لقصر الصغير

لقصر الصغير
‫القصر الصغير‬ (ar) Leqṣer Ameẓẓyan (tzm)
لبلاصة
لبلاد	لمغريب
لإقليم	إقليم لفحص أنجرة
السكان
شحال دالسكان	17,125 (2024)
شحال دلفاميلات	3,015 (2014)
معلومات خرين
الرمز لجغرافي	6545686

لقصر صّغير مدينة مغريبية كاينة ف شّمال د لمغريب، ؤ ف تّقسيم لإداري كاتّعتابر جماعة ترابية قروية كاينة ف إقليم لفحص أنجرة، جهة طنجة تطوان الحسيمة، ساكنين فيها 17,125 واحد، على حسب لإحصاء لعام 2024.

قصر صغير

حرب ف لقصر صغير

لقصر صغير

تاريخ

ف لعصور لقديمة كانت مدينة لقصر صّغير معروفة ب سميت ليسّا Lissa ؤلا إيكسيليسّا Exilissa، لي تقدر تكون جات من لّوغة لبونيقية، ب معنى "لبوغاز ديال إيليسا". إيليسّا هيا أميرة أسطورية كانو لقرطاجيين كيعتاقدو بلي هيّا لي أسسات مدينتهوم، لي لموضع ديالها كاين ف تونس ديال دابا. أو بسبب لموقع ديالها فمضيق جبل طارق، تاريخ لقصر صغير كيرجع لقرن لأول لميلادي. ف لعهد لإسلامي، تفتحات لمدينة على يد لعرب عام 708. وف دولة لموحدية، ولّات مرسى مهمة لانطلاق لجيوش نحو لأندلس. ومن بعد سقوط دولة لمرينية، تحوّلات فـ لقرن 15 لقاعدة ديال لقراصنة.

ومع توسع لبحري لبرتغالي، تعرّضات لهجوم كبير وتحتلات من طرف أسطول فيه حوالي 220 سفينة و25 ألف جندي بقيادة ألفونس لخامس، لملقب بـ"لإفريقي"، من بعد معارك دامت يومين فـ أكتوبر عام 1458.

وفـ عام1549، سلطان سعدي محمد شيخ، أول سلطان ف دولة سعدية، سترجع مدينة فاس ووحّد لمغريب، ومن بعد طرد لبرتغاليين من بزاف ديال لمواقع ديالهم، ومن بينها لقصر صغير لّي تخلاو عليها، ومن داك ساعة نقصات الأهمية ديالها..

تعليم

• نسبة لأمية (نّاس لّي ما كايعرفوش يقراو ولا يكتبو) : 36%
• نسبة سّكان لّي قاريين فوق ليسي (ليسي و جامعة): 6,1%

قتيصاد

• نسبة نّاس نّشيطين (لّي يقدرو يخدمو): 46,6%
• نسبة لبطالة (نّاس لّي ما خدامينش و تايقلبو على خدمة): 14,7%
• نسبة نّاس لي خدامين ف دّولة (ولا لبيطاليين لي سبق ليهوم خدمو): 3,6%
• نسبة نّاس لي خدامين ف لپريڤي (ولا لبيطاليين لي سبق ليهوم خدمو):56,4%

موقع لقصر صغير

لقصر صغير كاين على ساحل لبحر لأبيض لمتوسط، وبعيد عليه بحوالي 35 كلم من طريق لّي كتربط بين طنجة وتطوان.

لمناطق لي حدا هاد لموقع، عرفات استقرار قديم راجع لفترة رومانية، ولكن لأهمية ديالو؛ بانَت أكثر ف لعصور لإسلامية. لموقع فيه بقايا ديال آتار مهمة بحال مسجد، أوحمّام، أومركز ديال تجارة، وكيرجعو لفترات ما بين لقرن 12 ولقرن 14 ميلادي. هاد لآتار كتشهد على عظمة لدولة لمرينية، وعلى دور لي كان كيلعبو لقصر صغير كقاعدة لعبور لجيوش نحو ضفة شمالية ديال لمضيق، ومركز مهم لتبادل تجاري مع مملكة غرناطة.

وفـ23 أكتوبر عام 1458، استولى لجيش لبرتغالي بقيادة ألفونس لخامس على لقصر لصغير، وسمح لمسلمين يخرجو من لمدينة مع ممتلكاتهم. ومن بعد، ستقرت فيها حامية عسكرية بقيادة دون إدوارد ذونسيس. وبهادشي، ولّات لقصر صغير ثاني مدينة ك تطيح تحت لاحتلال لبرتغالي من بعد سبتة سنة 1415، ومن بعد لمحاولة لفاشلة لاحتلال طنجة سنة 1437. وبقاو لبرتغاليين فيها حوالي 90 عام، حتى خرجو منها سنة 1550.

لفضل ف لكشف على هاد لموقع لأثري كيرجع لبعتة أمريكية بدات لحفريات سنة 1972. ولقاو فيها كنيسة مبنية فوق أنقاض مسجد، ومنازل خاصة مبنية فوق أساسات إسلامية، وزيد عليها مباني تجارية بأبواب قوية ونوافذ مزخرفة ب طراز لمانويلي. كما بيّنات لحفريات اهتمام لبرتغاليين ب ساحات لعمومية وشوارع لمرصوفة بالحجر، أو زيد عليها مطاحن أو مخازن أو أفران أومعاصر.

ودارو حتى تغييرات فشكل لمدينة لإسلامية، بحال تقوية سور دفاعي، وبناو خنادق حدا لحصن لي داروه ف لجهة شمالية شرقية، ومدعّمين بأبراج للمراقبة ودفاع. وزادو دارو ممر مغطى كيتسمى "الكوراسا" كيربط لموقع ب شاطئ، وحوّلو لحمام لإسلامي لخزان ديال سلاح، ومن بعد ولى سجن.

مصادر

ويكيميديا كومنز عندا تصاور و معلومات على لقصر الصغير.

هادي زريعة ديال مقالة خاصها تّوسع. تقدر تشارك ف لكتبة ديالها.