نو (مسرح)
| لمقال مقطوع من شجرة، ما كايدي ليه تا شي مقال أخر، زيد ليان ديالو ف مقالات خرين. |
النُّو (ب جّاپونية: 能) هو واحد الفن ديال المسرح الجّاپوني، اللي كيرجع ل ربعطاش قرن.[1][2][3] فهاد المسرح، كيلبسو الممتلين الماصكات، وكيتكلمو كاملين بنفس النبرة فالصوت، وكيرافقهم فرقة موسيقية فيها آلات تقليدية. الخشبة ديال المسرح كتكون فالهوا الطلق، والسقف ديالها كيتسند على ربعة ديال الركايز ديال الخشب. هاد الفن عندو واحد السحر خاص، والماصكات والشكال ديالها المختالفين كترمز للشخصية ديال اللي لابسها.
بدات تتبان العلامات اللولى ديال هاد المسرح من القرن 13، ومن بعد تزاد «مسرح نو» ملي تخلطات جوج تقاليد قديمة جّاپونيين: هما الـ«كاغورا»، اللي هو فن مسرحي بالإشارات وكيتدار بالشطيح، و«الحوليات» اللي كانت كتنظم فشكل ديال أشعار وكايقراوها الرهبان البوديين اللي كيدورو من بلاصة لبلاصة.
الممتلين كيلبسو ماصكات خاصة ملي كيديرو العرض، وغالبا كتدار فمناسبات خاصة، وخصوصا فشي مزارات ديال الديانة الشينطوية المخصصة لعبادة الكامي. الشوݣون ولا كبار الزعما الإقطاعيين (اللي كيتسماو «دائي-ميو») كانو كيرعاو بعض الفرق المسرحية، وهاد الفن كيتوارثوه الممتلين من جيل لجيل.
مسرح «نو» تطور وخدا بزاف ديال الشكال، سوا عند الناس اللي لاباس عليهم ولا عند الدراوش. وكان هو الساس اللي خرجت منو مسارح خرى، بحال «كابوكي».
وملي جا «زي-آمي»، دار القوانين ديال هاد المسرح، وتجمعو الكتوبا ديال هاد النوع ديال المسرح والعروض ديالو، وآخر مسرحية معروفة ديال هاد النوع كترجع للقرن 16.
مدة العرض كتكون ما بين نص ساعة حتى لجوج ديال السوايع، وكيتقدمو خمسة د العروض فالنهار فاليامات المخصصة لهاد المسرح، وكل عرض كيهضر على مواضيع مختالفين.
الخشبة ديال المسرح مبنية على الستيل ديال الشينوا، وعندها شكل مستطيل، ومفتوحة من تلاتة د الجهات، ما عدا الجهة اللي فاللور، اللي كيحطو فيها لوحة مرسوم فيها شجرة ديال الأرز. كاينين ربعة ديال ركايز كيبينو جناب ديال الخشبة.
زيادة على هاد الشي، كاين واحد الكولوار صغير كيدخلو منو الممتلين باش يطلعو للخشبة، وهاد الفكرة خداوها وطوروها من بعد فمسرح الكابوكي، واللي كيتسمى حتى "طريق الزهور".
كاينين ربعة ديال النواع ديال الممتلين، وكيتقسمو الأدوار ديالهم على تمانية أدوار رئيسية:
- شيتيكاتا (Shitekata): هادو كيلعبو الدور الرئيسي فالمسرحية، واللي كيدور عليه كولشي. وكيدخلو فهاد الفئة:
- شيتي: هو البطل، واللي المسرحية كتدور عليه.
- تسوري: الشخص اللي كيرافق البطل.
- جوتاي: جوقة ديال الغنا فيه 8 ديال الناس كيغنيو مع العرض.
- كوكين: كيلعب دور الخادم.
- واكيكاتا (Wakikata): هاد الممتل كيلعب دور "واكي"، اللي هي شخصية تانوية كاتواجه "شيتي" (البطل).
- كيوغن-كاتا (Kyogenkata): هادو كيلعبو أدوار شعبية وكيديرو فقرة فكاهية كيسميوها "كيوغن" بين جوج عروض من عروض "نو" الرئيسية، باش يخففو شوية الجو ويهرسو الروتين.
- هاياشيكاتا (Hayashikata): هادو هما الموسيقيين، وكيلعبو على 4 ديال الآلات تقليدية كيرافقو بها العرض.
كل واحد من هاد النواع، كما تيبان عندو دور محدد، ولكن كيخدمو كاملين باش يعطيو العرض ديال "نو" الشكل ديالو المميز والنهائي.
مسرح «نو» كيستعمل هاد النواع بربعة ديال الممتلين اللي هدضرنا عليهم قبل، وكيعاتمد على ترات تقليدي فيه علاين 250 مسرحية. هاد المسرحيات كتقسم لستة ديال النواع على حساب المواضيع ديالها:
- النوع اللول: عروض كتهضر على لأرباب.
- النوع التاني: عروض كتحكي على المحاربين.
- النوع التالت: عروض كتدور على العيالات.
- النوع الرابع: عروض كتحكي على عيالات هبيلات.
- النوع الخامس: عروض كتهضر على الشياطين والأرواح الخايبة والشريرة.
- النوع السادس: عروض فيها عوايد ديال الشتا ومعزوفات غنائية، وهادو هما أقدم المسرحيات فـ «نو».
كل نوع عندو طابع خاص ديالو، وكيساهم فالغنى والتنوع ديال هاد الفن العريق.
مسرحية ف النو
ماصك ديال مسرح النو
خشبة المسرح ديال النو
- ↑ UNESCO - Intangible Heritage Section. "UNESCO Culture Sector - Intangible Heritage - 2003 Convention :". www.unesco.org (ب الإنجليزية). Retrieved 2025-08-23.
- ↑ Robin, William. "'Sonntag,' by Karlheinz Stockhausen, in Cologne" (ب الإنجليزية).
{{cite journal}}: Cite journal requires|journal=(معاونة) - ↑ Hori، Mariko (1994). "Aspects of Noh Theatre in Three Late O'Neill Plays". Eugene O'Neill Review. ج. 18 ع. 1/2: 143.