القنيتة الأركيولوجية الماقبلتاريخية ديال كاش كوش
| لمقال مقطوع من شجرة، ما كايدي ليه تا شي مقال أخر، زيد ليان ديالو ف مقالات خرين. |
القنيتة الأركيولوجية الماقبلتاريخية ديال كاش كوش
| ||
| ||
| معلومات عامة | ||
| نوع د لموضع | موقع أركيولوجي | |
| لبلاد | لمغريب | |
| مساحة | 5,000 | |
القنيتة الأركيولوجية الماقبلتاريخية ديال كاش كوش هي واحد الموضع د السكنة موري جا ف الشمال ديال المغريب من فوق واحد العلوة بعيد على البحر بشي 9 كيلوميطر. العلوة اللي فيها هاد القنيتة معروفة بالسمية ديال ظهر المودّن ؤ اللي العلو ديالعا شي 60 ميطرو بحال هكّاك. هاد القنيتة جات قريبة للطريق اللي كاتدّي من واد لاو ل تالامبّوط حدى دوار شرودة.
الاكتشاف ديال هاد القنت الأثري نوّض روبالة ف الضومين ديال الاركيولوجيا ؤ هرّس دوك الأفكار المغلوطين اللي كانو رايجين على منطقة تامازغا على أنها ما كانتش متحضرة حتى جاو الفينيقيين ؤ دخّلو ليها الخضارة. حيت هاد القنت الأثري تبث باللي كانت الحضارة ؤ الزراعة ف المغريب ؤ شمال إفريقيا القليلة هادي واحد 2200 عام قبل الميلاد أي هادي واحد 4000 عام أي قبل بقرون ما يجيو الفنيقيين ف ديك 800 قبل الميلاد.[1]
الحجاية ؤلا السردية التاريخية الكلاسيكية على المنطقة د تامازيغا ؤلا شمال إفريقيا كانت تقليديا كانت كاتبيّن بطريقة غالطة هاد المنطقة بحالا راها كانت "أرض خاوية" حتى جاو الفينيقيين ؤ عمّروها ف جواية ديك 800 قبل الميلاد.[1]
التبقشيش الأركيولوجي ديال الفرقة ديال الأستاد هشام بنعطية ف الموطع الأثري تاع كاش كوش كايجي باش يهرّس هاد الفكرة المغلوطة اللي كانت على هاد المنطقة ؤ يبيّن باللي قبل مايجيو الفينيقيين ل شمال إفريقيا بقرون كانت ديجا موجودة الحضارة ؤ الزراعة ؤ تجمعات بشرية متطورة.[1]
التبقشيش ؤ النبيش (التنقيب) الأركيولوجي ديال الأستاذ هشام بنعطية بين باللي هاد السيت د كاش كوش تسكن من كرف البشر على 3 ديال الفترات ؤلا المراحل اللي واصلة بيهم القدومية تال 2200 عام قبل الميلاد.[1]
(KK1: من 2200 تال 2000 ق.م) واخا داكشي اللي تلقى فيها قليل ؤ مشتّت ولكن الأدلة كاتبين باللي هاد الفترة كان فيها استعمار أولاني تاع البشر اللي تزامن مع الانتقال من البرونز للحديد ف إيبيريا[1]
من موراها كاينة واحدة التقطيعة كبيرة ف الحفريات متبوعة بالفترة الثانية (KK2: من 1300 تال 900 ق.م) ؤ اللي غاتكون فترة زاهية بزاف ف تاريخ هاد الموضع الأثري. هاد الفترة عرفات شدان لارض (استقرار) حقيقي تاع البشر ف موضع كاش كوش فين كانو كايفلحو لارض ؤ يزرعوها قبل ݣاع ما يبانو الفينيقيين بمدة طويلة ف شمال إفريقيا. فهاد الفترة كانلقاو الديور تاع الدوم المطلّس بالغيس، كانلقاو السيتيرنات محفورين ف الحجر، ؤ كانلقاو الرحاوات (الطواحن) تاع الحجر. الشي اللي كايبيّن باللي كانت عندهم فلاحة زاهية معتامدة على القمح ؤ الشعير ؤ الفول ؤ معاونينها بالكسيبة بحال الغنم ؤ الماعز ؤ البݣر.[1]
(KK3: من 800 تال 600 ق.م) كاتبيين القفوزية تاع ولاد كاش كوش ؤ شحال كانو ولاد الوقت ديالهم. فين دخّلو على الثقافة ديالهم ابداعات جاية من شرق الميديطيراني بحال الفخار المصاوب بالرويضة، الدوزان تاع الحديد ؤ شي عادات تاع المعمار. وحدة من الصروحا تاع هاد الفترة هي واحد الدار اللي خلطو فيها التقنيات المحلية تاع البني بالدوم المطلس بالغيس مع الساريات تاع الحجر اللي استلهموهم من عند الفنيقيين. هاد التخلاط بينات المحلي ؤ البراني كايبيّن شحال كانو الناس تاع هاد البلاصة منفاتحين على المحيط الحضاري ديالهم سيرتو تاع البحر الميديطيراني ولكن ف نفس الوقت محافظين على الهوية المحلية ديالهم.[1]
أول وحدين كانو طاحو على هاد الموضع الماقبلتاريخي ديال كاش كوش هي واحد الفرقة مغريبوصبليونية ف إطار واحد النبشة (تنقيبة) اللي كان مكلّف بيها محمد عبدالجليل الحجراوي ؤ فيرنانضيز ميرانضا ف التواخر ديال الثمانينات. القنيتة جرات ليها واحد التدخيلة أركيولوجي ف 1992 اللي كان الغاراض منها يحلو 4 ديال الصونداجات باش يكونفيرميو بيهم الخصايل ؤ الكرونولوجيا ديال الموضع.[2] هاد التدخيلة قدات تكونفيرمي الوجود ديال واحد حطان الرحال (استقرار تاع البشر) قديم فهاد الموضع مفطّح على التيساع تاع دشي نص هيكطار ؤ اللي لقاو فيه الآثار ديال ديور ؤلا برارك مصاوبين بالدوم المطلّس بالغيس و الوتاد ديال الخشب. ؤلقاو حتى شي حفاري ف الحجر اللي يا كانو يا كايخدّموهم باش يغرسو الوتاد يا واقيلة كانو كاتخدّمو بحال شي سيتيرنات.[3] هاد القنيتة الأركيولوجية لقاو فيها حتى شي مواعن تاع الفخار بلديين (محليين) منقوشين ؤ وحدين ؤخرين غالب الضن أنهم فينيقيين ؤ شي دوزان ؤ جالوق مصاوب من النحاس ؤلا البرونز ؤ وحدين ؤخرين مصاوبين مالحديد.[3]
الدوّار اللي لقاوه فهاد السيت الأركيولوجي كانو ساكنين فيه ناس ولاد البلاد اللي كايعيشو على الفلاحة ؤ الكسيبة ف اللخر د القرن 18 قبل الميلاد تا للبداية د القرن 6 قبل الميلاد. الكرونولوجيا ؤ القرب الجغرافي ؤ الخصايل المعمارية ؤ المديناتية ديال هاد الموضع د كاش كوش كايخليوه يكون كايشبه بزاف للموضح الأثري اللي موثّق ف البلاصة د الكاثيدرال د سبتة.[4] الحاصول اللي خرجات بيه هاديك التبقشيشة الأركيولوجية د 1992 بقاو غا تا للهنا ؤ الهيه ب ميكتهم ؤ ما خرجوش للعلن. واحد الپروحي جديد ديال التبقشيش الأركيولوجي غايتدار فهاد العوام اللي جاين باش يزيدو يكملو الخدمة ديال التبقشيش الأركيولوجي اللي تدارت ؤ مزال غادا تدار فهاد الموضع.[2]
- ^ a b c d e f g Benattia، Hamza؛ Bokbot، Youssef؛ Onrubia-Pintado، Jorge؛ Benerradi، Meryem؛ Bougariane، Bouchra؛ Bouhamidi، Bouchra؛ Carballo-Pérez، Jared؛ Echcherif-Baamrani، Othman؛ Elqably، Asmae (2025-02-17). "Rethinking late prehistoric Mediterranean Africa: architecture, farming and materiality at Kach Kouch, Morocco". Antiquity (ب نڭليزية): 1–21. doi:10.15184/aqy.2025.10. ISSN 0003-598X.
- ^ a b (Bokbot et Onrubia, 1995)
- ^ a b Y. Bokbot et al., "Subtrat autochtone et colonisation phénicienne au Maroc, Nouvelles recherches protohistoriques dans la péninsule tingitane, 1995
- ^ Villada, Ramon, Suárez, 2010