة كبيرة. واخا التطور الديمقراطي و زدهار التقافة المدنية لعصرية ف الوقيتة ديال طايشوو (1912–1926), كانت المؤسسة العسكرية الجاپونية القوية كتمتع ب بزاف ديال الإستقلالية و الحكم الذاتي، ل درجة ما كانتش ݣاع كاتسوّق ل قيّاد الجاپون المدنيين ف لعشرينات و التلاتينات. ف عام 1931 هاجم العكسر ديال الجاپون على منشوريا، و من عام 1937 تحولات ل حرب طويلة مع الشينوا. الهجوم ديال الجاپون على پيرل هاربور ف دجنبر 1941 دخلها ف حرب مع ميريكان و لحولافا ديالها. القوات الجاپونية دغيا ولات صغيرة قدام لقوات د لحولافا، و لكن واخا هكاك صمدات قدام الهجمات الجوية ديال لحولافا على البلاد اللي سببات ضرر كبير ف الديور و الطرقان. نهار 15 غشت 1945 علن الإمبراطور هيروهيطو ستسلام الجاپون بلا شروط، من بعدما طيحات ميريكان قنابل ذرية على هيروشيما و ناݣاساكي و هاجمو السوڤيات منشوريا.
الحلفا حتلو الجاپون حتى ل عام 1952، و ف هاد الفترة، تدار دستور جديد ف عام 1947 اللي حول الجاپون ل ملكية دستورية. بعد 1955، 10 سنين مور لحرب، الجاپون حققات نمو قتصادي عالي بزاف، و ولات قوة قتصادية عالمية. من التسعينات، عرفات كوارت طبيعية كبيرة بحال زلزال هانشين لكبير ف عام 1995، و هجوم ݣاز السارين ف الميطرو ديال طوكيو. ف عام 2004، صيفطات الجاپون قوة عسكرية باش تعاود تبني داكشي اللي طاح و مساعدة قوات التحالف الدولي خلال حرب العراق.
نهار الجمعة، 11 مارس 2011، ف الساعة 2:46 د لعشية (توقيت عالمي +9)، عرفات الجاپون زلزال و تسونامي كبير ب قوة 9.0 درجات. و هو واحد من أقوى الزلازل اللي ما عمر العالم عرف بحالو. هاد الزلزال قتل جوايه 20.000 واحد، و تضررو مناطق طووهوكو و تشوبو و كانطو ف شمال شرق هونشو. زيد عليهم منطقة طوكيو، و كانو عندو أضرار قتصادية كبيرة، و تسبب ف كارتة نووية خطيرة ف فوكوشيما.
القناطر لبريين تدارو ف الوقيتة الجليدية نهار فاش كان مستوى سطح البحر منخافض. هاد القناطر ربطو الأرخبيل الجاپوني ب القارة الآسيوية عبر جزيرة سكالين ف الشمال و جزر ريوكيو و طايوان ف الجنوب من بداية التجلد الرباعي الحالي قبل 2.58 مليون سنة. و تقدر تكون كانت تما قنطرة على الأرض كتربط الجاپون ب كوريا الجنوبية الغربية. كان أول دليل على الوجود البشري ف الجاپون هو وجود صيادين من العصر الحجري القديم لفوقاني قبل 40.000 سنة، منين نفاصلات الجاپون على القارة.[2]
ل حد دابا، لعولاما ما تمكنوش يحددو الأصول ديال السكان اللوالا ديال الجاپون، ولكن مؤكد بلي الشعب الجاپوني جا نتيجة ديال تخلاط بزاف ديال الأجناس اللي كانو مختالفين على بعضياتهم، واللي منهم: الجنس اللول، شعب بدائي قديم كان موجود خلال فترة الجليد، بين هادي 30.000 و 20.000. و بعد داكشي جاو على الأقل جوج أجناس للجزيرة. ف هاد الوقيتة، كانت الجاپون، آسيا، و أمريكا متلاصقين ب قطعة جليدية وحدة، لولى كانت جاية من الجنوب ديال آسيا، و الجاوجة واقيلا من سيبيريا و الشينوا.
مقالة متعمقة: وقيتة الجومون
ڤاز من وقيتة الجومون لمبكرة (11000 تال 7000 قبل لميلاد)
ڤاز من وقيتة الجومون لوسطانية (جوايه 2000 قبل لميلاد)
تمتال ديال ضوݣو من وقيتة الجومون لمعطلة (1000 تال 400 قبل لميلاد)
بدات الوقيتة ديال أسوكا من عام 538 مع دخول الدين البوذي من مملكة پايكتشي الكورية. من هاد الوقيتة، البودية تعايشات مع دين الشينطو الأصلي ف الجاپون، اللي كايتسمى اليوم ب سمية شينبوتسو شووݣوو. هاد الوقيتة جابت سميتها من العاصمة الفعلية ديال لإمبراطورية، أسوكا، ف إقليم كيناي.[3]
فاميلة صوݣا البودية خدات الحكم ف التسعينات ديال القرن ستة و حكمت الجاپون من الظل علاين ستين عام. الأمير شووطوكو، واحد من الموالين د لبودية و قضية صوݣا، اللي عندو أصول من فاميلة صوݣا، تولى الحكم و لقيادة الفعلية على الجاپون من عام 594 ل 622. شووطوكو دار دستور ب سبعطاش مادة، و هي مدونة ديال القواعد و السلوك للمسؤولين و لمدنيين. هاد الدستور جابو من الكونفوشيوستية و حاول يطبق نظام مدني مبني على الإستيحقاق اللي تسمى نظام المراتب و الطرابش. ف عام 607، شووطوكو دار واحد الإهانة للشينوا حيت سيفط واحد لبرية و بداها بـ"حاكم أرض الشمس الطالعة كيخاطب حاكم أرض الشمس لهابطة" كيما تيبان ف الرموز ديال لكانجي د لكلمة الجاپونية "نيپون". ف عام 670، تعتامد واحد الشكل ديال هاد الكلمة اللي هو نيهون، سمية رسمية ديال لأمة، و بقا مخدّم تال دابا.[4]
عام 645، طاحت سلالة صوݣا من بعد نقلاب ديال الأمير ناكا نو ؤوي و فوجيوارا نو كاماطاري، مؤسس سلالة فوجيوارا. الحكومة ديالهم طبقات إصلاحات تايكا. بدات العملية ب إصلاح الأراضي، على ساس الأفكار و الفلسفة الكونفوشية الشينوية. و رجعات جميع الأراضي ب يد الدولة (التأميم)، باش تعاود توزع على الفلاحا و المزارعين ب التساوي، و وصات باش يتدار روجيستر عائلي باش يكون هو الساس ديال نظام ضرائب جديد. كان الهدف الحقيقي من هاد الإصلاحات هو التمركيز و لعطيان د سلطة واسعة للقصر الإمبراطوري، اللي كان كيعتامد على الطريقة و التنظيم الشينوي ف الحكم. و كان كيصيفط المبعوتين و الطلبة للشينوا باش يتعرفو على الكتابة الشينوية و سياساتها و دينها. من بعد هاد الإصلاحات، طرات حرب دجينشين عام 672، لي كانت نزاع دموي بين الأمير ؤواما و ولد خوه الأمير ؤطومو، لي كانو متنافسين على العرش. هاد لحرب كانت حافز رئيسي للمزيد من لإصلاحات الإدارية. كانت هاد الإصلاحات وصلات لأوج ديالها ب تدواز دستور طايهوو، اللِّي عزز القوانين اللي كانت موجودة بعدا، و أسس حكم مركزي مع حكومات إقليمية اللي تابعة ليه. هاد الإصلاحات القانونية خلقات نظام حكم مركزي على الطريقة الشينوية تسمى ريتسوريوو و بقى خدام على مدى خمسة د لقرون.[5]
الفن ديال فترة أسوكا كان كيجسد مواضيع الفن البودي. المعبد البودي هوريو دجي كيتعتبر واحد من أشهر الأعمال ديال هاد الوقيتة، اللي تبنى ب طلب و تكليف من الأمير شووطوكو و كملات فيه الخدمة عام 607. اليوم كيتعتابر أقدم هيكل د لخشب ف العالم.[6]
ف عام 710، بنات الحكومة عاصمة جديدة ف هييجوو كيوو (نارا لعصرية) ب نفس لموضيل ديال شانݣ-أن، عاصمة سلالة تانݣ الشينوية، ف هاد الوقيتة بانو جوج أول كتوبا تكتبو ف الجاپون: كوجيكي و نيهون شوكي، و فيهم تسجلو بزاف ديال الروايات الخرافية على أصل الجاپون و البدايات الولى ديالها و أساطير خلقها، اللي بينو بلي السلالة الإمبراطورية من لأرباب. ف النص اللخر ديال القرن التامن، تجمع كتاب مان-يووشوو اللي بزاف ديال الناس كيعتابروه أفضل مجموعة شعرية جاپونية.[7]
ف هاد الوقيتة، عرفات الجاپون بزاف ديال الكوارت الطبيعية، بما فيها عوافي ديال الغابات و الجفاف و الجوع و نتشار الأمراض، بحال جايحة الجدري ف 735-737 اللِّي قتل كتر من ربع السكان. كان الإمبراطور شوومو (حكم من 724 إلى 749) خايف من كون السباب ديال داكشي هوّ بلي ما كانش متّاقي، داكشي اللي خلاه يزيد من الدعم الحكومي للبودية، بما فيها لبني ديال معبد طووضاي-دجي عام 752. الراهب البودي المؤتر ݣيووكي جمع جزء من الفلوس اللي كانو خاصين باش يتبنى هاد المعبد، و بعد ما تبنى ستعملو الراهب الشينوي ݣانجين بلاصة للترسيم. واخا هكاك، دخلات الجاپون مرحلة من التدهور السكاني اللي ستامرات ف الوقيتة ديال هييان اللاحقة. كانت زيدون واحد المحاولة خطيرة ل إسقاط البيت الإمبراطوري خلال ف النص ديال وقيتة نارا. ف الستينيات ديال القرن 7، حاول الراهب ضووكيوو يبني سلالة خاصة بيه ب المعاونة ديال الإمبراطورة شووطوكو، ولكن من بعد ما توفات ف عوام 770 فقد السلطة ديالو كاملة و تنفى برا ديال البلاد. ف نفس لوقت سلالة فوجيوارا وسعات السلطة ديالها.[8]
- مقالة متعمقة: فترة هييان
فترة هييان (جاپونية: 平安時代، هييْيان دجيداي) هيّ لفترة اللخرة ف التاريخ لكلاسيكي د الجاپون، و كاتبدا ب لإمبراطور نمرة 50، كامّو. ف عام 784، تنقلات العاصمة ل ناݣاوكا كيوو ل مدة قصيرة، و مرة خرى ف عام 794 ل هييان كيو (كيوطو لعصرية)، اللي بقات هي العاصمة حتى ل عام 1868. و دغيا تنقلات السلطة السياسية داخل القصر ل فاميلة فوجيوارا، و هي عائلة ديال النوبالا المحليين، لي تقربو من العائلة الإمبراطورية ب الجواج. بين عوام 812 و 814 ميلادي، قتلات جايحة الجدري علاين نص السكان ديال جاپون.[9]
عام 858، فوجيوارا نو يوشيفوسا علن راسو وصي (ب لقب "صيشّو") على الإمبراطور الصغير. ولدو فوجيوارا نو موطوتسوني دار منصب كامپاكو، اللي كيعطيه حق الحكم بلاصت إمبراطور راشد. حكم فوجيوارا نو ميتشيناݣا، كان راجل دولة ستثنائي لي شد منصب كامپاكو عام 996، ف الوقيتة فاش وصلات فاميلة فوجيوارا للقمة ديالها، و زوج ربعة من بناتو ل أباطرة. بقات فاميلة فوجيوارا ف السلطة حتى ل عام 1086, من بعد ما تخلى الإمبراطور شيراكوا على العرش ل ولدو الإمبراطور هوريكاوا ولكن واخا هكاك ستامر ف ممارسة السلطة السياسية، و أسس ما كيتعرف ب الحكم المنفاصل، اللي كان فيه الإمبراطور الحاكم مجرد حاكم صوري، ف حين السلطة الحقيقية كانت كتدوز من تحت الطبلة تحت السيطرة ديال إمبراطور سابق ف المنصب.[10][11]
طيلة الوقيتة ديال هييان، ضعافت القوة د لقصر الإمبراطوري. و بقى القصر ملهي ف الصراعات على ود السلطة و لمساعي لفنية ديال النوبالا، ل درجة بلي هملو لإدارة د لحكومة برا العاصمة. التأميم ديال لأراضي ف إطار نظام ريتسوريو تراجعات، حيت بزاف ديال العائلات النبيلة و الجماعات الدينية حصلات على إعفاء ضريبي للمزارع لي تسماو شووين. مع القرن حداعش، كانو لملّاك ديال الشوين كيسيطرو على بزاف ديال الأراضي ف الجاپون كتر من هاديك اللي كانت تحت سيطرة الحكومة المركزية. و هادشي حرم القصر الإمبراطوري من بزاف ديال مداخيل الضرائب اللي بها تيخلصو الجيش الوطني. و هكا غادي يضعاف هاد الجيش، و غادي يصاوبو النوبالا صحاب الشوين جيوشهم الخاصة من الساموراي. جوج من العائلات النبيلة القوية اللي هما من فروع العائلة الإمبراطورية الحاكمة، و هما قبايل تايرا و ميناموطو، صاوبو جيوش كبيرة مع بزاف ديال الشوين برا ديال العاصمة. و بدات الحكومة المركزية كتخدّم هاد العشائر المسلحة ف القمع ديال التمردات و القرصنة. الشعب الجاپوني غادي يرجع لمرحلة الإستقرار و الهدوء ف التالي ديال وقيتة هييان بعد مئات السنين ديال الحروب و التدهور.[12]
ف بداية الوقيتة ديال هييان، نجح القصر الإمبراطوري ف السيطرة على الشعب الإيميشي ف شمال هونشو. كان ؤوطومو نو ؤطومارو أول راجل كيعطيه القصر لقب سيي طاي-شووݣون (القائد العظيم قاهر البرابرة). ف عام 802، سيي طاي-شووݣون ساكانووي نو طامورامارو تحكم ف شعب إيميشي، اللِّي كان القائد ديالو هو أطيروي. مع بداية عام 1051، تحدى أعضاء من قبيلة آبي، اللي كانو خدامين ف بلايص بارزة ف الحكومة الإقليمية، تحداو السلطة المركزية ب العلالي. لقصر طلب من قبيلة ميناموطو محاربة قبيلة آبي، اللي هزماتها ف حرب تسع سنين لفايتة (1051–1062). و هكا، رجع القصر كيفرض السلطة ديالو ل بعض الوقت على شمال الجاپون. بعد حرب أهلية خرة - حرب التلت سنين التالية - تولى فوجيوارا نو كيوهيرا السلطة ب الكامل؛ فاميلتو، فوجيويرا الشمالية، حكمات شمال هونشو على مدى القرن اللي جا من بعد، من العاصمة ديالهم هيرايزومي.[13]
ف عام 1156، بدا النزاع على العرش داكشي اللي خلى المتنافسين الإمبراطور جو-شيراكاوا و الإمبراطور سوتوكو، يركزو على القبيلة ديال تايرا و القبيلة ديال ميناموطو لعل و عسى يوصلو للعرش ب القوة العسكرية. ف هاد الحرب، هزمات قبيلة تايرا ب قيادة تايرا نو كيموري قبيلة ميناموطو. كيموري ستاغل الإنتصار ديالو باش ياخد السلطة بيديه ف كيوطو و حتى حطّ حفيدو أنطوكو إمبراطور. هاد الحرب خلقات منافسة بين قبيلة ميناموطو و تايرا. و بسباب داكشي، غادي تنطالق إنتفاضة هييجي ف عام 1160. ف عام 1180، لقى الإمبراطور تايرا نو كيوموري راسو قدام تمرد ب قيادة ميناموطو نو يوريطومو، واحد من أفراد قبيلة ميناموطو، اللي نفاه كيموري بعد هداك التمرد ل كاماكورا. واخا توفى تايرا نو كيموري ف عام 1181, ولايني حرب ݣينپيي الدموية ستامرات بين فاميلات تايرا و ميناموطو ربع سنين خرة. ف عام 1185، جا الفوز ديال قبيلة ميناموطو حاسم منين بانت القوة ديالها ب قيادة خو يوريطومو الصغير، ميناموطو نو يوشيتسوني، ف معركة دان نو ؤرا البحرية. و هاكدا ولى يوريطومو و الحاشية ديالو الحكام الفعليين د الجاپون.[14]
ف وقيتة هييان، كان القصر الإمبراطوري مركز ديال الفن العالي و التقافة الرفيعة، كان من بين الإنجازات الأدبية المجموعة الشعرية كوكينشو و يوميات طوسا بجوج بيهم ديال الشاعر كي نو تسورايوكي، و حتى مجموعة نثريات سي شووناݣون كتاب السادة و قصة ݣينجي ديال موراساكي شيكيبو، واللي غالبًا كتعتبر من أروع لأعمال الأدبية ف الأدب الجاپوني.
كان تطوير نظام الكتابة المقطعية المعروف ب سمية كانا نتيجة ديال التأتير الشينوي المتراجع خلال فترة هييان. ف هاد الوقيتة ما بقاتش الجاپون كتصيفط البعتات الرسمية ديالها للسلالة ديال تانݣ الشينوية، اللي بدات ف عام 630, ف القرن التاسع، واخا وقفو البعتات، ولايني بقاو بعتات لارسمية للشينوا بحال الرهبان و العولاما، و بعد داكشي تسارع التطور ديال الشكال الفنية و الشعرية الجاپونية الأصلية. معبد بيوودوو-إن اللي تبنى عام 1053 ف ؤجي كيتعتابر من الإنجازات المعمارية العظيمة، بحالو بحال هييان-كيو براسها.[15]
- ↑ Fujita, Masaki (2016). "Advanced maritime adaptation in the western Pacific coastal region extends back to 35,000–30,000 years before present". Proceedings of the National Academy of Sciences of the United States of America. 113 (40): 11184–11189. doi:10.1073/pnas.1607857113. PMID 27638208.
- ↑ Tsutsumi Takashi (January 18, 2012). "MIS3 edge-ground axes and the arrival of the first Homo sapiens in the Japanese archipelago". Quaternary International. 248: 70–78. Bibcode:2012QuInt.248...70T. doi:10.1016/j.quaint.2011.01.030.
- ↑ Perez 1998, pp. 16, 18.
- ↑ Weston 2002, p. 127.
- ↑ Sansom 1958, p. 57.
- ↑ Totman 2005, pp. 55–57.
- ↑ Keene 1999, pp. 85, 89.
- ↑ Farris 2009, p. 59.
- ↑ Sansom 1958, p. 99.
- ↑ Totman 2005, pp. 91–93.
- ↑ Henshall 2012, pp. 29–30.
- ↑ Perez 1998, pp. 25, 26.
- ↑ Meyer 2009, p. 62.
- ↑ Henshall 2012, pp. 33–34.
- ↑ Totman 2005, p. 120.
