بلوكتشيين

من ويكيپيديا
اذهب إلى التنقل اذهب إلى البحث
كيفاش كتخدم لبلوكتشيين

لبلوكتشييْننّڭليزية Blockchain) هيّا ليستة ديال تّسجيلات دّيجيطالية كيتسمّاو بلوكات (مفرد بلوك)، لّي كيتربطو بيناتهم ب ستيعمال لكريپطوڭرافيا. كولا بلوك فيه كريپطوهاش ديال لبلوك لّي سابقو ؤ توقات، ؤ زيد عليهم لمعلومات ديال لموعاملة. تّوقات كيتبت بلي لموعاملة طرات ف لوقت لّي لبلوك ولّا مفتوح ل لعموم. هاد لبلوكات، لّي كولا واحد منها فيه لهاش ديال لّي سبقو، كيشكلو سنسلة، لّي كولا بلوك فيها كيرونفورصي لّي سبقو. داكشي علاش لبلوكتشيين صعيب باش تتبدل لمعلومات ديالها حيت مايمنكش يتبدل بلوك بلا مايتبدلو لبلوكات لّي تابعينو.[1]

لبوكتشيين عادة كيجيريهم ريزو پيرتوپير، لّي كيتّستعمل كا كناّش موزّع. هاد رّيزو مكون من عڭدات كيتبّعو پروطوكول محدّد باش يتبادلو لمعلومات بيناتهم ؤ يڤاليديو لبلوكات.[1]

طّيكنولوجيا ديال لبلوكتشيين ختارعها شي شخص ؤلا مجموعة د لأشخاص لّي خدا ؤلا خداو لپسودو ديال ساطوشي ناكاموطو ف 2008، باش يكون كنّاش موزّع ديال لكريپطوعوملة بيتكوين. لهوية ديال ناكاموطو ل حد سّاعة مامعروفاش. وخا تّطبيق لّول ديال لبلوكتشيين كان ف لكريپطوعوملات، هاد طّيكنولوجيا صالحة ل تطبيقات كتيرة بحال لكونطرات دّكية،[2] ف لّوعاب د تّيليجو، ف لمجالات ديال طّاقة ؤ لبانكات، ؤ ف أي مجال لّي كيحتاج ل تّيقة ؤ تّحقيق د لهوية، بحال ف طّرونسپور ديال لمنتوجات بشكل أوطوماتيكي، لّي دارتو شركة ديال والمارت ف كانادا. ؤ كاينين تطبيقات موستقبالية بحال لإتبات ديال لملكية[1] ؤ لنتيخابات، وخا كاين باقي نيقاش بين لمختصين واش تّطبيق ديال لنتيخابات مومكين ؤلا لا.[3]

حيت ماكايناش سلطة مركزية لّي كتڤاليدي لهوية باش تحقق تّيقة، هاد لعملية كتكون موزّعة ف رّيزو كامل، ؤ كتخلي تّطبيق سريع ؤ فعّال، ؤ مبدئيا ماشي قابل ل لختيراق، حيت ماكاينش شي بلاصة محددة لّي لهاكر يقدر يآطاكيها. هادشي ماكيمنعش بلي كاينين طرقان باش تّهاكا بلوكتشيين، سيرتو فاش رّيزو ديالها كيكون باقي صغير، مافيهش عڭدات بزاف، بحال لهجمة ديال 51%، لّي كيسيطر فيها شي حد علا 51% ديال لعڭدات ؤلا كتر، ؤ كتولي عندو ف هاد لحالة لأغلبية ديال لأصوات ف لڤوط علا لبلوكتشيين، شّي لّي كيخلّي عندو لقدرة باش يبدلها كيفما بغا.[4]

عيون لكلام[بدل | بدل لكود]

  1. 1.0 1.1 1.2 "The great chain of being sure about things" (بنڭليزية). 31 أكتوبر 2015.
  2. "Leaderless, Blockchain-Based Venture Capital Fund Raises $100 Million, And Counting" (بنڭليزية). 15 ماي 2016.
  3. "New MIT Paper Roundly Rejects Blockchain Voting as Solution to Election Woes" (بنڭليزية). 16 نونبر 2020.
  4. "Bitcoin Spinoff Hacked in Rare '51% Attack'" (بنڭليزية). 29 ماي 2018.
Wikimedia Commons تقدر تزيد شوف بزاف د صور و معلومات ديال Blockchain ف ويكيميديا كومنز.