الشفارا د لبيشكليطات

الشفارا د لبيشكليطات

معلومات عامة
لعنوان لأصلي	Ladri di biciclette
نوع د لفيلم	دراما و فلم فني
تاريخ د نّشر	1948
شركة د توزيع	Ente Nazionale Industrie Cinematografiche و نتفليكس
لموساهمين
لمخرج	ڨيطوريو دي سيكا
سيناريست	Cesare Zavattini، ڨيطوريو دي سيكا، سوسو شيشي داميكو، Oreste Biancoli، Gerardo Guerrieri، Gherardo Gherardi و Adolfo Franci
مونتيج تنفيدي	ڨيطوريو دي سيكا
مودير د تّصوير	Carlo Montuori
مونتيج	ڨيطوريو دي سيكا و Giuseppe Amato
مومتيلين	لامبيرطو مادجوراني، إينزو ستايولا، Lianella Carell، Gino Saltamerenda، Elena Altieri، Carlo Jachino، Fausto Guerzoni، سرجيو ليون، Memmo Carotenuto، Nando Bruno، Checco Rissone، Umberto Spadaro و Eolo Capritti
معلومات إضافية
لجوايز	المجلس الوطني للمراجعة: الأفلام العشر الأولى جائزة المجلس الوطني للمراجعة لأفضل فيلم جائزة الأوسكار الشرفية

الشفارا د لبيشكليطات (بطّاليانية: Ladri di biciclette لادري دي بيتشيكليتي)، فيلم طالياني خرج ف 1948^[1] ولمخرج ديالو هو ڨيطوريو دي سيكا. لفيلم من نوع نيورياليست دراما، وللي كيعاود لقصة ديال واحد سيد تمخرات ليه لپيكالا للي هي باش كيصور رزقو فلعاصمة روما، وتكرفيصة لي دازت عليه باش يلقاها.

لفيلم مبازي على رواية ديال لويجي بارتوليني للي عندها نفس سمية، ولبطولة لعبها لامبيرطو مادجوراني فدور لبّات و إنزو ستايولا فدور لولد. فعام 1950 لفيلم ربح جايزة د لؤسكار ديال أحسن فيلم بلوغة برّانية، و ختارتو مجلة صورة ؤ صوت ف ستيفتا عالمي عام 1952 كأحسن فيلم ف تاريخ سينيما^[2]، ف 2012 نفس لمجلة دارت ستيفتا و جا لفيلم هو لعاشر عند المخرجين و 33 عند لكريتيك.

مجلة إمپاير (Empire) حتى هي ختارتو يكون الرّابع من بين أحسن 100 فيلم ف تاريخ سينيما ف لعالم عام 2010.^[3] كيمّا دخل ليستة ديال 100 فيلم للي خاص وزارة د تقافة طاليانية تصوڨيهم حيت غيرو دّاكِرة لجماعية ديال لبلاد.

ملخص

قتصاد ديال طاليان كلا لعصا مزيان مورا لڭيرة ديال هيتلير، ؤ بزاف ديال ناس خرجو لشوماج، منهوم بطل لفيلم أنطونيو ريكي. أنطونيو عايش فروما ؤعندو وليد صغير فعمرو 12 عام، سميتو برونو، ومرا سميتها مارية. لمهم أنطونيو سهل عليه الله ؤ دبّر فواحد لخديمة ديال تلصاق إعلانات فلحيوط، ولكن خاصّاه پيكالا باش يبدا لخدمة ؤمعندوش باش يشريها. فاش ڭالها لمرتو، مشات هزات تلامط ؤ غطيان لّي عندها ؤ باعتهم باش يشريو هاد لپيكالا ؤ يبدا أنطونيو لخدمة.

النهار اللول ديال لخدمة، كان أنطونيو خدام ما بيه ماعليه، كيلصق لإشهارات ؤ فرحان، واحد تلاتة ديال شفّارة بانت ليهم لهمزة، هما يتفرقو، صغير فيهم خلا أنطونيو حتى طلع فوڭ سلّوم هو يطير ليه بلبشكليط. أنطونيو نزل تبعو، الشفّار 2 جا وقف ڭدامو، ڭبضو من يديه وسولو ياك لاباس آشريف؟ زعما باش يعطلو ؤ يعطي فرصة لصاحبو يهرب. أنطونيو دفعو ؤ مشا كيجري باش يلحڭ على الشفّار ولكن دنيا عامرة ببنادم ؤ لبشكليطات ؤ طوبيسات ؤ طوموبيلات ...روينة. فنص طريق وقف واحد مول طوموبيل ؤ قال لأنطونيو يركب باش يقربو، هنا بان الشفّار 3، جا كيجري حتى تعلق فلباب ديال طوموبيل ؤ بدا كينعّت للشيفور كيقول ليه راهو الشفّار لهيه تبعو، بقاو تابعين هداك خونا حتى لحڭو عليه، مي فاش وصلو ليه لقاوه واحد آخر ماشي الشفّار. لموهيم هاد ولاد لحرام وضّرو أنطونيو وشمتوه.

إيوا أنطونيو زعف، قال آش ندير مندير، مشى عند لبوليس، دار شكاية ولكن لبوليسي قاليه بلي راه معند لمخزن مايدير ليه. شي ناس قالو ليه يمشي لسوق ديال پياتسا ڨيتوريو، تمّا فين كيتباع داكشي لممخور. أنطونيو هو ؤشي صحابو، ؤمعاه برونو مشاو لداك سوق ؤ بداو كيقلبو ولكن لمشكل لقاو بلي كلشي پياس ديطاشي: ڭيدونات، سناسل، فرانات، روايض... عياو مايقلبو ملقاو والو حتى وصلو عند واحد عندو كادر ديال پيكالا كيشبه لديال أنطونيو. ولكن سيد قالهم باللي هاد لكادر ماشي ديال شي بيشكليط مشفرة، قالو ليه ورينا نيميرو د سيري نتاع لكادر، مابغاش. تزايدو لهدرة، شكّو فيه، مشا أنطونيو جاب كارابينييري. كارابينييري قلّب نيميرو ؤ قال لأنطونيو بلي هاد بيكالا ماديالكش، غيب على سيد.

من "پياتسا ڨيتوريو" مشى أنطونيو وولدو برونو لسوق "پورطا پورتيزي" واخا سوق صغير ولكن حتى هو كيتباعو فيه پياسات مشفرين، بدات الشتا كتصب، تخبى أنطونيو ؤولدو برونو تحت واحد سقف حتى سحات سما، شوية بان ليهم واحد لبعلوك كيشبه لداك الشفّار كيهضر مع واحد سيد كبير فلعمر. الشفّار زاد مع طريق ؤ أنطونيو تبعو كيغوت: شدو الشفّار، شدو الشفّار! ولكن الشفّار طار! أنطونيو رجع للسوق كيقلب على داك الشويرف حتى لقاه. سولو قاليه فين نلقا داك لولد للي كنتي كتهضر معاه فسوق پورطا پورتيزي، الشارف نكر، قاليه مكنعرفوش، علاه آش بغيتي منو؟ آش دار ليك؟ جاوبو أنطونيو قاليه بغيت غير نهضر معاه على شي غرض. لموهيم شارف دار هبل تربح ؤ زاد مع طريق. أنطونيو عرف بللي خونا فكرشو لعجينة، بقا تابعو حتى دخل لواحد لكنيسة.

لكنيسة كانت عامرة بلپوبرية ؤ طلابة لِّي كيجيو نهار لحد يصليو وياكلو ويحففو (يحسنو) شعرهم ولحيتهم. أنطونيو جلس حدا شويرف لِّي كان كيصلي، وبدا كيطلب فيه يعاونو، لموهيم شويرف عطاه لادريسا فين ساكن داك الشفّار، أنطونيو خاف ليكون غير باغي يتفك منو، قاليه خاصك تمشي معايا، شويرف مبغاش، أنطونيو قاليه يا تمشي معايا يا نعيط ليك لبوليس. شويرف مابغاش يتفرش فلكنيسية قاليه ؤكي خليني غير نتغدى ونمشي معاك. أنطونيو حن فيه وخلاه يتغدى. شارف ستغل لفرصة، وهرب.

أنطونيو طلع ليه دّم مزيان، وملّي برونو قاليه علاش خليتيه يمشي ياكل، جبد معاه بتصرفيقة حتى بدا كيبكي. من بعد قال لولدو يتسناه حدى لگنطرة، ؤ هو مشا يشوف واش هاد شارف مخبي جنب لواد. بدا كيقلب، شوية هو يسمع لغوات ديال ناس، كيقولو بلّي شي واحد كيغرق فلواد. أنطونيو تخلع سحاب ليه برونو لّي غرق مشا كيجري عند جوقة ساع لقاه ماشي ولدو. ضار جيهت لگنطرة بان ليه برونو جالس تما كيتسنى فيه. هنا بحال إيلا أنطونيو حس بقيمة ولدو، ودّاه لواحد ريصطو يتغداو فيه. تهلاّ فبرونو مزيان وبدا كيخمم بلّي إيلا لقى لپيكالا حياتهم غادي تبدل، غادي يولّي ياكل ديما مزيان بحال ليوم ولكن محال واش دعاوي مارية غادي يستاجب ليهم سيدي ربي. هنا أنطونيو تفكّر الشوّافة لّي كتمشي عندها مرتو وكيخاصم عليها. واخّا هو مكيآمنش بشوّافات قال مافيها باس يحاول.

هي هديك مشا عند الشوّافة، وصلات نوبتو، وحكا ليها ماجرى ليه، هي جاوباتو قالت ليه: يا إما غادي تلقى پيكالتك بزربة، يا إما عمرك ماغادي تشوفها تاني. أنطونيو خلّصها وخرج من عندها ما هو حي ماهو ميت. قال لبرونو يالله نمشيو لپياتسا ڨيتوريو عاوتاني علله تبان شي حاجة، وهما فطريق بان ليه داك الشفّار، هو يتبعو، الشفّار دخل ل"بورديل" يتخبى، أنطونيو دق على دّار ودخل ليها صحّة، تخاراو تما ؤ لپاطرونة خرجاتهم بجوج. فزنقة أنطونيو شنق على شفّار وبداو كيتغاوتو.

هاد لبلاصة هي فين ساكن هاد الشفّار، ناس ديال لحومة تجمعو عليهم وبداو كيفارقوهم. الشفّار كيقول لولاد حومتو راه أنطونيو حگرو ؤبغى يسبّي فيه سرقة. بداو ناس كيدافعو على لولد شفّار، شي كيسب فأنطونيو، شي كيسقسيوه كيقولو ليه باش عرفتيه راه هو لّي مخر ليك لپيكالا؟ جاوبهوم بلّي شاف وجهو وعاقل عليه بلكاسكيطا لّي لابس.

برونو شاف طرح كيحماض مشى يعيط على لبوليس. شفّار بدا كيتساخف وكيقول لأنطونيو يطلق منو حيت أنطونيو كان شانق عليه مزيان، شوية هو يطيح شاد فراسو بحال إيلا غاب. تمّا ولاد لحومة جهلو على أنطونيو ؤ ضارو بيه، مي عندو زهر لبوليسي وصل قبل ما يسلخوه.

لبوليسي بدا كيسول آشنو واقع، أنطونيو عاود ليه، ولولد الشفّار مجبّد فلرض كينكر. نزلات عندو مّو حتى هي جابت ليه مخده يحط عليها راسو باش ميتردخش مع لرض. قاليها لبوليسي وريني دار باش نقلب على پيكالا ديال سيّد. طلعو لپارطما، لقاوها بيت واحد صغير منو كوزينة منو شومبر نعاس منو كلشي. أنطونيو كيشوف لحالة لّي عايشين فيها هاد ناس بقى فيه لحال. لموهيم بوليسي مالقاش لاطراص ديال شي بيشكليط، ضار عند أنطونيو وقال ليه: واش نتا متيقن بلّي هاد لبرهوش هو لي شفرك؟واش شفتي وجهو مزيان؟واش عندك شهود؟ لا. لبوليسي زاد قاليه إيوا راه هاد دري كيقولو مريض ونتا تعديتي عليه وعندو شهود، و يمكن يشارعك إيلا بغا ونتا معندكش شي دليل ليتبت عليه أنو مخر ليك لپيكالة. نزلو من لباطيما وجاو عند لولد، تما جبد لبوليسي ستيلو وورقة وسوّل أنطونيو: واش باغي تشكي بهاد لولد؟ هنا، بقى أنطونيو ساكت شوية، ؤ هو يقول ليه لا. شدّ يد ولدو برونو ؤ زاد فحالو ؤ ناس تابعينو كيعايرو فيه ؤ يتحلفو عليه.

قرّب نهار يسالي، أنطونيو فقد لأمل، ؤ عرف بلّي صافي مشات ليه لپيكالة ؤ معاها لخديمة ؤ صالير. دايز من حدا تيران د لحزب لوطني لفاشي لّي كانت لاعبة فيه آيس روما كونتر مودينا، بان ليه واحد سيد نزل من پيكالتو ؤ خلاها گدام لباب ديال واحد لباطيمة. شيطان لعب ليه بعقلو، بدا أنطونيو كيخمم واش يمخر هاد لبيشكليط ؤلا ينعل شيطان؟ تالف مابين مستقبل عائلتو وأخلاقو وتربيتو. كيشوف ناس خارجين من تيران، كيركبو فپيكالاتهم ؤ هو بلاش، جبد شي فليسات من جيبو وعطاهم لبرونو، قاليه يشد طرام لدار. برونو دار داكشي لي قاليه باه، أنطونيو قرّر باش يشفر لپيكالا.

بدا كيمشي ويجي حدا بيشكليط، حتى زعم ؤهو ينقّز عليها. ولكن مولاها خرج ؤ بدا كيغوت، قوم ديال بشر تبعوه.

برونو مشا عليه طرام، فاش كان راجع، بان ليه بّاه غادي معلّق فوق پيكالة ؤ نّاس تابعينو حتى شدوه. جا برونو مسكين كيبكي كيشوف ناس شانقين على بّاه، كيسبّو فيه، ؤ كيصرفقوه ؤ جارّينو لكوميسارية. مول لپيكالة شاف فلولد فديك لحالة هو يقول للنّاس باراكا عليه غير خلّيوه يمشي فحالو الله يسامح. طلقوه بعد ما شبعو فيه سبّان، وقالو ليه عندك زهر طحتي فهاد رّاجل ضريف.

أنطونيو بدا كيبكي، شد لولدو فيديه وشدوها كعبة لدّار. آخر لقطة فلفيلم فيها أنطونيو ؤ برونو غاديين لدّار، ساكتين، شاداهم لكاميرا من للّور حتى كيغبرو وسط زحام.