محمد العطاز

محمد العطاز
معلومات عامة
زيادة	1631 فاس
لموت	15 شتنبر 1667 (35/36 عام) مدريد
لجنسية	لمغريب
لحرفة	كاهن كاثوليكي و يسوعيون
لّوغات لي كيعرف	عربية، لوغات أمازيغية و طاليانية
معلومات خرى
دين	لكنيسة الرومانية لكاطوليكية

محمد العطاز لمعروف ب بالطازار مينديس دي لويولا (مزيود ف 1631 ف فاس، توفى ف ج. 15 شتنبر 1667 ف مدريد) كان أمير مغريبي سعدي لي تحوّل للدين لمسيحي لكاطوليكي، و ولّى فرايلي يسوعي و مبشّير مسيحي.

حياتو

كينحادر محمد لعطاز من فاميلة مغريبية شريفة لي كاتنتامي للسلالة السعدية. السلطان لمغريبي أحمد لمنصور الدهبي ف لغالب كان بات جدو. ف 1654، مشى باش يحج ف مكة. لعطاز و جماعتو تشدو ف لبحر من عند باطو د النصارى تابع ل بالطازار مونضولس قبل مايوصلو ل كاپ بون (ف تونس). بقى محابسي ف مالطا حتى تّطلق سراحو ف 1656 بعدما خلص لفدية. ف ديك لفترة داز من أزمة روحانية خلاتو يعتانق لمسيحية لكاطوليكية. ديك الساع ستاقر ف لقصر ديال مونضولس، و تلقّى التعميد ف 31 يوليوز 1656، و بدّل سميتو ل بالطازار دي لويولا تيمناً ب لمضايف و الداعم ديالو إڭناتيوس د لويولا. ولى كيتسارى ف لمراسي د الطاليان، باش يحاول يقنع لمحابسيا لموريين لي شدوهم لعساكريا النصارى، باش يتحوّلو من لإسلام للمسيحية.

ف 1657، بدا لعطاز التدريب ديالو باش يولي فرايلي (راهب)، ف ميسينا، صقلية. ف 27 دجنبر 1663 دخل للكهنوت، و مشى للشبونة باش يولي مبشير ف لهند الشرقية. ف جوايه 15 شتنبر 1667، توفى و هوّ ف طريقو ل مدريد.

لورت ديالو

الصحافي لمغريبي سامي لقماهري كتب عليه ف مجلة زمان: "ف لقرن 17، كانو التحولات الدينية لقسرية كتيرة من لأطراف بجوج [...] واش نقدرو نڭولو بلي محمد لعطاز ف لواقع كان غير باغي باش يخفف الظروف د لحبس ديالو ولّا يتحرر منها؟ لكاريير لكهنوتية لي تبعات التحول الديني ديال لعطاز كاتخلينا نشكّو ف هادشي. بالطازار ماشي غير مسيحي. لحالة ديالو ديال راجل دين فوق لعادة ماكانش يقدر يوصل ليها بلا واحد التفاني ديني شديد".

على حساب سامي لقماهري، "من الناحية ديال لپروپاڭاندا، مايمكنش ل شي مسيحي بارز يلقى قصة حسن من هادي. ها واحد لمير مسلم، تقي و حكيم، لي ختار باش يدعم قضية ليسوع لمسيح. التاريخ ديال هاد التحول لواعر منتاشرة ف لأداب لغربي. لكتابات ديال توارخيا، فرايليا، و حتى مسرحيات و بزاف د النواع خرين خداو لقصة ديال بالطازار. لهدف كان جعل لمير لمغريبي شخصية دينية مهمة ف زمانو. و دليل ديال الساس لمتين د الصراع د لمسيحيين ضد "لمحمديين". يلا كانو لقيّاد لكبار د لمسلمين كايعتانقو لمعتقد لمسيحي، راه الصحة ديالو مابقى فيها شك". پيضرو كالضيرون دي لا باركا كتب على لعطاز شوية مور لموت ديالو، ف 1668، يمكن حيت كان باغي يدعم محاولة التطويب ديالو (يعني يولي درجة قل من قدّيس).

بيبليوڭرافيا

• P. Duclos: article Loyola Mandes (Attazi), in Diccionario historico de la Compañia de Jesús, vol.III, Roma, IHSI, 2001, pp. 2428.
• C. García Goldáraz: Un príncipe de Fez jesuita: Sceih Muhammad Attasi, en religión P. Baltasar Diego Loyola de Mandes (1631-1667). Estudio sobre su ascendencia regia, in Miscelánea Comillas, vol.2 (1944), pp. 487–541.
• L. Lebessou: La seconde vie d'un sultan du Maroc, in Étvdes, vol.123 (1910), pp. 488–498.
• E. Colombo, A Muslim Turned Jesuit: Baldassarre Loyola Mandes (1631-1667), in Journal of Early Modern History 17 (2013): 479–504.
• E. Colombo, Baldassarre Loyola de Mandes (1631-1667), Prince de Fez and Jésuite, in Les Musulmans dans l’histoire de l’Europe, tome 1: Une intégration invisible, eds. Bernard Vincent and Jocelyne Dakhlia (Paris: Albin Michel, 2011), 159–193.
• E. Colombo, Infidels at Home. Jesuits and Muslim Slaves in Seventeenth-Century Naples and Spain, in Journal of Jesuit Studies 1 (2014): 192–211.
• E. Colombo, Telling the Untellable. Geography of Conversion of a Muslim Jesuit, in Space and Conversion: A Global Approach eds. Wietse De Boer, Aliocha Maldavsky, and Giuseppe Marcocci (Leiden: Brill, 2014), 285-307 [with R. Sacconaghi].