الخطة ديال الوطن الكبير

لمقال مقطوع من شجرة، ما كايدي ليه تا شي مقال أخر، زيد ليان ديالو ف مقالات خرين.

الخطة ديال الوطن الكبير كانت برنامج تدار ف الأرجنتين انطلاقا من 17 أبريل 2006 باش الحراڭا لي كاينين ف البلاد يصاوبو وراقيهم. كان الرئيس الأرجنتيني ديال ديك الساعة، نيسطور كيرشنير، هو لي دارو، وكان كاينباني على المبدأ ديال "الوطن الكبير" (Patria grande) لي الهدف ديالو أن ڭاع الدول ديال أمريكا اللاتينية تتوحد من الناحية السياسية.

كانت الخطة موجهة بالخصوص للمواطنين ديال الدول لي داخلة ف السوق المشتركة الجنوبية والدول لي مرتبطة بيها، بحال بوليڤيا، البرازيل، الشيلي، الإكواضور،الپاراڭواي، الپيرو، الأوروڭواي، و ڤينيزولا. لحد غشت 2010، كانو 423,697 مهاجر لي تسجلو ف الخطة. من هاد العدد، 248,144 كانو من الپاراڭواي، 104,984 من بوليڤيا، 47,455 من الپيرو، 10,785 من الأوروڭواي، 5,349 من الشيلي، 4,603 من البرازيل، 914 من الإكواضور و216 من ڤينيزويلا.

الشروط

باش الواحد ياخد الوراق، كان خاصو يمشي لعند السلطة المختصة ف المدينة فين ساكن ويدي معاه لاكارط، الپاسپور ولا شهادة ديال الجنسية، وجوج ديال التصاور صغار. ديك الساع كان كاياخد "الإقامة المؤقتة"، لي تقدر تخليه يبقى ف الأرجنتين، يسافر ويرجع، يقرا، و يشد رقم مؤقت ديال التسجيل ف الضمان الإجتماعي لي كايخول ليه يخدم بطريقة قانونية بيدما يشد الإقامة الدايمة.

الإنعكاس الدولي

كانت هاد الخطة هضرو عليها بواحد الطريقة مزيانة ف الوسائل ديال برا و نفس الحاجة بالنسبة للمنظمات الدولية بحال المنظمة الدولية ديال الهجرة "OIM" لي كان المدير ديالها، برونصون ماكينلي، قال بلي الخطة ديال الوطن الكبير "مثال عالمي" خاص ميريكان تحتادي بيه.