بݣر
 مقالة ؤلا فقرة ناقصينها مصادر.لمعلومات لّي ف هاد لمقالة ؤلا هاد لفقرة ناقصين ف توتيق، خاصّ يتزادو فيها مصادر باش تكون موتوقة. شوف هنا كيفاش تزيد لمصادر. ماتّخلعش! هاد لميصاج مديور باش تشوفو لفرقة ديال الصيانة و لمراجعة د لمقالات، و ماكيعنيش بلي درتي شي غلط! |
بݣر
| ||
 | ||
| لعيشة | ||
| أقدم تاريخ | لقرن 105 قبل لميلاد | |
| لمودة د لعيشة | حتال 48 عام | |
| لمناسلة | ||
| شحال كايولد ف دقّة | 1 | |
| لمودة د رضاعة | 11 ayyuren | |
| خصايصو | ||
| النيفو دالسميع | من 23 Hz حتال 35,000 Hz | |
| كاياكل | نجيلية | |
| كاين منو | ثور *بقرة *ثور | |
| لخاريطة ديال فين عايش لكائن | ||
 | ||
| معلومات خرين | ||
| لكائن مصدر ديال | بڭري *حليب بقر *إهاب البقر *knuckle *beef byproducts | |
| رمز ديال ليونيكود | 🐄، 🐮 | |
لبݣر (سمية علمية: Bos taurus) هوما حافريات مربيين لي كايخلّيوهم ب شكل عريض ب صيفتهم كسيبة. هومايا أعضاء عصريين بارزين ف لفاميلة التحتانية بݣيّريات و أكتر نوع دايع من ݣنس لبݣرة. لبݣرات النتوات الناضجات كايعيّطو ليهم لبݣرة و لبݣر لي الدكر كايسميوه التور. نتوات لبݣر الصغار ف لعمر كايسميوهم لبݣيرات، و الدكور د لبݣر الصغار ف لعمر كايسميوهم لعجولا.
لبݣر كايترباو ب شكل شايع على قبل لحمهم، لمنتوجات لحليبيين، و على قبل جلدهم. ب صيفتهم حيوانات د لخدمة، كايجرّو لكوتشيات و ماكينات لفلاحة. لبݣر كايتعتابر حيوان مقدس ف لهندوسية، و لقتيل ديالهم ف شي ولايات ف لهند كايكون لاقانوني. السلالات الصغر ف لقد كيف ما الزيبو لمصغّر كايخلّيوهم ب صيفتهم حيوانات نتاع الدار.
لبݣر التوري (Taurine؛ ولا لبݣر لي تأصل ف أوروپا) موزع ب شكل واسع على طول أوروپا و لبلايص لمعتادلين د آسيا، لأمريكيتين، و أوسطراليا. الزيبوات كايتلقاو ب شكل ساسي ف لهند و لبلايص لمداريين د آسيا، أمريكا الجنوبية و الشمالية، و أوسطراليا. بݣر الصانݣا كايتصاب ب شكل لولاني ف إفريقيا جنوب الصحرا. هاد الشكال، شي مرّات كايتكلاصاو كا نواع مفارقين ولا نويّعات، كايتقسّمو ل كتر من 1,000 سلالة معتارف بيها.
جوايه 10,500 عام هادي، لبݣرات التوريين تدوميستيكاو من لأوروخسات لبّريين السلفيين ف لأناضول لوسطاني، بلاد الشام و غرب إيران. واحد الدوميستيكاسيو مفارقة وقفات ف شبه لݣزيرة لهندية، لي طلّعات الزيبو. كاين كتر من 940 مليون بݣرة ف لعالم على حساب 2022. لبݣر مسؤولين على جوايه 7٪ من نبعاتات لݣازات د لحتيباس لحراري. هوما كانو من لحيوانات لمربيين اللولين ݣاع لي كسبو واحد لخريطة كاملة ديال الجينوم.
لبݣر هوما حيوانات بزوليين من مساويات الصبعان ب حوافر مفروقين، معنيتو كايتمشاو على جوج صبعان، الصبع التالت و الرابع. بحال ݣاع النواع د لبݣريات، هوما كايقدر يكونو عندهم ݣرون، لي كايكونو مامعرّشينش و ماكايطيحوش من عام ل لعام. التلوينة كاتنوع على حساب السلالة؛ اللوان الشايعين هوما لكحل، لبيض، و لحمر/قهوي، و شي سلالات كايكونو منقطين ولا عندهم لوان مخلطين. التوار كايكونو كبر من لبݣرات من نفس السلالة ب تقل كايوصل حتى ل 100 كيلوݣرام. بݣرات هيرفورد لبرطانيين، متلاً، كايوزنو 600–800 كݣ، أما التوار كايوزنو 1,000–1,200 كݣ، لبݣرات الضروبات (beef cattle؛ لبݣر د اللحم) كان عندهم متوسط غير د 160 كݣ صافي. من موراها، التقل د هاد لبݣرات بدا كايطلع ب شكل تابت. سلالات لبݣر كايتبدلو ب شكل عريض ف لقد؛ أطول و أتقل سلالة هي لكيانينا (Chianina)، لي شي دكر ناضج من هاد السلالة يقدر يوصل حتى ل 1.8 م حد لكتاف، و يقدر يقفل 1,280 كݣ ف التقل. لعيشة الطبيعة ديال لبݣر لمربي ف جوايه 25–30 عام. الضروبات كايتنحرو ف جوايه 18 الشهر، و لبݣرات د لحليب ف جوايه خمس سنين.
لبݣر كايتعتابرو مدايغيات، معنيتها سيستيمهم د لهضيم كايكون مختص ب زايد ف معالجة لمواد النباتيين كيف ما الربيع لمعبي ب السيلولولز، لي هو واحد لپوليمير د لكاربوهيدرات مجهد لي شلا حيوانات ماكايقدروش يهضموه. كايديرو هادشي ف مكافلة (symbiosis) معا لكائنات لميكروبيين – لباكتيرية، لفݣيع، و لحيوانات اللولانيين – لي كايملكو السيلولازات (cellulases)، لي هوما ؤنزيمات كايفرْقو السيلولوز ل السكريات لي مشكلاهم. من بينات شلا باكتيريا لي كايساهمو ف هادشي، كاين النواع بحال فيبروباكتير سوكينوجينيس (fibrobacter succinogenes)، رومينوكوكوس فلاڤيفاسيينس (Ruminococcus flavefaciens) و رومينوكوكوس آلبوس (Ruminococcus Albus). لفݣيع السيلولوتي كايشمل بزاف د النواع من ݣنس لمسواط الزوين الجديد (Neocallimastix)، أما لحيوانات اللولانيين (protozoa) كايشملو لهدبيات (ciliates) بحال النواع يوديپلودينيوم ماݣي (Eudiplodinium maggie) و أوسطراكودينيوم آلبوم (Ostracodinium album). يلا لماكلة د لحيوان تبدلات معا لوقت، التركاب د هاد لميكروبيوم حتى هو كايتبدل كا ستيجابة.
لبݣر عندهم معدة وحدة كبيرة ب ربعة د لقسام؛ بيت لمديغ (rumen)، الشبّيك (reticulum)، مّو تلافف (omasum)، و النفّاحة (abomasum). بيت لمديغ هو أكبر قسم و فيه لپارتيات لمهمين ݣاع د لميكروبيوم. الشبّيك هو أصغر قسم، معروف ب سمية "خلية النحل". لوضيفة الساسية د مو تلافف هي مصان لماو التقاوت من لماكلة لقابلة ل لهضيم. النفاحة ولا لمنفحة عندها وضيفة مشابهة معا لمعدة د بنادم. لبݣر كايرجّعو (regurgitate) و كايعاودو مديغ ماكلتهم على جريق عملية مديغ الجرّة (cud، لماكلة لمرجعة)، بحال لغالبية د لمضايغيات. ف وقيت لماكلة، لبݣر كايبلعو ماكلتهم بلا مديغ؛ هاد لماكلة كاتدوز ل بيت لمديغ باش تتخزن. من بعد، لماكلة كاتعاود تترجّع ل لفم، ب لقمات من خطرة ل خطرة، فين الجرّة كاتتمدغ ب الضراس، ب طحين النباتات لحرشين ل ݣسيّمات صغار. الجرّة من موراها كاتتعاود تتمدغ و كاتتهضم من لكائنات لميكروبيين ف معدة لبݣرة.
وقيت لحبالة عند شي بݣرة كاتكون ف جوايه تسع شهور. معدال تفريخات الدكر معا النتوا ف الزيادة تقريباً 52:48. الضّرَع (Udder) د لبݣرة فيه جوج فردات ديال غدد بزوليين ولا حلمات. لفيرمات ديما كايخدّمو لإمنا الصطيناعي (insemination)، لي هو لحطان الصطيناعي ديال لماني ف لمسلك لمناسلي د النتوا؛ هادشي كايخلّي لكسّاب يعزل بينات واحد لمادى عريض ديال التوار على قبل لمجاوجة معا لبݣرات دياولو. لوداق (Estrus؛ الشالور) حتى هي تقدر تتدخّل ب شكل صطيناعي باش تسهّل لعملية. تدخال لماني (Copulation) كايبقى بزاف ديال التواني و كايصاوب من واحد الدفعة فرّادية ديال لحوض. لبݣرات كايقلّبو على لبلايص لخلويين على قبل الزيادة. لبݣرات لعزبات (heifers) ديال التيرات لعاليين (Highland cattle) كايولدو ل لمرّة اللولانية ف عمر 2 ولا 3، و التوقيت د لولادة كايكون مزامن معا زيادات ف لكاليطي د لماكلة الطبيعية. متوسط فواصل لولادة هو 391 يوم، و نسبة لموت وقيت لولادة وسط لعام اللول د لعيشة هو 5٪. لعجولا كايرضعو 5 لخطرات ف ليوم كا متوسط، كايدوّزو شي 46 دقيقة و هوما كايرضعو. كاين واحد الريتم نهاري ف الرضاعة، لي الدروة ديالتو علاين ف 6 د لعشية، 11.30 د الليل، و 7 د الصباح. تحت الضروف الطبيعيين، لعجول كايبقاو معا مهم ل لفطامة ف 8 ولا 11 شهر. لبݣرات لعزبات و لعجولا الدكور كايكونو مرتابطين ب شكل مكافي معا مهم ف الشهورا اللولانيين من حياتهم.
لبݣر عندهم واحد التنويعة د لقدرات الستيعرافيين. هوما كايمكن ليهم يعقلو على لمواضع د شلا عوينات د لماكلة، و كايقدرو يبقاو عاقلين 48 يوم علاقل. لبݣرات الطفلات كايتعلّمو زرب من لبالغين. لعجولا كايقدرو يتعلّمو ب التمييز (discrimination learning)، ب تفراز لحيوانات لخافيين و لماخافيينش، و بينات بنادم، ب تخدام لوجوه و ليمارات لخرين. لعجولا كايخيّرو صوات ماواتهم على الصوات د لبݣرات لخافيين. الصوات كايمدو لمعلومة على لعمر، الجنس، لحالة د لحكام و لحالة لمكاترية ديال لعيّاط، و يقدرو يلمّحو على لحالة لوداقية ديال لبݣرات و على التوْرِية د لمنافسة ديال التوار. لبݣر يمكن ليهم يرتبو التصاور ب صيفتهم فراد خافيين و ماخافيينش. لعجولا لمكلونيين (لمستنسخين) من نفس لعاطي (donor) كايشكلو ݣروپات دياولهم، هادشي لي كايقتارح بلي التمييز د لقراب يقدر يكون هو الساس نتاع السلوك د تشكال لݣروپ. لبݣر كايخدّمو التجناب الشوفي/لمخّي (visual/brain lateralisation) منين كايكونو يسكانيو لمحفزات الجداد و لخافيين. هومايا كايخيّرو يشوفو لمحفزات الجداد ب لعين ليسرية (ب تخدام النص ليمني د لمخ)، و لعين ليمنية على قبل لمحفزات لماخافيينش. لبݣر لأفراد فايتين تقشعو عاوتاني كايورّي مزيّات مبدلين د الشخصية، بحال عدم لخوف و التجماع.
الشوف هو لحاسة الطاغية؛ لبݣر كاياخدو النص ديال لمعلومات دياولهم ب شكل شوفي. ب صيفتهم حيوانات فرايس، لبݣر تطوّرو باش يحضيو معا لمفتارسين من ݣاع الجوايه، ب عينين لي محطوطين ف جناب الراس ف عاوض لقدّام. هادشي كايعطيهم واحد لمجال شوفي د 330°، بلحق كايحد الشوف الجاوجي (binocular vision) و ف التالي كايحد من التݣسام (Stereopsis؛ الشوف د لغرق) من شي 30° ل 50°، ب لمقارنة معا 140° عند بنادم. هومايا عندهم شوف جاوجي اللون (dichromatic)، كيف بحال لغالبية د لبزوليات. لبݣر كايتجنبو لماكلة لمرّة، و كايختارو لماكلة لحلوة على ود لينيرجي. لحساسية نتاعتهم ل لماكلة لحامضة كاتعاونهم يخليّو واحد لPH مخيّر د بيت لمديغ. هوما كايقلّبو لماكلة لمالحة ب الدوق و الشمان باش يحافضو على لموازنة ديالتهم د لإيليكطروليتات. السميع ديالهم كايكون حسن من ديال لعوادن، و لايني كفس ف تقلاع الصوات على لماعز، و كفس كتر على السميع د لكلاب ولا لبشر. هوما يمكن ليهم يفرّزو بينات لهدرة لبنادمية لحيّة (لايڤ) ولا لمشجلة. الشمان ف لغالب كايلعب دور كبير ف حياتهم الجتيماعية، لي كايلمّح ب لحالة الجتيماعية ولا د لمكاترة. لبݣر يقدرو يعرفو وقتاش كايكونو لبݣرات لخرين مسطريسيين ب شمان لمواد لكيماويين د لالارم ف لبول ديالهم. لبݣر يقدرو يتدريساو باش يعرفو لفراد من نفس النوع ب تخدام غير الشمان و صافي.
لبݣر كايعيشو ف واحد السنسلة هرمية د لحكام (dominance hierarchy). هادشي كايتحافض ب شلا طرقان. لبݣر ديما كايدخلو ف مضاربات تمتيليين (mock fights) فين كايطيسطيو الصحوحية د بعضياتهم ب واحد الشكل ماشي عدواني. اللحيس كايتدار ب شكل لولاني من التابعين و كايتخاد من لبݣورا لحامين. الركيب (Mounting) هو واحد السلوك د التفلية كايورّيوه لعجولا من الجناس ب جوج و من التوار و شي خطرات من لبݣرات ف حالة لوداق، وخا هاكداك، هادشي ماشي واحد السلوك مربوط ب لحكام (السيطرة) و فايت تصاب ف نواع خرين. لعدوانية لمقرونة ب لحكام ماكاترافقش معا الرتبة د لفرد، بلحق مربوطة ب شكل قريب معا لبعد د الرتبة بينات لفراد. ݣرون لبݣرة كايتخدّمو ف عزيلة لملاقيين. لبݣر لي عندهم ݣرون كايجرّبو يخلّيو مسافات كبر بينات بعضياتهم و عندهم مفاعلات كسديين قل من لبݣر بلا ݣرون، هادشي لي كايودّي ل روابط جتيماعيين تابتين. عند لعجول، السلوك لمعكس كايولي قل ف التردد معا الزيادة د تيساع السكنة، بلحق ماشي منين كايتبدل لقد د لݣروپ، ف لوقيتة لي لبالغين، لعدد د لملاقيات لعنيفين كايتزاد معا الزيادة ف لقد د لݣروپ.
لعلاقات ديال لحكام عند بݣر التيرات لعاليين النص بريين كايكونو ملامّين ب زايد، ب صراعات عدوانيين باينين قل: لغالبية ديال لمناقشات كايتفكّو ب السلوك لمعكس (Agonistic؛ ماشي عدواني، تنافسي) بلا كونكاكط كسدي بينات لمضادين، هادشي لي كايقلل الريسك د لعطيب. لحالة د لحكام كاتعوّل على لعمر و الجنس، و لحيوانات لي كبر ف لعمر كايكونو ف لعادة حاكمين على الصغر و الدكور حاكمين على النتوات. لعجولا الدكور كايكسبو حالة د حكام مفوّقة على لبݣر لبالغ منين كايقفلو جوايه عاماين ف عمرهم.
لبݣر كاياكلو ريجيم مخلط، و لكن كايخيرو ياكلو 70٪ النفلة (Clover) و 30٪ الربيع. هاد لميول عندو واحد النمط نهاري، ب ميول جهد ل النفلة ف الصباح، و النسبة ديال الربيع كاتبدا تزاد ماحد كايقرّبو ل لمسا. منين كايكونو يعلفو، لبݣر كاينوّعو شلا جوانب من عضتهم، متلاً حركات اللسان و لفك، على حساب خصايل النبتة لي كاياكلوها. مساحة لعضة كاتنقص معا لكتافة د النبتة و لايني كاتزاد معا الطول ديالها. لمساحة د لعضة كاتحدد ب التشطيبة د اللسان؛ ف واحد الدراسة حضات توار تقلهم 750 كيلوݣرام، مساحة لعضة وصلات ل ماكسيموم د 170 سم² تقريباً. غرق لعضة تزاد معا طول النبتة. ب لمريݣلة د سلوكهم، ب مساحة/كتلة مكافية، لبݣر كسبو عضات تقل ف لمروج د النبات الطويل و لمفرق ب لمقارنة معا لمروج لقصار و لكتيفين. لبݣر كايريݣلو جوانب خرين من سلوكهم د لعليف ب شكل مربوط ب لماكلة لموجودة؛ زربة لعليف كاتنقص و معدال لماكلة لمكونصومية كايتزاد ف لبلايص ديال لعلف لكتير و الصالح ل لماكلة. لبݣر كايتجنبو لعليف ف لبلايص لمقيوصين ب لخرا د لبݣر لاخر كتر ب زايد من لي كايتجنبو لبلايص لمقيوصين ب لحوالا، و لايني ماكايتجنبوش التنبيتات لمقيوصين ب لخرا د لقنيّات.
عند لبݣر، لمجاج ولا الطبيعة السلوكية يمكن ليهم يأترو على لمنتوجية، الصحة ب شكل عام، و عل لمكاترة. فايتين تقتارحو خمسة ديال لكاطيݣوريات الساسيين على مزيّات لمجاج: لحشمة–الزعامة، لفضول (حب الستيكشاف)–التجناب، النشاط، لعدوانية، و الجتيماعية. كاينين شلا موشرات على الشعور عند لبݣر. لبݣرات لعزبات د لهولسطاين–لفريزيين لي وصلو ل تحسانات واضحين ف واحد التجربة تعليمية، كانو عندهم معدالات د تردد لقلب زيْد، هادشي لي كايلمّح ل واحد الستيجابة شعورية ل التعلم ديالهم. من بعد لفراق على مواتهم، عجول لهولسطاين ستاجبو، هادشي لي كايلمّح ل واحد لݣانة هابطة. ب شكل مشابه، من مورا تزوال لݣرون ب لكاوية د لحديد، لعجول ستاجبو ل لوجع د مور لعملية. وضعية لودنين تخدّمات ب صيفتها موشر على لحالة الشعورية. لبݣر يقدرو يعيقو منين لبݣر لاخر كايكونو مسطريسيين على طريق لمواد لكيماويين لي ف بولهم. لبݣر كايكون عندهم ميلان جتيماعي (gregarious)، و حتى لعزلة قصيرة لمدى كاتسبب سطريس نفسي. منين لبݣرات لعزبات كايتعزلو، الصوات، معدال لقلب و لكورتيزول پلازما كاملين بيهم كايتزادو. منين كايرجع لكونطاكط الشوفي، الصوات كاينقصو ب الزربة؛ معدال زربة لقلب كاتنقص زرب كتر يلا لبݣرة الراجعة مولّفة ب لفرد لي تتعزل ف لفايت. لمرايات فايتين تخدّمو باش يقللو السطريس عند لبݣر لمعزول.
متوسط وقت النعاس عند شي بݣرة مربية كايكون ف جوايه 4 سوايع ف ليوم. لبݣر كايملكو واحد لاپاراي د الرصيان (stay apparatus)، بلحق ماكاينعسوش واقفين؛ كايتشبحو ف لرض باش ينعسو مزيان.
ف 2009، لمؤسسات لوطنيين ديال الصحة و وزارة الزراعة لميريكانية علمو بلي شكلو لخريطة لكاملة د الجينوم لبݣري. لبݣر عندهم شي 22,000 جين، 80٪ منهم مشروكين معا بنادم؛ عندهم شي 1000 جين لي كايشركوه معا لكلاب لقوارض، و لايني ماكايشركوهش معا بنادم. ب تخدام هاد "لخريطة الصبغاوية" لبݣرية، كايمكن ل لباحتين يتتبعو بينات السلالات التبدالات لي كايأترو على لغلة د اللحم و لحليب. لباحتين اللوالا ركزو على التنسيلات الجينيين د سالالة هيرفورد؛ واحد الدراسة عريضة زادت صايبات خريطة د 4.2٪ من الجينوم د لبݣر.
لمزيّات السلوكيين ديال لبݣر يقدرو يتورتو بحال شي مزيّات إنتاجيين، و ديما ب جوج بيهم كايقدرو يكونو مرتابطين. قابلية لوراتة (heritability) د لمجاج (الستيجابة على لعزلة وقيت التكلاف) تحسبات كا 0.36 و 0.46 على قبل التولاف (habituation) ب التكلاف. التقييمات د لمروج لواسعين ورّاو بلي قابلية لوراتة د لعدوانية عند لبݣر ف جوايه 0.36.
لمواضع الصبغاويين د لمزيّة لكمية (Quantitative trait loci) تصابو ف واحد لمادى من لخصايل السلوكيين و لينتاجيين ف لبݣر د لحليب و ديال اللحم.
لبݣر لعبو دور ساروت ف التاريخ لبنادمي، تضوميستيكاو علاقل من لعمر لحجري الجديد (Neolithic). لمعطيات الجينيين و لأركيوزولوجيين (Archaeozoological؛ أتارو-حيوانيين) كايلمّحو بلي لبݣر ترباو (تضوميستيكاو) ل لمرّة اللولانية من لأوروخصات لبرّيين (aurochs؛ Bos primigenius) تقريباً 10,500 عام هادي. كانو جوج بلايص كبار ديال الضوميستيكاسيو: وحدة ف لأناضول لوسطاني، الشرق لقريب، و غرب إيران، لي طلّعو لينا النسل ديال لپݣر التوري (taurine)، و الجاوجة ف لبلايص لي دابايا كايتعتابرو ف پاكيستان، لي خرّجو لينا النسل لهندي (indicine؛ الزيبو). التنويعة لعصرية د لاديئين لميطوكوندري كاتلمّح بلي النسل ديال لپݣر التوري يقدرو يكونو طلعو غير من 80 أوروخص و صافي لي تدريساو ف لقنات لفوقانيين ديال بلاد الرافدين حدا لڤيلاجات د شايونو طيپيسي (Çayönü Tepesi)، لي دابايا ف جنوب شرق تركيا، و جعدة لمغارة، لي دابايا ف شمال سوريا.
وخا لبݣر لأوروپي ب شكل كبير معرّش من نسل لبݣر التوري، التدفاق الجيني من لبݣر لإفريقي (طرف منهم جاي من النسل لهندي) ساهم ف مركبات جينوميين ساسيين ل السلالات الجنوب أوروپيين و خلفتهم لي ف لعالم الجديد. واحد الدراسة على 134 سلالة ورّات بلي لبݣرات التوريين لعصريين تأصّلو من إفريقيا، آسيا، أمريكا الشمالية و الجنوبية، أوسطراليا، و أوروپا. شي باحتين قتارحو بلي لپݣرات التوريين لأوروپيين تعرّشو من واحد الضوميستيكاسيو تالتة مستاقلة من لأوروخصات الشمال إفريقيين. يا كانو جوج ولا تلاتة د ضوميستيكاسيوات، لبݣر لأوروپي، لإفريقي، و لأسياوي كايشركو بزاف من الجينومات نتاوعهم، من السلف ديالهم لي من نفس النوع و من الرحلات لمعاودين د لكسيبة و د لمادة الجينية بينات النواع، كيف ما باين ف الدياݣرام.
لبݣر تعرفو ف لأصل ب صيفتهم تلاتة ديال النواع مفارقين: بوص طاوروس (Bos taurus)، لبݣر لأوروپي ولا "التوري" (كايشكل شكال مشابهين من إفريقيا و آسيا)؛ بوص إنديكوس (Bos indicus)، لبݣر لهندي ولا "الزيبو"، و بوص پريميجينوس (Bos primigenius) لمنقارض، لأوروخصات. لأوروخصات سلفيين ل بݣر الزيبو و لبݣر التوري ب جوج. ف اللاحق تعاود تكلاصاو ب صيفتهم نوع واحد، بوص طاوروس، ب لأوروخص (B. t. primigenius)، الزيبو (B. t. indicus)، و لبݣر التوري (B. t. taurus) كا نويّعات. غير هو، هاد الطاكسونوميا منوضة اللغيط، و السلطات بحال لمجتمع لأمريكي ديال عولاما لبزوليات كايتعاملو معا هاد الطاكسونات ب صيفتهم نواع مفارقين.
لي زاد صعّب هادشي هو قدرة لبݣرة على باش يتجاوجو (interbreed) معا نواع خرين قرابين ليهم. كاينين أفراد مهجنين (Hybrid) و حتى شي سلالات مهجنين، ماشي غير بينات لبݣر التوري و الزيبو (كيف ما بݣر الصانݣا، (Bos taurus africanus x Bos indicus)، و لايني حتى بينات شي حد من هادو ولا ب جوج و شي أعضاء خرين من ݣنس لبݣرة – بحال لياك، لبانطينݣ، و لݣاور. لمهجنين بحال سلالة لبݣموس (beefalo) يمكن ليها ݣاع توقع بينات لبݣر التوري و أي نوع من لبيزون (Bison)، هادشي لي خلّا شي كتاتبيا يعتابرو اللخر طرف من ݣنس لبݣرة، حتى هو. أصل التهجينة د شي شكال يقدر مايكونش باين – متلاً، الطيسط الجيني على سلالة لولو (Lulu) لقزمة، الشكل لفرّادي ديال لبݣر التوري ف نيپال، تصابو بلي هوما تخليطة بينات لبݣرات التوريين، الزيبو، و لياك.
لأوروخصات ف لأصل كان عندهم مادى على طول أوروپا، شمال إفريقيا، و بزاف من آسيا. ف الزمانات التاريخيين، لمادى ديالو ولا محصور ف أوروپا، و لفرد اللخراني لمعروف مات ف مازوڤيا، پولونيا، جوايه 1627. لكسّابا فايتين جرّبو يعاودو يصايبو سيفة مشابه معا لي عند لأوروخصات ب تكرويز الشكال التقليديين من لبݣر لمربّي، هادشي لي خرّج سلالة هيك (Heck).
واحد لݣروپ ديال لپݣر توري الشكل موجود ف إفريقيا؛ هاد لݣروپ كايمتل يا واحد لواقعة ديال ضوميستيكاسيو مستاقلة ولا لحاصول د بݣر توري مكروْز تضوميستيكا ف شي بلاصة معا لأوروخصات اللوكال، بلحق هومايا مفرّزين جينياً؛ شي كتاتبيا حطوهم كا نويّعات مفارقين، لبݣر التوري لإفريقي (Bos taurus africanus). السلالات لفرّاديين ديال بݣر توري حر لي باقيين مازال هوما سلالة النضاما (N'Dama)، سلالة كوري (Kuri) و شي تنويعات من لبݣر لغرب إفريقي قصير لݣرون (West African Shorthorn).
لبݣر لوحشي (Feral) هوما هادوك لي خلّاوهم لبشر يمشيو ل لبرية. النسمات لوحشيين موجودين ف شلا قنات ف الدنيا، شي مرّات ف لݣزاير الصغار. شي وحدين، كيف ما بݣرة ݣزيرة أمسطيردام (Amsterdam Island cattle)، بݣرة تشيلينݣام (Chillingham cattle)، و لبݣرة لأليوطية لوحشية (Aleutian wild cattle)، ولّاو مفرّزين ب شكل كافي باش يتوصفو كا سلالات.
مقالة متعمقة: تاكسابت
لبݣر كايترباو دايماً ب السماح ليهم يرعاو على الربيع ف التيرات لكبار ديال لمروج لواسعين. تربية لبݣر ب شكل واسع على هاد الشكل كايسمح ب التخدام د أرض ݣاعما صالحة ل زريع لغلّة. أكتر لمفاعلات الشايعين معا لبݣر كايشملو التعلاف ليومي، التنقية و التحلاب. شلا تخدامات روتينيين د التاكسابت كايجمعو الطاݣ د لودن، تحياد لݣرون، التنقال، لإجراءات الطبيين، لإمنا الصطيناعي، الجليب و التهلية ف لحوافر، و حتى الدريساج على قبل لمعارض لفلاحيين و التحضيرات. ف قنات لعالم، التاكسابت د شعب لفولاني كاتعوّل على تقنيات سلوكيين، ف لوقيتة لي ف أوروپا، لبݣر كايتكونطرولاو ب شكل لولاني ب وسايل ملموسين، كيف ما السيّاجات. لكسّابا كايخدّمو التاكسابت باش يقللو لمحسوسية ديال السل ب لمجاوجة ب لعزيلة و ب لمحافضة على صحة لقطيع باش يتجنبو لمرضات لمزامنين.
ف ميريكان، شلا بݣرات كايترباو ب شكل شديد، كايخلّيوهم ف أوپيراسيوات مركزين ديال التعلاف، معنيتو بلي كاين 700 بݣرة حليبية ناضجة علاقل ولا كاين 1000 بݣرة خرى علاقل ف الروا ولا محبوسين ف واحد التيرة د لعلف (feedlot) ل "45 يوم ولا كتر ف وقيتة د 12 الشهر".
لبݣر عندهم أكبر بيوماص (biomass؛ كتلة بيولوجية) من بينات أي نوع بهيمي ف لرض، علاين 400 مليون طون، متبوعين ب شكل قريب ب لكريل لأنطاركتيكي (Antarctic krill) ب 379 مليون طون و لبشر ب 373 مليون طون. ف 2023، لبلدان ب أكتر نوامر د لبݣر كانو لهند ب 307.5 مليون راس (32٪ ف الطوطال)، متبوعين ب لبرازيل ب 194.4 مليون راس، و الشينوا ب 101.5 مليون راس، من طوطال ديال 942.6 مليون راس ف لعالم.
لبݣر كايتخلاو ف لفيرمات باش ينتجو اللحم، لحليب، و الجلد، و شي خطرات كايتخدّمو ف جرّان لكرارس ولا التويشيات د لفلاحة.
اللحم د لبݣر كايسميوه لبݣري، و داك ديال لعجل كايعيّطو ليه لحم لعجل (veal). طراف خرين د لكسدة كايتخدّمو كا منتوجات د لماكلة، بحال لكبدة، لكلاوي، لقلب، الديّالة و الدم. 300 بݣرة تقريباً، ب لحساب د لبݣر لي كايخرّج لحليب، كايتݣزرو (ولا كايتدبحو) كل عام على قبل لحمهم. جوايه الربع من اللحوم د لعالم جاي من لحم لبݣر. ف 2021 لإنتاج لعالمي د لبݣري كان 72.3 مليون طون.
شي سلالات فلانيين من لبݣر، بحال لهولسطاين، كايتخدّمو على قبل تخراج لحليب، لي بزاف منو كايتعالج ل منتوجات حليبيين بحال الزبدة، الجبن، و الرايب (ياغورت). لبݣر د لحليب ف لعادة كايخلّيوهم ف فيرمات مختصين ف لمواد لحليبيين مديزاينين على قبل إنتاج لحليب. لغالبية ديال لبݣر كايتحلبو جوج خطرات ف النهار، و من بعد لحليب كايتعالج ف شي وزين د لحليب، لي يقدر يكون ف نفس لبلاصة ولا يقدر يتنقل ل شي مرفق خر باش ف اللخر يتباع كا منتوج حليبي.
الرضاعة كاتحفّز عند لبݣرات لعزبات و لبݣرات لمعݣّرات (spayed) ب تخليطة ديال التحفازات لكسديين و النفسيين، ب الضروݣات، ولا ب تخليطة ديال هاد لميطودات. باش يقدرو لبݣرات لمّاوات يكّملو إنتاج لحليب، كايولدو عجل واحد ف لعام. يلا لعجل كان دكر، ب شكل عام كايتدبح ف عمر صغير باش ينتج لحم لعجل. لبݣرات كايخرّجو لحليب حتى كاتبقى ل لولادة تلاتة ديال السيمانات. ف لخمسين عام لفايتة، تربية لبݣرات لحليبيين ولات مشددة كتر باش يزيد لمردود د لحليب لمنتوج من كل بݣرة. سلالة لهولسطاين ديال لبݣرات لحليبيين هي أكتر سلالة شايعة ف لمملاكة لمتاحدة، أوروپا و لولايات لمتاحدة. تجاوجو ب شكل تعازيلي باش يخرّجو مردود د لحليب زيْد من أي سلالة د لبݣر. ف لمملاكة لمتاحدة، متوسط مردود لحليب د لبݣرة لوحدة ف جوايه 22 ليطر ف ليوم.
مشتقات لحليب هي واحد الصناعة كاين ف ݣاع الدنيا. ف 2023، بلدان التيحاد لأوروپي نتجو 143 مليون طون د حليب لبݣرة؛ ميريكان 104.1 مليون طون؛ و لهند 99.5 مليون طون. زيد لهند نتجات 94.4 مليون طون من حليب لݣاموس، هادشي لي خلّاها لمنتج لكبر ف لعالم ف عام 2023؛ الصناعة ديالتها ديال مشتقات لحليب كاتخدّم شي 80 مليون د الناس.
التوار لمخصيين (Oxen) هوما بݣر كايتدريساو باش يولّيو حيوانات د الشغل (draft animals). التوار لمخصيين كايمكن ليهم يجرّو حمولات تقل و ل وقت طؤل على لعوادن. التوار لمخصيين كايتخدّمو ف ݣاع الدنيا، ب لخصوص ف لبلدان الناميين. كاين شي 11 لمليون تور مخصي ف إفريقيا جنوب الصحرا، أما لهند ف 1998 كان عندها كتر من 65 مليون تور مخصي، ف لبدو د لقرن ال21، جوايه النص من لإنتاج لعالمي د لغلّات لفلاحيين عوّلو على التوجاد د لرض من لحيوانات لخدّاما.
لبݣر ݣاعما كايترباو دايماً على قبل لهياضر (hides)، و كايكونو ف ف لعادة واحد لمنتوج تانوي ف لإنتاج د اللحم لبݣري. لهياضر كايتخدّمو ب شكل ساسي على قبل لمنتوجات د الجلد بحال الصبابط. ف 2012، لهند كانت أكبر منتج د لهياضر ف لعالم. هياضر لبݣر كايصايبو جوايه 65٪ من لإنتاج لعالمي ديال لهيضورات.
لبݣر كايكونو معرّضين ل لآفات بحال لپارازيطات من مفصليات الرجلين كيف ما لݣراد (لي ب دورها تقدر تدوّز مرضات سبابهم باكتيريات و حيوانات لولانيين)، و مرضات سبابهم مرّاضات (pathogens) بحال لباكتيريا و لڤيروسات. شي مرضات ڤيروسيين كايتفرّقو من لبخوش—متلاً، مرض زرقة اللسان (bluetongue disease) كايتفرّق من شنيولات. الجربة الصدفية (Psoroptic mange) هي واحد لحالة مرضية كاتخلخل وضيفة الجلدة سبابها لݣراد. السل لبݣري (Bovine tuberculosis) سبابو واحد لباكتيرية كاينة ف لبشر و لحيوانات لبريين بحال لأيل و لغريرات. مرضة السخانة لقلاعية (Foot-and-mouth disease) كاتجي ب واحد لڤيروس، و كاتقيص واحد لمادى د لكسيبة لحافرية و كاتكون كاتعادي ب زايد. ختيلال لمخ لبݣري سفنجي الشكل (Bovine spongiform encephalopathy؛ ولا تسطية لبݣر) هو واحد لمرض كايسبب التدهوير لعصبي كايتفرّق من واحد لپريون (prion)، لي هو پروتين مخي مطوي ب شكل غالط، ف شي لحم ملوّت. من بينات لپارازيطات لمصرانيين د لبݣر كاين الدودات لمتقبات من ݣنس مشابهة لفم (Paramphistomum)، لي كاقيص بيت لمديغ، و الدود لخطافي ف لمصران الرقيق.
التبدال د لمناخ متوقّع منو يفاقم ف السطريس د لحر عند لبݣر (heat stress)، و لوقات طوْل. لبݣر لمسطريسيين حرارياّ يقدر يجرّبو هديم مكسيري ديال النسيج لمشحم من لكبدة، هادشي لي كايسبب التاليپيديت (lipidosis). لبݣر كاياكلو قليل منين كايكونو مسطريسيين حرارياً، هادشي لي كايسبب ل التاحماضيت د بيت لمديغ (ruminal acidosis)، لي يمكن ليها تودّي ل مرض لتيهاب الصفايح (laminitis). لبݣر يمكن ليهم يجرّبو يتعاملو معا درجات لحرارة الزيْد ب التنفاس كتر؛ هادشي دغيا كايقلل تركيزات ديوكسيد لكاربون على حساب الزيادة ف الPH، هادشي لي كايسبب ل لقلا التنفسي (respiratory alkalosis). باش يتعاملو معا هادشي، لبݣر كايتشرط عليهم يصرّفو لبيكاربونات على طريق التبوال، على حساب لموازنة د بيت لمديغ. هاد لحالات لمرضيين ب جوج يقدرو يسببو لعروجية (lameness). واحد الريسك محدد خر هو لتيهاب لبزولة (mastitis). هاد اللتيهاب كايكفاس ف لوقيتة لي نوامر الدبان لمنشوش من ݣنس حمالة الزين (Calliphora) كايتزادو معا لحتيرار لمكمّل، هادشي لي كايفرّق لباكتيريات لي كايسببو هاد اللتيهاب. لݣراد حتى هوما كايتزادو ب شكل محتامل ف الزونات لمعتادلين ف لوقيتة لي الجو كايدفا، هادشي لي كايزيد الريسك د لمرضات لمنقولين من لݣراد. لإنتاج د لبݣري و د لحليب ب جوج بيهم كايتتوقعو غاينقصو ب سباب تبدال لمناخ.
صحة لبݣر هي واحد لقضية بيطرية (على قبل صحة لحيوان و لمنتوجية)، قضية ديال الصحة لعامة (باش يتحد ف ديعان لمرض)، و قضية ديال سلامة لماكلة (باش يتضمن بلي منتوجات لحليب و اللحم سالمين على قبل لماكلة). هاد التقلاقات كايتعكسو ف التعديلات د الزراعة. هاد لمساطر يمكن ليهم يوليو غراضات ف السياسة، كيف بحال ف 2011 منين تقتارح ف لمملاكة لمتاحدة بلي لحليب الجاي من لبݣر لمعدي ب السل خصو يتسمح ليه باش يدخل ف سنسلة لماكلة. مرض لبݣر جدب النتيباه ف عوام 1980 و 1990 منين ختيلال لمخ لبݣري سفنجي الشكل (مرض تسطية لبݣر) داع ف لمملاكة لمتاحدة. خ.م.ب.س.ش يمكن ليه يدوز ل بنادم بحال لمرض لقتال، مرض ياكوب–كغويتسفيلت لمغيّر (variant Creutzfeldt–Jakob).
النبيّت لمصراني (gut flora؛ لميكروبيوم لمصراني) ديال لبݣر كايطلق لميتان (methane)، لي هو ݣاز مجهد كايعاون ف لحتيباس لحراري، ب صيفتو منتوج تانوي ديال التخمار لمصراني (enteric fermentation)، ب كل بݣرة كاتݣرّع 100 كݣ د لميتان ف لعام. لميتان الشايط كايتنتج ب التخمار اللاؤكسيجيني (anaerobic fermentation) ديال لخرا لمخزّن. منضمة لماكلة و الزراعة (Fao) قدّرات ف 2015 بلي جوايه 7٪ من نبيعاتات لݣاز لعالميين د بيت لغرس (greenhouse؛ حتيباس حراري) كانو ب سباب لبݣر، و لايني هادشي ماميقنش منو. تخفاف نبيعاتات لميتان ب الزربة كايعاون ف لحدان ديال التبدال لمناخي.
لعمليات لمركزين د تعلاف لحيوان ب الضبط كاينتجو كميات ساسيين ديال لما الشايط و لخرا، لي يقدرو يسببو ضرار بيئيين بحال تعرية التراب، تعراض بنادم ولا لحيوان ل لمواد لكيماويين السامين، تحسان الزكير ديال لباكتيريات لأونتي بيوتيين و واحد الزيادة ف التلوات ب ش. كولي.
ف شلا قنات ف الدنيا، السريح فوق لحد (overgrazing) من لبݣر هبّط من التنواع لبيولوجي ديال النبات لي كايترعا و ديال لحيوانات ف نيڤوات مبدلين د لماكلة ف السيستيم لإيكولوجي. واحد لعاقبة موتقة مزيان على السريح لفوق لقياس هو الزحيف ديال النبات لخشبي (woody plant encroachment) ف لمروج، لي معا لوقت كايهبّط ب شكل شديد من الطاقة الستيعابية ديال لرض.
التاكسابت نتاع لبݣر كاتشمل ممارسات الرشيم، التخصية، تحياد لݣرون، تطݣاݣ لودنين (حطان الطاݣ)، تركاب لحلاقي د النيف، التكتاف، التقزاب، التخدام د ݣاريطات لعجول، و التكاكات د لبݣر (كوّايات)، هاد لممارسات نوّضو تقلاقات على الصحة د لبݣر.
لكتافة ديال لخزينة هو لعدد ديال لحيوانات وسط شي بلاصة فلانية. لكتافة د لخزينة الزايدة تقدر تأتر على صحة، التهلية، لمنتوجية، و سلوك لماكلة د لبݣرة. لبݣرات لي خزينتهم كتيفة كاياكلو ب شكل زرب و كايتكاو بكري، هادشي لي كايزيد الريسك ديال تعفان الضرع، لتيهاب لبزولة، و خسران الجنين. تأتيرات السطريس و الصحة السلبية كايجيو ب لكتافة الطالعة د لخزينة بحال ف لعمليات لمركزين د تعلاف لحيوان ولا تيرات لعلف، سواق الدلالة، و الطرونسپور يقدر يكونو كايضرّو الصحة ديال لبݣر.
باش يتنتج لحليب، لغالبية ديال لعجول كايتفرْقو على ماواتهم من مور الزيادة ب شوية و كايتشربو بدايل د لحليب باش حليب لم يبقى على قبل لكونصوماسيو د بنادم. لبݣرات لحليبيين كايوقع ليهم لإمنا الصطيناعي ب شكل معاود. لمناصرين د صحة لحيوان كايكونو حاسمين ف هاد لممارسة، حيت كايدكرو بلي هاد لفراق كايهرّس الرابطة الطبيعة بينات لم و لعجل ديالها. الصحة ديال لعجول اللحميين (لي كايترباو على قبل اللحم حتى هي نوضات واحد التقلاق.
جوج رياضات كايجمو لبݣر كايتشافو قاسيين من لݣروپات د صحة لحيوان؛ لي هوما الروضيو (rodeos) و لمضاربة معا التور (bullfighting). بحال هاد لݣروپات كايعارضو لأنشطة د الروضيو بحال ركيب التور، تكبال لعجول و تكبال التوار لمخصيين (شدانهم ب لحبل)، و كايقولو بلي الروضيوات ݣاعما مشروطين و كايسببو السطريس، لعطيب، و لموت ل لبݣر. ف سبانيا، مهرجان الجري ديال التوار كايواجه معارضة ب سباب السطريس و لعطبات لي كايجيو ل التوار لوقيتة ديال لمهرجان.